Sosua Wiahla Kaun

MOSES mwahuki iang mehn Israel kan kohla nan sahpwen Kenaan. Ih eri idek: ‘Mweidong ie en kotehla Pillap Sordan, Siohwa, oh kilang sahpw mwahuo.’ Ahpw Siohwa mahsanih: ‘Itar! Dehr pwurehng kapwurehda ireo!’ Ke ese dahme kahrehda Siohwa mahsanihki met?

Pwehki mehkot me wiawi ni en Moses wetih takaio. Tamataman, ih oh Aaron sohte wahuneki Siohwa. Ira sohte padahkiong aramas kan me Siohwa me pahn kahrehdo pihlo sang nan takaio. Ong kahrepe wet Siohwa mahsanih me ira sohte pahn pidelong ong nan sahpwen Kenaan.

Ihme mwehrin Aaron mehla sounpwong kei, Siohwa padahkiong Moses: ‘Alehda Sosua, oh kohieila kesihnenda mwohn samworo Eliasar oh aramas ko. Oh mwohn irail koaros, padahkiong aramas koaros me Sosua iei me pahn wia kaun kapw.’ Moses wia duen me Siohwa mahsaniehr, duen me ke kilang nan kilel wet.

Siohwa eri mahsanih ong Sosua: ‘En kehlail, oh dehr masapwehk. Ke pahn kahluwa mehn Israel kan ong nan sahpwen Kenaan me I inoukiong irail, oh I pahn ieiang uhk.’

Mwuhri Siohwa padahkiong Moses en doudahla pohn kadoken Dohl Nepo nan sahpwen Moap. Sang wasao Moses kak kilangwong sahpw kasehlel en Kenaan me mi palio Pillap Sordan. Siohwa mahsanih: ‘Iet sahpwo me I inoukihda me I pahn kihong nain Apram, Aisek oh Seikop seri kan. I mweidong uhk en kilang, ahpw I sohte pahn mweidong uhk en pidelong wasao.’

Pohn nahna en Nepo me Moses mehla. E mahkiehr sounpahr 120. Ansou me e mehla e wia kekehlailte, oh mese mwamwahute, oh e kak kilang wasa. Aramas kan insensuwedkihla en Moses mehla. Ahpw irail pil peren pwehki Sosua uhd wiahlahr arail kaun kapw.