Pwutak Riemen Me Pil Pwurehng Mour

MA KE pwurehng mourada mwehrin ahmw mehla, ia pahn duen peren me ahmw nohno pahn ahniki? E pahn uhdahn peren kowahlap! Ahpw mie me mehla me kak pwurehng mour? Met wiawiehr mahs?

Kilang duen ohl menet, oh lih iangahki kisin pwutako. Ohlo adaneki soukohp Elias. Liho emen liohdi nan kahnihmwen Sarepad, oh pwutako nah. Eri, ehu rahn pwutako soumwahuda. Ah soumwahu doar lao e mehla. Elias ahpw padahkiong liho: ‘Kihdohng ie pwutako.’

Elias alehda pwutak mehlao oh doudahlahng pere powe oh kawendi ih pohn peht. Ih eri kapakap: ‘Maing Siohwa, kamourada pwutak menet.’ Oh ansouohte pwutako tapiada esingek! Elias eri alehda serio oh pwurehng wahdihla oh indaiong liho: ‘Kilang, noumw pwutaken memour!’ Ihme kahrehda ah nohno inenen peren kowahlap.

Pil emen soukohp kesempwal sapwellimen Siohwa adaneki Elaisa. E kin wia sewespen Elias. Ahpw ansou lelehr Siohwa pil doadoahngki Elaisa pwen wia manaman kei. Ehu rahn Elaisa kohla nan kahnihmwen Sunem, wasa me lih emen me kin kadek ong ih mi ie. Mwuhri ekis lih menet neitikihdi emen pwutak.

Ni menseng ehu, ansou me serio ekis laudla, e kohla pwen tuhong ah pahpa me doadoahk nan mwetuwelo. Ansouohte pwutako sengeseng oh weriwer: ‘I mwoang madak!’ Mwehrin irail wahihdo nan ihmw, serio mehla. Met uhdahn kainsensuwed ong ah nohno! Ansouohte liho kohla oh luhke Elaisa.

Ni en Elaisa leldo, e kohieila nan pere wasa me seri mehlao mi ie. Ih eri kapakap ong Siohwa, oh poalepene serio. Mwuhri ekis paliwar en serio tapiadahr karakarala, oh e asih pak isuh. Met kahrehda ah nohno en peren kowahlap ni ansou me e kohdo oh diarada serio memour!

Aramas tohto mehlahr. Met kahrehda arail peneinei oh kompoakparail kan en insensuwed kowahlap. Kitail sohte ahniki manaman en kamourada me mehla. Ahpw Siohwa kak. Mwuhri ekis kitail pahn sukuhliki duen ah pahn ketin kamourada aramas rar rar kei sang mehla.