May

Tepin Kristian ko lelohng kahpwal ni lehk laud eh wiawi “nan sahpwo pwon.” Pahpa nohno kan uhdahn pwunodki ia duwen ar pahn kak diar kenen arail peneineio mwenge. Ahpw ia duwen me pwulopwul kan me pilahn en kalaudehla arail doadoahk en kalohk? Mwein irail medewe me re en awih lao lehk laudo sohla wiawi? Mendahki ar mi nan soangen irairo, Kristian ko wiahda wekidekla kan. Irail pousehlahte kalohk ni ahl sohte lipilipil, oh perenki ehukihong riarail Kristian kan nan Sudia dahme re ahneki. (Wiewia 11:​29, 30) Irail kan me alehdi soahng kan me re anahne kin kilang duwen Siohwa eh ketin sewese irail. (Mad. 6:​31-33) Ele re karanihala riarail Kristian kan me sewese irail. Oh irail ko me kihda sawas en mwohni de iang sawas ni soangen ahl teikan, ahneki peren me kohsang arail kin kihkihwei.—Wiewia 20:35. w23.04 16 ¶12-13

Ekei pak, Siohwa kin ketin sapengala kapakap en sapwellime aramas akan sang ni eh ketin doadoahngki irail kan me sohte kin kaudokiong ih pwehn sewese irail. Karasepe, e ketin kamwakid Nanmwarki Ardaserksihs en kapwaiada en Nehmaia pekipeko en pwurala Serusalem pwehn kak sewese onohnsapahldahn kahnimwo. (Neh. 2:​3-6) Rahnwet, Siohwa pil kak ketin kamwakid irail kan me sohte kin kaudokiong ih pwehn sewese kitail ni ahnsou me kitail anahne. Atail kapakap sohte kin kalapw pasapengla ni ahl kapwuriamwei kan. Ahpw pasapeng kan me kitail alehdi ih me kitail uhdahn anahne pwehn loalopwoatohngete Samatailo nanleng. Eri tetehk ia duwen Siohwa eh ketin sapengala omw kapakap kan. Ekei ahnsou, uhdi oh medemedewe duwen Siohwa eh kin ketin sapengala omw kapakap kan. (Mel. 66:​19, 20) Kitail anahne kasalehda pwoson kaidehn sang atail kin kapakapohngete Siohwa, ahpw pil sang atail kin pwungki sapwellime pasapeng, sohte lipilipil ni ahl dah.—Ipru 11:6. w23.05 12 ¶13, 15; 13 ¶16

Ni atail inoukihong Siohwa atail mour, kitail inoukihda en kaudokiong ih oh wia kupwure. Kitail anahne kolokol inowo. En kapwaiada atail inou ong Siohwa sohte wia wisik toutou ehu. Met pwehki Siohwa ketin kapikkitailda en wia kupwure. (Kaud. 4:11) E ketin wiaikitailda pwehn esehla oh kaudokiong ih, oh e ketin wiaikitailda rasehng ih. Pwehki met, kitail kak karanihala oh perenki wia kupwure. Patehng met, ni atail kin wia kupwuren Koht oh idawehn sapwellime Ohlo, kitail kin pein “diar nsenamwahu.” (Mad. 11:​28-30) Eri kakehlaka omw limpoak ong Siohwa sang ni omw medemedewe soahng mwahu koaros me e ketin wiahiong uhk oh kapai kan me e pahn ketikihong uhk. Ni omw poakohng Koht eh laudla, e pahn mengeiong uhk en peikiong ih. (1 Sohn 5:3) Sises pweida ni eh wia kupwuren Koht pwehki e kapakapki sapwellimen Siohwa sawas oh medemedewehte ketingpe. (Ipru 5:7; 12:2) Duwehte Sises, kapakapki sapwellimen Siohwa kehl oh pousehlahte medemedewe koapworopwor en mour soutuk. w23.08 27-28 ¶4-5

Kitail koaros kin kalahnganki aramas akan me kin kanengamah. Dahme kahrehda? Kitail kin wauneki irail me kak awih mehkot oh sohte lingeringerda. Kitail kin kalahnganki me meteikan kin kanengamahiong kitail ni atail wiahda sapwung kan. Oh kitail kin kalahnganki ni atail sounpadahk en Paipelo eh kin kanengamahiong kitail ni atail kin nantihong sukuhlki, pwungki, oh kapwaiada padahk en Paipel kan. Ahpw laudsang mehkoaros, ia uwen atail kalahnganki me Siohwa Koht kin ketin kanengamahiong kitail! Mendahki kitail kin kalahnganki ahn meteikan ar kin kanengamahiong kitail, ele e sohte kin ahnsou koaros mengei ong kitail en kin kanengamah. Karasepe, ele kitail sohte kin kanengamah ni atail kesikesihnen awiawih ni lain ehu, ahpw mehlel ma kitail pwandalahr. Mwein kitail kin lingeringerda ni meteikan ar kalidorih kitail. Ekei pak, e kakete apwal ong kitail en awiawih sapwellimen Siohwa inou en sampah kapwo. Ahpw, ni soangen ahnsou pwukat, kitail anahne kalaudehla kanengamah. w23.08 20 ¶1-2

Siohwa ketin mahsanihong Kidion en kadarala pali laud en nah sounpei ko ni imwarail ko. Ele Kidion medewe: ‘Wekidekla wet uhdahn anahn? E pahn kak kadoadoahk?’ Mendahki met, Kidion peikiong kaweido. Elder kan rahnwet kin alasang Kidion sang ni arail kin peik ni ahnsou me sapwellimen Siohwa pwihn padahkihong irail en wia mehkot me weksang dahme irail kin wia. (Ipru 13:17) Kidion peikiong Siohwa pil ni eh kin masepwehk oh eh pwukoau keper. (Sounkopwung 9:17) Mwurin Siohwa eh ketin kangoange ih, Kidion uhdahn kamehlele me Koht pahn ketin sewese ih pere sapwellime aramas akan. Elder kan me kin mi nan wasa me atail doadoahko keinapwidi, kin alasang Kidion. Ni eimah, irail kin tiengla mwowe nan mihting oh doadoahk en kalohk mehnda ma pilismen kan pahn salihiraildi, kapeidakih irail, de sohla arail doadoahk, de re lelohng tiahk lemei kan. Erein kahn kamakam kowahlapo, elder kan pahn anahne eimah pwehn peikiong kaweid kan me re alehdi, sohte lipilipil ma e keper. w23.06 5-6 ¶12-13

Siohwa ketin mweidohng koasoiepen Samworo Lapalap Sehoiada en kileldi nan Paipel pwehn kak kasukuhlih kitail. (Rom 15:4) Oh ahnsou me Sehoiada mehla, wahu tohrohr kowohng ih pwehki e iang seridi “nan sousoun nanmwarki kan nan kahnimw en Depit, kasalepen ar wauneki doadoahk en papah me e wiadahr ong mehn Israel, ong Koht, oh ong Tehnpas Sarawio.” (2 Kron. 24:​15, 16) Koasoipen Sehoiada kak sewese kitail koaros en kakairada atail lemmwiki Koht. Brother kan me kin tiengla mwowe kak alasang Sehoiada sang ni arail kin ni lelepek tetehk oh apwalih mwahu sapwellimen Koht pelin sihpw kan. (Wiewia 20:28) Me mah kan kak sukuhlkihsang Sehoiada me ni arail kin lemmwiki Siohwa oh loalopwoatete, Siohwa kak ketin doadoahngki irail en kapwaiada kupwure. Me pwulopwul kan kak kilang sapwellimen Siohwa wiewia ong Sehoiada oh kahlemengih sang ni arail wauneki riarail Kristian kan, ahpw mehlel irail kan me papahkier Siohwa erein sounpar tohto. (Lep. Pad. 16:31) Ni loalopwoat, kitail en utungada ‘irail kan me kin tiengla mwohtail’ sang ni atail kin peikiong irail.—Ipru 13:17. w23.06 17 ¶14-15

Ni ahnsoun mihting kan, medewe mwahu ni omw pilada ia uwen tohtohn omw pahn kihda pehmw. Ma kitail kin nohn kalapw kihda pehtail ka, mwein kitail kakete kahrehiong brother me wia onopo en medewe me e anahne pwurupwurehng likwerih kitail mendahki meteikan saikinte iang pasapeng. Met kak kamworusehla meteikan en kihda pehrail. (Ekl. 3:7) Ma sounkalohk tohto kin kauwada pehrail erein onop ehu, ele kitail sohte pahn kak pasapeng pak tohto ni uwen me kitail men. Ekei pak, me wia peidek oh pasapeng kakete sohte likwerihkitailda douluhl. Met kak kamworuseikitailla, ahpw kitail anahne song en dehr nsensuwedla ma adatail kan sohte likwerda. (Ekl. 7:9) Ma ke sohte kak pasapeng ni uwen me ke mwahuki, ke sou rong kanahieng ni meteikan ar pasapeng oh mwurin mihtingo kalahnganki arail pasapengo? Omw kalahnganki ahn riomw Kristian kan arail pasapeng pahn kangoange irail duwehte omw wia pasapeng kangoang kan. w23.04 23-24 ¶14-16

Onopki Mahsen en Koht oh doudouloale. Tuhke pwoat kak kesihnenda teng ma kalewe kan kohdihla wasa me loal. Eri, ma atail pwoson Siohwa kin kehlail, kitail pahn kak kesihnenda teng. Ni tuhke pwoat eh kin kekeirda, kalewe kan kin kohdihla wasa loal oh kohpeseng. Ni atail kin onop oh doudouloale, kitail kin kakehlakahda atail pwoson oh kalaudehla atail kamehlele me sapwellimen Koht ahl akan me keieu mwahu. (Kol. 2:​6, 7) Medewehla ia duwen sapwellimen Siohwa kaweid oh mehn perehre kan eh sewese sapwellime ladu kan mahso. Karasepe, Esekiel kilang tohnleng men eh sohngedi ni keneinei kehl en tehnpas sarawio me e kilangada nan kaudiahlo. Kaudiahl wet kakehlakahda Esekiel oh kihong kitail mehn kasukuhl mwahu ong ia duwen atail kak kolokolete sapwellimen Siohwa koasoandi kan ong kaudok min. (Esek. 40:​1-4; 43:​10-12) Kitail pil kak paiekihda ni atail wiahda ahnsou en onopki oh doudouloale duwen soahng rir kan nan Mahsen en Koht. Kitail kak kakehlakahda mohngiongitail oh likih Siohwa ni unsek.—Mel. 112:7. w23.07 18 ¶15-16

Mie mehn kahlemeng mwahu nan Paipel ong ohl pwulopwul kan en alasang. Ohl pwukat sang mahso kin poakohng Koht oh apwalih sapwellime aramas akan ni soangsoangen ahl akan. Ke pil kak diarada mehn kahlemeng mwahu kan rehn ohl Kristian koahiek kan nan omw peneinei oh nan omw mwomwohdiso. (Ipru 13:7) Oh ke pil kak alasang mehn kahlemeng unsek en Sises Krais. (1 Pit. 2:21) Ni omw onopki mwahu mehn kahlemeng pwukat, medewehla arail irair kaselel kan. (Ipru 12:​1, 2) Kowe eri pilada ia duwen omw pahn alasang ohl pwukat. Ohl emen me ahneki koahiek en madamadau kin medewe mahs mwohn eh pilada dahme e pahn wia. Eri esehla ia duwen omw pahn wia met oh doulahte kapwaiada. Keieu, sukuhlki nan Paipel ia sapwellimen Siohwa madamadau oh pepehm oh eri medewe dahme kahrehda e mwahu en wia dahme e ketin mahsanih. Mwuri doadoahngki soahng kan me ke sukuhlki pwehn seweseiuk wiahda pilipil me pahn kaperenda Siohwa. (Mel. 119:9) Met pahn seweseiuk ken wiahla Kristian koahiek.—Lep. Pad. 2:​11, 12; Ipru 5:14. w23.12 24-25 ¶4-5

Pahpa nohno kan kak padahkihong neirail seri kan ia duwen arail pahn sapeng ni mpahi emen me peidengki dahme irail kin kamehlele. (Seims 3:13) Ekei pahpa nohno kan kin wiahda ahnsoun praktis erein arail kaudok en peneinei. Irail kin medewe duwen ire kan me kakete pwarada nan sukuhl, koasoiapene oh kamwomwada ia duwen arail pahn sapeng emen, oh padahkihong neirail seri ko ia duwen arail pahn kasalehda mpahi oh kadek ni arail kin koasoiong meteikan. Ahnsoun praktis kak sewese me pwulopwul kan en kamehlelehiong pein irail dahme re kamehlele oh kawehwehiong meteikan dahme kahrehda. Artikel kan pahn oaralapo “Young People Ask” nan jw.org pil kin kihda doaropwehn kasukuhl ong me pwulopwul kan. Soahng pwukat wiawihda pwehn sewese me pwulopwul kan en kalaudehla dahme irail kin kamehlele oh kaunopada pasapeng kan ni pein arail lokaia. Sang ni atail onopki artikel pwukat nin duwen peneinei ehu, kitail koaros kak sukuhlki en uhki atail pwoson ni elen mpahi oh kadek. w23.09 16 ¶10; 18 ¶15-16

Mie pak me ke wiahda mehn akadei ehu ahpw apwalki kapwaiada? Ma ei, kaidehn kowe kelehpw. Karasepe, Philip men kamwahwihala mwomwen eh kapakap oh kalaudehla eh ahnsou en kapakap, ahpw e apwalki diar ahnsou en kapakap. Ahn Erika mehn akadei iei en kin mwadangala ni tuhpenehn kalohk kan, ahpw kereniong ahnsou koaros e pil pwandte. Ma mie omw mehn akadei ehu me ke saikinte lel, dehr mworusala. Pwehn lel mehn akadei tikitik ehu, met pil kin anahne ahnsou oh doadoahk laud. Pwehki ke kin men kapwaiadahte omw mehn akadeio, met kasalehda me ke kin kesempwalki omw nanpwungmwahu rehn Siohwa oh men patohwanohng ih dahme keieu mwahu. Siohwa kin ketin kesempwalki omw nannanti. Ni mehlel, e sohte kin ketin kasik laudsang dahme ke kak patohwanohng ih. (Mel. 103:14; Maika 6:8) Eri ni omw pilada mehn akadei ehu, tehk mwahu me ke pahn kak kapwaiada. w23.05 26 ¶1-2

Aramas eimah ele kin masepwehkada, ahpw irail sohte kin mweidohng met en kauhiraildihsang wia dahme pwung. Daniel wia mwahnakapw pwulopwul men me uhdahn eimah. E onopki dahme sapwellimen Koht soukohp kan ntingihdi, iangahki kokohp kan en Seremaia. Sang ni eh onopo, Daniel esehda mwuhr me mehn Suhs ko me wie sensel ahnsou werei nan Papilon pahn kereniong saledekla. (Dan. 9:2) Daniel kin kilang me dahme Siohwa ketin mahsanih kin pweida, oh met kakehlakahda eh likih Siohwa, oh irail kan me uhdahn kin likih Koht kak kalaudehla arail eimah. (Pil kilang Rom 8:​32, 37-39.) Me keieu kesempwal, Daniel kin kalapw kapakapohng Semeo nanleng. (Dan. 6:10) E wehkohng Siohwa dipe kan oh ehukihong eh pepehm. Oh Daniel peki sawas. (Dan. 9:​4, 5, 19) Duwehte kitail koaros, Daniel sohte ipwidihte ahneki eimah. Ahpw, e kakairada irairo sang ni onop oh kapakap oh sang ni eh likih Siohwa. w23.08 2 ¶4; 4 ¶7

Ni atail kin peikiong irail kan me ahneki manaman, e kin wia kamwahu ong kitail oh meteikan. Ia duwen? Ehu kahrepe iei kitail kin soikala kalokepen atail sapeikiong kosonnedo. (Rom 13:​1, 4) Ni atail kin peikiong irail kan me ahneki manaman, irail pahn kilang me Sounkadehdehn Siohwa kan kin peik. Karasepe, sounpar tohto samwalahro nan Nigeria, sounpei kei pedolong nan Wasahn Kaudok ehu erein mihting eh wiewiawi, oh rapahki irail kan me sohte men pwain daksis. Ahpw kaunen sounpei ko ndaiong irail en kohkohla. E nda: “Sounkadehdehn Siohwa kan kin ahnsou koaros pwain daksis.” Ahnsou me ke peikiong kosonned kan, ke kin sewese kahdamwahwihala Sounkadehdehn Siohwa kan oh ehu rahn, met kak pere riatail Kristian kan. w23.10 9 ¶13

Erein ahnsou werei, ekei sapwellimen Siohwa ladu kan kin awiawih koasoandi wet en imwisekla. Ekei aramas kin medewe me imwio nohn pwand en leledo. Ahpw Siohwa ketin mwahngih pepehm en sapwellime ladu kan. Ni mehlel, e ketin kamehlelehiong soukohp Apakuk: “E saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” (Apak. 2:3) Ia duwe, Koht ketikihda mahsen pwukat pwe Apakuk kelehpw en paiekihda? De kitail pil kak iang paiekihda sapwellime mahsen ko rahnwet? Siohwa ketin kaweidki wahnpoaron Pohl en doadoahngki mahsen pwukat ong Kristian kan me kin kasikasik sampah kapwo. (Ipru 10:37) Eri, kitail kak kamehlele me mehnda ma sapwellimen Siohwa inou en ketin doareikitailla nohn pwand, “e pahn pweida ni ahnsawi; oh e sohte pahn pwand.” w23.04 30 ¶16

Mehn Israel ko soikala mehn kadehde sansal me Siohwa kin ketin doadoahngki Moses nin duwen wiliepe. (Nemp. 14:​10, 11) Irail kin pwurupwurehng pohnsehsehla pwukoa me Moses ahneki. Pwehki met, Siohwa sohte ketin mweidohng irail en iang pedolong nan Sapwen Inowo. (Nemp. 14:30) Ahpw, ekei mehn Israel ko idawehn sapwellimen Siohwa kaweid. Karasepe, Siohwa ketin mahsanih: “Kalep . . . kin loalopwoatohng ie.” (Nemp. 14:24) Koht ketin katingih Kalep oh pil mweidohng en pilada wasa me e men mi ie nan Sapwen Inowo. (Sos. 14:​12-14) Mehn Israel kan me mweimwei en pedolong nan Sapwen Inowo pil wiahda mehn kahlemeng mwahu en idawehn sapwellimen Siohwa kaweid. Ni ahnsou me Sosua wiliandi Moses pwehn kahluwa mehn Israel ko, irail “waunekihla sang ni ahnsowo kohla lel eh mehla.” (Sos. 4:14) Pwehki met, Siohwa ketin kapaiairailda oh ketikihong irail sahpwo me e ketin inoukihda.—Sos. 21:​43, 44. w24.02 21 ¶6-7

Duwehte toahkte men eh kak esehda iren atail mohngiong sang ni eh tehk pulse ni kumwut en pehtail, kitail pil kak esehda uwen kehlail en atail poakohng Koht sang ni atail kasawih mwomwen atail poakohng meteikan. Ma kitail tehkada me atail poakohng riatail Kristian luhluwetala, met kak kasalehda me atail poakohng Koht pil luhluwetala. Ahpw ni atail kin kaukaule kasalehda atail poakohng riatail kan, kitail pahn ese me atail poakohng Koht kin kehlail. Kitail anahne nsenohki ma atail poakohng riatail kan luhluwetala. Pwekida? Pwehki met pahn wehwehki me atail nanpwungmwahu rehn Siohwa pil luhluwetala. Wahnpoaron Sohn kasalehda met ni sansal ni eh katamankihong kitail: “Ma e sohte kin poakohng rie me e kin kilang, ia duwen eh kak poakohng Koht me e sohte kin kilang?” (1 Sohn 4:20) Dahme kitail kak sukuhlkihsang met? Siohwa kin ketin kupwurperenkihte kitail ma kitail kin “poakohng emenemen.”—1 Sohn 4:​7-9, 11. w23.11 8 ¶3; 9 ¶5-6

Nanmwarki Sohas wiahda pilipil mwahu ehu ni ahnsou me e pwulopwul. Pwehki eh pahpao mehla ni ahnsou me e pwulopwul, Sohas kin idawehn kaweid en Samworo Lapalap lelepeko, Sehoiada. Samworo menet apwalihada ih oh padahkihong ih duwen Siohwa. Sohas loalokong pwehki e kin peikiong kaweid kan me Sehoiada kihong ih. E pilada en papah Siohwa oh sewese aramas akan en pil papah Siohwa. Sohas pil koasoanehdi me tehnpas en Siohwa en onohnsapahlda. (2 Kron. 24:​1, 2, 4, 13, 14) Ma ahmw pahpa nohno de emen tohrohr padahkihong uhk en poakohng Siohwa oh kapwaiada sapwellime koasoandi kan, irail kihong uhk kisakis kesempwal ehu. (Lep. Pad. 2:​1, 10-12) Ahmw pahpa oh nohno kak kaiahnihiuk ni ahl tohto. Ahmw pahpa nohno pahn peren ni ara rong me ke kin peikiong kaweid kan me ira kihong uhk sang nan Paipel. Kesempwalsang met, ke pahn kaperenda Koht oh ahmw nanpwungmwahu reh pahn kehlailla. (Lep. Pad. 22:6; 23:​15, 24) Mepwukat sou wia kahrepe mwahu en alasang mehn kahlemeng en Sohas ni ahmw pwulopwul? w23.09 8-9 ¶3-5

Siohwa ketin inoukihda en karonge atail kapakap kan. Atail Kohto kin ketin poakohng sapwellime tohnkaudok lelepek kan, eri e pahn kin ahnsou koaros karonge atail kapakap kan. (Mel. 10:17; 37:28) Ahpw met sohte wehwehki me e pahn ketikihong kitail soahng koaros me kitail peki. Ele kitail anahne awih lao sampah kapwo leledo pwehn alehdi ekei soahng kan me kitail kin kapakapki. Siohwa kin ketin medewe ia duwen atail kapakap eh pidada kupwureo. (Ais. 55:​8, 9) Ehu me e ketin kupwurki iei me sampah pwon en direkihla aramas akan me pahn perenki wiahki ih arail Kaun oh peikiong. Ahpw Sehdan kose me aramas akan pahn peren ma re kaunda pein irail. (Sen. 3:​1-5) Pwehn kadehdehda me dahme Tepilo koasoia likamw pwoat, Siohwa ketin mweidohng aramas akan en kaunda pein irail. Ahpw arail kaunda kahredahr kahpwal tohto me kitail ahneki rahnwet. (Ekl. 8:9) Kitail wehwehki me Siohwa sohte pahn ketikihsang kahpwal pwukat koaros ahnsou wet. w23.11 21 ¶4-5

Siohwa ketin inoukihda me pwehki Eipraam “wehi ngedehrie” pahn alehdi kapai. Ahpw, Eipraam sounpar 100 oh Sara sounpar 90, ira saikinte nainekihda seri. E mwomwen me Eipraam oh Sara sohte kak nainekihda pwutak men. Kasongosong laud ehu met ong Eipraam. Ahpw, “e koapworopworki oh pwoson me e pahn wiahla semen wehi tohto.” (Rom 4:​18, 19) Kedekedeo, dahme Eipraam koapworopworki pweida. E wiahla semen Aisek, me e kin koapworopworki en nainekihda. (Rom 4:​20-22) Kitail kak pwungla rehn Koht oh wiahla kompoakepah, duwehte Eipraam. Ih met me Pohl koasoia ni eh ntingihedi: “Mahsen pwukat ‘e ketin wiahkihla ih aramas pwung men’ sohte ntingdi ong [Eipraam] ihete, ahpw pil ong kitail me Koht pahn ketin wiahkihla aramas pwung kei pwehki kitail kin kamehlele Ih me ketin kaiasada Sises atail Kaun sang rehn me melahr akan.” (Rom 4:​23, 24) Duwehte Eipraam, kitail anahne pwoson Siohwa, wia soahng mwahu kan, oh uhdahn kamehlele me sapwellimen Siohwa inou kan pahn pweida. w23.12 7 ¶16-17

Ni omw lelohng kahpwal ehu me kahrehda ken masepwehkada, tamataman me Siohwa kin ketin mwahngih duwen kahpwalo oh ia omw pepehm duwen kahpwalo. Karasepe, Siohwa sohte ketin mwahngihete duwen mehn Israel ko ar wiakaula pahn mehn Isip ko, ahpw e pil ketin mwahngih “uwen ar lokolok laud.” (Eks. 3:7) Ma ke lelohng irair kamasepwehk ehu, ele ke sohte kin kilang ia duwen Siohwa eh kin ketin sewesewese iuk. Dahme ke kak wia? Peki en ketin seweseiuk en kilang sapwellime sawas. (2 Nan. 6:​15-17) Kowe eri medewehla met: Mie padahk de pasapeng ehu nan mihting en mwomwohdiso me kakehlakaiukada? Mie pwuhk, kisin kasdo de koul ehu (original song) me kin kangoange iuk? Mie emen me ehukihong uhk ire kangoang ehu de iren Paipel ehu? Ele kitail kin manokehla duwen limpoak en riatail Kristian kan oh kangoang sang Mahsen en Koht eh kin sewese kitail. Soahng pwukat wia kisakis kaselel kei sang rehn Siohwa. (Ais. 65:13; Mark 10:​29, 30) Mepwukat kin kadehdehda me e kin ketin nsenohkin uhk. (Ais. 49:​14-16) Oh mepwukat pil kadehdehda me ke kak uhdahn likih ih. w24.01 4-5 ¶9-10

Mwohnte eh ketidahla nanleng, Sises ketin katamankihong sapwellime tohnpadahk ko arail pwukoa en kalohki duwen ih “nan Serusalem, nan Sudia pwon oh Sameria, oh pil wasa me keieu doh nin sampah.” (Wiewia 1:8; Luk 24:​46-48) Ahnsou kis mwuhr, kaunen mehn Suhs ko salihedi wahnpoaron Piter oh Sohn oh wairahla mwohn Sanedrin ko. Irail ruwese ohl lelepek pwukat en uhdihsang kalohk oh pil kamasak ira. (Wiewia 4:​18, 21) Piter oh Sohn nda: “Ma kumwail medewe me e pwung mwohn silangin Koht sen rong kumwail a kaidehn Koht, kumwail pein pilada. Ahpw kiht, se sohte kak uhdihsang koasoia duwen soahng kan me se kilangehr oh rongehr.” (Wiewia 4:​19, 20) Ni ahnsou me Piter oh Sohn saledeksang nan imweteng, tohnpadahk ko kapakapkihong Siohwa duwen arail en wia kupwure. Siohwa ketin sapengala arail kapakapo.—Wiewia 4:31. w23.05 5 ¶11-12

Siohwa oh sapwellime Ohlo kin mihmihpene wereisang me aramas riemen kin wia. Erein sounpar lik lik kei me ira kin ketiket nanleng, ira uhdahn karanihala oh poakohngala emenemen. Kitail wadek nan iren rahn en rahnwet me Siohwa ketin kasalehda sapwellime limpoak ong Sises. Siohwa kak ketin mahsanih, ‘Ih menet me I kin kupwurperenki.’ Ahpw e kupwurki kitail en ese uwen eh ketin poakohng Sises, eri e ketin ekerki ih “nei Pwutak kompoake.” Siohwa ketin kupwurperenki Sises, ahpw mehlel pwehki eh toukihda moure. (Ep. 1:7) Oh Sises sohte peikasalki ma Semeo ketin poakohng. E uhdahn kamehlele ahn Semeo limpoak. E kin pwurupwurehng kasalehda me e kin kamehlele me Semeo ketin poakohng.—Sohn 3:35; 10:17; 17:24. w24.01 28 ¶8

Medewehla met: Aramas emen me ke kin kesempwalki ndahkin uhk mehkot suwed. Ke ese me likamw pwoat me, ahpw ekei kamehlele. Suwedsang met, irail tepida kihpeseng likamwo, oh me tohto pil kamehlele. Ia pahn omw pepehm? Ele, karaun likamw wet pahn kansensuwedihiukala, kaidehn? Karasaras wet kak sewese kitail en wehwehki ia sapwellimen Siohwa pepehm ni ahnsou me ekei kahdsuwedihala mwareo. Emen sapwellime tohnleng ko karaunlikamwih Ih ong tepin liho, Ihp. Ihp kamehlele likamwo. Likamwo kahrehiong tepin atail pahpa nohno en uhwongada Siohwa. Pwehki met, dihp oh mehla lelohng aramas koaros. (Sen. 3:​1-6; Rom 5:12) Kahpwal kan koaros me kitail kin kilang nin sampah—mehla, mahwen, lokolok—kin wiawi pwehki likamw kan me Sehdan kihpeseng. Ia duwe, Siohwa ketin kupwurtoutoukihla karaun likamw pwukat oh kahpwal kan me likamw pwukat kahrehda? Ei uhdahn. Ahpw Siohwa sohte kin ketin kolokolete sapwellime engieng. Ni mehlel, e ketin wiahte “Koht me peren.”—1 Tim. 1:11. w24.02 8 ¶1-2

Ia duwen omw kak alasang Sosep oh soikala kasongosong? Ke kak pilada ahnsou wet dahme ke pahn wia ni omw lelohng songosong. Esehla mwadang soikala soahng kan me Siohwa ketin kalahdeki oh dehr pil medemedewe soahng pwukat. (Mel. 97:10; 119:165) Ni ahl wet, ke sohte pahn wiahda dihp ni omw lelohng songosong. Ele ke ese me ke diaradahr padahk mehlel oh me ke men papah Siohwa ni mohngiongomw unsek ahpw ke pehm me ke pil saikinte onopada en wiahda inou oh papidais. Ke kak wia dahme Nanmwarki Depit wia. Ke kak peki rehn Siohwa: “Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi oh ketin kahluwa ie nan ahl en mour soutuk.” (Mel. 139:​23, 24) Siohwa kin ketin kapaia irail kan me kin “ngoangki rapahki ih.” Omw kin nantihong en lel mehn akadei en wiahda inou oh papidaisla kin kasalehiong ih me ke kin wiewiahte met.—Ipru 11:6. w24.03 6 ¶13-15

Samworo lapalapo wiliandi aramas akan mwohn Koht. Siohwa ketin idihada tepin samworo lapalap en Israel, Aaron, ni ahnsou me irail kasarawihala impwal sarawio. Ahpw nin duwen me wahnpoaron Pohl kawehwehda, “aramas tohto anahne wiahla samworo pwe ren wiliandi meteikan pwehki mehla kin irehdi irail sang ren wiewiahte samworo.” (Ipru 7:​23-26) Oh pwehki samworo lapalap ko sohte unsek, irail anahne wia meirong ong pein diparail kan. Met wia wekpeseng laud nanpwungen samworo lapalap en Israel kan oh Samworo Lapalapo, Sises Krais. Nin duwen atail Samworo Lapalap, Sises Krais ketin wia “sounpapah . . . nan impwal mehlel me Siohwa ketin kauwada, a kaidehn aramas.” (Ipru 8:​1, 2) Eri, Pohl kawehwehda me “pwehki [Sises] kin ieias kohkohlahte, sohte emen me pahn wiliandi sapwellime pwukoahn samworo.” Pohl pil koasoia me Sises “sohte samin kis reh, tohrohrasang me dipan akan” oh me weksang samworo lapalap en Israel kan, “e sohte ketin anahne wiahda meirong kan rahn koaros” ong dipe kan. w23.10 26 ¶8-9

“Lahng en mahso” kin dokedoke koperment kan me mi pahn manaman en Sehdan oh nah ngehn suwed kan. (Mad. 4:​8, 9; 1 Sohn 5:19) Nan Paipel, “sampah” kin kak dokedoke tohn sampah kan. (1 Kron. 16:31; Mel. 97:1) Eri, “sampah en mahso” kin dokedoke aramas suwed kan rahnwet. Siohwa sohte pahn ketin kamwahwihalahte “lahng” oh “sampah” en ahnsou wet, ahpw e pahn ketin kamwomwala douluhl. Ih eri pahn ketin wiliankihdi “lahng kapw oh sampah kapw”—me wehwehki koperment kapw ehu me pahn kaunda aramas pwung kan. Siohwa pahn ketin kamwahwihala sampah oh aramas akan pwe ren unsekla. E pahn ketin wiahiong sampah pwon en wiahla wasa kaselel ehu me duwehte mwetuwel en Ihden. Oh e pahn ketin kamwahwihala douluhl emenemen kitail. Me nehtuk, maskun, oh salengepon pahn mwahula, oh pil me mehlar kan pahn iasada.—Ais. 25:8; 35:​1-7. w23.11 4 ¶9-10

‘Kamakam kowahlapo’ pahn wiawi ni atail sohte kasik. (Mad. 24:21) Ahpw, e pahn weksang kahpwal laud tohto teikan pwehki kitail ese me e pahn wiawi. Mpen sounpar 2,000 samwalahro, Sises ketin kehkehlingkihong sapwellime tohnpadahk kan ren onopadahng rahno. Ma kitail kaunopada, e pahn mengeiong kitail en dadaur pahn ahnsou apwalo oh sewese meteikan en wia duwehte. (Luk 21:36) Kitail pahn anahne dadaurete pwehn peikiong Siohwa oh likih me e pahn ketin pere kitail. Dahme kitail pahn wia ma sohla ahn riatail Kristian kan ekei kepwe de kepwe koaros? (Apak. 3:​17, 18) Atail poakehla meteikan pahn kamwakid kitail en sewesehki irail dahme re anahne. Dahme kitail pahn wia ma pwihn en wehi kan uhwong kitailda oh kitail anahne kousoanpene wasa kis rehn riatail Kristian kan erein ahnsou ehu? (Esek. 38:​10-12) Atail limpoak ong irail pahn anahne kehlail pwe kitail en dadaur pahn ahnsou apwalo. w23.07 2 ¶2-3

Pwopwoud kan kak sukuhlsang ahn Akwila oh Persila mehn kahlemeng, pwopwoud ehu me tepin Kristian tohto kin wauneki. (Rom 16:​3, 4) Ira kin ehupene doadoahk, kalohk, oh sewese meteikan. (Wiewia 18:​2, 3, 24-26) Ni mehlel, ni ahnsou me Paipel kin koasoia duwen Akwila oh Persila, e kin ahnsou koaros koasoia duwen ara kin ehupene. Ia duwen pwopwoud kan ar kak alasang ira? Medewehla soahng tohto me kowe oh omw pwoudo anahne wia. Ia duwe, kumwa kak ehupene wia ekei soahng pwukat, a dehr kelehpwki? Karasepe, Akwila oh Persila kin ehupene kalohk. Kumwa kin kaukaule wiahda koasoandi en wia duwehte? Akwila oh Persila pil kin ehupene doadoahk. Ele amwa doadoahk en mwohni wekpeseng, ahpw kumwa kak ehupene wia doadoahk en nan imwamwao? (Ekl. 4:9) Ni amwa kin sawaspene wia doadoahk ehu, ele e kin kalaudehla amwa ahnsou en ehupene oh koasoipene. w23.05 23 ¶10-12

Kitail koaros kin ekei pak masepwehkada. Karasepe, ni ahnsou me Nanmwarki Sohl pwakipwakih pwehn kemehla Depit, Depit lemehda en tangala nan kahnimw en Kad nan Pilisdia. Nanmwarki en Kad, Akis, diarada me Depit iei sounpeio me kemehla mehn Pilisdia “nen.” Depit uhdahn “masakada” nanmwarkio. (1 Sam. 21:​10-12) E pwunodki dahme Akis pahn wiahiong ih. Ia duwen Depit eh powehdi eh masak? Nan Melkahka 56, Depit kasalehda eh pepehm nin doken e mihmi Kad. Nan melkahkao, Depit kawehwehda mwahu dahme kahrehda e masepwehkada, ahpw e pil kawehwehda dahme sewese ih en uhdihsang masepwehk. Ni eh kin masepwehkada, Depit kin likih Siohwa. (Mel. 56:​1-3, 11) Depit ahneki kahrepe mwahu en likih Siohwa. Pwehki sawas sang rehn Siohwa, Depit medewehda en wia mehkot kapwuriamwei; e mwomwehda mwomwen aramas iahk men! Akis sohla men kemehla Depit, ahpw e uhd men Depit en kohkohla. Eri Depit pitla.—1 Sam. 21:13–22:1. w24.01 2 ¶1-3

Ihs irail kat me koasoiparail pwarada nan iren rahn en rahnwet? Irail me keidi kan me iasada! Eri ni lahsen me keidi kan nin sampah kohdahla nanleng ni imwin kahn kamakam kowahlapo, ihme re pahn tepin wia iei mahwen. Mwurin arail kohdahla nanleng, irail pahn iang Krais oh nah tohnleng sarawi kan mahweniong sapwellimen Koht imwintihti kan. Nna medewehla! Nin sampah, ekei Kristian keidi kan mah oh pil luwetalahr. Ahpw ni ahnsou me irail pahn iasadahng mour nanleng, irail pahn wiahla tohnleng kehlail kei me sohte kak mehla oh pahn iang Sises Krais mahwen. Mwurin mahwen en Armakedon, irail pahn iang Sises doadoahk pwehn sewese aramas akan en unsekla. Eri sang nanleng, irail pahn kak sewese riarail Kristian kan nin sampah laudsang ni ahnsou me irail wia aramas soh unsek kei! w24.02 6-7 ¶15-16

Ekei me onopadahr en wiahda inou oh papidaisla kin pweiek en wia met. Mwein re kin medewe, ‘Ia duwen ma mwurin mwo I wiahda dihp laud ehu oh piskenla?’ Ma ke ahneki pepehm wet, kamehlele me Siohwa pahn ketikihong uhk soahng koaros me ke anahne pwehn ‘weweid ni ahl me e ketin kupwurki pwe ke en uhdahn kaperenda ih.’ (Kol. 1:10) E pahn pil ketikihong uhk kehl pwehn wia dahme pwung. E ketin sewesehier me tohto en wia met. (1 Kor. 10:13) Ihme kahrehda aramas malaulau keite me kin piskensang nan mwomwohdisohn Kristian. Siohwa kin sewese sapwellime aramas akan en lelepekte. Aramas soh unsek koaros kin lelohng kasongosong en wia mehkot sapwung. (Seims 1:14) Ahpw, ke anahne pilada dahme ke pahn wia ni omw lelohng songosong. Ni mehlel kowe me pahn kaunda mwomwen omw mour. Ekei aramas kin nda me kitail sohte kak kaunda atail pepehm oh dahme kitail kin wia. Ahpw met sohte mehlel. Ke kak esehla kaunda omw ineng sapwung kan. w24.03 5 ¶11-12