Sises Selidi

Sises oh wahnpoaron ko keid nan Wahun Kidron kohlahng ni Nahna Olip. Ahnsowo mwurin lukepen pwong oh maram mat. Ni ahnsou me irail lella ni mwetuwel en Kedsemeni, Sises mahsanihong irail: “Kumwail awih ie met oh iang ie pepehd.” Sises eri ekis ketilahsang irail nan mwetuwelo oh kelepwikihdi. Nan kupwure inenen toutoula oh e kapakapohng Siohwa mahsanih: “Kupwuromwi en pweida.” Siohwa eri ketin kadarala tohnleng men pwehn kangoange Sises. Ni Sises eh ketin pwurala rehn wahnpoaron ko, e mahsanihada ar wie memeir. E mahsanih: ‘Kumwail pirida! Met kaidehn ahnsoun memeir! Ahnsowo leledohr pwe ien pengpengla rehn ei imwintihti kan.’

Sohte pwand Sudas ahpw lella rehrail. E kahre pwihnen aramas ehu me weuwa kedlahs oh mehn wowoki kei. E ese ia wasa e kak diarada Sises ie pwehki irail kin kalapw kohla nan mwetuwelo. Sudas eri ndaiong sounpei ko me e pahn kasalehiong irail ihs me Sises. Sudas eri alulahng Sises oh rahnmwahwih, oh ndaiong: ‘Maing Sounpadahk,’ mwurin mwo e metik Sises. Sises eri mahsanihong: ‘Sudas, ke metik ie pwe ken pangiehla?’

Sises eri ketin keila limwahn aramas ako oh mahsanihong irail: “Ihs me kumwail raparapahki?” Irail eri sapeng nda: “Sises mehn Nasareto.” Sises eri mahsanihong irail: “Iei ngehi met,” ohl ako eri pweieklahsang oh pwupwudiong nanpwel. Sises pil pwurehng mahsanihong aramas ako: “Ihs me kumwail raparapahki?” Irail eri pil pwurehng nda: “Sises mehn Nasareto.” Sises eri ketin sapeng irail mahsanih: ‘I ndaiongkumwailehr me iei ngehi mwo. Kumwail mweidala ohl pwukat ren kohkohla.’

Ni ahnsou me Piter esehda dahme wiewiawi, e ahpw usadahte nah kedlahso oh pelehsang salengen Malkus, emen nein samworo lapalapo ladu. Ahpw Sises ketin doahke salengen ohlo oh kamwahwihala. Ih eri mahsanihong Piter: ‘Kapwurehwei noumw kedlahs en. Ma ke kin peiki kedlahs, ke pahn mehkihla kedlahs.’ Sounpei ko eri koledi Sises oh pirehdi peh kan, oh wahnpoaron ko tangasang ih. Aramas ako eri wahlahng Sises rehn Anas, kaunen samworo. Anas eri kapeidakihseli Sises oh kadarala ih nan imwen Samworo Lapalap Kaiapas. Ahpw dahme wiawihong wahnpoaron ko?