Irelaud 3
Likih “Ladu Lelepek Oh Loalokong”
“IHS IRAIL ladu lelepek oh loalokong?” Pwehki peidek wet, Sises Krais karasa duwen kesempwalpen kokohp. E wia kisehn “kilel” me e koasoia me pid “imwin sampah.” (Madiu 24:3, 42-47) Sises kasalehda me “laduwo” pahn inenen kedirepw ni ahnsou en imwi. “Sounpapah” menet pahn alehda pwukoah en apwalih doadoahk en Wehio nin sampah oh ahneki pwukoah kesempwal en ketikihong sapwellimen Koht aramas akan mwengehn ngehn kan “ni ahnsou me konehng.” Pwehki met, Sises pil ketin pousehla oh mahsanih: “Meid pai papah meno me eh kaun pahn kin diar eh wiewia met, ni eh kin pwarodo ni imwe.”
Karasaras wet kin kihda soangen peidek kesempwal tohto kan me kitail anahne doudouloale. Ihs me wia “sounpapaho”? Ia ahn emenemen kitail pwukoah nan karasaras wet? Peidek pwukat sohte kohda ihte pwe kitail en esehla pasapengpe kan. Ni atail pahn kasakasawih soahng pwukat oh kolokolete atail likih “ladu lelepek oh loalokong” kak sewese kitail en wia kupwuren Siohwa.
KASAWIHADA “LADU LELEPEK OH LOALOKONG”
Nan karasaraso, Sises mahsanih me “laduo” pahn kihda mwengehn ngehn me konehng. Ihs me Sises pilada pwehn kamwenge sapwellime tohnpadahk kan nan keieun senturi? Oh ihs me e diarada me wiewia soahngohte ni lelepek ni ahnsou me e ketin pwurodo nan ah alehdier manaman en wehio nan 1914? E sansal me sohte aramas emen me memour nan erein senturi ko koaros. Eri, “ladu lelepek oh loalokong” pahn sansalkihda irail akan me kin ideidawehn Sises me keikihdier ngehn sarawi me wie momour nin sampah nan ahnsou me wekpeseng kan. (Luk 12:42) Ehi, Krais kin doadoahngki pwihn wet en kihseli audepen pweidahn kokohp en Paipel kan oh ketikihda iren kaweid ohng kosonned kan en Paipel nan ehu ehu rahn en atail mour. Mwengehn ngehn wet ahpw uhd kin kohpeseng nan mwomwohdisohn Sounkadehdehn Siohwa kan koaros.—Aiseia 43:10, Kalesia 6:16.
Eri ia wehwehn “sapwellime dipwisou kan”? Mepwukat iei mehkan en ni pali ngehn me mih pohn sampah oh wialahr sapwellimen Krais pwehki ah alehdier manaman en wia nanmwarki nanleng. Me pil doke met iei poahsoan kaun en Sounkadehdehn Siohwa kan, iangahki rahn ohpis kan, Kingdom Hall kan, oh wasahn kapokon kan nan sampah pwon. Ehi, “sapwellime” pwukat koaros kin iang utungada doadoahk en “rongamwahu en wehio” nan sampah pwon oh pil padahkih irail kan me kin kasalehda arail perenki. “Ladu” kan kin wia sapwellimen Koht mehn kihpene irail akan nan mwomwohdiso me wia “pokon kalaimwun me . . . sohte aramas kak wadekedi uwen tohto! Re kohsang nan wehi koaros, ni kadaudok koaros, nan sahpw koaros, oh lokaia koaros,” me pahn pitsang kahn kamakam kowahlap. (Luk 12:42-44; Madiu 24:14; Kaudiahl 7:9-14) Ni mehlel, pokon kalaimwun wet kin iang pwukoah laud ohng ni petehkpen rongamwahuo en kalohk lella ni irepen sampah. Irail iei kisehn “sapwellime dipwisou kesempwal” en Krais oh kin ale limpoak laud sang rehn ladu lelepek pwehki arail kin lelepek oh pil ngoang.
PWUKOA EN GOVERNING BODY
“Ladu lelepek oh loalokong” kin rapahki ahl en miniminpene oh pil wiahda ahl akan nan sampah pwon pwe sapwellimen Siohwa pwihn wasa koaros en ‘wiahda mehkoaros nin duwen me konehng oh koasoandi pwung.’ (1 Korint 14:40) Pwehn kapwaiada met nan keieun senturi, irail Kristian keidi kan sang nanpwungen irail ladu lelepek oh loalokong pilipildahr en wia wilieperail. Irail sohte tuhkihong irail elder keidi kan nin sampah pwon mwohn arail wiahda pilipil wet. Sang arail pwukoah kan nan mwomwohdisohn Serusalem, irail papah nin duwen governing body ong koaros Kristian keidi kan nan mwomwohdiso kan.
Sang Pendekos 33 C.E. kohla, irail tohnpadahk lelepek kan en Kaun Sises Krais, tiengla mwowe ohng sawaspen kaweid ohng irail mwomwohdiso kapw en Kristian akan. (Wiewia 4:33, 35, 37; 5:18, 29) Mpen pahr 49 C.E., governing body wet laudlahr oh pil iangahkier irail kan likin sapwellimen Sises wahnpoaron kan. Ni ahnsou me irail pwungkihpenehr duwen irair en sirkumsais, paliwar wet wiawihkihda “tohnpadahk kan oh ohl mah kan nan Serusalem.” (Wiewia 15:1, 2) E wia arail pwukoah en tehk duwen irair akan me kin lelohng Kristian akan wasa koaros. Irail kadarala kisinlikou kan me wia mehn kakehl ohng mwomwohdiso kan oh me kahrehong irail tohnpadahk kan en kak miniminpene nan arail madamadau kan oh doadoahk kan. Mwomwohdiso kan kin daur koasoandi en governing body, oh met imwikihla arail pweida oh alehdi sapwellimen Siohwa kapai.—Wiewia 8:1, 14, 15; 15:22-31; 16:4, 5.
Kesempwalpen soangen koasoandi wet sansaldahr rahnwet. Me keidi kan me wiahdahr Governing Body en Sounkadehdehn Siohwa kan ahnsou wet kin lelepek oh papah Siohwa erein pahr tohto pil ekspiriens tohto nan sapwellimen Siohwa pwihn. Irail kin kihda sawas en pali ngehn ohng sapwellimen Siohwa aramas kan, duwehte me governing body kin wia nan keieun senturi. Governing body pil alehdi pwukoah en tetehk duwen doadoahk en kalohk, wiahda pwuhk kan ohng sawaspen onop Paipel, oh wiahda koasoandi ohng sounapwalih mwomwohdiso kan en papah nan soangsoangen wasa kan nan pwihn wet. Met iei ekei doadoahk en Wehio me Krais kupwurki me kin pweida rahnwet. Duwehte Kristian kan en mahso, kitail kin perenki ale kaweid sang irail me mah ni pali ngehn ohng kaweid kan me poahsoankihda Paipel ohng pil ire teikan.
Me pil duwehte nan keieun senturi, governing body en rahnwet kin wiawihkihda aramas soh unsek kan. Mendahki met, Siohwa pil kin doadoahngki irail aramas soh unsek kan en mahs en kapwaiada kupwure. E padahkiong Noha en kauwada warihmw ehu oh kalohki duwen rahn en kamwomwomwlahn eh ahnsou. (Senesis 6:13, 14, 22; 2 Piter 2:5) Moses pilipilda en kahluwa sapwellimen Siohwa aramas akan sang nan Isip.(Eksodus 3:10) Ohl soh unsek kei me ngehn sarawi kamwekid pwe irail en ntingihda Paipel.(2 Timoty 3:16; 2 Piter 1:21) En Siohwa kin doadoahngki aramas soh unsek kan rahnwet en kaweidih doadoahk en kalohk oh katohnpadahk sohte kin katikala atail likih sapwellimen Koht pwihn. Weksang met, kitail kin ale kakehl pwehki kitail ese ma Siohwa sohte iang pwihn en Governing Body, eri, irail sohte pahn kak pweida nan arail doadoahk.
DAHME KAHREHDA KITAIL EN LIKIH “LADU LELEPEK OH LOALOKONG”
Kahrepe tohto mie kitail en likih ni unsek pwihn en ladu wet. Keieu, pwehki Sises pilada irail pohnangin “sapwellime dipwisou” kesempwal akan koaros. Met wia mehn kadehde sansal me e ketin sapwellimaniki likilik unsek ohng irail.
Keriau, Mahsen en Koht kin kaweidki Kristian kan en peikiong irail brother kan me kin apwahpwalih tohnmwomwohdiso kan. Dahme kahrehda met pahn wia kamwahupatail? Nan pwuhken Ipru 13:17, wahnpoaron Pohl mahsanih: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih ngenomwail kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.” Pwehn wia kamwahupen atail pali ngehn oh nsenamwahu, e kesempwal kitail en peikiong oh uhpahiong elder kan nan mwomwohdiso ni arail kin ‘apwahpwalih pali ngenatail.’
Nin duwen me kileledi nan 1 Korint 16:14, Pohl mahsanih: “Amwail doadoahk koaros en kin wiawi ni limpoak.” Pilipil kan me kin wiawihda pwehki sapwellimen Koht aramas akan kin poahsoankihda limpoak. Me pid limpoak, 1 Korint 13:4-8 mahsanih: “Limpoak me kanengamah oh kadek; e sohte kin peirin de aklapalap de pohnmwahso; limpoak sohte kin aklemei, e sohte kin mehwo, de kin mwadang lingeringerda; limpoak sohte kin inaptihnmwomw; limpoak sohte kin perenkihda me sapwung, pwe me mehlelete me e kin perenki. Limpoak kin sewesei kitail en loalenohng apwal akan koaros, e kin sewese atail pwoson ahnsou koaros, e kin sewesei kitail en likih Koht, oh en pil kanengamah ni mehkoaros. Limpoak me poatopoat, sohte imwi.” Pwehki limpoak me kin poahsoankihda pilipil kan me pahn wia kamwahupen sapwellimen Siohwa ladu kan, kitail kak likih oh nsenamwahuki soangen pilipil pwukat. Patehng met, e wia kasalepen sapwellimen Siohwa limpoak ong sapwellime aramas koaros.
Ni arail lelohngehr soangsoangen kahpwal akan oh dadaurete, pwihn en ladu lelepek oh loalokong kasalehda me sapwellimen Koht ngehn sarawi ieiangete irail. Kapai tohto kin wudekidihong pohn sapwellimen Siohwa pwihn sansal nan rahnpwukat, kahrehda kitail kak utungada oh likih mehlel pwihn en ladu lelepek oh loalokong.
IADUWEN KITAIL KIN KASALEHDA ATAIL LIKIH “LADU LELEPEK OH LOALOKONG”
Irail me kin alehda pwukoa kesempwal kan nan mwomwohdiso kin kasalehda arail likih pwihn en “ladu lelepek oh loalokong” ni ahr kin perenki alehda oh lelepekiong kapwaiada ahr pwukoa kan me kohwong irail. (Wiewia 20:28) Nin duwen sounkalohk kan en Wehio, kitail kin ngoangki iang doadoahk en kalohk ihmw-lel-ihmw, wia return visit kan, oh onop Paipel rehn aramas akan. (Madiu 24:14; 28:19, 20) Pwehn kak paiekihda mehlel mwengehn ngehn me kin kohdo sang irail “ladu lelepek oh loalokong,” kitail kin onopada mwahu oh iang towehda mihding en Kristian koaros. Kitail pil kin onopada mwahu oh iang towehda kapokon laud oh tikitik kan me kin wiawi nan ehuehu pahr. Kitail kin paiekihda mehlel kangoang akan me kitail kin alehda ni atail kin werekiong riatail kan nan ahnsou kan me Kristian akan kin tuhpene.—Ipru 10:24, 25.
Kitail pil kin kasalehda atail likih ‘ladu lelepek oh loalokong’ ni atail kin kasalehda atail utung irail ki atail meirong en mwohni oh dipwisou kan. (Lepin Padahk 3:9, 10) Ni atail kin kilang riatail akan me anahne sawas, kitail kin mwadangete sewese irail. (Kalesia 6:10; 1 Timoty 6:18) Kitail kin wia met ni ngenin limpoak ong riatail kan, ahnsou koaros kitail en kin tehk kanahieng ahnsou mwahu kan en kasalehda atail kalahngan ong Siohwa oh sapwellime pwihn pwehki kamwahu kan me kin kohwong kitail.—Sohn 13:35.
Ehu elen kasalehda atail likih pwihn en “ladu lelepek oh loalokong” nan rahnpwukat iei ni atail kin utungada pilipil kan me irail kin wiahda. Mendahki kitail ele sohte kin wehwehki kahrepen pilipil de koasoandi kan me kin wiawihda, kitail ese me ni atail pahn kin utungada pilipil kan, e pahn kin wia kamwahu ohng kitail. Ekei pak, kawehwe sansal kan me pid ire kesempwal kan kin wiawi oh kitail kin utungada mehlel pilipil oh koasoandi pwukat. Imwilahn met, Siohwa kin kapaiada atail kin peikiong sapwellime Mahsen oh pwihn en “ladu lelepek oh loalokong.” Ni ahl wet, kitail kin pil kasalehda atail uhpahiong atail Soumas, Sises Krais.
Ehi, uhdahn mie kahrepen kitail kin kak likih mehlel “ladu lelepek oh loalokong.” Sehdan, koht en koasoandi suwed wet, kin wia uwen e kak koaros en kauwehla mwaren Siohwa oh sapwellime pwihn. (2 Korint 4:4) Kitail en dehr lohdi pahn widing suwed en Sehdan. (2 Korint 2:11) Sehdan kin wehwehki me ah ahnsou mwotomwotlahr mwohn e pahn selidi nan pwoahr loalo, oh e men sapwellimen Siohwa aramas tohto en iang ih lohdi. (Kaudiahl 12:12) Ahpw, ni en Sehdan wie kalaudehla eh doadoahk en kaluwetala aramas akan, kitail en kin karanih Siohwa ni atail kasalehda likilik unsek ong pwihn me Siohwa doadoahngki ahnsou wet iei pwihn en ‘ladu lelepek oh loalokong.’ Sehdan kin mahweniong “luhwen” pwihn en ‘ladu lelepek oh loalokong,’ pwehki pwukoa me kohwong irail en apwahpwalih doadoahk en kalohki oh “loalopwoatohng padahk me Sises ketin kadehdehier.” (Kaudiahl 12:17) Atail likih Siohwa oh sapwellime koasoandi kan ni unsek pahn imwikihla pwihn ehu me kin miniminpene oh doadoahkpene.