Kotehla Pillap Sordan

KILANG! Mehn Israel kan kotehla Pillap Sordan! Ah ia pilen pillapo? Pwehki ansouo ansoun keteu en sounpahr, pillapo direkihla pihl minit kei mwowe. Ahpw met sohlahr pile! Oh mehn Israel kan kak kotehla wasao pohn sahpw madakeng duwehte me irail wia nan Sehd Weitahta! Iawasa pihl kohla ie? Kitail pahn kilang.

Ni ansou me mehn Israel kan leldohng Pillap Sordan pwen kotehla, iet me Siohwa mahsanih ong Sosua en padahkiong aramas kan: ‘Samworo kan pahn alehda kohpwa en inou oh tiehngala mwotail. Ni arail pahn tiahkedi pilen Pillap Sordan, pihlo pahn uhdi sohlahr pwilipwil oh madada.

Eri samworo kan pwekada kohpwa en inou, oh tiehngala mwohn aramas ko koaros. Ni arail leldohng Sordan, samworo kan eri doudihla nan pihlo. Pihlo me inenen kehlail oh loal. Ahpw ansou me nehrail ko sair pihlo, pihlo uhdi sohlahr pwilipwil! Met manaman ehu! Siohwa kauhdiehr pihlo oh pillapo madada. Ansoukis mwuhri sohlahr pihl nan pillap!

Samworo kan me weuwah kohpwa en inou eri kohla nan warengen pillapo. Ke kak kilang irail nan kilel wet? Irail eri kesihnen wasao lao mehn Israel kan koaros kotehla pillapo me madada!

Ni en aramas kan koaros kotehlahr, Siohwa eri mahsanih ong Sosua en padahkiong ohl 12: ‘Kohdihla nan pillapo wasa me samworo kan keskesihnen oh kolokol kohpwa en inou. Irail en pwekada takai 12, oh kasokada wasa me irail pahn mi ni pwonget. Eri, mwuhri, ni ansou me noumwail seri kan pahn idek rehmwail ia wehwehn takai ko, kumwail pahn padahkiong irail me pillapo uhdi ni ansou me kohpwa en inou en Siohwa kotehla Pillap Sordan. Takai ko pahn katamanki ong kumwail manaman wet!’ Sosua pil kauwada takai 12 wasa me samworo ko kesihnenda nan pillap madadao.

Mwuhri ekis Sosua eri padahkiong samworo kan me weuwah kohpwa en inou: ‘Douda sang nan Sordan.’ Ansou me re wia met, pihlo eri pwurehng pwilipwilwei.