Lipahrok 12

KILANG wahn tuhke kan me ohl pwukat weuwa. Kilang duen laud en wahn kreip ko. Anahne ohl riemen en ini. Oh kilang wahn pik kan oh wahn pomekranet kan. Iawasa wahn tuhke kasehlel pwukat kohsang ie? Sang sahpwen Kenaan. Tamataman, Kenaan iei wasa me Apram, Aisek oh Seikop kin kousoan mahs. Ahpw pwehki lehk lel wasao, Seikop eri wahda ah peneinei kohdihla Isip. Met, mwehrin sounpahr 216, Moses kahluwa aramas kan pwurelahng sahpwen Kenaan. Irail leldohng wasakis nan sahpwtehn me adaneki Kades.

Aramas suwed me kin koukousoan nan sahpwen Kenaan. Ihme kahrehda Moses kadarala lipahrok 12, oh padahkiong irail: ‘Rapahkihda aramas depe me kousoan wasao, oh ia wen kehlail en irail. Pil tehk ma sahpwo mwahu ong mwetuwel. Oh ni omwail pwurohdo kumwail en uhdahn wahdo ekei wahn tuhke en sahpwo.’

Ni ansou me lipahrok pwukat pwurohdohng Kades, irail padahkiong Moses: ‘Sahpwo uhdahn sahpw kasehlel ehu.’ Oh kadehdehda met ni arail kasaleong Moses wahn tuhke ko. Ahpw irail 10 kisehn lipahrok ko koasoaia: ‘Aramas kan me mi wasao inenen laud oh kehlail. Kitail koaros pahn mehla ma kitail song en peiong sahpwo.’

Ni en mehn Israel kan rong ripoht wet irail eri masapwehkada. Irail inda, ‘E pahn mwahu ma kitail mehla nan Isip de nan sahpwtehn. Kitail koaros pahn mehla nan mahwin, oh atail pwoud kan oh neitail seri kan pahn poaropoardi. Kitail pilada emen kaun kapw en wiliandi Moses, oh pwurala Isip!’

Ahpw mie lipahrok riemen me liki Siohwa, oh song en kameleileidi aramas kan. Adara iei Sosua oh Kalep. Ira inda: ‘Kumwail dehr masak. Siohwa kin ieiang kitail. E pahn inenen mengei kitail en kalowehdi sahpwo.’ Ahpw aramas kan sohte men rong. Re pil men kamehla Sosua oh Kalep.

Met kahreong Siohwa engiengda kowahlap, oh e padahkiong Moses: ‘Sohte aramas sang rehn aramas pwukat me sounpahr 20 kohda pahn pidelong ong nan sahpwen Kenaan. Irail kilangehr soahngen manaman kan me I wiahda nan Isip oh nan sahpwtehn, ahpw irail sohte liki ie. Ihme irail pahn keikeiru nan sahpwtehn sounpahr 40 lao irail koaros mehla. Sosua oh Kalep kelehpw pahn pidelong ong nan sahpwen Kenaan.’