Rehap Ekihla Lipahrok Kan

OHL pwukat mi nan irair keper. Re uhdahn pahn tang, ma soh re pahn kamakamala. Ira lipahrok en mehn Israel kan, oh liho me seusewese ira iei Rehap. Rehap kin mi nan ihmwe pohn kehl en kahnihmw Seriko. Kitail pahn kilang dahme kahrehda ohl pwukat lelohng kahpwal.

Mehn Israel kan onopadahr pwen kotehla Pillap Sordan ong nan sahpwen Kenaan. Ahpw mwohn irail wia met, Sosua kadarala lipahrok riemen. E padahkiong ira: ‘Kohla oh kilang sahpwo oh kahnihmwen Seriko.’

Ni ansou me lipahrok ko kohdo nan Seriko, ira kohlahng ihmwen Rehap. Ahpw aramas men kilang ira oh padahkiong nanmwahrki en Seriko: ‘Ohl en Israel riemen kohdo wasaht pwonget pwen lipahroki sahpwet.’ Ni ah rongadahr met, nanmwahrkio eri kadarala ohl kei ong ihmwen Rehap, oh irail ahpw padahkiong liho: ‘Ohl ko me mi nan ihmwomw, kadarirahdo liki!’ Ahpw Rehap ekihlahr lipahrok ko pohn kadoken ihmweo. Liho indaiong irail: ‘Ohl kei kohdo nan ihmwei, ahpw I sehse iawasa re kohla ie. Ira samwalahr ansou me rotpene, mwohnte wanihmw en kahnihmwo ritpene. Ma kumwail pahn mwadang, kumwail kak parokirahdi!’ Ohl ko eri tangala rapahki ira.

Mwehrin irail kohieila, Rehap pitipit doudahla pohn kadoken ihmweo. ‘I ese me Siohwa pahn ketikihong kumwail sahpwet,’ e indaiong lipahrok ko. ‘Se rongehr duen Sehd Weitahta madada ni omwail pidoi sang Isip, oh duen omwail kamehla nanmwahrki kan en Saion oh Ok. I kadek ong kumwa, pwe kumwa en inouki ong ie, menlau, me kumwa pahn pil kadek ong ie. Doarehla ai pahpa oh ai nohno, oh riei pwutak kan oh serepein kan.’

Lipahrok ko eri inoukihdi me ira pahn, ahpw Rehap en wia mehkot. ‘Alehda sahl weitahta wet oh pireong ni wanihmwtok en ihmwomw,’ lipahrok ko inda, ‘oh kihpene omw peneinei koaros nan ihmwomw pwen ieiang uhk. Ah ni aht pahn pwurohdo pwen kalowehdi Seriko, se pahn kilang sahl wet sansal nan ahmw wanihmwtok oh sohte pahn kamehla me mi nan ihmwomw.’ Ni ansou me lipahrok ko pwurala rehn Sosua, ira padahkiong ih mehkoaros me wiawiehr.