Reap Kamehlele Siohwa

Nna kitail medewehla me kitail mihmi nan kahnimw en Seriko. Kahnimw wet mi nan sapwen Kenan. Aramas nan wasao sohte kin kamehlele Siohwa. Emen lih me adaneki Reap kin mihmi wasaht.

Ahnsou me Reap wia serepein pwulopwul men, e rong duwen Moses eh kahrehiong pilen nan Sehd Weitahta en kohpeseng oh kahre mehn Israel kan sang Isip. E pil rong ia duwen Siohwa eh ketin sewese irail en kana ni arail mahweniong arail imwintihti kan. Met e rong me mehn Israel kan mihmihier limwahn Seriko!

Ehu ni soutiko, mehn Israel riemen kohla nan Seriko pwehn lipoahroke mwomwen kahnimwo. Ira kohdo ni imwen Reap. E kahrehdo ira nan imweo oh mweidohng ira en mihmi. Ni pwongohte, nanmwarki en Seriko diarada me lipoahrok ko mihmi nan kahnimwo oh ira kohla ni imwen Reapo. Eri nanmwarkio kadarala ohl akan pwehn koledi lipoahrok ko. Reap ekihla lipoahrok riemeno pohn wasa patapat ehu ni koadoken imweo. E uhd ndaiong nein nanmwarkio ohl ko: ‘Lipoahrok ko kohdo ahpw ira mweselsangehr kahnimw wet. Ma kumwail pahn kohla met, kumwail pahn kak koledi ira!’ Ke ese dahme kahrehda Reap ekihla lipoahrok ko?— E wia met pwehki e kamehlele Siohwa oh e ese me Siohwa pahn ketikihong mehn Israel kan sapwen Kenan.

Mwohn lipoahrok ko kohkohlahsang imwen Reap, ira inoukihong ih me ih oh eh peneinei pahn pitila ni ahnsou me Seriko pahn ohla. Ke ese dahme ira padahkihong ih en wia?— Ira nda: ‘Ale sahl weitahta wet oh kadarehdi sang ni wenihmwtoket. Ma ke pahn wia met, koaros me mihmi nan ihmw wet pahn pitila.’ Reap wia soahng koaros me lipoahrok ko padahkihong ih. Ke ese dahme wiawi mwurin mwo?—

Rahn kei mwuri, mehn Israel kan pidakih kahnimwo ahpw sohte mweseisei. Erein rahn weneu, re pidakih kahnimwo pahn pak ehu nan rahn ehu. Ahpw ni keisuhn rahno, re pidakih kahnimwo pahn pak isuh. Oh irail uhd weriwer laudida. Siohwa ketin kahrehiong kelen kahnimwo en pwupwudi. Ahpw ihmw me sahl weitahta mweteusang ni wenihmwtoko mihmihte! Ke kak kilang met nan kilelo?— Reap oh eh peneinei pitila!

Dahme ke kak sukuhlki sang Reap?— Reap kamehlele Siohwa pwehki soahng mwahu koaros me e rong duwen ih. Ke pil kin sukuhlki soahng mwahu tohto duwen Siohwa. Ke kamehlele Siohwa duwehte Reap eh kin kamehlele ih?— Se ese me ke kamehlele ih!