August

Tehk ire kesempwal riau nan melkahka me mi powe: (1) Aramas mwahu, de pwung kan, kin lelohng kahpwal. (2) Siohwa kin ketin doareikitailsang atail kahpwal kan. Ia duwen eh kin ketin wia met? Ehu ahl iei sang ni eh kin ketin sewese kitail en ahneki madamadau pwung ong mour nan sampah wet. Siohwa ketin inoukihda me kitail pahn ahneki peren ni atail papah ih, ahpw e sohte ketin inoukihda me kitail sohte pahn lelohng kahpwal kan ahnsou wet. (Ais. 66:14) E ketin kangoange kitail en medemedewehte duwen ahnsou kohkohdo, ahnsou me kitail pahn ahneki soangen mour me e ketin kupwurki kitail en ahneki kohkohlahte. (2 Kor. 4:​16-18) Ahpw ahnsou wet, e kin ketin sewese kitail en pousehlahte papah ih rahn koaros. (Koul Ked. 3:​22-24) Dahme kitail kak sukuhlkihsang mehn kahlemeng en sapwellimen Siohwa tohnkaudok lelepek kan, nan Paipel oh pil nan atail ahnsou? Kitail kakete lelohng kahpwal me kitail sohte kasik. Ahpw ni atail kin koapworopworki Siohwa, e pahn ahnsou koaros ketin sewese kitail.—Mel. 55:22. w23.04 14-15 ¶3-4

Kitail kak sukuhlsang mehn kahlemeng en Sosep oh Mery, me men peikiong irail kan me kin ahneki manaman mehnda ma e apwal en wia met. (Luk 2:​1-6) Ahnsou me Mery liseiankiher sounpwong duwau, koperment en wasao men ih oh Sosep en wia mehkot me uhdahn apwal. Sihsar Akustus wiahda kosonned ehu me koaros nan wehin Rom en kohla sapwarail kan oh iang kileldi. Sosep oh Mery anahne seiloakla Pedleem me dohki mwail 93 oh diren ukada kan. Seiloak wet sohte pahn soanamwahu ong Mery. Pwopwoudo ele pwunodki ma e pahn keper ong ih oh serio. Ia duwen ma e medekda erein arail seiseiloak? Ira pwunodki dahme pahn wiawihong serio pwehki serio iei Mesaia. Ia duwe, met sou pahn wia kahrepe mwahu en sapeikiong kosonned en kopermento? Mendahki mie kahrepen Sosep oh Mery en pwunod, ira peikiongete kosonnedo. Siohwa ketin kapaiahda ira pwehki ara peik. Mery lella Pedleem, kaipwidi serio oh sewese kapwaiada kokohp en Paipel!—Maika 5:2. w23.10 8 ¶9; 9 ¶11-12

Dahme ke kak wia ma ke kin uhdahn salohki pasapeng ni mihting? Ele ke pahn diarada me e pahn sawas ma ke kaunopada mwahu. (Lep. Pad. 21:5) Uwen laud en omw esehla mwahu iren onopo, ih uwen laud en omw pahn sohla salohki iang pasapeng. Patehng met, wia pasapeng me mwotomwot. (Lep. Pad. 15:23; 17:27) Ke sohte pahn pwunodki ma ke wia pasapeng mwotomwot. Ni omw wia pasapeng mwotomwot ni pein omw lokaia, ke pahn kasalehda me ke kaunopada mwahu oh wehwehki mwahu audepen onopo. Ahpw ia duwen ma ke song ekei mehn sawas pwukat ahpw ke pil kin salohkihte pasapeng tohtohsang pak ehu de riau? Kamehlele me Siohwa pahn ketin kupwurperenki omw nanti laud en wia dahme ke kakohng. (Luk 21:​1-4) Siohwa sohte ketin kupwurki kitail en wia laudsang dahme kitail kak. (Pil. 4:5) Koasoanehdi dahme ke kak wia, wiahda mehn akadei en wia met, oh kapakapki en dehr saloh. Nin tapio, mwein ke koasoanehdi en wia pasapeng ehu me mwotomwot. w23.04 21 ¶6-8

Wahnpoaron Pohl kapahrekiong kitail sounpei kan me kin mwasamwasahn oh likoudahr ong mahwen. Aramas kin kasik me sounpei men pahn onopadahr en pei sohte lipilipil ahnsou me mie mahwen. Pil duwehte kitail. Kitail kin onohnop ong rahnen Siohwa sang ni atail kin perehki mwaremwaratail mehn perehpen pwoson oh limpoak oh lisoaropkihda lisoarop en koapworopwor. Sounpei men kin perehki eh mohngiong mehn perehpen mwaremware. Ni karasaras, pwoson oh limpoak kin pere mohngiongitail. Irair pwukat pahn sewese kitail en papahte Koht oh ideidawehn Sises. Pwoson kin kamehlelehiong kitail me Siohwa pahn ketin katingihkin kitail atail rapahki ih sang mohngiong unsek. (Ipru 11:6) E pahn kamwakid kitail en loalopwoatohngete atail Kaun, Sises, mehnda ma kitail anahne dadaur pahn kahpwal kan. Kitail kak kakehlaka atail pwoson pwehn kak dadaur pahn kahpwal kan sang ni atail sukuhlsang mehn kahlemeng en irail kan nan atail ahnsou me kin kolokol arail lelepek mendahki kalokolok de kahpwal en mwohni. Oh kitail kak soikala lidip en noahrok kepwe sang atail alasang irail kan me kin kihsang nan arail mour soahng kan me sohte nohn kesempwal pwehn mwohneki mahs doadoahk en Wehio. w23.06 10 ¶8-9

Kaunda pein emen iei irair ehu me emen ahneki pwehn kaunda eh pepehm oh eh wiewia kan. Kitail anahne irair wet pwehn kamwakid kitail en lel atail mehn akadei, ahpw mehlel ma e apwal en lel mehn akadeio de kitail sohte inengieng wia. Pil tamataman me irair wet wia kisehn wahn sapwellimen Siohwa manaman. Eri peki rehn Siohwa sapwellime manaman pwehn seweseiuk en kakairada irair kesempwal wet. (Luk 11:13; Kal. 5:​22, 23) Dehr awih ahnsou mwahu pwehn wia mehkot. Nan sampah wet, ele kitail sohte pahn ahneki ahnsou mwahu en wia soahng kan. Ma kitail awiawih ahnsou mwahu, ele kitail sohte pahn kapwaiada atail mehn akadei kan. Ele atail ineng tikitikla pwehki atail mehn akadeio uhdahn apwal. Ma met wiawi, ke kak kamengeila omw mehn akadeio? Ma omw mehn akadeio iei en kakairada irair mwahu ehu, ke sou nantihong ekisekis kasalehda irair wet? Ma omw mehn akadeio iei en wadekala Paipel pwon, ke sou tepida ni omw koasoanehdi ahnsou mwotomwot pwehn wadek Paipel? w23.05 29 ¶11-13

Erein imwin rahn pwukat, Siohwa kin ketin doadoahngki sapwellime pwihn pwehn doulahte kihda kaweid kan sang Mahsen en Koht pwehn sewese koaros pousehlahte kekeid nan “Ahl en Sarawi.” (Ais. 35:​8, NW; 48:17; 60:17) Kitail kak nda me ni ahnsou me emen kin pwungki en onop Paipel, e ahnekiher ahnsou mwahu en keid nan “Ahl en Sarawi.” Ekei kin kekeidki erein ahnsou kiste oh mwuhr sohla keid nan ahlo. Ekei kin koasoanehdi teng en pousehlahte kekeid nan ahlo lao irail lel wasa me re pahn lel ie. Ia wasa mwo? Ong irail kan me ahneki koapworopwor en mour nanleng, “Ahl en Sarawi” kin kahluwairaillahng “paradais en Koht” nanleng. (Kaud. 2:7) Ong irail me ahneki koapworopwor en mour nin sampah, ahlo kin kahluwairaillahng ni imwin pahr kido ni ahnsou me koaros pahn unsekla. Ma ke kin kekeid nan ahlo rahnwet, dehr sohpeila mwuri. Oh dehr wetsang ahlo lao ke kanekehla omw seiloaklahng sampah kapwo! w23.05 17 ¶15; 19 ¶16-18

Ni omw medewehla soahng mwahu koaros me Siohwa ketin wiahiong uhk, ke pahn men kalahnganohng oh inoukihong omw mour. (Mel. 116:​12-14) Paipel mahsanih me Siohwa kin ketikihda “kisakis mwahu oh unsek koaros.” (Seims 1:17) Kisakis me keieu laud iei meirong en sapwellime Ohlo, Sises. Nna medewehla! Pweinen pweipwei sapahlo kahrehiong ken ahneki nanpwungmwahu keren rehn Siohwa. Oh e ketikihong uhk koapworopwor en mour kohkohlahte. (1 Sohn 4:​9, 10) Inoukihong Siohwa omw mour iei ahl keieu mwahu en kasalehda me ke uhdahn kalahnganki kasalepen limpoak me keieu laud, iangahki kapai teikan me Siohwa ketikihong uhk.—Deud. 16:17; 2 Kor. 5:15. w24.03 5 ¶8

Ni atail kin kilang tiahk samin en aramas akan rahnwet, kitail kin ahneki soangen pepehmohte me Lohd ahneki. E kin “nsensuwedkihla kowahlap ahn aramas suwed kan ar kin wia me suwed ni ngidingid,” pwehki e ese me Samatailo nanleng kin ketin kalahdeki tiahk samin. (2 Pit. 2:​7, 8) Pwehki Lohd uhdahn wauneki oh poakohng Koht, e uhdahn kailongki tiahk samin en aramas akan ahnsowo. Kitail pil mi nanpwungen aramas akan me sohte kin wauneki sapwellimen Siohwa koasoandi kan ong tiahk mwakelekel. Mendahki met, kitail kak kolokolete atail tiahk mwakelekel ma kitail kin poakohngete Koht oh sukuhlki en uhdahn lemmwiki ih. Siohwa kin ketin sewese kitail en wia met sang ni eh ketikihda mehn kangoang me kitail diar nan pwuhken Lepin Padahk. Kristian koaros, ohl oh lih, me pwulopwul oh mah, kak uhdahn paiekihda arail tehk kaweid erpit me dierek nan irelaudo. Ni atail kin lemmwiki Siohwa, kitail kin kanahieng en dehr kompoakepahnkihla irail kan me kin wia me suwed. w23.06 20 ¶1-2; 21 ¶5

Ele omw peneinei kin uhwong uhk, de ele ke tounmeteikihla ahneki kepwe de naineki mwohni tohto pwe ken kin mwohneki mahs Wehin Koht. (Mad. 6:33) Ma ei, ke kak kamehlele me Siohwa ketin mwahngih soahng koaros me ke wiahda ong ih. (Ipru 6:10) Ele ke kilangehr mehlelpen dahme Sises mahsanih: “Mehmen me pwilikihdi imwe de rie pwutak kan de serepein kan de ine de seme de nah seri kan de sapwe pwehki ngehi oh rongamwahwo pahn ale pak 100 ni imwe, ni rie pwutak, ni rie serepein, ni ine, ni nah seri kan oh ni sapwe iangahki kalokolok nan ahnsou pwukat, a ni koasoandi en mwehi me kohkohdo, mour soutuk.” (Mark 10:​29, 30) Kapai kan me ke alehdier uhdahn laudsang tounmetei kan koaros me ke wiahda.—Mel. 37:4. w24.03 9 ¶5

Ni Kristian kan nan Suda ar lelohng lehk laud, riarail kan nan mwomwohdiso en Andiok “koasoanehdi me emenemen irail en kadarala sawas ni uwen me e kak ong riarail kan me koukousoan nan Sudia.” (Wiewia 11:​27-30) Mendahki Kristian ko me lelohng lehk laud mi wasa doh, Kristian kan nan Andiok koasoanehdi en sewese irail. (1 Sohn 3:​17, 18) Kitail pil kak kasalehda atail poakehla meteikan rahnwet ni atail kin esehda me riatail Kristian kan lelohng kahpwal laud ehu. Kitail kin mwadangete sawas sang ni atail idek rehn elder kan ma kitail kak iang sawas nan doadoahk ehu, sang ni atail kihda sawas en mwohni ong doadoahk en sampah pwon, de sang atail kapakapki irail kan me lelohng kahpwal laudo. Ele riatail kan anahne sawas pwehn alehdi soahng kan me re anahne. Ni atail Nanmwarkio, Krais Sises, eh pahn ketido pwehn kadeikada aramas, kitail men en mahsanih atail poakehla meteikan oh eri luke kitail en “sohsohki Wehio.”—Mad. 25:​34-40. w23.07 4 ¶9-10; 6 ¶12

Sises kin kahlemengih sapwellimen Siohwa madamadau toupahrek. E ketin pekederdo nin sampah pwehn kalohk ong “sihpw salongala kan en wehin Israel.” Ahpw e ketin kasalehda madamadau toupahrek ni eh kalohk ong aramas akan. Karasepe, lih emen me kaidehn mehn Israel peki en ketin kamwahwihala nah serepeino me ‘ngehn suwed men tiadahr powe.’ Ni kadek, Sises ketin kapwaiada ahn liho pekipeko oh kamwahwihala nah serepeino. (Mad. 15:​21-28) Medewehla pil ehu karasaras. Nindoken eh tepida sapwellime doadoahk en kalohk, Sises mahsanih: “Mehmen me kahmahmkin ie . . . , I pil pahn kahmahmki.” (Mad. 10:33) Ahpw ia duwe, e ketin likidmeliehla Piter, me kahmahmkihla ih pak siluh? Soh. Sises mwahngih me Piter uhdahn koluhkihla dahme e wiao oh me ih ohl lelepek men. Mwurin eh ketin iasada, Sises ketin kamehlelehiong Piter me e ketin mahkohngehr oh poakepoakehte. (Luk 24:​33, 34) Siohwa Koht oh Sises Krais kin ketin madamadau toupahrek. Ia duwen kitail? Siohwa ketin kasik kitail en ahneki madamadau toupahrek. w23.07 21 ¶6-7

Mehn kamehlel dah kan me kitail kak ehukihong irail kan me kin peikasalki me sapwellimen Koht inou en Paradais pahn pweida? Keieu, pein Siohwa me ketin wiahda inou wet. Pwuhken Kaudiahl mahsanih: “Meno me ketiket nan mwoahl ketin mahsanih: ‘Kilang! I wiewiahda mehkoaros en kapw.’” E sapwellimanki erpit, manaman, oh ineng en kapwaiada sapwellime inou. Keriau, pweidahn sapwellime inou uhdahn mehlel me kahrehda ong ih, inou wet mwomwen pweidahr. Kahrehda e kak ketin mahsanih: “Mahsen pwukat me lelepek oh mehlel. . . . Mahsen pwukat pweidahr!” Kesiluh, sohte mehkot kak kauhdi Siohwa en ketin kanekehla mehkot me e ketin tapihadahr. Ihme kahrehda e mahsanih: “Ngehi me Alpa oh Omeka.” (Kaud. 21:6) Siohwa pahn ketin kadehdehda me Sehdan sounlikamw men me sohte kak kauhdi kupwure en pweida. Eri ni ahnsou me emen nda, “Soahng pwukat kaselel, ahpw I sohte kamehlele me e kak pweida,” wadek oh kawehwehiong ih Kaudiahl 21:​5, 6. Kasalehda ia duwen Siohwa eh kin ketin kamehlelehiong kitail me sapwellime inou pahn pweida, me mwomwen duwehte eh ketin sainihala.—Ais. 65:16. w23.11 7 ¶18-19

Siohwa ketin inoukihong Eipraam ni eh sounpar 75 oh sohte nah seri. Ia duwe, Eipraam kilang kokohp wet eh pweida? Soh, kaidehn koaros. Ni eh kotehla Pillap Iupreitis oh awiawihki sounpar 25, Eipraam kilang ipwidi en nah pwutako, Aisek oh mwurin sounpar 60, e kilang ipwidien nein Aisek pwutak kan, Esau oh Seikop. (Ipru 6:15) Eipraam sohte kilang kadaudoke kan wiahla wehi laud ehu oh sohsohki Sapwen Inowo. Ahpw ohl lelepek menet ahneki nanpwungmwahu keren rehn Sounkapikadao. (Seims 2:23) Oh ni ahnsou me Eipraam pahn iasada, ia uwen eh pahn peren ni eh pahn esehda me eh pwoson oh kanengamah kin kahrehda wehi koaros en paiekihda! (Sen. 22:18) Ia mehn kasukuhlo? Ele kitail sohte kak kilang sapwellimen Siohwa inou kan koaros pweida ahnsou wet. Ahpw, ma kitail kin kanengamah duwehte Eipraam, kitail kak kamehlele me Siohwa pahn ketin katingih kitail ahnsou wet oh pil kapaiahda kitail laud nan Sapwellime sampah kapwo.—Mark 10:​29, 30. w23.08 24 ¶14

Ahnsou me e pwulopwul, Nanmwarki Usaia kin aktikitik. E sukuhlki en “papah KAUN-O ni loalopwoat” de lemmwiki Koht. E momour lel sounpar 68 oh pali laud en eh mour, Siohwa ketin kapaiahda. (2 Kron. 26:​1-4) Usaia kalowehdi imwintihti tohto en eh wehio oh sinsile mwahu Serusalem. (2 Kron. 26:​6-15) Usaia uhdahn perenki soahng koaros me Koht ketin sewesehki ih. (Ekl. 3:​12, 13) Nanmwarki Usaia kin ahnla ndaiong meteikan dahme ren wia. Ia duwe, met kahrehiong ih en medewe me e kak wia soahng sohte lipilipil? Ehu rahn, Usaia pedolong nan sapwellimen Siohwa tehnpas sarawio oh song en isik war pwoh mwahu pohn pei sarawio me nanmwarki kan sohte mweimweiong en wia. (2 Kron. 26:​16-18) Samworo Lapalap Asaraia song en kapwungala ih, ahpw Usaia uhdahn lingeringerda. E kansensuwed me Usaia sohla lelepek oh Siohwa ketin kalokehki soumwahu en tokutok. (2 Kron. 26:​19-21) E uhdahn pahn mwahu ma e aktikitikte! w23.09 10 ¶9-10

Pil mwurin eh wiahla Kristian keidi men, wahnpoaron Piter anahne pelipeliante eh luwet kan. Nan pahr 36, Piter mi mwo ahnsou me Kornilius, me kaidehn mehn Suhs, keikihdi sapwellimen Koht manaman, me kadehdehda ni sansal me Koht “sohte kin ketin lipilipilki aramas” oh irail kan me kaidehn mehn Suhs pil kak wiahla kisehn mwomwohdiso en Kristian. (Wiewia 10:​34, 44, 45) Mwurin mwo, Piter kak iang mwenge rehn mehn liki kan, mehkot me e sohte pahn wia mwoweo. Ahpw, ekei Kristian mehn Suhs medewe me mehn Suhs kan oh mehn liki kan sohte kak mwengepene. Ni ahnsou me ekei irail me ahneki soangen madamadau wet kohla Andiok, Piter uhdihsang mwengehiong mehn liki kan, mwein pwehki e masak en kansensuwedihala irail Kristian mehn Suhs kan. Wahnpoaron Pohl kilang duwen tiahk mwalaun wet oh kapwungala Piter mwohn meteiko koaros. (Kal. 2:​13, 14) Mendahki sapwung laud wet, Piter pousehlahte papah Siohwa. w23.09 22 ¶8

Pein kasawihiuk ni mehlel oh kilang wasa kan me ke kak kamwahwihala, ahpw dehr mworusala. “Kauno me ketin kadek” oh e pahn ketin seweseiuk en kekeirda. (1 Pit. 2:3) Wahnpoaron Piter kamehlelehiong kitail: “Koht . . . pahn ketin kanekehla amwail kaiahn. E pahn ketin katengeikumwaildi.” Nin tapio, Piter pehm me e sohte warohng mi rehn Sises. (Luk 5:8) Ahpw pwehki limpoak oh utuht sang Siohwa oh Sises, Piter pousehlahte idawehn Sises ni lelepek. Eri Siohwa ketin mweidohng Piter en pedolong “nan Wehi poatopoat en atail Kaun oh Sounkomour Sises Krais.” (2 Pit. 1:11) Met wia keting laud ehu! Ma ke pousehlahte papah Siohwa duwehte me Piter wia, oh mweidohng Siohwa en ketin kaiahneiuk, ke pahn pil ale keting en mour soutuk. Ke pahn ‘ale mehn akadei en omw pwoson, me iei komourpomw.’—1 Pit. 1:9. w23.09 31 ¶16-17

Mie wasa kelepene ehu ni impwal sarawio me samworo kan kin wia arail doadoahk. Pei sarawi laudo me wiawihdahsang prons ong meirong isihs mi wasa me kelpeneo, iangahki peisin en pihl prons ehu me samworo kan kin doadoahngki pwehn kamwakeleirailda mwohn arail pahn wia arail doadoahk sarawio. (Eks. 30:​17-20; 40:​6-8) Rahnwet, rien Krais me keidi kan nin sampah kin papah ni lelepek ni wasa me kelpeneo masloale en tehnpas sarawi lapalapo. Peisin en pihl laudo me mi nan impwal sarawio oh tehnpas sarawio kin wia mehn kataman ehu ong irail, oh pil ong Kristian kan koaros en kolokolete arail mwakelekel. Eri, ia wasa me ‘pokon kalaimwuno’ pahn kaudokiong Siohwa? Wahnpoaron Sohn kilang arail “uh mwohn mwoahlo . . . oh re kin papah [Koht] ni rahn oh nipwong.” Pokon kalaimwuno kin wia met nin sampah ni wasa me kelpeneo masliki en sapwellimen Siohwa tehnpas sarawi lapalapo. (Kaud. 7:​9, 13-15) Ia uwen atail uhdahn kalahnganki me Siohwa ketikihong kitail pai kaselel en kaudokiong ih nan sapwellime tehnpas sarawi lapalapo! w23.10 28 ¶15-16

Ehu ahl me Siohwa kin ketikihong kitail kehl iei sang elder kan. (Ais. 32:​1, 2) Eri ni omw kin pwunod, ehukihong elder kan omw pepehm. Dehr peikasalki ale sawas sang rehrail. Pwehki irail, Siohwa kak ketin kakehlakaiukada. Inou kan nan Paipel, atail koapworopwor en mour kohkohlahte nanleng de nan Paradais nin sampah, pil kak kihong kitail kehl pwehn pousehlahte papah Siohwa. (Rom 4:​3, 18, 19) Atail koapworopwor kin kakehlaka kitail en dadaur pahn kahpwal kan, kalohki rongamwahwo, oh papah riatail Kristian kan nan mwomwohdiso. (1 Des. 1:3) Soangen koapworopwor wet kakehlakahda wahnpoaron Pohl. E kin “idaidpene,” “pingida,” “aramas kin kaloke,” oh ‘kesehdi.’ Ekei pak eh mour kin mihla nan keper. (2 Kor. 4:​8-10) Sang ni eh koapworopwor, Pohl alehdi kehl pwehn dadaurete. (2 Kor. 4:​16-18) Pohl medemedewehte eh koapworopwor en mour soutuk nanleng. Pohl doudouloale koapworopworo, oh imwilahn met, e pehm me e “kekehlailla ehuehu rahn.” w23.10 15-16 ¶14-17

Ni omw kapakap, medewe ma ih ahnsou me Siohwa pahn ketin sapengala omw kapakapo. Ele kitail medewe me atail kapakap kan anahne pasapengla ni ahnsou mwadang. Ahpw, Siohwa ketin mwahngih ahnsou me keieu mwahu en ketikihda sawas. (Ipru 4:16) Ni atail sohte kin mwadangete alehdi dahme kitail peki, ele kitail kin medewe me pasapengo sang Siohwa iei ‘Soh.’ Ahpw ni mehlel, ele sapwellime pasapengo iei ‘Saikinte.’ Karasepe, brother pwulopwul men kapakapki eh soumwahwo en mwahula. Ahpw eh soumwahu sohte mwahula. Ma Siohwa ketin kamwahwihala ih, Sehdan kakete akupwungki me brothero pousehlahte papah Siohwa ihte pwehki Siohwa ketin kamwahwihala ih. (Sohp 1:​9-11; 2:4) Pil ehu, Siohwa ketin koasoanedier iahd me e pahn ketin kamwahwihala soangen soumwahu koaros. (Ais. 33:24; Kaud. 21:​3, 4) Ahpw lao lel ahnsowo, kitail sohte kak kasik me Siohwa pahn ketin wiahda manaman kan pwehn kamwahwihala atail soumwahu. Eri, brothero kak peki rehn Siohwa en ketikihong ih kehl oh meleilei pwe en kak dadaur pahn eh soumwahwo oh pousehlahte papah Koht ni lelepek. w23.11 24 ¶13

Samson wiahda sapwung laud ehu, ahpw e sohte uhdihsang papah Siohwa. E rapahki ahnsou mwahu en peiong mehn Pilisdia ko, pwehki ih pwukoa me Koht ketikihong ih. (Sounkopwung 16:​28-30) Samson peki rehn Siohwa: “Komw ketin kapwuredohng ie pil ehu kehlail, pwe I en ikihong mehn Pilisdia kat.” Koht mehlelo ketin sapengala ahn Samson pekipeko oh ketin kapwurehiong eh kehl tohrohro. Eri, ni ahnsowo Samson kemehla mehn Pilisdia tohtohsang me e kemehla mwoweo. Mendahki Samson lelohng imwila suwed pwehki sapwung me e wiahda, e sohte uhdihsang eh songosong en wia kupwuren Siohwa. Ma kitail pil wiahda sapwung ehu oh anahne peneu de kitail luhssang pwais kaselel ehu, kitail en dehr uhdi papah Siohwa. Tamataman me Siohwa kin ketin kupwurki mahkohng kitail. (Mel. 103:​8, 9) Mendahki atail sapwung kan, Siohwa kak ketin doadoahngkihte kitail, duwehte eh ketin doadoahngki Samson. w23.09 6 ¶15-16

Ni omw kin dadaur, Siohwa kin ketin kupwurperenkin uhk. Met sohte wehwehki me Siohwa kin ketin kupwurperenki omw lelohng kahpwal kan. Ahpw e kin ketin kupwurperenkihda omw kin dadaur ni lelepek. Met kin uhdahn kangoange kitail en ese me ni atail kin dadaur, kitail kin kaperenda Siohwa! (Mel. 5:12) Tamataman me Eipraam lelohng kahpwal kan oh ni eh dadaur pahn kahpwal pwukat ni lelepek, Siohwa ketin kupwurperenkihda. Siohwa ketin wiahki ih Kompoakepah oh aramas pwung men. (Sen. 15:6; Rom 4:​13, 22) Met pil kak wiawihong kitail. Siohwa kin ketin kupwurperenki kitail kaidehn pwehki uwen laud en doadoahk me kitail kin wia de pwehki pwais kaselel kan me kitail ahneki. Siohwa kin ketin kupwurperenki kitail ni atail kin lelepek mendahki kahpwal kan. Sohte lipilipil atail sounpar, atail irair, de atail koahiek, kitail koaros kak dadaur. Ia duwe, ke kin dadaur pahn kahpwal ehu ahnsou wet oh kin loalopwoatete ong Siohwa? Ma ei, tamataman me ke kin kaperenda Siohwa. Atail pohnese me Koht ketin kupwurperenki kitail kak uhdahn kamwakid kitail. E kak kakehlakahla atail koapworopwor. w23.12 11 ¶13-14

Ohl Kristian men anahne esehla en kin rong mwahu oh koasoi ni kadek. Met wehwehki me e anahne rong oh wehwehki pepehm oh madamadau en meteikan. (Lep. Pad. 20:5) E kak esehla aramas emen sang ni mwomwen ngilen aramaso, mwomwen pohn meseo, oh mwomwehu. Ke sohte kak esehla met ma ke sohte wiahda ahnsou en patehng aramaso. Ma ke kin kalapw doadoahngki email, text, oh soahng teikan, eri e pahn apwal ong uhk en tuhwong aramaso oh koasoiong. Eri song en diarada ahl teikan en tuhwong oh koasoiong meteikan. (2 Sohn 12) Ohl Kristian koahiek men pil anahne pein kak apwalih pein ih oh eh peneinei. (1 Tim. 5:8) E mwahu en esehla doadoahk ehu me kak seweseiuk diarada omw doadoahk. (Wiewia 18:​2, 3; 20:34; Ep. 4:28) Doadoahk laud oh tehk mwahu me ke kanekehla dahme ke tapiada. Meteikan pahn tehk met oh re pahn wauneki omw doadoahk. Ma ke wia met, ke kakete alehdi doadoahk ehu oh kolokolete. w23.12 27 ¶12-13

Ni Paipel eh kin koasoia duwen “rahnen Siohwa,” e kin dokedoke ahnsou ehu me Siohwa ketin kasohrehla sapwellime imwintihti kan oh kapitala sapwellime aramas akan. Mahso, Siohwa ketin kaloke ekei wehi. (Ais. 13:​1, 6; Esek. 13:5; Sep. 1:8) Nan atail ahnsou, “rahnen Siohwa” pahn tepida ahnsou me kaunen koperment kan pahn kasohrehla Papilon Lapalap oh pahn imwisekla ni mahwen en Armakedon. Pwehn pitsang ‘rahno,’ kitail anahne kaunopada ahnsou wet. Sises ketin padahngki me kaidehn kitail en kaunopadahte ong “kahn kamakam kowahlap,” ahpw kitail “en pil onohnop” ong rahno. (Mad. 24:21; Luk 12:40) Nan nah keieun kisinlikou ong mehn Deselonika ko, wahnpoaron Pohl doadoahngki karasaras kei pwehn sewese rie Kristian ko en onohnop ong rahn lapalap en sapwellimen Siohwa kadeik. Pohl ese me rahnen Siohwa sohte pahn wiawi ahnsowo. (2 Des. 2:​1-3) Ahpw e kangoange rie ko en kaunopada ong rahno duwehte ma rahno pahn wiawi lakapw, oh kitail pil kak doadoahngki eh kaweido. w23.06 8 ¶1-2

Nan pahr 1978, ihmw ehu me uhdahn ileile kokouda nan Tokyo, Sapan. Aramas tohto kin medewe ia duwen ihmw ileile wet eh kak kesikesihnente, pwehki rerrer en sahpw kin kalapw wiawi wasao. Dahme sounwia ihmw kan wia pwe ihmw wet en kak mihmihte? Irail wiahda ihmwo pwehn uhdahn kehlail oh ni ahnsowohte kak mwekidseli ahpw sohte mweredi erein rerrer en sahpw wiawi. Kristian kan duwehte ihmw ileile wet. Ni ahl dah? Kristian men anahne kin tengetengete oh pil toupahrek. E anahne kehlail oh tengeteng ni eh kin utung sapwellimen Siohwa kosonned oh koasoandi kan. E kin “men peik” oh sohte kin wekidala eh madamadau. E pil anahne “toupahrek” ni ahnsou me e kak de ni ahnsou me anahn. (Seims 3:17) Kristian me esehlahr en kin toupahrek sohte pahn kin nohn kakos de sohte kakos. w23.07 14 ¶1-2

Sises anahne soikala Sehdan me kasonge en wiahda dihp oh pil ndaiong en uhdihsang eh loalopwoatohng Siohwa. (Mad. 4:​1-11) Sehdan koasoanehdi teng en kahrehiong Sises en wiahda dihp pwe en dehr pwainla pweinen pweipwei sapahlo. Erein sapwellime doadoahk en kalohk nin sampah, Sises pil ketin lelohng kasongosong teikan. Sapwellime imwintihti kan kaloke ih oh song en kemehla. (Luk 4:​28, 29; 13:31) E anahne ketin dadaur pahn soh unsek en sapwellime tohnpadahk ko. (Mark 9:​33, 34) Ni kopwung eh wiawihong ih, e ketin lelohng lokolok oh meteikan kapailoke. Ih eri kamakamala duwehte loallap men oh ketin lelohng lokolok laud. (Ipru 12:​1-3) E anahne pein dadaur pahn kaimwiseklahn eh lokolok oh Siohwa sohte ketin pere ih. (Mad. 27:46) Sises ketin lokolok laud pwe en ketikihda pweinen pweipwei sapahlo. Ni atail medewehla duwen tounmetei kan koaros me Sises kupwurki wiahiong kitail, kitail kin uhdahn poakohngala ih. w24.01 10-11 ¶7-9

Kanengamah kak sewese kitail nan atail wiewia ong meteikan. E kin sewese kitail en rong kanahieng ni meteikan ar kin koasoi. (Seims 1:19) Kanengamah pil kin sewese kitail en ahneki popohl rehn meteikan. Ma kitail kin kanengamah, kitail sohte pahn mwekid ni pwurur oh nda mehkot me sohte kadek ni atail kin pwunodada. Oh ma kitail kin kanengamah, kitail sohte pahn mwadang lingeringerda ni emen eh kamedekeikitailla. Kitail pahn “pousehlahte kanengamahiong emenemen oh mahkpene douluhl,” ahpw dehr dupuk. (Kol. 3:​12, 13) Kanengamah pil kak sewese kitail en wiahda pilipil mwahu kan. Kitail pahn kihong ahnsou en esehda uwen atail kak duwen pilipil kan me kitail wiahda oh ahneki oh pilada me keieu mwahu. Karasepe, ma kitail kin rapahki doadoahk, kitail kakete ale keieun doadoahk me kitail diar. Ahpw ma kitail kin kanengamah, kitail pahn kihong ahnsou en medewe dahme doadoahko kak wiahiong atail peneinei oh atail nanpwungmwahu rehn Siohwa. Ni atail kin kanengamah, ele kitail kak soikala wiahda pilipil sapwung. w23.08 22 ¶8-9

Ma ke kin mworusala pwehki ke anahne pelianda omw ineng sapwung kan, omw medemedewe inowo me ke wiahiong Siohwa pahn kakehlaka omw koasoanehdi teng en pelianda kasongosong. Ia duwen? Ni omw inoukihong Siohwa omw mour, ke tounmeteikilahr omw mour. Met wehwehki me ke piladahr en soikala pein omw ineng kan oh mehn akadei kan me pahn kansensuwedihala Siohwa. (Mad. 16:24) Eri, ni omw lelohng kasongosong ehu, ke sohte anahne medemedewe dahme ke anahne wia. Ke koasoanedier dahme ke pahn wia, me iei en lelepekohngete Siohwa. Ke pahn tengediongete en kaperenda Siohwa. Ke pahn duwehte Sohp. Mendahki e lelohng kahpwal kan me uhdahn laud, e koasoia: “I pahn keptakaila koasoakoasoia ei mwakelekel.”—Sohp 27:5. w24.03 9 ¶6-7

Siohwa “Koht en limpoak,” kin ketin ieiang kitail! (2 Kor. 13:11) E ketin nsenohkin kitail. Kitail kamehlele me “sapwellime limpoak poatopoat pahn sinsile” kitail. (Mel. 32:10) Uwen laud en atail kin doudouloale eh ketin poakohng kitail, ih uwen laud en atail pahn kilang eh ketin nsenohkin kitail oh kitail pahn karanihala ih. Kitail kak kapakap ong ih ni saledek oh patohwanohng ih ia uwen atail anahne sapwellime limpoak. Kitail kak ehukihong ih atail pwunod akan koaros, pwehki kitail kamehlele me e ketin mwahngih oh kupwurki sewese kitail. (Mel. 145:19) Duwehte atail kin keilahng mpen kisiniei ehu ni ahnsoun kopou, sapwellimen Siohwa limpoak kin kahrehiong kitail en keilahng mpe. Mendahki sapwellimen Siohwa limpoak uhdahn kehlail e pil kin kansenamwahu. Eri pereperen pwehki Siohwa ketin poakohng uhk. Oh kitail koaros en mwekidki sapwellime limpoak oh nda: ‘I kin poakohng Siohwa’!—Mel. 116:1. w24.01 31 ¶19-20

Sises ketin wia laudsang en padahkihongete aramas akan me mwaren Koht iei Siohwa. Mehn Suhs kan me Sises ketin padahki eseier mwaren Koht. Ahpw Sises ketin tiengla mwowe oh “patohwan kawehwehdahr duwen Ih.” (Sohn 1:​17, 18) Karasepe, Palien Paipel ni Lokaiahn Ipru kasalehda me Siohwa kin ketin kadek kalahngan oh kupwurkalahngan. (Eks. 34:​5-7) Sises ketin kalaudehla ire mehlel wet ni eh ketin doadoahngki karasaras en pwutak me salongalao oh eh pahpao. Ni atail wadek duwen pahpao eh kilangada nah pwutak me koluhlahro “eh mihmihte wasa doh,” oh tangala pwehn tuhwong oh pwoalehdi, oh uhdahn mahkohng, kitail kin uhdahn wehwehkihla uwen Siohwa eh kin ketin kadek kalahngan oh kupwurkalahngan. (Luk 15:​11-32) Sises ketin sewese aramas akan en wehwehki soangen Koht dahmen Siohwa. w24.02 10 ¶8-9

Siohwa kin ketin kansenamwahwihala irail kan me kin lelohng lokolok. Ia duwen atail kak kahlemengih Siohwa oh poakehla oh kansenamwahwihala meteikan? Ehu ahl en wia met iei sang ni atail kakairada nan mohngiongitail soangen irair kan me pahn sewese kitail en poakehla oh kansenamwahwih meteikan. Ia ekei irair pwukat? Dahme pahn sewese kitail en pousehlahte poakohng oh ‘kansenamwahwih emenemen’ rahn koaros? (1 Des. 4:18) Kitail anahne kakairada soangen irair kan me duwehte ahneki limpoak en pirien, kadek, oh iang riatail kan nan arail lokolok. (Kol. 3:12; 1 Pit. 3:8) Ia duwen irair pwukat ar pahn sewese kitail? Ni atail kin poakehla riatail Kristian kan oh uhdahn nsenohkin irail, kitail pahn ahneki ineng laud en kansenamwahwih irail ni arail lelohng lokolok. Nin duwen me Sises mahsanih, “ewen aramas kin kapwadewei audepen eh mohngiong. Aramas mwahu kin kihda dahme mwahu sang soahng mwahu kan me e kin nekinekid.” (Mad. 12:​34, 35) En kansenamwahwih riatail kan me anahne sawas wia ahl ehu me uhdahn kesempwal pwehn kasalehda atail poakohng irail. w23.11 10 ¶10-11

Kitail anahne peki sawas ma kitail men wehwehkihla kokohp en Paipel kan. Medewehla karasaras wet. Medewehla me ke mwemweitla wasa ehu me ke sehse ahpw kompoakepahmwo me iang uhk uhdahn ese wasao. E ese ia wasa me kumwa mi ie, oh ese ahl ko koaros. Ele ke pahn uhdahn perenki me kompoakepahmwo iang uhk! Duwehte met, Siohwa ketin mwahngih soangen ahnsou dah me kitail miher loale oh dahme pahn wiawi ni ahnsou kohkohdo. Eri pwehn wehwehki kokohp en Paipel kan, kitail anahne peki ni aktikitik sapwellimen Siohwa sawas. (Dan. 2:28; 2 Pit. 1:​19, 20) Duwehte pahpa nohno mwahu men, Siohwa ketin kupwurki sapwellime kan en ahneki nsenamwahu ni ahnsou kohkohdo. (Ser. 29:11) Ahpw weksang aramas, Siohwa kak ni pwung ketin padahkihong kitail dahme pahn wiawi ahnsou kohkohdo. E ketin pilada ohl kei en ntingihedi kokohp kan pwe kitail en kak ese duwen mwekid kesempwal kan mwohn ar wiawi.—Ais. 46:10. w23.08 8 ¶3-4