Kaimwiseklahn Koasoakoasoipene ong Irail akan me Pahn Papidais

Papidais kin kalapw wiawi ni mihting tohrohr kan en Sounkadehdehn Siohwa kan. Ni kaimwiseklahn padahk en papidais, me wia padahko pahn peki irail me pahn papidais ko ren kesihnenda oh sapeng peidek riau pwukat ni ngihl laud:

1. Ke koluhkihlahr dipomw kan, inoukihong Siohwa omw mour, oh kamehlele sapwellime ahl en komourla ni eh ketikihda Sises Krais?

2. Ke wehwehki me omw papidaisla kin kasalehda me kowe emen Sounkadehdehn Siohwa ni omw kin werekiong sapwellimen Siohwa pwihn?

Pasapeng “ei” ong peidek pwukat kin wehwehki me irail me pahn papidais ko wia “kadehde ong wehipokon” me re pwoson pweinen pweipwei sapahlo oh re inoukihongehr Siohwa arail mour unsek. (Rom 10:9, 10) Irail me pahn papidais ko pahn men kapakapki oh medemedewe mahs duwen peidek pwukat pwe arail pasapeng en kak pahrekiong dahme re pein kamehlele.

Ke inoukihongehr Siohwa omw mour nan kapakap, inoukihda me ke pahn kaudokiong ih kelehpw oh me en wia kupwure iei me keieu kesempwal nan omw mour?

Ni ahnsouwet ke uhdahn kamehlele me ke anahne papidaisla ni ahnsou me kakehr?

Soangen likou dah me konehng ken likawih ni ahnsoun papidais? (1 Tim. 2:9, 10; Sohn 15:19; Pil. 1:10)

Kitail anahne likouda ni ahl me “kasalehda wahu oh madamadau pwung” pwe met pahn kasalehda atail “poadidiong Koht.” Eri, irail me pahn papidaisla sohte pahn likawih likoun pampap me kasale laud paliwar de likou me mie nting kan powe. Re pahn anahne likouda ni ahl ehu me pahn soandi mwahu, mwakelekel, mwomw mwahu, oh me konehng ahnsowo.

Ia mwomwen wiewiahn aramas emen ni eh pahn papidais? (Luk 3:21, 22)

Sapwellimen Sises papidais kin wia mehn kahlemeng mwahu ong papidais en Kristian me kin wiawi rahnwet. E ketin mwahngih me papidais kin wia wiewia kesempwal ehu, oh met sansal sang sapwellime madamadau oh wiewia kan. Kahrehda wasahn papidais en dehr wia wasahn kamwakamwan, mwadong, pampapseli, de soangen wiewia teikan me pahn kihsang wahupen ahnsoun papidais. Kristian kapw menet en dehr wiahda mwomwen me likamwete e kanahkihda mehkot. Mendahki papidais kin wia ahnsou kaperen ehu, peren wet anahne sansalda ni wahu.

Ia duwen omw kaukaule iang mihting oh patehng mwomwohdiso eh pahn seweseiuk ken kapwaiada omw inou ong Siohwa?

Mwurin omw papidaisla, dahme kahrehda e pahn kesempwal ken kin kolokolete omw koasoandi mwahu ong pein onop oh kaukaule iang doadoahk en kalohk?

KAWEID KAN ONG ELDER KAN EN MWOMWOHDISO

Ni ahnsou me emen sounkalohk me saikinte papidais eh kehsehki elder kan me e men papidaisla, kangoang pahn kohwong ih en kousapahlih kanahieng “Peidek kan ong Irail akan me Men Papidais,” me dierek nan pali 12-49. E pil anahne wadek “Iren Kataman Ehu ong Sounkalohk Men me Saikinte Papidais,” me tepida sang pali 7, me kawehwehda ia duwen eh kak kaunopadahng koasoakoasoipene rehn elder kan. Duwen me sansal nan ireo, me men papidaiso kak kilang pein nah doaropwe kan me e ntingihedi ire kan oh e pil kak kilang pwuhket ni ahnsou me ih oh elder kan wie koasoakoasoipene. Ahpw sohte anahnepen emen en kousapahlih peidek kan reh mwohn eh pahn tuhwong elder kan.

Mehmen me men papidaisla anahne kehsehki soun koasoanehdi pwihn en elder kan. Mwurin aramaso me peki en papidaisla eh wadekala “Peidek kan ong Irail akan me Men Papidais,” soun koasoanehdi pwihn en elder kan pahn idek reh ma e wiadahr eh inou ong Siohwa nan eh kapakap pwehn kapwaiada kupwure. Ma aramaso wiadahr eh inou, eri soun koasoanehdi pwihn en elder kan pahn wiahda koasoandi ong elder riemen pwe ira en koasoiong ih duwen “Peidek kan ong Irail akan me Men Papidais.” Emen elder pahn kileldiong en wia pali keieu en pwuhko oh emen elder pahn wia pali keriau. Re sohte anahne awih lao pakair en mihting tohrohr ehu wiawi pwe ren koasoiapene ire pwukat.

Pali riau ko kak wiawi ni arail tuhpene pak riau oh ehuehu tuhpene ko kak reireiki awa ehu, ahpw re kak doadoahngki ahnsou laud ma mie anahnepe. Ehuehu kasukuhl ko pahn konehng en tepikihda kapakap oh kaimwisekihla kapakap. Me kaukaunop en papidaiso de pil eldero en dehr karuwaru ni ara koasoiapene peidek kan. Elder kan me alehdi pwukoa wet pahn anahne wiahki koasoakoasoipene wet en keieu kesempwal nan arail koasoandi teikan.

E pahn keieu mwahu en kousapahlih peidek kan ong emenemen me men papidais a kaidehn wiahkinteieu wiawi ni mwomwen pwihn. Ni emenemen eh pahn sapeng peidek kan koaros, elder kan pahn kak wehwehki mwahu uwen laud en eh wehwehki Paipel, oh sohte peikasalki ma e kakehr papidaisla de soh. Patehng met, e pahn kak saledek en koasoiong elder kan. Pwopwoud ehu kak patpene oh sapeng peidek kan.

Ma sister men me men papidais, koasoipene en wiawi ni soangen ahl ehu me pahn sansal ong meteikan ahpw re sohte kak rong. Ma mie anahnepen emen en iang, me pahn iango pahn wia elder men de sounsawas men, poahsoankihda pali me irail pahn kousapahlih, me sansalda nan parakrap en mwurin met.

Nan mwomwohdiso kan me malaulau elder kan, sounsawas koahiek me kin kasalehda madamadau toupahrek ele kak kousapahlih rehn irail kan me men papidaisla peidek kan me mi nan “Pali 1: Padahk kan en Kristian.” Elder kante me pahn kousapahlih “Pali 2: Momour nin Duwen Kristian.” Ma sohte itar brother koahiek kan nan mwomwohdiso, ele re kak kehsehki sounapwalih me kin seiloak en tehkada ma mie mwomwohdiso me karanih me kak sawas.

Ma me pahn papidaislao serihte (minor), eh pahpa de nohno me papidaislahr pahn anahne iang tuhpeneo me pahn wiawi. Ma papah de nohno sohte kak iang towehda, eri elder riemen (de emen elder oh emen sounsawas, met pahn pidada wasa me re pahn kousapahlih nan pwuhko) pahn anahne iang nan tuhpene riau ko.

Elder kan pahn tehk kanahieng pwe me men papidaiso en wehwehki ni uwen me konehng ong tepin padahk en Paipel kan. Pil patehng met, irail pahn pil men tehk mwahu ma e uhdahn kesempwalki padahk mehlel oh kasalehda me e kin wauneki sapwellimen Siohwa pwihn. Ma aramaso saikinte wehwehki tepin padahk en Paipel kan, elder kan pahn koasoanehdi ong ih en ale sawas pwe mwuhr en kak papidais. Ekei ele anahne ahnsou pwe ren kak kalaudehla arail kin kesempwalki iang doadoahk en kalohk de ren kak kasalehda arail utung koasoandi kan en sapwellimen Siohwa pwihn. Elder kan pahn koasoanehdi ia mwomwen arail pahn doadoahngki awa ehu samwa ong ehuehu pali pwe ren kak wehwehki mwahu ma aramaso konehngehr papidais. Mendahki ahnsou laud kak kohwong ekei peidek kan oh ahnsou mwotomwot ong peidek teikan, ahpw kousapahl en peidek koaros pahn anahne wiawi.

Elder kan me wia peidek kan pahn tuhpene mwurin keriaun koasoipene oh irail pahn koasoanehdi ma aramaso kakehr papidais de soh. Elder kan pahn tehk duwen aramaso duwehte mwomwen eh mour en mahs, eh koahiek kan, oh soangen irair teikan me emenemen kin ahneki. Dahme elder kan men ese iei ma aramaso kakairadahr eh nanpwungmwahu rehn Siohwa oh wehwehki tepin padahk kesempwal kan nan Paipel. Pwehki amwail sawas oh limpoak, irail me pahn papidaisla pahn kaunopada mwahu pwe ren kak kapwaiada arail pwukoa kesempwal en wia sounkalohki rongamwahwo.

Mwurin mwo, emen de riemen nanpwungen elder ko pahn pwurehng tuhwong aramaso oh padahkihong ih ma e kak papidais de soh. Ma e kak papidais, elder kan pahn kousapahlih reh “Kaimwiseklahn Koasoakoasoipene ong Irail akan me Pahn Papidais,” me dierek nan pali 51-53. Ma me pahn papidaiso saikinte kanekehla eh onopki pwuhken Padahkihong Kitail oh “Dadaurete ni Limpoak en Koht,” elder kan anahne kangoange en kanekehla eh onopki pwuhk ko mwurin eh papidaisla. Padahkihong me pahn papidaislao me rahn me e papidaisla pahn kileldi nan Congregation’s Publisher Record. Katamankihong me elder kan kin ale ire wet sang reh pwe sapwellimen Siohwa pwihn en kak pousehlahte apwalih koasoandi kan en kaudok en Sounkadehdehn Siohwa kan sampah pwon. Oh ni ahl wet, e kak iang wia soahng kan me mwomwohdiso koasoanehdi oh en kak ale kangoang oh kaweid sang rehn elder kan. Pil patehng met, elder kan kak katamankihong sounkalohk kapw kan me soahng kan me kileldi duwen ih kin mi pahn epwelpen Global Data Protection Policy of Jehovah’s Witnesses, me mi nan jw.org. Koasoipene wet pahn anahne reireiki minitte eisek de mwotomwotsang.

Sounpar ehu mwurin sounkalohko papidaisla, elder riemen pahn tuhwong ih pwehn kihda kangoang oh iren sawas kan. Emen elder ko pahn anahne wia en aramaso sounapwalih en pwihn. Ma me papidaislao serihte (minor), eh pahpa de nohno me papidaisla en pil iang tuhpeneo. Arail tuhpene en wia ahnsou kaperen oh kangoang. Elder ko pahn koasoiapene duwen eh kekeirda nin duwen Kristian oh kihda iren sawas kan ong ia duwen eh pahn pousehlahte nan eh koasoandi mwahu en pein onop oh wadawad Paipel rahn koaros, kaudok en peneinei wihk koaros, kaukaule iang towehda mihting oh iang pasapeng, oh iang doadoahk en kalohk nan wihk koaros. (Ep. 5:15, 16) Ma e saikinte kanekehla eh onopki pwuhken Padahkihong Kitail oh “Dadaurete ni Limpoak en Koht,” elder kan en koasoanehdi me emen en sewese ih kanekehla eh onop. Elder kan en kin saledek en kihda kaping ni limpoak. En kihda kaweid oh iren sawas ehu de riau kin kalapw itar.