June

Siohwa ketin kapaia tepin Kristian ko pwehki ar wiahda wekidekla kan nan soangen irairo. Re kin kalapw lelohng kalokolok, ekei pak ni ahnsou me re sohte kasik. Medewehla dahme wiawihong Parnapas oh wahnpoaron Pohl erein ara kalokalohk nan wasa ehu nan Listra. Nin tapio, aramas ako kasamwo oh rong ira. Ahpw mwuhr, sounuhwong kan “kamwakid pokono,” oh ekei irail kate Pohl oh kohkohsang pwehn mehla. (Wiewia 14:19) Ahpw Parnapas oh Pohl pousehlahte kalohk ehu wasa tohrohr. Ia imwilahn met? Ira “katohnpadahkihala me tohto,” oh ara koasoi ko oh mehn kahlemeng kakehlaka riara Kristian ko. (Wiewia 14:​21, 22) Me tohto paiekihda pwehki Parnapas oh Pohl sohte uhdihsang kalohk mendahki ira lelohng kalokolok kan. Ma kitail sohte uhdihsang wia doadoahk me Siohwa ketin kupwurki kitail en wia, e pahn ketin kapaikitailda. w23.04 16-17 ¶13-14

Erein eh mour, Nanmwarki Depit lelohng imwintihti keper tohto, oh e kin kalapw kapakap oh peki sapwellimen Siohwa sawas. Depit uhdahn kamehlele me Siohwa kin ketin karonge oh sapengala eh kapakap kan. Ke pil kak kamehlele soahngohte. Paipel kin kamehlelehiong kitail me Siohwa kak ketikihong kitail erpit oh kehl me kitail anahne pwehn dadaur. E kak ketin doadoahngki riatail Kristian kan de pil irail kan me sohte kin kaudokiong ih met en sewese kitail. Mendahki Siohwa sohte kin ketin ahnsou koaros sapengala atail kapakap kan ni ahl me kitail kasik, kitail ese me e pahn ketin sapengala. E pahn ketikihda dahme kitail anahne oh pil ni ahnsou me kitail anahne. Eri, kapakap oh kamehlele me Siohwa pahn ketin karongeiuk. Likih me Siohwa pahn ketin apwalihiuk ahnsou wet oh me e pahn ketin ‘kaitarala anahn akan koaros’ nan sampah kapwo me kohkohdo.—Mel. 145:16. w23.05 8 ¶4; 13 ¶17-18

E mwahu en medemedewehte kamwahu kan me kohsang omw pahn lel omw mehn akadei. Soangen kamwahu dah kan me ke kak medemedewe? Ma omw mehn akadeio kin pidada wadek Paipel de kapakap, medewehla ia duwen met eh pahn kakehlakahda omw nanpwungmwahu rehn Siohwa. (Mel. 145:​18, 19) Ma omw mehn akadeio iei en kakairada irair en Kristian ehu, medemedewehte ia duwen eh pahn kamwahwihala omw nanpwungmwahu rehn meteikan. (Kol. 3:14) Dahme ke sou ntingihedi kahrepe koaros me ke men kapwaiakihda omw mehn akadeio? Kaukaule kilang dahme ke ntingihedi. Oh pil werekiong irail kan me pahn kangoangeiuk en lel omw mehn akadei. (Lep. Pad. 13:20) Ahpw mie rahn akan me kitail koaros sohte kin inengieng lel atail mehn akadei kan. Ia duwe, met wehwehki me kitail sohte kak wia mehkot pwehn lel atail mehn akadeio? Soh. Kitail pil kak nannantihte pwehn lel atail mehn akadeio pil ni ahnsou me kitail sohte inengieng wia met ekei pak. Mehlel, met sohte pahn mengei. Ahpw ke pahn peren ni omw lel omw mehn akadeio. w23.05 27-28 ¶5-8

Atail ese me kitail pein pwukoahki atail pilipil kan kak kamwakid kitail en wehkada dipatail kan, kapwungala atail sapwung kan, oh dehr pwurehng wiahda sapwung. Atail wia met kak sewese kitail en mihmihte nan weirentang en mour. Ma ke wiahda pilipil sapwung ehu, dahme ke kak wia? Dehr doadoahngkihla omw ahnsou oh kehl pwehn kadehdehda me ke pwung de kapwopwohnki pein uhk de meteikan. Ahpw, pohnese omw sapwung kan oh wia uwen omw kak koaros ahnsou wet. Ma ke nsensuwedkihla sapwung ehu me ke wiahda, ni aktikitik kapakapohng Siohwa, kasalehda omw sapwung kan, oh peki en ketin mahkohng uhk. (Mel. 25:11; 51:​3, 4) Peki mahk ong irail kan me ele ke kansensuwedihala, oh ma anahn, rapahki sawas sang elder kan. (Seims 5:​14, 15) Sukuhlsang omw sapwung kan, oh song en dehr pwurehng wiahda. Ni omw wia met, ke kak kamehlele me Siohwa pahn ketin kasalehiong uhk mahk oh ketikihong uhk sawas me ke anahne.—Mel. 103:​8-13. w23.08 28-29 ¶8-9

Sehoiada sewese Nanmwarki Sohas en wia aramas mwahu men. Eri, ni ahnsou me nanmwarkio pwulopwul, e kin men kaperenda Siohwa. Ahpw mwurin Sehoiada mehla, Sohas uhd kin rong irail me lapalap kan me kesehla oh uhwongada kaudok mehlel. (2 Kron. 24:​4, 17, 18) Mendahki Siohwa ketin kupwurtoutoukihla met, e ketin “kadaralahng irail soukohp kei pwe re en kapehmkin irail ar sapwung kan pwe re en pwurehng sohpeiong ih, ahpw aramas akan sohte men rong.” Irail sohte pil rong nein Sehoiada pwutako, Sekaraia, me sohte wiahte sapwellimen Siohwa soukohp oh samworo, ahpw e pil wia emen me Nanmwarki Sohas pahn rianiki. Nanmwarki Sohas pil kemehla Sekaraia. (2 Kron. 22:11; 24:​19-22) Sohas sohte kin lemmwiki Siohwa. Siohwa ketin mahsanihier: “I pahn kin mwamwahliki irail kan me kin mwamwahlikin ie.” (1 Sam. 2:30) Mwuhr, pwihn en sounpei en Siria tikitik ehu kalowehdi nein Sohas “karis laud” oh kahrehiong ih en “inenen ohla laud.” (2 Kron. 24:​24, 25) Emen nein Sohas ladu kemehla Sohas pwehki eh kemehla Sekaraia. w23.06 18-19 ¶16-17

Wahnpoaron Pohl mihmi ekis werei nan Episos, kalokalohk oh padahngki rongamwahwo. (Wiewia 19:​1, 8-10; 20:​20, 21) E uhdahn poakohng rie Kristian ko oh men sewese irail en lelepekohngete Siohwa. Mahso mehn Episos ko kin kamehlele padahk en pelien lamalam likamw kan oh pil akmanaman kan. Aramas akan nan Episos kin uhdahn wia tiahk suwed oh sohte kin namenengki. Sipai kan nan arail wasahn kasdo oh arail kasarawi kan kin kalapw pidada tiahk samin me pid wia nsenen pwopwoud. (Ep. 5:3) Mehn Episos tohto “solahr arail pepehm en namenek.” (Ep. 4:​17-19) Mwohn arail sukuhlki duwen sapwellimen Siohwa koasoandi kan ong dahme pwung oh sapwung, kadeikpen loalarail sohte kin kedirepwa arail wiahda mehkot sapwung. Irail pil sohte kin nsenohki ia sapwellimen Siohwa pepehm ong arail wiewia kan. Eri Pohl kak nda me irail mi “nan rotorot oh re kin dohsang mour me kin kohsang rehn Koht.” Ahpw ekei mehn Episos ko kohkohsang nan rotorot. w24.03 20 ¶2, 4; 21 ¶5-6

Pwehn wia Sounkopwung men, Kidion anahne doadoahk laud. Ni en mehn Midian ko ar tangdoaui erein mahweno, Kidion pwakih irail sang wahu en Sesreel lel Pillap en Sordan. (Sounkopwung 7:22) Ia duwe, Kidion uhdi ni Pillap en Sordan? Soh! Mendahki irail pwangadahr, ih oh nah sounpei silipwuki ko kotehla oh pousehlahte pwakih arail imwintihti ko. Irail eri pwakihedi mehn Midian ko oh kaloweiraildi. (Sounkopwung 8:​4-12) Kidion likih me Siohwa pahn ketin kakehlakahda ih, oh ih met me Siohwa ketin wia. (Sounkopwung 6:​14, 34) Ehu ahnsowo, Kidion oh nah ohl ako tang pwakih nanmwarki en Midian riemen ni ara dake kamel. (Sounkopwung 8:​12, 21) Koht ketin sewese mehn Israel ko en koledi irail oh kana nan mahweno. Elder kan pil kak koapworopworki Siohwa, me “sohte mwahn kin ngirala de luwetala.” E pahn ketikihong irail kehl ni ahnsou me re anahne.—Ais. 40:​28, 29. w23.06 6 ¶14; 7 ¶16

Kitail pil kak ahneki mohngiong kehlail erein kahpwal sohte lipilipil me kitail ele lelohng. Eri likih Siohwa. Tehk ia duwen Parak eh pweida pwehki eh likih sapwellimen Siohwa kaweid. Mendahki mehn Israel kan sohte kaunopada ong mahwen oh sohte neirail dipwisou en mahwen, Siohwa ketin mahsanihong Parak en kohla peiong kaunen sounpei en mehn Kenan ko, Sisera, oh nah sounpei ko me naineki dipwisou en mahwen tohto. (Sounkopwung 5:8) Lih soukohpo, Depora ndaiong Parak en kohdihla wasa patapato oh peiong Sisera oh were werennansapw 900 ko. Nan wasa patapato, e pahn apwal ong mehn Israel kan en peiong werennansapw marahra ko. Mendahki met, Parak peikiong kaweido. Ni sounpei ko ar kohdi sang pohn Nahna Tapor, Siohwa ketin kamwerehdi keteu mosul sang nanleng. Weren Sisera werennansapw ko tengla nan pwelmatak, oh Siohwa ketin kahrehiong Parak en kana. (Sounkopwung 4:​1-7, 10, 13-16) Duwehte met, Siohwa pahn ketin sewese kitail en kana ma kitail kin likih ih oh pil kaweid kan me e ketikihda sang sapwellime pwihn. w23.07 18-19 ¶17-18

Kanengamah kin kesempwal ong komourpatail. Duwehte ladu lelepek kan mahso, kitail anahne awih ni kanengamah pwe Koht en ketin kapwaiada sapwellime inou kan. (Ipru 6:​11, 12) Paipel kin karasahiong atail irair duwehte ahn soumwet men. (Seims 5:​7, 8) Soumwet men kin doadoahk laud pwehn padokedi weren tuhke oh kalamwur, ahpw e sohte uhdahn ese iahd weren tuhkeo pahn wosada. Eri soumweto kin awiawih ni kanengamah oh koapworopworki me e pahn dolung wah kan. Duwehte soumweto, kitail kin doadoahk laud mendahki kitail “sehse mehnia rahn me [atail] Kauno pahn ketido.” (Mad. 24:42) Kitail kin awih ni kanengamah oh kamehlele me ni sapwellime ahnsou, Siohwa pahn ketin kapwaiada soahng koaros me e ketin inoukihda. Ma kitail sohla kanengamah, kitail kakete pwangahkihda awih oh ekisekis peila sang padahk mehlel. Kitail pil kakete tepida rapahki soahng kan me kitail medewe kak kahrehiong kitail peren ahnsou wet. Ahpw ma kitail kin kanengamah, kitail kak dadaurete lel ni imwio oh pitla.—Maika 7:7. w23.08 21 ¶7

Ni atail kapahrekihpene Daniel 2:​41-43 oh kokohp teikan nan pwuhken Daniel oh Kaudiahl, kitail kak wehwehki me patehn nehn sansalo kin karasaraskihong wehin Amerika oh Britain me kin ehupene, oh me wia kaunda me keieu kehlail nin sampah nan atail ahnsou. Me pid kaunda kehlail wet, Daniel kohpada me ‘mwehi wet pahn kehlail, ahpw mengei en ohla.’ Dahme kahrehda e mengei en ohla? Pwehki aramas akan, me karasaraskihong pwehl, kin kaluwetehla eh kehl me rasehng mete. Kitail sukuhlki padahk mehlel kesempwal kan sang sansalo me Daniel kawehwehda. Keieu, Kaunda Kehlail en Britain-Amerika kasaledahr me e uhdahn kehlail. Karasepe, Wehin Amerika oh Britain iangete wehi kan me kana nan Mahwen Keieu oh Keriau en Sampah. Ahpw kaunda kehlail wet luwetkilahr oh pil pahn pousehlahte luwetala pwehki towe kan kin uhpene oh pil uhwong koperment. Keriau, kaunda kehlail en Britain-Amerika iei kaimwiseklahn kaunda nin sampah mwohn Wehin Koht pahn kasohrehla wehi kan koaros en aramas. w23.08 10-11 ¶12-13

Ekei pak, Depit kin nsensuwedla pwehki kahpwal oh lokolok koaros me e kin sohsohpai. (Mel. 18:​4, 5) Ahpw, sapwellimen Siohwa limpoak oh epwel kin kakehlahda ih. Siohwa kin ketin kahluwahla kompoakepah menet me pwangada nan “mohsen dihp” oh “ni pihl mwakelekel.” Pwehki met, Depit kehlailda oh kak pousehlahte papah Siohwa ni peren. (Mel. 18:​28-32; 23:2) Duwehte rahnwet, “pwehki sapwellimen Siohwa limpoak loalopwoat kitail sohte sohrala” ni atail kin lelohng kahpwal kan. (Koul Ked. 3:​22, NW; Kol. 1:11) En Depit mour kin kalapw mi nan keper oh mie eh imwintihti kehlail tohto. Ahpw, sapwellimen Siohwa limpoak kin sewese ih en dehr perki mehkot oh kin pere ih. Depit kak pehm me Siohwa kin ketin ieiang ih nan irair koaros oh met kin kansenamwahwih. Kahrehda e kak koulki: “[Siohwa] ketin kasaledekihiehla sang nan ei masak koaros.” (Mel. 34:4) Mendahki ekei pak Depit kin uhdahn masepwehkada, e kin kak powehdi met pwehki e ese me Siohwa ketin poakohng ih. w24.01 30 ¶15-17

Sukuhlsang ahn Sohas pilipil suwed kan. Mwurin Samworo Lapalap Sehoiada mehla, Sohas pilada werek suwed kan. (2 Kron. 24:​17, 18) E pilada en rong kaun akan en Suda me sohte kin poakohng Siohwa. Ke pahn pwungki me Sohas anahne soikala irail pwukat pwehki irail kin wia me suwed. Ahpw, e rong arail kaweid suwed kan. Ni mehlel, ni ahnsou me kiseho Sekaraia song en kapwungala ih, Sohas kemehla ih. (2 Kron. 24:​20, 21; Mad. 23:35) Tiahk wet uhdahn pweipwei oh suwed! Nin tapio Sohas mwahu, ahpw e kesehla oh uhwongada kaudok mehlel oh wiahla sounkam aramas men. Mwuhr, nah ladu kan kemehla ih. (2 Kron. 24:​22-25) Ma e pousehlahte rong Siohwa oh irail kan me kin poakohng Ih, eh mour pahn mwahu! w23.09 9 ¶6

Sises mwahngih me Piter kak kolokolete eh lelepek. Eri, ni kadek Sises mahsanihong Piter en “dehr masepwehk.” Sises eh ketin koapworopworki Piter wekidala ahn Piter mour. Mwuhr, Piter oh rie ohlo Andru pwilikihdi ara pesines en laido oh iangala Sises nan sapwellime doadoahk en kalohk. Siohwa eri ketin kapaiairahda laud. (Mark 1:​16-18) Piter kilang soahng kapwuriamwei tohto ni eh iang wia sapwellimen Krais tohnpadahk. E kilang Sises ketin kamwahwihala me soumwahu kan, kausala ngehn suwed kan, oh pil kaiasada me mehla kan. (Mad. 8:​14-17; Mark 5:​37, 41, 42) Piter pil iang kilang kaudiahl kapwuriamwei ehu duwen Sises eh ketin wia Nanmwarki en Wehin Koht, oh e sohte manokehla duwen met. (Mark 9:​1-8; 2 Pit. 1:​16-18) Ei, ma e sohte idawehnla Sises, Piter sohte pahn kak kilang soahng kan me e kilang. Ia uwen eh perenki me e sohte mweidohng eh madamadau sapwung kan en kahrehiong ih en katihasang soangen kapai pwukat! w23.09 21 ¶4-5

Nan nah tepin kisinlikowo, wahnpoaron Piter doadoahngki lepin lokaiao “uhdahn limpoakpene.” Soangen limpoak wet kin pwaindi “dihp tohto,” kaidehn ekeite. (1 Pit. 4:8) Ele Piter tamanda ni Sises eh ketin padahkihong ih sounpar kei mwoweo duwen en mahkohng meteikan. Ni ahnsowo, ele Piter medewe me ih aramas mwahu men ni eh nda me e pahn mahkohng rieo “pak isuh.” Ahpw, Sises ketin padahkihong ih—pil kitail—en mahkohng riatail kan “pak 77,” me wehwehki sohte irepen atail en wia met. (Mad. 18:21) Ma e kin apwal ong uhk en kapwaiada kaweid wet, dehr mworusala! Sapwellimen Siohwa ladu soh unsek kan koaros kin ekei pak apwalki mahkohng meteikan. Dahme kesempwal ahnsou wet iei en wia dahme ke kak wia pwehn mahkohng riomwo oh wiahda popohl reh. w23.09 29 ¶12

Nan kapehden mwahmw, Sona pwoson me Siohwa pahn ketin karonge eh kapakapo oh me Siohwa pahn ketin sewese ih. Siohwa ketin doarehla Sona oh mwuri e onopadahr en wia doadoahko me Siohwa mahsanihong en wia. (Sona 2:10–3:4) Erein kahpwal ehu, ke kin masak en kasalehda omw madamadau nan kapakap? De ke kin nohn pwang en onop? Tamataman me Siohwa uhdahn ketin mwahngih omw irair. Eri ni omw pil wia kapakap me mengei, ke kak kamehlele ma e pahn ketikihong uhk dahme ke uhdahn anahne. (Ep. 3:20) Ma e apwal ong uhk en wadawad oh onop pwehki omw soumwahu, pwang, de uhdahn pwunod, ke kak rong ngilen wadawad en Paipel de ehu neitail sawasepen Paipel kan. Ke pil kak rong ehu neitail koul kan de kilang kasdo ehu nan jw.org. Sang ni omw kapakap ong Siohwa oh rapahki pasapeng nan neitail sawasepen Paipel kan me e ketikihda, e pahn ketin seweseiuk en kehlail. w23.10 13 ¶6; 14 ¶9

Loalen impwal sarawio oh tehnpas sarawi kan me kokouda mwuhr nan Serusalem duwepenehte. Mie pere riau—“Wasa Sarawi” oh “Wasa Sarawihe”—me kahdeng ehu katohrepeseng. (Ipru 9:​2-5; Eks. 26:​31-33) Loalen wasa Sarawio, mie dewen lamp kohl ehu, pei sarawi en isik warpwohmwahu, oh tehpel en pilawa ehu. “Samworo keidi” kante me mweimwei en pedolong Wasa Sarawio pwehn wia arail pwukoa sarawi kan. (Nemp. 3:​3, 7, 10) Wasa Sarawihe, mie kohpwahn inou kohl ehu me karasaraskihong wasa me Siohwa kin ket ie. (Eks. 25:​21, 22) Samworo lapalapohte me mweimwei en daulih kahdengo kohla Wasa Sarawiheo ni Rahnen Tomwo me kin wiawi pak ehu nan pahr koaros. (Lip. 16:​2, 17) E kin pedolong wa ntahn mahn kan pwehn tomwki pein dipe kan oh dipen wehio pwon. Kedekedeo, Siohwa ketin kadehdehda wehwehn soahng pwukat me mi nan impwal sarawio.—Ipru 9:​6, 7. w23.10 27 ¶12

Mahsen en Koht kin pwurupwurehng kehkehlingkihong kitail en “poakohng emenemen.” (Sohn 15:12; Rom 13:8; 1 Des. 4:9; 1 Pit. 1:22; 1 Sohn 4:11) Ahpw limpoak iei pepehm ehu loalatail me sohte aramas emen kak kilang. Eri, ia duwen meteikan ar kak kilang me kitail kin poakohng irail? Sang ni atail lokaia oh wiewia kan. Mie soangsoangen ahl akan me kitail kak kasalehiong riatail kan me kitail poakohng irail. Iet ekei karasepen met: “Lokaia mehlelpene nanpwungamwail.” (Sek. 8:16) “Kolokol popohl nanpwungamwail.” (Mark 9:50) “Tiengla mwowe ni amwail kin kasalehda wahu ong emenemen.” (Rom 12:10) “Kasamwo emenemen.” (Rom 15:7) “Pousehlahte . . . mahkpene.” (Kol. 3:13) “Pousehlahte sawaskipene amwail wisik toutou kan.” (Kal. 6:2) ‘Kumwail kansenamwahwih emenemen.’ (1 Des. 4:18) “Kumwail . . . kangkakehlailih emenemen.” (1 Des. 5:11) “Kapakapki emenemen.”—Seims 5:16. w23.11 9 ¶7-8

Rahn koaros kitail kin wiahda pilipil kan me anahne atail pwoson en kehlail. Karasepe, atail pilipil kan kin pidada ihs me kitail en werekiong, mehn kamweit kan, sukuhl, mouren pwopwoud, seri kan, oh doadoahk en mwohni. E mwahu en pein idek rehtail: ‘Ahi pilipil kan kin kasalehda me I uhdahn kamehlele me koasoandi wet ongete ahnsou mwotomwot, oh me ahnsou keren sapwellimen Koht sampah kapwo pahn wiliandi? De I kin pilada en wia soahng kohte me irail me sohte kamehlele me re kak mour kohkohlahte kin wia?’ (Mad. 6:​19, 20; Luk 12:​16-21) Kitail pahn wiahda pilipil keieu mwahu ma kitail kakehlakahla atail pwoson me sampah kapwo uhdahn kerendohr. Kitail pil ahneki kahpwal kan me anahne atail pwoson en kehlail. Ele kitail anahne dadaur pahn kalokolok, soumwahu laud, de soahng teikan me kak kahrehiong kitail en mworusala. Nin tapio, ele kitail medewe me kitail kak dadaur pahn atail kahpwal kan. Ahpw soangen kahpwal pwukat kin kalapw mihmi werei, kahrehda atail pwoson anahne kehlail pwehn dadaur oh pousehlahte papah Siohwa ni peren.—1 Pit. 1:​6, 7. w23.04 27 ¶4-5

Siohwa ketin kasik me kitail en mwekid pahrekiong atail kapakap kan. Karasepe, ele brother men peki rehn Siohwa en ketin sewese pekihda en kommoal sang eh doadoahko pwehn kak iang towehda mihting tohrohr ehu. Ia duwen Siohwa eh kakete ketin sapengala eh kapakapo? Ele e pahn ketikihong brothero eimah me anahn pwehn koasoiong eh kaunen doadoahko. Ahpw brothero pil anahnehte en kohla rehn eh kauno oh peki. Mwein e anahne pwurupwurehng peki. Mwein e pil pahn peki rehn emen ienge tohndoadoahk ma ira kak weliali ara rahn en doadoahk kan de kak kommoal mehnda ma e sohte ale pweipwei. Siohwa ketin kasik me kitail en pwurupwurehng kapakapki dahme kesempwal ong kitail. Nin duwen me kitail kilang sang dahme Sises mahsanih, ekei atail pekipek kan ele sohte pahn mwadang pasapengla. (Luk 11:9) Eri, dehr uhdi! Pwurupwurehng kapakap ni ngidingid. (Luk 18:​1-7) Ni atail kin wia met, kitail kin kasalehiong Siohwa me atail pekipeko uhdahn kesempwal ong kitail. Kitail pil kin kasalehda me kitail pwoson me e kak ketin sewese kitail. w23.11 22 ¶10-11

Siohwa ketin inoukihong kompoakepaho Eipraam me pwehki kadaudoke wehi koaros nin sampah pahn ale kapai. (Sen. 15:5; 22:18) Pwehki Eipraam uhdahn pwoson Koht, e uhdahn kamehlele me sapwellimen Koht inou pahn pweida. Ahpw, ni Eipraam eh lel sounpar 100 oh eh pwoudo 90, pwopwoud lelepek wet saikinte nainekihda seri. (Sen. 21:​1-7) Mendahki met, Paipel mahsanih: “[Eipraam] koapworopworki oh pwoson me e pahn wiahla semen wehi tohto mendahki e mwomwen me met sohte pahn kak wiawi. E kamehlele met nin duwen me Koht ketin mahsanih.” (Rom 4:18) Ke ese me ahn Eipraam koapworopworo pweida. E wiahla semen Aisek, pwutako me erein ahnsou werei e kin koapworopworki en nainekihda. Dahme kahrehda Eipraam uhdahn kamehlele me Siohwa pahn ketin kapwaiada sapwellime inou? Pwehki eh nanpwungmwahu keren rehn Siohwa, Eipraam “uhdahn kamehlele me [Koht] pil kak ketin kapwaiada dahme E kin ketin inoukihda.” (Rom 4:21) Siohwa ketin kupwurperenki Eipraam oh wiahki ih aramas pwung men pwehki eh pwoson.—Seims 2:23. w23.12 8 ¶1-2

Brother pwulopwul men me likilik kin pwerisek en apwalih eh pwukoa kan koaros. Medewehla mehn kahlemeng mwahu en Sises. E kin ketin nsenohki apwalih eh pwukoa kan. E ketin kapwaiada pwukoa kan me Siohwa ketikihong, mehnda ma e apwal en wia met. E ketin poakohng aramas akan—ahpw mehlel sapwellime tohnpadahk kan—oh e kupwurki ketikihda moure ong irail. (Sohn 13:1) Pwehn alasang Sises, doadoahk laud pwehn kapwaiada pwukoa kan me ke alehdi. Ma ke sehse ia duwen omw pahn wia met, kin aktikitik oh peki sawas rehn brother koahiek kan. Dehr pohnkahke. (Rom 12:11) Ahpw, kapwaiada omw pwukoa kan, “wiahiong Siohwa, a kaidehn aramas.” (Kol. 3:23) Ei mehlel, ke sohte unsek, eri kin aktikitik oh pohnese sapwung kan me ke wiahda.—Lep. Pad. 11:2. w23.12 26 ¶8

Kitail koaros uhdahn perenki atail papidaisla oh wiahla kisehn sapwellimen Siohwa peneinei. E wia pai kaselel ehu en ahneki nanpwungmwahu keren wet rehn Siohwa. Kitail pwungki sounmelkahkao Depit, me koasoia: “Meid pai irail kan me komwi [Siohwa] ketin pilada, me komwi ketikiniraildo pwe re en kin kousoan nan mwoalomwi sarawi.” (Mel. 65:4) Soangen aramas dah me Siohwa kin ketin mweidohng en ahneki nanpwungmwahu keren reh? E kin ketin pilada irail kan me kin kadehdehda me re men ahneki nanpwungmwahu keren reh. (Seims 4:8) Ni omw inoukihong Siohwa pein kowe oh papidaisla, ke kak kamehlele me mwurin omw papidais, e pahn ketin ‘kamwerehdiong uhk soangen kamwahu kan ni uwe ieu me laud.’ (Mal. 3:10; Ser. 17:8) Papidais iei tepin kahk me ke wiahda pwehn papah Siohwa. Ke pahn men wia uwen omw kak en kapwaiada omw inowo, pil ni omw kin lelohng kasongosong de kahpwal laud kan. (Ekl. 5:​4, 5) Nin duwen sapwellimen Sises tohnpadahk men, ke pahn idawehn sapwellimen Sises mehn kahlemeng oh kehkehlik kan ni uwen omw kak.—Mad. 28:​19, 20; 1 Pit. 2:21. w24.03 8 ¶1-3

Ia duwen ma kowe oh omw pwoudo sohte kin perenki amwa ahnsoupene? Dahme kumwa kak wia? Medewehla kisiniei ehu. E sohte kin pein tepida lul laud. Emen anahne doulahte kihkihong tuwi laud. Duwehte met, kumwa seu tepida sang ni amwa wiahdahte ahnsou kis ong emenemen ehuehu rahn? Kumwa kak wiapene soahng ehu me kumwa koaros perenki wia. (Seims 3:18) Ni amwa ekisekis tepida, kumwa kak kilang amwa limpoak eh pwurehng kekeirda. En wauneki emen uhdahn kesempwal nan pwopwoud ehu. E duwehte oxygen me kin kahrehda kisiniei en wie lullul. Ma sohte oxygen, kisinieio kak mwadang kunla. Duwehte met, ma pwopwoud ehu sohte wauneki emenemen, ara limpoakpene pahn kak mwadang tikitikla. Ahpw pwopwoud ehu me kin nantihong en wauneki emenemen kin doadoahk laud pwe ara limpoak en kehlailte. Tamataman me met sohte kin pidada ma ke lemeleme me ke wauneki ih, ahpw e kin pidada ma omw pwoudo pehm me ke wauneki ih. w23.05 22 ¶9; 24 ¶14-15

Nan Paipel, sapwellimen Koht ladu lelepek kan koasoia ahnsou kan me re kin pwunodada oh masepwehkada pwehki arail imwintihti kan de kasongosong teikan. (Mel. 18:4; 55:​1, 5) Duwehte met, kitail kakete lelohng uhwong nan sukuhl, wasahn doadoahk, sang atail peneinei, de sang koperment. Kitail pil kakete masak me kitail pahn mehla pwehki kahpwal en roson ehu. Erein ahnsou pwukat, kitail kakete duwehla kisin seri men me anahne sawas. Ia duwen Siohwa kin ketin sawas nan soangen ahnsou pwukat? E pahn ketin kansenamwahwih oh kaloalamwahwih kitail. Eri, kaukaule wiahda ahnsou ong Siohwa—kapakapohng ih oh wadek sapwellime Mahsen. (Mel. 77:​1, 12-14) Ma ke kin kaukaule wia met, ele ke pahn kin tepte peki sawas sang Semomwo nanleng. Padahkihong Siohwa dahme ke kin masak oh dahme ke kin pwunodki. Kowe eri wadek sapwellime Mahsen oh kilang ia duwen eh pahn ketin kansenamwahwihiuk.—Mel. 119:28. w24.01 24-25 ¶14-16

E uhdahn kesempwal en ahneki ineng laud en lel omw mehn akadei kan. Ni omw kin inengieng laud en lel omw mehn akadei, ke pahn doadoahk laud en wia met. Oh ma atail ineng en lel atail mehn akadei kan uhdahn laud, kitail pahn kapwaiada. Eri, dahme ke kak wia pwehn kalaudehla omw inengo? Kapakapki en kalaudehla omw ineng. Sang ni eh ketin doadoahngki sapwellime manaman, Siohwa kak ketin kamwakid uhk en lel omw mehn akadei. Ekei pak, kitail kin wiahda mehn akadei ehu pwehki kitail ese me kitail anahne wia met, oh met mwahu. Ahpw ele kitail sohte uhdahn inengieng kapwaiada. Doudouloale dahme Siohwa ketin wiadahr ong uhk. (Mel. 143:5) Wahnpoaron Pohl kin doudouloale sapwellimen Siohwa kadek sapan ong ih, oh met kamwakid ih en doadoahk laud ong Siohwa. (1 Kor. 15:​9, 10; 1 Tim. 1:​12-14) Pil duwehte met, ni omw kalaudehla omw doudouloale dahme Siohwa ketin wiadahr ong uhk, omw ineng en lel omw mehn akadei pahn pil laudla.—Mel. 116:12. w23.05 27 ¶3-5

Kitail kin kaperenda Samatailo nanleng ni atail kin kapinga mware. (Mel. 119:108) Ia duwe, met wehwehki me Koht wasa lapalahpie kin duwehte aramas soh unsek kan me men meteikan en kapinga irail pwehki re anahne kangoang? Soh. Ni atail kin kapinga Samatailo nanleng, kitail kin sewese kadehdehda pil ehu likamw me Sehdan ndahki emenemen kitail. Sehdan kose me dene sohte aramas emen pahn uhki mwaren Koht ni loalopwoat. E kose me sohte emen rehtail pahn lelepekte ong Koht ni atail kin lelohng kasongosong. E pil nda me kitail koaros pahn uhdihsang papah Koht ma kitail medewe me met pahn mwahu ong kitail. (Sohp 1:​9-11; 2:4) Ahpw Sohp lelepekte oh kadehdehda me Sehdan likamw. Ia duwen kowe? Emenemen kitail kak pilada en uhki Samatailo oh kaperenda ih sang ni atail kin papah ih ni lelepek. (Lep. Pad. 27:11) E uhdahn wia pwais kaselel ehu en wia met. w24.02 8-9 ¶3-5

Mwurin mwehin Moses oh Sosua, Siohwa ketin idihada sounkopwung kan pwehn kaweid sapwellime aramas akan. Mwurin mwo, erein ahnsou en nanmwarki kan, Siohwa ketin idihada soukohp kan pwehn kaweid sapwellime aramas akan. Nanmwarki lelepek kan idawehn ahn soukohp ko kaweid. Karasepe, Nanmwarki Depit pwungki ale kaweid sang soukohp Nadan. (2 Sam. 12:​7, 13; 1 Kron. 17:​3, 4) Nanmwarki Seosopat likih ahn soukohp Sahasiel kaweid oh kangoange mehn Suda ko en “pwoson dahme sapwellime soukohp kan patohwanohng.” (2 Kron. 20:​14, 15) Ni ahnsou me Nanmwarki Esekaia kin pwunodada, e kin peki sawas rehn soukohp Aiseia. (Ais. 37:​1-6) Ehuehu ahnsou me nanmwarki ko kin idawehn sapwellimen Siohwa kaweid, e kin ketin kapaia oh pere sapwellime aramas akan. (2 Kron. 20:​29, 30; 32:22) E kin uhdahn sansal me Siohwa kin ketin doadoahngki sapwellime soukohp kan pwehn kaweid sapwellime aramas akan. w24.02 21 ¶8

Sehdan men kitail en werekiong aramas akan me pahn kahrehiong en apwal ong kitail en peikiong sapwellimen Siohwa koasoandi kan. Eri kitail anahne kanahieng laudsang mehn Episos en mahs ko, pwehki rahnwet kitail kak patehng aramas akan kaidehn sang ni atail tuhwong irail, ahpw pil nan social media. Kitail anahne pelianda madamadau en sampah me tiahk samin sohte sapwung. Kitail ese me e sapwung. (Ep. 4:​19, 20) Ahpw e mwahu en pein idek rehtail: ‘Ni keneinei I kin soikala werekiong iengei tohndoadoahk kan, iengei tohnsukuhl kan, de meteikan me sohte kin wauneki sapwellimen Siohwa koasoandi? I kin eimah idawehn dahme Siohwa ketin mahsanih me pwung de sapwung mehnda ma ekei kin nda me I kin lipilipilki aramas?’ Nin duwen me 2 Timoty 2:​20-22 mahsanih, kitail pil anahne kanahieng ni atail pilada kompoakepatail keren kan nan mwomwohdisohn Kristian. Kitail en tamataman me ekei kakete sohte kin sewese kitail en lelepekte nan atail papah Siohwa. w24.03 22-23 ¶11-12

Mie pak me ke song medewehla ia mwomwen Siohwa? Mendahki kitail sohte kak kilang Siohwa, Paipel kawehwehda ih ni soangsoangen ahl kei. Siohwa kin ketin rasehng “ketipin ehu oh mehn sansar ehu” oh “kisiniei me kin kamwomwala wasa.” (Mel. 84:​11, NW; Ipru 12:29) Esekiel kawehwehda nan kaudiahl ehu me Siohwa ketin rasehng takai sapair pwoat, mete lingaling ehu, oh ahia lingaling pwoat. (Esek. 1:​26-28) Pwehki kitail sohte kak kilang Siohwa, e kak apwal ong kitail en kamehlele me e ketin poakohng kitail. Ekei aramas kin medewe me Siohwa sohte kak ketin poakohng irail pwehki soahng suwed kan me re lelohng. Siohwa ketin mwahngih soangen pepehm pwukat oh ese dahme kahrehda e apwal ong kitail en karanihala ih. Pwehn sewese kitail, e ketin kasalehda sapwellime irair kaselel kan nan sapwellime Mahsen. Siohwa kin ketin limpoak. Paipel mahsanih me “Koht iei limpoak.” (1 Sohn 4:8) Soahng koaros me e kin ketin wia kin poahsoankihda limpoak. Sapwellimen Koht limpoak uhdahn mwahu oh kehlail me kahrehda e sohte kin ketin kasalehiongete irail kan me kin poakohng ih ahpw pil ong irail kan me sohte kin poakohng ih.—Mad. 5:​44, 45. w24.01 26 ¶1-3

Siohwa ketin idihada Moses pwehn kahluwa mehn Israel ko sang Isip, oh nin duwen mehn kadehde sansal, E ketikihda uhren depwek ehu nin rahn oh uhren kisiniei ehu nipwong. (Eks. 13:21) Moses idawehn uhr ko, me kahluwahlahng ih oh mehn Israel ko ni Sehd Weitahtao. Ahpw aramas ko masepwehkada oh medewe me re tengala nanpwungen sehdo oh sounpei en Isip ko. Ahpw Moses sohte sapwung. Siohwa ketin doadoahngki Moses kahluwahlahng aramas ko wasao. (Eks. 14:2) Koht eri ketin doareirailla ni ahl kapwuriamwei ehu. (Eks. 14:​26-28) Eri mwurin sounpar 40, Moses doulahte likih uhren depweko pwehn kahluwahlahng sapwellimen Koht aramas akan nan sapwtehno. (Eks. 33:​7, 9, 10) Sang ni uhro Siohwa ketin mahseniong Moses, me uhd padahkihong aramas ako dahme Siohwa ketin mahsanihong. Mehn Israel ko kak kilang ni sansal me Siohwa kin ketin doadoahngki Moses pwehn kaweid irail. w24.02 21 ¶4-5