January

Sises ketin “mahsanihada” nohnou me pahtoula oh eri “ketin poakehla.” (Luk 7:13) Ahpw Sises sohte ketin poakehlahte nohnou; ahpw e ketin kasalehiong me e poakehla. Ni kamantik, e mahsanihong liho: “Ke dehr sengiseng.” Ih eri ketin sewese. E ketin kaiasada nein liho pwutako oh “ketikihong rehn ineo.” (Luk 7:​14, 15) Dahme kitail kak sukuhlkihsang Sises eh ketin kaiasada nein liohdio pwutako? Kitail sukuhlki me kitail anahne poakehla irail kan me pahtou. Duwehte me Sises ketin wia. Ahpw duwehte Sises, kitail kak kakairada irair en poakehla me pahtou kan sang ni atail kin tehk irail. Kitail kak tiengla mwowe oh kasalehda atail poakehla meteikan sang ni atail nda oh wia dahme kitail kak pwehn sewese oh kansenamwahwihirailla. (Lep. Pad. 17:17; 2 Kor. 1:​3, 4; 1 Pit. 3:8) Mehnda ma kitail nda de wia mehkot tikitik, e kak uhdahn kangoange oh kansenamwahwihirailla. w23.04 5-6 ¶13-15

Mendahki Sises mwahngih me kompoakepaho ahpwtehn mehla, e ketikette wasao rahn riau oh eri ketila Pedani. Ni Sises eh ketin lella Pedani, Lasarus melahr rahn pahieu. Sises pahn ketin wia mehkot me pahn wia kamwahupen kompoakepah ko oh kalinganahla Koht. (Sohn 11:​6, 11, 17) Kitail sukuhlki mehn kasukuhl ehu duwen kompoakepahnki meteikan sang koasoiepen Paipel wet. Medewehla met: Ni Mery oh Marda ara kadarala pakairo rehn Sises, ira sohte peki Sises en ketila Pedani. Ira ndahte me kompoakepaho soumwahu. (Sohn 11:3) Ni ahnsou me Lasarus mehla, Sises kak ketin kaiasada, mendahki e ketiket wasa doh. Ahpw Sises ketin pilada en ketila Pedani pwehn mi rehn kompoakepah ko, Mery oh Marda. Ia duwe, mie kompoakepahmw men me pahn seweseiuk mehnda ma ke sohte peki reh? Eri ke ese me ke kak koapworopworki ih, oh me e pahn seweseiuk “ni ahnsou apwal.” (Lep. Pad. 17:17) Duwehte Sises, kitail en wia soangen kompoakepaho ong meteikan! w23.04 10 ¶10-11

Erein kahpwal ehu, ele kitail kin medewe me sapwellimen Siohwa sampah kapwo sohte pahn pweida. Ia duwe, met wehwehki me atail pwoson luwet? Soh. Medewehla karasaras wet. Ni ahnsou me e kin ketketeu erein wihk tohto, ele kitail kin medewe me e solahr pahn ketipin. Ahpw mwuhr ketipino dakada. Duwehte met, ni atail kin nsensuwedla laud, kitail kakete medewe me sampah kapwo sohla pahn pweida. Ahpw ma kitail ahneki pwoson kehlail, kitail ese me sapwellimen Koht inou kan pahn pweida. (Mel. 94:​3, 14, 15; Ipru 6:​17-19) Pwehki kitail kamehlele met, kitail kak pousehlahte mwohneki mahs atail kaudok ong Siohwa nan atail mour. Atail pwoson pil anahne kehlail pwe kitail en kak wia doadoahk en kalohk. Aramas tohto kin medewe me “rongamwahu” duwen sapwellimen Koht sampah kapwo sohte kak pweida. (Mad. 24:14; Esek. 33:32) Dehr peikasalki dahme Siohwa ketin padahkihong kitail duwehte me irail kin wia. Pwe met en dehr wiawi, kitail anahne pousehlahte kakehlaka atail pwoson. w23.04 27 ¶6-7; 30 ¶14

Mie pak me ke medewe ma Siohwa kin ketin sapengala omw kapakap kan? Ma ei, kaidehn kowe kelehpw. Mie riatail Kristian tohto teikan me pil nda me irail kin medewe duwen met, ahpw mehlel ni arail kin lelohng kahpwal kan. Ma kitail kin lokolok, kitail pil kin apwalki en ese ia duwen Siohwa eh kin ketin sapengala atail kapakap kan. Dahme kahrehda kitail kak kamehlele me Siohwa kin ketin sapengala en sapwellime tohnkaudok kan kapakap kan? Paipel kamehlelehiong kitail me Siohwa kin uhdahn ketin poakohng oh kesempwalkin kitail. (Ak. 2:7; 1 Sohn 4:10) Ihme kahrehda e ketin luke kitail en kapakapohng ih oh peki sawas. (1 Pit. 5:​6, 7) E kin ketin kupwurki sewese kitail en mihmi karanih ih oh dadaur pahn atail kahpwal kan. Kitail kin kalapw wadek nan Paipel me Siohwa kin ketin sapengala en sapwellime tohnkaudok kan kapakap. Ke kak medewehla ehu karasepen met? w23.05 8 ¶1-4

Mery ahneki pein eh nanpwungmwahu rehn Siohwa; e kin pousehlahte kakehlailih eh pwoson. E esehla mwahu Paipel. E pil kin wiahda ahnsou en doudouloale dahme e sukuhlki. (Luk 2:​19, 51) Kitail kak kamehlele me ahn Mery nanpwungmwahu rehn Siohwa kahrehiong ih en wia lih pwopwoud mwahu men. Rahnwet, lih pwopwoud tohto kin nantihong en alasang Mery. Karasepe, sister men me adaneki Emiko, koasoia: “Ni ahnsou me I kiripw, I kin pein wia ei koasoandi kan me pid ei nanpwungmwahu rehn Siohwa. Mwurin ei pwopwoudla, ei pwoudo kin kapakapkin kiht, oh tiengla mwowe nan at kaudok en peneinei. I diarada me I tepida koapworopworki en kin wia soahng pwukat ong ie. Ahpw I anahne pousehlahte pein kakehlailih ei nanpwungmwahu rehn Siohwa. Eri met, I kin koasoanehdi ahnsou en kelehpwla kapakap ong Koht, wadek Paipel, oh doudouloale sapwellime madamadau kan.” (Kal. 6:5) Lih pwopwoud kan, ni amwail kin pousehlahte kakehlailih amwail nanpwungmwahu rehn Siohwa, amwail pwoud pahn ahneki kahrepe tohto en kapinga oh poakohng kumwail.—Lep. Pad. 31:30. w23.05 22 ¶6

Kitail sohte ipwidihte lemmwiki Siohwa; kitail anahne kakairada irair wet. Ehu ahl me kitail kak wia met iei sang ni atail kin kilang kepikipik kan. Uwen laud en atail kin kilang sapwellimen Siohwa erpit, manaman oh limpoak laud ong kitail me sansalda nan “soahng kan me wiawihda,” atail wauneki oh poakohng ih pahn pil laudla. (Rom 1:20) Pil ehu ahl me kitail kak kakairada atail lemmwiki Koht iei sang ni atail kin kaukaule kapakap. Atail esehla Siohwa kin mwamwahula ehuehu ahnsou me kitail kin kapakapohng ih. Ahnsou koaros me kitail kin peki reh kehl pwehn dadaur pahn kahpwal ehu, met kin katamandohng kitail duwen sapwellime manaman lapalap. Ni atail kin kalahngankihong Ih sapwellime Ohlo, kitail kin tamanda ia uwen Siohwa eh ketin poakohng kitail. Oh ni atail kin peki Siohwa en ketin sewesehkin kitail kahpwal ehu, kitail kin tamanda me e uhdahn ketin erpit. Soangen kapakap kan me duwehte met pahn kalaudehla atail wauneki Siohwa. Oh e pil kahrehiong kitail en koasoanehdi teng en soikala soahng kan de soahng koaros me pahn kauwehla atail nanpwungmwahu reh. w23.06 15 ¶6-7

Siohwa kin ahnsou koaros ketin kasalehda ni sansal sapwellime kosonned kan ong sapwellime aramas akan. Karasepe, pwihn me kin apwalih mwomwohdiso ni mwehin tepin Kristian ko kasalehda me Kristian kan anahne tengedihongete ahl siluh pwukat: (1) soikala kaudokiong dikedik kan oh kaudokiong Siohwa kelehpw, (2) wauneki me nta wia mehkot sarawi, oh (3) peikiong kehkehlik en Paipel en liksang tiahk samin me pid wia nsenen pwopwoud. (Wiewia 15:​28, 29) Ia duwen Kristian kan rahnpwukat ar kak tengetengete ni ahl siluh pwukat? Sang ni arail kin kaudokiong oh peikiong Siohwa. Siohwa ketin mahsanihong mehn Israel kan en kaudokiong ih kelehpw. (Deud. 5:​6-10) Ni ahnsou me Tepilo kasonge Sises, Sises ketin kasalehda ni sansal me kitail anahne kaudokiong Siohwa kelehpw. (Mad. 4:​8-10) Eri, kitail sohte kin kaudokiong dikedik kan. Kitail sohte pil kin pwongih aramas akan—sohte lipilipil ma irail kaun en pelien lamalam, kaunen koperment, de me ndand kei nan palien mwadong de kamweit kan—oh wiahkin irail duwehte koht kei. Kitail kin kaudokiongete me ketin “kapikada mehkoaros.”—Kaud. 4:11. w23.07 14-15 ¶3-4

Ahn Sehdan sampah kin medemedewehte tiahk samin me pid wia nsenen pwopwoud oh kilel oh kasdo suwed. (Ep. 4:19) Eri kitail anahne sukuhlki en wauneki Koht oh sohpeisang me suwed. Nan Lepin Padahk irelaud 9, kitail wadek duwen erpit oh pweipwei, me karasaraskihong lih riemen. Ira koaros kasalehda luhk ong me salamalam akan—irail kan me “pweipwei.” Ira kin mwomwen ndinda, ‘Kohdo ni imweiet oh mwenge.’ (Lep. Pad. 9:​1, 4-6) Ahpw dahme wiawihong irail ako me alehdi ehuehu luhk ko uhdahn wekpeseng. Medewehla luhk me kohsang ‘lih pweipweio.’ (Lep. Pad. 9:​13-18) Ni eimah, e kin likwerih me salamalam akan, “Kumwail kohdo” oh kamadipw. Dahme kin wiawihong irail pwukat? “Irail kan me kin kohla ni imwe kin mehla.” Kitail wadek duwen “lih suwed me pahn song en kasongosongehkin uhk eh lokaia kansenamwahu kan.” E mahsanih: “Ma ke pahn kohla ni imwen soangen lih suwed menet, ke kekeidier nan ahl en kolahng mehla.” (Lep. Pad. 2:​11-19) Lepin Padahk 5:​3-10 (NW) pil katamankihong kitail duwen emen “lih suwed” me “neh kan kin kohkohdilahng mehla.” w23.06 22 ¶6-7

Elder kan anahne wiahda mehn kahlemeng mwahu en madamadau toupahrek. (1 Tim. 3:​2, 3) Karasepe, elder men en dehr kasik me pein eh madamadau pahn ahnsou koaros pwung pwehki e laudsang elder teikan. E kamehlele me sapwellimen Koht manaman kak kamwakid emen elder en nda mehkot me pahn sewese irail en wiahda pilipil pwung. Oh ma pali laud en elder kan pwungki pilipil ehu me sohte uhwong kaweid en Paipel, elder men me madamadau toupahrek pahn utung pilipilo mehnda ma pein ih pwungki ehu pilipil tohrohr. Ni atail kin madamadau toupahrek kitail kin paiekihda ni ahl tohto. Kitail kin ahneki nanpwungmwahu keren rehn riatail Kristian kan, oh mwomwohdiso kin ahneki popohl. Kitail kin perenki mwomwen sapwellimen Siohwa aramas akan oh arail tiahk. Oh e kaperen en ese me mendahki kitail koaros wekpeseng, kitail kin kaudokiong ih nin duwen peneinei ehu me kin miniminpene. Laudsang met, kitail perenki ese me kitail kin kahlemengih atail Kohto Siohwa me ketin madamadau toupahrek. w23.07 25 ¶16-17

Daniel ahneki kahrepe pwung en onopki kokohp kan. E men esehla dahme mehlel. E pil kin aktikitik, oh pohnese me Siohwa pahn ketin sewese ih en wehwehkihla kokohp kan ma e karanihete oh peikiong ih. (Dan. 2:​27, 28) Daniel kadehdehda me e aktikitik sang ni eh kin koapworopworki sawas sang rehn Siohwa. (Dan. 2:18) Daniel pil kin onop ni keneinei. E kin rapahki pasapeng kan nan palien Nting Sarawi kan me mie ni eh ahnsowo. (Ser. 25:​11, 12; Dan. 9:2) Ia duwen omw kak alasang Daniel? Kasawih kahrepen omw onop. Ia duwe, ke kin onopki kokohp en Paipel kan pwehki ke uhdahn men esehla dahme mehlel? Ma ei, Siohwa pahn ketin seweseiuk. (Sohn 4:​23, 24; 14:​16, 17) Ekei kin wia met pwe re men kadehdehda me Paipel sohte pwilisang rehn Koht. Re medewe me ma Paipel sohte pwilisang rehn Koht, eri irail kak pein pilada dahme pwung oh sapwung. Ahpw, kitail anahne ahneki kahrepe mwahu en onopki Paipel. w23.08 9 ¶7-8

Kitail kak katoutouwihala pein kitail ni atail kapahrekihong pein kitail meteikan. (Kal. 6:4) Ma kitail kin wia met, kitail pahn peirin oh ahneki madamadau en siai. (Kal. 5:26) Ma kitail kin song en wia dahme meteikan kin wia mendahki atail sohte kak wia met, kitail kakete kamedekihala pein kitail. Oh ma “koapworopwor kin ohla, mohngiongomw pil kin ohla,” eri ia uwen eh kansensuwed en awih mehkot me kitail sohte douluhl kak alehdi! (Lep. Pad. 13:12) Ma kitail wia met, e pahn kahrehiong kitail en nohn pwangada nan atail weirentang en mour. Dehr kasik laudsang dahme Siohwa ketin kupwurki. E sohte ketin kasik ken patohwanohng dahme ke sohte ahneki. (2 Kor. 8:12) Kamehlele me Siohwa sohte kin ketin kapahrekihong dahme ke kin wia ong dahme meteikan kin wia. (Mad. 25:​20-23) E ketin kesempwalki omw papahki ih sang omw mour unsek, omw lelepek, oh omw dadaurete. w23.08 29 ¶10-11

Siohwa ketin sapengala ahn Samson peksawas oh ketikihda pihl ni ahl kapwuriamwei ehu. Ni ahnsou me Samson nim pihlo, “eh kehl ahpw pwurodo oh e kehlailda.” (Sounkopwung 15:​19, NW) E sansal me pahd en pihl kapw wet mihmihte wasao mwurin sounpar tohto lella ahnsou me soukohp Samuel ntingihedi pwuhken Sounkopwung kan. Mehn Israel kan me kilang pahd en pihlo ele kin tamanda me irail kak koapworopworki Siohwa en ketin sewese sapwellime tohnkaudok lelepek kan ni ahnsou me irail anahne. Kitail pil anahne koapworopworki Siohwa en ketin sewese kitail sohte lipilipil soangen koahiek dah me ele kitail ahneki de dahme kitail wiadahr nan sapwellime doadoahk. Kitail anahne aktikitik oh pohnese me kitail kak pweida mehlel ma kitail kin koapworopworkihte ih. Duwehte Samson eh kehlailda ni eh nim pihl me Siohwa ketikihda, kitail pil pahn kehlailda ni atail kin isaneki soangen sawas koaros me Siohwa ketikihda ong kitail.—Mad. 11:28. w23.09 4 ¶8-10

Dahme kitail kak wia ni meteikan ar kalingeringerihkitailda, duwehte ni emen eh karaunlikamwih mwaren Koht de kauwe Paipel? Kitail anahne peki rehn Siohwa sapwellime manaman oh erpit pwe kitail en sapeng aramaso ni mpahi. Ahpw ia duwen ma mwuhr kitail esehda me atail pasapengo sohte wiawi ni ahl me kitail anahne wia? Kitail kak pwurehng kapakapki ireo oh medewe ia duwen atail kak kamwahwihala atail wia met mwuhr. Eri, Siohwa pahn ketikihong kitail sapwellime manaman pwe kitail en kak kaunda atail lingeringer oh kasalehda mpahi. Iren Paipel tohto kak sewese kitail ni ahnsou me e apwal en kasalehda mpahi. Sapwellimen Koht manaman kak katamandohng kitail iren Paipel ko. (Sohn 14:26) Karasepe, kaweid kan me kitail diar nan pwuhken Lepin Padahk kak sewese kitail en kasalehda mpahi. (Lep. Pad. 15:18) Pwuhken Paipelo pil kasalehda dahme kahrehda e mwahu kitail en kin meleilei ni ahnsou me kitail kakete lingeringerda.—Lep. Pad. 10:19; 17:27; 21:23; 25:15. w23.09 15 ¶6-7

Wahnpoaron Piter papah Siohwa ni lelepek erein sounpar tohto. E kin iang Sises erein sapwellime doadoahk en kalohk. E tapiada doadoahk en kalohko rehn irail me kaidehn mehn Suhs, oh mwuhr, e iang pwihn me kin apwalih mwomwohdiso kan koaros ni ahnsowo. Kerenlahng imwin eh mour ni ahnsou me e ese me e pahn kereniong mehla, Siohwa ketikihong ih doadoahk tohto en wia. Nan pahr 62 lel 64, Siohwa ketin doadoahngki pwehn ntingihedi kisinlikou riau—pwuhken Piter Keieu oh Keriau nan Paipel. (2 Pit. 1:​13-15) Siohwa ketin doadoahngki Piter en ntingihedi kisinlikou ko ni ahnsou me ienge Kristian kan “nsensuwedlahr sang ni soangsoangen kahpwal kan.” (1 Pit. 1:6) Aramas suwed kan kin songosong en kawailong nan mwomwohdiso padahk likamw kan oh tiahk samin. (2 Pit. 2:​1, 2, 14) Kristian kan nan Serusalem pahn kereniong lelohng “imwin mehkoaros,” me iei kasohrlahn kahnimwo oh eh tehnpas sarawio sang sounpei en Rom kan. (1 Pit. 4:7) Nein Piter kisinlikou ko uhdahn sewese Kristian ko en kilang dahme re kak wia pwehn dadaur pahn arail kahpwal en ahnsowo oh onopadahng kasongosong kan me pahn wiawi mwuhr. w23.09 26 ¶1-2

Duwehte Sises, kitail kin esehla peik erein atail kahpwal kan. Karasepe, erein tepidahn soumwahu lusuluso COVID-19 ni ahnsou me kitail alehdi kaweid en uhdihsang tuhpene ni mihting kan nan Wasahn Kaudok oh kalohk ihmw lel ihmw, ke kin apwalki peikiong? Mendahki met, omw peik pereiukala, sewese mwomwohdiso en miniminpene, oh kaperenda Siohwa. Met kitail koaros onopadahr en kin peikiong kaweid koaros me kitail ale erein kahn kamakam kohwahlapo. Peikiong kaweid pwukat pahn pere atail mour! (Sohp 36:11) Kitail pilada en peikiong Siohwa pwehki kitail poakohng ih oh men kaperenda ih. (1 Sohn 5:3) Kitail sohte kak kapwungohng Siohwa soahng koaros me e ketin wiahiong kitail. (Mel. 116:12) Ahpw kitail kak peikiong ih oh irail kan me ahneki manaman. Ma kitail peik, kitail kin kasalehda me kitail loalokong. Me loalokong kan kin kaperenda kupwuren Siohwa.—Lep. Pad. 27:11. w23.10 11 ¶18-19

Ma tohnleng men pahn koasoiong uhk, ke pahn rong dahme e pahn koasoia? Rahnwet, tohnleng men kin koasoakoasoiong “wehi koaros oh keinek koaros oh lokaia koaros oh aramas koaros.” Dahme e koasoakoasoia? “Lemmwiki Koht oh kalinganahda ih . . . Kaudokiong Meno me ketin wiahda nanleng oh sampah.” (Kaud. 14:​6, 7) Siohwa iei Koht mehlelo kelehpw me koaros anahn kaudokiong. Ia uwen atail kalahnganki me e ketikihong kitail ahnsou mwahu en kaudokiong nan sapwellime tehnpas sarawi lapalapo! Dahkot tehnpas sarawi lapalapo, oh ia wasa kitail kak diarada oaritik kan me kawehwehda met? Tehnpas sarawi lapalapo kaidehn uhdahn ihmw ehu. E wia sapwellimen Siohwa koasoandi ong kaudok me e ketin kupwurki me poahsoandahsang ahn Sises meirong en pweinen pweipwei sapahlo. Wahnpoaron Pohl kawehwehda met nan nah kisinlikowo me e ntingihdi ong tepin Kristian en Ipru ko me mi Sudia. w23.10 24 ¶1-2

Nan pahr 522 Mwohn Krais, en mehn Suhs kan ar imwintihti kan kahrehiong koperment en Persia en kauhdi arail doadoahk ni tehnpas sarawio. Ahpw Sekaraia kamehlelehiong mehn Suhs ko me Siohwa pahn ketin doadoahngki sapwellime manaman me uhdahn kehlail pwehn sewese irail mendahki kahpwal kan. Nan pahr 520 Mwohn Krais, Nanmwarki Darius mweidada irail en pousehlahte wia doadoahko oh pil kihong irail mwohni pwehn wia met. E pil ruwese kepina en wasa ko ren sewese irail. (Esra 6:​1, 6-10) Siohwa ketin inoukihong sapwellime aramas akan me e pahn ketin sewese irail ma re kin mwohnkihte doadoahk en onohnsapahlo. (Ak. 1:​8, 13, 14; Sek. 1:​3, 16) Pwehki kangoang sang soukohp ko, mehn Suhs ko pwurehng tepida koadoahki tehnpas sarawio nan pahr 520 Mwohn Krais, oh kereniong sounpar limau mwurin mwo, irail kanekehla. Pwehki irail nsenohkihte kupwuren Koht mendahki kahpwal tohto, Siohwa ketin sewese irail. Pwehki met, irail kin kaudokiong Siohwa ni peren.—Esra 6:​14-16, 22. w23.11 15 ¶6-7

Mendahki aramas tohto rongehr duwen Eipraam, pali laud ese soahng keite duwen ih. Ahpw, ke ese soahng tohto duwen Eipraam. Karasepe, ke ese me Paipel mahsanih me Eipraam iei “semen irail koaros me kin pwoson.” (Rom 4:11) Ahpw, ke kakete medewe, ‘I kak duwehte Eipraam oh ahneki soangen pwosonohte me e ahneki?’ Ei, ke kak. Ehu ahl me kitail kak kakairada soangen pwoson me Eipraam ahneki iei sang ni atail onopki eh mehn kahlemeng. Koht ketin mahsanihong Eipraam en keseula ehu sahpw me uhdahn doh, kousoan nan ihmw likou erein sounpar tohto, oh song en meirongkihla nah pwutak kompoakeo Aisek. Eipraam wia soahng pwukat koaros pwehki e pwoson laud Siohwa. Pwehki eh pwoson oh wiewia mwahu kan, met imwikihla Siohwa eh ketin kupwurperenki oh wiahla kompoakepah. (Seims 2:​22, 23) Siohwa ketin kupwurki kitail koaros—pil kowe—en pwungla reh oh wiahla kompoakepah. Pwehki met, e ketin doadoahngki sounnting en Paipel ko Pohl oh Seims en koasoia ahn Eipraam mehn kahlemeng. w23.12 2 ¶1-2

Sister kan, esehla en rong mwahu oh koasoi ni kadek. E kesempwal ong Kristian kan en wia met. Wahnpoaron Seims kihong kitail kaweid mwahu me mi powe. Ni omw kin rong kanahieng ni meteikan ar koasoi, ke kasalehda me ke kin ‘iang irail nan arail lokolok.’ (1 Pit. 3:8) Ma ke sohte nohn wehwehki dahme emen koasoia de ia eh pepehm, idek peidek kan me konehng. Kowe eri medewe mahs mwohn omw koasoi. (Lep. Pad. 15:28) Pein idek rehmw: ‘Dahme I pahn koasoiao e mehlel oh kangoang? E kin kasalehda wahu oh kadek?’ Sukuhlsang sister kan me kin rong kanahieng oh koasoi ni kadek. (Lep. Pad. 31:26) Rong kanahieng mwomwen arail kin koasoi. Ni omw esehla mwahu soangen koahiek wet, e pahn mengeiong uhk en ahneki nanpwungmwahu rehn meteikan. w23.12 21 ¶12

Rahnwet, Siohwa kakete doadoahngki atail peneinei, kompoakepatail, oh elder kan pwehn sewesei kitail. Ahpw, ni atail kin nsensuwedla, ele kitail kin men tohrohr sang meteikan. Kitail kin men kelehpwla. Koaros kin ahneki soangen pepehm wet. Dahme kitail kak wia pwehn ale sapwellimen Siohwa sawas? Song en dehr katohreiukla. Ni atail kin katohrekitailla, kitail kakete tepida medemedewehte pein kitail oh kahpwal kan me kitail kin lelohng. Soangen madamadau wet kak kahrehiong kitail en wiahda pilipil sapwung. Ei mehlel, kitail koaros anahne ahnsou en kelehpwla, ahpw mehlel ni ahnsou me kahpwal laud ehu wiawi nan atail mour. Oh ma ahnsou werei kitail kin katohrei kitail, kitail kakete soikala sawas sang irail me Siohwa kin ketin doadoahngki pwehn sewesei kitail. Eri, ale sawas sang omw peneinei, kompoakepahmw, oh elder kan. Wiahki met me Siohwa kin ketin doadoahngki pwehn seweseiuk.—Lep. Pad. 17:17; Ais. 32:​1, 2. w24.01 24 ¶12-13

Nasaraid kan kin inoukihda me ren dehr sehk pitenmoangarail. Irail kin kasalehda ni ahl wet me irail uhdahn uhpahiong Siohwa. Ahpw mie ahnsou kan nan poadopoad en Israel me meteikan sohte kin kalahnganki oh utung Nasaraid kan. Ekei pak, Nasaraid men anahne eimah pwehn kolokolete eh inowo oh weksang meteikan. (Eimw. 2:12) Pwehki kitail pilada en peikiong Siohwa, meteikan kin tehk me kitail weksang irail. Kitail pil anahne eimah pwehn padahkihong meteikan ni wasahn doadoahk de sukuhl me kitail Sounkadehdehn Siohwa kan. Oh ni wiewia oh madamadau en sampah wet eh wie susuwedla, ele kitail kin apwalki mour pahrekiong kaweid en Paipel kan oh ehukihong meteikan rongamwahwo. (2 Tim. 1:8; 3:13) Ahpw ahnsou koaros tamataman me kitail kin “kaperenda” Siohwa ni atail kin eimah oh weksang meteikan me sohte kin papah ih.—Lep. Pad. 27:​11, NW; Mal. 3:18. w24.02 16 ¶7; 17 ¶9

Medewehla wekpeseng en aramas akan nan mwomwohdiso en Rom. Ekei irail mehn Suhs kei me sukuhlki en peikiong Kosonned en Moseso, ahpw ekei kohsang wehi teikan, oh mwomwen arail tikida wekpeseng. Ekei Kristian ko ele wia lidu kei ah meteikan soh, oh mwein ekei naineki lidu kan. Ia duwen Kristian ko ar kak pousehlahte limpoakpene mendahki soangen wekpeseng ko? Wahnpoaron Pohl kangoange irail en kin “kasamwo emenemen.” Ia wehwehn eh koasoio? Lepin lokaiao “kasamwo” kin wehwehki en kadekohng de kasamwolong emen nan imwomw de en wiahki ih kompoakepahmw. Karasepe, Pohl padahkihong Pailimwon ia duwen eh pahn kasamwo liduwo Onesimus me tangasang eh wasa. E koasoia: “Kasamwo ih ni kadek.” (Pail. 17) Oh Persila oh Akwila kasamwo Apolos me sohte nohn ese padahk en Kristian duwehte ira, sang ni ara “kahrehda ih.” (Wiewia 18:26) Kristian ko sohte mweidohng arail wekpeseng en kahrehda kahpwal nanpwungarail ahpw irail kin kasamwo emenemen. w23.07 6 ¶13

Kahrepe keieu kesempwal me ke inoukihong Siohwa omw mour iei pwehki ke poakohng ih. Omw poakohng ih sohte pidadahte omw pepehm. Ke poakohngala Siohwa pwehki ke esehla “loalokong pwung” duwen ih oh kupwure. (Kol. 1:9) Omw onopki Paipel kamehlelehiong uhk (1) me Siohwa ketin ieias, (2) me Paipel iei sapwellime Mahsen, oh (3) me e kin ketin doadoahngki sapwellime pwihn pwehn kapwaiada kupwure. Irail me kin inoukihong Siohwa arail mour anahne ese padahk mengei kan sang nan Paipel oh kin peikiong sapwellimen Koht koasoandi kan. Irail kin wia uwen ar kak en padahkihong meteikan dahme irail sukuhlki. (Mad. 28:​19, 20) Arail poakohng Siohwa kin laudla, oh irail kin inengieng kaudokiong ih kelehpw. Ke kin wia met? w24.03 4-5 ¶6-8

Apikail pwoudiki Napal me Paipel mahsanih kin lemei oh sakanakan. (1 Sam. 25:3) E apwal ong Apikail en mi rehn soangen ohlo. Ia duwe, mie ahl mengei ehu me Apikail kak mweikihsang eh pwoudo? Ahnsou mwahu kohwong ih ni Depit, me mwuhr wiahla nanmwarki en Israel, kodohng kemehla eh pwoudo pwehki eh kasarowehdi ih oh nah ohl ako. (1 Sam. 25:​9-13) Apikail kakete tangasang oh mweidohng Depit en kemehla Napal. Ahpw e sohte wia met, e peki rehn Depit en dehr kemehla Napal. (1 Sam. 25:​23-27) Dahme kahrehda e wiahki met? Apikail poakohng Siohwa oh wauneki sapwellime koasoandi kan me pid mouren pwopwoud. E ese me mouren pwopwoud wia mehkot sarawi mwohn silangin Siohwa. E men kaperenda Koht, oh met ele kamwakid ih en wia soahng koaros pwehn doarehla tohnimweo, iangahki eh pwoudo. E mwadangete wiahda soahng kan pwehn kauhdi Depit en dehr kemehla Napal. w24.03 16 ¶9-10

Ia duwe, mie ekei nan omw mwomwohdiso me kin song en dehr kedirepwkihla soahng kan me sohte nohn kesempwal pwehn kalaudehla arail papah Siohwa? Mie me pwulopwul kan me ke ese me kin nantihong kesihnenda teng pwehn weksang meteikan nan sukuhl mendahki e apwal ren wia met? Mie irail kan me kin kolokolete arail lelepek mendahki uhwong sang peneinei? Koasoanehdi teng ken wia uwen omw kak en kangoange irail oh padahkihong irail me ke perenki dahme irail kin wia ong Siohwa. (Pail. 4, 5, 7) Siohwa ketin mwahngih me kitail men kaperenda ih oh me kitail uhdahn men wiahda tounmetei kan pwehn mour pahrekiong atail inou ong ih. E ketin wauneki oh ketikihong kitail ahnsou mwahu pwehn kasalehiong ih me kitail poakohng Ih. (Lep. Pad. 23:​15, 16) Eri, kitail koasoanehdi teng en pousehlahte papah Siohwa, men patohwanohng ih uwen atail kak koaros. w24.02 18 ¶14; 19 ¶16

Medewehla dahme wiawi ni kaimwiseklahn pahr 29 ni ahnsou me Sises ketin tapiada sapwellime doadoahk en kalohk. Sises oh ineo, Mery, lukohng kamadipw en kapwopwoud ehu nan Kena. Mery sewesewese irail kan me kohdo ni kapwopwoudo. Ahpw erein kamadipwo, kahpwal ehu pwarada—wain ko nekila. Mery mwadangete kohla rehn nah pwutako oh nda: “Solahr nimarail wain.” (Sohn 2:​1-3) Dahme Sises ketin wia? E ketin wekidala pihl ong “wain mwahu.” (Sohn 2:​9, 10) Sises ketin wiahda manaman tohto erein sapwellime doadoahk en kalohk. E ketin doadoahngki sapwellime manaman kapwuriamwei pwehn sewese aramas kidkid kei. Karasepe, nan sapwellime manaman riau kohte—katungoale ohl 5,000 oh mwuri ohl 4,000—ele pidada aramas tohtohsang 27,000 ma kitail kapatahiong lih oh seri kan me pil iang mi wasao. (Mad. 14:​15-21; 15:​32-38) Nan ahnsou riau ko, Sises pil ketin kamwahwihala me soumwahu tohto.—Mad. 14:14; 15:​30, 31. w23.04 2 ¶1-2

Ma kahpwal laud ehu wiawihong kitail, ele mie rahn kei me paliwaratail oh atail pepehm kin luwetala. Duwehte Elaisa, kitail kakete pehm me e nohn apwal ong kitail en pwourda. Kitail men memeirte. (1 Nan. 19:​5-7) Ele kitail anahne sawas pwehn doulahte papah Siohwa. Ni soangen ahnsowo, Siohwa ketin kamehlelehiong kitail me e pahn ketin sewese kitail, duwehte me sansalda nan iren rahn en rahnwet. Nanmwarki Depit alehdi sawas wet. Ni eh lelohng kahpwal kan oh kahpwal sang eh imwintihti kan, e patohwanohng Siohwa: “Palimaun en nin limomwi me kin utung ie.” (Mel. 18:​35, NW) Siohwa kalapw ketin sewesei kitail ni eh kin ketin doadoahngki meteikan. Karasepe, ni ahnsou me Depit kin pehm me e luwet, kompoakepaho Sonadan kin mwemweitla reh pwehn kakehlaka oh kangoange ih. (1 Sam. 23:​16, 17) Duwehte met, Siohwa ketin doadoahngki Elisa en sewese Elaisa.—1 Nan. 19:​16, 21; 2 Nan. 2:2. w24.01 23-24 ¶10-12

Siohwa kin ketin apwalih kitail ni eh ketin sapankihong kitail soahng tohto. Sang liho me karasaraskihong “kupwurokong,” de erpit mehlel nan Lepin Padahk irelaud 9, kitail sukuhlki me Siohwa kin ketin sapan oh kin ketikihong kitail soahng mwahu tohto. Iretikitik ko koasoia me liho lukehdo aramas akan en pedolong nan imweo pwehn tungoale mwenge oh nim wain me e kaunopadahr. (Lep. Pad. 9:2) Iretikitik 4 oh 5 pil doula koasoia me liho kin ndindaiong me “pweipweio” en “kohdo tungoale” mwenge ko. Dahme kahrehda kitail en ale luhko sang lih menet? Siohwa ketin kupwurki me sapwellime kan en kin loalokong oh dehr lelohng keper. E sohte ketin kupwurki kitail en wiahda sapwung kan me pahn kamedekeikitailla. Ihme kahrehda “e kin ketin nahkpene erpit mehlel ong me pwung.” (Lep. Pad. 2:​7, NW) Ni atail kin lemmwiki Siohwa, kitail pahn men kaperenda ih. Kitail kin rong sapwellime kaweid erpit, oh perenki kapwaiada.—Seims 1:25. w23.06 23-24 ¶14-15

Mehnda ma kitail sohte kak wia uwen me kitail men wia ong Siohwa, kitail kak kamehlele me e kin ketin kalahnganki atail nannanti koaros en kaperenda ih. Ia duwen atail ese met? Ni mwehin Sekaraiao, Siohwa ketin mahsanihong sapwellime soukohpo en wiahda nihn ehu sang kohl oh silper me pekedersang irail kan me mihmihte Papilon. (Sek. 6:11) “Nihno” pahn wia “mehn ketemen ehu” ong irail pwehki arail sawas laud kan. (Sek. 6:14) Kitail kak kamehlele me Siohwa sohte pahn ketin manokehla atail nannanti en papah ih erein ahnsou apwal kan. Kitail pahn pousehlahte lelohng kahpwal kan ni imwin rahn pwukat, oh e kakete pil suwedla ni ahnsou kohkohdo. (2 Tim. 3:​1, 13) Ahpw, kitail sohte anahne pwunod laud. Tamataman sapwellimen Siohwa mahsen ong sapwellime aramas akan ni mwehin Akkai: “I kin ieiang kumwail . . . Kumwail dehr masak.” (Ak. 2:​4, 5) Kitail pil kak kamehlele me Siohwa pahn ketin ieiang kitail erein atail wia uwen atail kak pwehn wia kupwure. w23.11 19 ¶20-21

Siohwa kakete sohte ketin mweidohng ahn wahnpoaron Piter sapwung kan en ntingdi nan Paipel. Ahpw e ketin mweidohng en ntingdi pwehn kak wia mehn kasukuhl ong kitail. (2 Tim. 3:​16, 17) Atail sukuhlki duwen ohl menet me ahneki luwet oh pepehm me duwehte atail kak sewese kitail en kilang me Siohwa sohte kin ketin kasik me kitail en unsek. E kin ketin kupwurki kitail en pousehlahte papah ih—de nannantihte—mendahki atail luwet akan. Dahme kahrehda kitail anahne pousehlahte papah Siohwa? Mwurin atail medewe me kitail powehdier soangen luwet ehu, kitail kakete pil pwurehng wia. Ahpw kitail kin nannantihte doadoahk pwehn kamwahwihala. Kitail koaros kin nda de wia soahng kan me kitail kin koluhkihla mwuhr; ahpw ma kitail sohte uhdi, Siohwa pahn ketin sewese kitail en kekeirda. (1 Pit. 5:10) Limpoak me Sises ketin kasalehiong Piter, mendahki eh luwet akan, kak kamwakid kitail en pousehlahte papah Siohwa. w23.09 20 ¶2-3

Sises kakete ketin kamwahwihala Lasarus duwehte Marda eh koasoia nan iren rahn en rahnwet. Ahpw e kupwurki wia mehkot me uhdahn mwahusang. E ketin inoukihong: “Riomw pwutako pahn pwurehng mourda.” E pil mahsanih: “Ngehi me kaiasada oh ngehi me mour.” (Sohn 11:​23, 25) Ei, Koht ketikihong Sises manaman en kaiasada me melahr kan. Mwoweo, Sises ketin kaiasada serepein pwulopwul men mwurinte serepeino mehla, oh e pil ketin kaiasada mwahnakapw men, mwomwen rahnohte me mwahnakapwo mehla. (Luk 7:​11-15; 8:​49-55) Ia duwe, e kak ketin kaiasada emen me melahr erein rahn pahieu oh paliwaro tepidahr ohla? Mery, rien Lasarus lih teio, kohieila pwehn tuhwong Sises. E pwurehng nda dahme rie serepeino nda: “Maing Kaun, ma komw ketikette met, riei pwutako sohte pahn mehla.” (Sohn 11:32) Ni Sises eh mahsanih oh karonge Mery oh meteikan ar wie sengiseng, e uhdahn kupwur toutoula. Pwehki eh uhdahn ketin poakehla kompoakepah ko, e tepida tentenihr. E mwahngih ia uwen kamedek ni emen me aramas kin poakohng eh mehla. E uhdahn kupwurki ketikihsang dahme kin kahrehda arail sengiseng! w23.04 10-11 ¶12-13