Siohwa Ketin Pilada Sosua

Moses kin kakahluwa wehin Israel erein sounpar tohto, a met eh mour kereniongehr imwisekla. Siohwa mahsanihong ih: ‘Kaidehn kowe me pahn walahng mehn Israel kan nan Sapwen Inowo. Ahpw I pahn mweidohng uhk ken kilang sahpwo.’ Moses eri patohwan peki rehn Siohwa en ketin pilada emen kaun kapw me pahn apwalih aramas ako. Siohwa eri mahsanihong ih: ‘Kohla rehn Sosua, oh padahkihong me ih me pahn kahluwa oh apwalih mehn Israel kan.’

Moses padahkihong wehio me e pahn kereniongehr mehla oh me Siohwa ketin piladahr Sosua me pahn kahluwairaillahng nan Sapwen Inowo. Moses eri ndaiong Sosua: ‘Ke dehr masak. Siohwa pahn ketin seweseiuk.’ Mwurinte mwo, Moses kohdahla pohn koadoken Nahna Nepo, wasa me Siohwa ketin kasalehiong ih sahpwo me E ketin inoukihong Eipraam, Aisek, oh Seikop. Moses sounpar 120 ni ahnsou me e mehla.

Siohwa eri mahsanihong Sosua: ‘Kotehla Pillap Sordan, oh kohla nan Kenan. I pahn seweseiuk duwehte ei sewese Moses. Kanahieng pwe ken kin wadek ei Kosonned akan rahn koaros. Ke dehr masepwehk. Kommwad. Kohla oh wia dahme I kehkehlikihong uhk ken wia.’

Sosua kadarala lipoahrok riemen nan kahnimw en Seriko. Kitail pahn kalaudehla atail sukuhlki dahme wiawi wasao nan koasoi en mwurin met. Ni ahnsou me ira pwurodo, ira koasoia me ahnsowo iei ahnsou mwahu en kohla nan Kenan. Mandahn rahno, Sosua ndaiong mehn Israel ko ren kihpene arail kahnimpwal kan. Ih eri kadarala samworo kei me weuwa kohpwahn inowo ren tiengla ni Pillap Sordan. Pillapo wie laplapake. Ahpw ni ahnsowohte me samworo ko kerediong nan pihlo, pillapo uhdihsang pwilipwil oh tikitikla! Samworo ko aluhla nanwerengen pillapo oh kesihnenda wasao erein mehn Israel ko ar kotekote pillapo kolahng pali teio. Ia duwe, ke sou medewe me manaman wet katamankihong irail dahme Siohwa ketin wiahda ni Sehd Weitahtaho?

Eri mwurin sounpar tohto, met mehn Israel ko mihier nan Sapwen Inowo. Irail kak kauwada ihmw kan oh kahnimw kan. Irail kak wiahda arail mwetin wain oh mwetuwel en wahntuhke teikan. Sahpwo diren milik oh sukehn loangalap.