September

Koht ketikihong Sises manaman en kamwahwihala ahn aramas akan kahpwal koaros. Ni Sises eh ketin wiahda manaman kan, e kadehdehda me e kak ketin kamwahwihala kahpwal koaros me kitail sohte kak pein kamwahwihala. Karasepe, e sapwellimanki manaman en kasaledekikitailsang kahpwal kan me kitail sohsohki sang dihp, oh pil soahng koaros me dihp kin kahrehda, me iangahki soumwahu oh mehla. (Mad. 9:​1-6; Rom 5:​12, 18, 19) Sapwellime manaman kan kadehdehda me e kak ketin kamwahwihala “soangsoangen” soumwahu oh pil kaiasada me melahr kan. (Mad. 4:23; Sohn 11:​43, 44) Patehng met, e sapwellimanki manaman en kauhdi melimel laud kan oh kasaledekihasang aramas akan ngehn suwed kan. (Mark 4:​37-39; Luk 8:2) Ia uwen eh mwahu en ese me Siohwa ketikihong soangen manaman wet rehn sapwellime Ohlo! Kitail kak uhdahn kamehlele me inoupen soahng mwahu kan pahn kaundahn Wehin Koht pahn pweida. Manaman kan me Sises ketin wiahda ni ahnsou me e ketiket nin sampah padahkihong kitail dahme e pahn ketin wia nan sampah pwon nin duwen Nanmwarki en Wehin Koht nanleng. w23.04 3-4 ¶5-7

Ma ke mi nan mwomwohdiso laud ehu oh ke pehm me brothero sohte kin piluhkada, ke kakete sohla pasapeng. Ahpw dehr uhdihsang song en pasapeng. Kaunopada ekei pasapeng ong ehuehu mihting. Eri ma ke sohte pilipilda en pasapeng ni tepin onopo, ke pahn ahnekihte ahnsou mwahu en pasapeng ni erein mihtingo. Ni omw kaunopada noumw Kahn Iroir, medemedewe ia duwen ehuehu parakrap eh dokedoke oaralap en iren onopo. Ma ke wia met, ele e pahn mie pasapeng mwahu kan me ke kak wia erein onopo. Patehng met, ke kak kaunopada en pasapeng ni parakrap kan me koasoia padahk loal kan me apwal en kawehwehda. Dahme kahrehda? Pwehki e kakete malaulau me pahn pasapeng wasa ko. Ahpw ia duwen ma ke diarada me mwurin mihting kei, ke pil saikinte ahneki ahnsou mwahu en iang pasapeng? Koasoiaiong brother me pahn wia Kahn Iroiro mwohn mihtingo mehnia peidek me ke men sapeng. w23.04 21-22 ¶9-10

Sosep kin mwadang en kapwaiada sapwellimen Siohwa kaweid kan, oh met kahrehiong ih en wia ohl pwopwoud mwahu men. Pak siluh e alehdi kaweid kan sang rehn Koht me pid eh peneineio. Ehuehu ahnsou ko, e mwadang kapwaiada, mehnda ma e apwal ong ih. (Mad. 1:20; 2:​13-15, 19-21) Sang ni eh idawehn sapwellimen Koht kaweid, Sosep kin pere, utung, oh apwalih Mery. Medewehla ia uwen en Sosep wiewia ko ar kalaudehla en Mery wauneki ih! Ohl pwopwoud kan, kumwail kak alasang Sosep sang ni amwail kin rapahki kaweid kan en Paipel pwehn apwalih amwail peneinei. Ni amwail doadoahngki kaweido, mehnda ma met wehwehki kumwail anahne wiahda wekidekla laud kan, kumwail kin kasalehda amwail poakohng amwail pwoud oh kin kakehlailih amwail pwopwoud. Sister men sang Vanuatu, me pwopwoudkier daulih sounpar 20 koasoia: “Ni ei pwoudo eh kin rapahki oh kapwaiada sapwellimen Siohwa kaweid, met kin kalaudehla ei wauneki ih. I pehm me I sohte anahne perki mehkot, oh I kin likih eh pilipil kan.” w23.05 21 ¶5

Mehn Suhs kan me pwurala sang Papilon pahn wiahla “aramas sarawi” kei ong arail Kohto. (Deud. 7:​6, NW) Ahpw met sohte wehwehki me irail kan sohte anahne wiahda wekidekla kan pwehn kaperenda Siohwa. Pali laud en mehn Suhs kan me ipwidi nan Papilon ahnlahr madamadau oh tiahk en mehn Papilon kan. Sounpar tohto mwurin tepin mehn Israel ko pwurala Israel, Kepina Nehmaia pil pwuriamweikihla eh esehda me seri kan me ipwidi nan Israel sohte pil sukuhlki lokaiahn mehn Suhs kan. (Deud. 6:​6, 7; Neh. 13:​23, 24) Ia duwen me pwulopwul ko ar kak sukuhlki en poakohng oh kaudokiong Siohwa ma irail sohte kak wehwehki lokaiahn Ipru—uhdahn lokaiao me re kin doadoahngki pwehn ntingihada Mahsen en Koht? (Esra 10:​3, 44) Eri, mehn Suhs ko anahne wiahda wekidekla laud kan, ahpw e pahn mengei ma irail wiahda wekidekla pwukat nan Israel, wasa me kaudok min kedekedeo pwurehng wiawi.—Neh. 8:​8, 9. w23.05 15 ¶6-7

E kansensuwed me sohte lipilipil ia uwen atail inengieng en kapwaiada atail mehn akadei, ele mie soahng kan me kin wiawi me kahrehda e apwal ong kitail. Karasepe, ele kitail lelohng “paisuwed” me kak kihsang atail ahnsou en kapwaiada atail mehn akadei. (Ekl. 9:11) Ele kitail lelohng kahpwal ehu me kahrehiong kitail en mworusala oh kaluwetekitailla. (Lep. Pad. 24:10) Pwehki kitail soh unsek, kitail kak wiahda sapwung kan me kahpwalihala atail en lel atail mehn akadei. (Rom 7:23) De kitail uhdahn pwang. (Mad. 26:43) Dahme kak sewese kitail en powehdi kahpwal ehu me kakete wiawi? Tamataman me met sohte wehwehki me ke sohte pweida. Paipel mahsanih me ele kitail pahn pwurupwurehng lelohng kahpwal kan. Ahpw e pil kasalehda ni sansal me kitail kak pwurehng song en lel atail mehn akadei. Sang ni omw pousehlahte song en lel omw mehn akadei mendahki e apwal, ke kin kadehdehiong Siohwa me ke men kaperenda ih. Ia uwen Siohwa eh kin ketin kupwurperenkihda ni eh mahsanih omw kin nannantihte en lel omw mehn akadei! w23.05 30 ¶14-15

Doadoahk en pioneer kin sewese brother pwulopwul men en esehla ehuiong soangsoangen aramas akan. E pil kin sewese en esehla mwahu doadoahngki nah mwohni oh dehr doadoahngkihla laudsang dahme e naineki. (Pil. 4:​11-13) Ahl keieu mwahu en tepida doadoahngki pali laud en eh ahnsou en papah Siohwa, iei doadoahk en sawasepen pioneer, met kin sewese ih en tepida pioneer. Mwurin arail tepida pioneer, mwuhr ele irail kak alehdi soangen pwukoa teikan, me duwehte iang kauwada wasahn kaudok kan oh doadoahk nan Pedel. Ohl Kristian koaros anahne akadeiong en kak papah riarail Kristian kan nin duwen elder men nan mwomwohdiso. Paipel mahsanih me ohl akan me kin nantihong alehdi pwukoa wet kin “inengieng doadoahk mwahu ehu.” (1 Tim. 3:1) Keieu, brother men anahne wiahla sounsawas men. Sounsawas kan kin sewese elder kan ni ahl tohto. Elder oh sounsawas kan kin ni aktikitik papah riarail Kristian kan oh ngoangki doadoahk en kalohk. w23.12 28 ¶14-16

Nanmwarki Sosaia sounpar 16 ni ahnsou me e tepida karanihala Siohwa. E men sukuhlki duwen Siohwa oh wia kupwure. Nin duwen nanmwarki pwulopwul men e sohte mengei ong ih. Ni ahnsowo, pali laud en aramas akan kin kaudokiong koht likamw kan oh Sosaia anahn eimah pwehn kauhdi irail. Oh e uhdahn pweida! Mwohn Sosaia eh sounpar 20, e tepida kihsang nan wehio kaudok likamw. (2 Kron. 34:​1, 2) Mehnda ma ke pwulopwulte, ke kak pilada en alasang Sosaia sang ni ahmw karanihala Siohwa oh sukuhlki en kalahnganki sapwellime irair kaselel kan. Ni ahmw wia met, ke pahn men inoukihong ahmw mour ong ih. Ia duwen met eh pahn kamwakid ahmw mour? Luke, me sounpar 14, koasoia, “Sang met kohla, I pahn mwohneki Siohwa nan ei mour oh song en kaperenda ih.” (Mark 12:30) Ia uwen met eh pahn wia kapai ehu ong uhk ma ke men wia soahngohte! w23.09 11 ¶12-13

Ni ahnsou me wahnpoaron Pohl ntingihedi nah kisinlikowo, mwomwohdisohn Deselonika saikinte sounpar ehu. Ohl akan me idihdida ele soakoahiek oh kin wiahda sapwung. Ahpw meteikan anahne waunekihte irail. Ni kahn kamakam kowahlapo eh kerendohr, ele kitail anahne koapworopworki elder kan en kaweid kitail laudsang ahnsou wet. Mwein kitail sohla kak ale kaweid sang atail poasen kaun oh ohpis en Sounkadehdehn Siohwa kan; eri, e kesempwal en esehla poakohng oh wauneki elder kan ahnsou wet. Sohte lipilipil dahme pahn wiawi, kitail en kolokolete atail koahiek en madamadau, dehr kilikilangete arail soh unsek, ahpw medemedewehte duwen Siohwa eh kin ketin doadoahngki Krais pwehn kaweid ohl lelepek pwukat. Duwehte lisoarop eh kin pere moangen sounpei men, atail koapworopwor en komourla pil kin pere atail madamadau. Kitail pohnese me dahme sampah wet kin kihda sohte katepe. (Pil. 3:8) Atail koapworopwor kin sewese kitail en meleilei oh tengeteng. w23.06 11-12 ¶11-12

Irail kan me kin rong ‘lih pweipweio’ anahne pilada ma irail pahn alehda de soikala eh luhko. Mie kahrepe kan me uhdahn mwahu me kitail en soikala tiahk samin me pid wia nsenen pwopwoud. ‘Lih pweipweio’ kin mwomwen ndinda: “Pihl me pirapada me iou.” (Lep. Pad. 9:17) Ia wehwehn “pihl me pirapada”? Paipel kapahrekiong wia nsenen pwopwoud nanpwungen pwopwoud ehu pihl me kansenamwahu. (Lep. Pad. 5:​15-18) Pwopwoud ehu me pwopwoudida nin duwen kosonned kak perenki wia nsenen pwopwoud nanpwungara. Ahpw “pihl me pirapada” uhdahn weksang met. E kak pidada wia nsenen pwopwoud me sohte konehng. Soahng wet kin kalapw wiawi ni rir, duwehte sounpirap men me kin kalapw pirap ni rir. “Pihl me pirapada” ele kin mwomwen iou ma irail kan me wia tiahk wet kin medewe me sohte emen pahn diarada. Irail kin pitipitih pein irail pwehki Siohwa kin ketin mahsanih soahng koaros. Ma Siohwa sohla ketin kupwurkin kitail, met wia mehkot me keieu katik, de keieu suwed, me kak wiawihong kitail, oh e uhdahn sohte “iou.”—1 Kor. 6:​9, 10. w23.06 22 ¶7-9

Ia duwen ma erein ahnsou ehu, ke pehm me omw kapakap kan sohte kin uhdahn kohsang nan omw mohngiong de ke sohla perenki doadoahk en kalohk? Dehr medewe me sapwellimen Siohwa manaman solahr ieiang uhk. Ke sohte unsek, oh omw pepehm kak wekiwekla. Ma omw ngoang tepida luwetala, medemedewe mehn kahlemeng en wahnpoaron Pohl. Mendahki e kin song en kahlemengih Sises, e ese me ekei pak e sohte pahn kin nohn men wia dahme e anahne wia. Pohl koasoanedier teng en kapwaiada eh doadoahk en kalohk mehnda ma e sohte nohn men wia met ni ahnsowo. Pil duwehte met, ken dehr mweidohng omw madamadau soh unsek en kamwakid omw pilipil kan. Koasoanehdi teng me ke pahn wia dahme pwung mehnda ma met sohte pahrekiong nsenomw. Ma ke kin doulahte wia me pwung, omw pepehm pahn ekisekis wekila.—1 Kor. 9:16. w24.03 11-12 ¶12-13

Kitail kak kasalehda atail poakohng riatail Kristian kan sang ni atail wiahkihla irail kompoakepatail. (2 Kor. 6:​11-13) Me tohto rehtail kin iang mwomwohdiso kan me riatail kan weksang kitail oh me ahneki soangsoangen irair kan. Kitail kak kakehlaka atail limpoak ong irail koaros sang ni atail medemedewehte arail irair mwahu kan. Ni atail kin kilangwohng meteikan ni ahlohte me Siohwa kin ketin wia, kitail kin kadehdehda me kitail poakohng irail. Limpoak pahn uhdahn kesempwal erein kahn kamakam kowahlapo. Ni kahn kamakam kowahlapo eh pahn tepida, ia wasa kitail pahn diar ie mehn perepatail? Medewehla dahme Siohwa ketin kaweidki sapwellime aramas ako en wia ni ahnsou me mahwen wiawihong Papilon en mahso. E ketin mahsanih: “Nei aramas akan, kumwail pedolong nan imwamwail kan, oh ritingedi wenihmw. Kumwail rukula mahs lao sapwellimen Koht engieng imwisekla.” (Ais. 26:20) Mwein kitail pil pahn idawehn kaweid kohte erein kahn kamakam kowahlapo. w23.07 6-7 ¶14-16

Kasalehda ni omw wiewia me ke kin madamadau toupahrek. Idek pein rehmw: ‘Aramas kin wiahkin ie emen me kin madamadau toupahrek oh kanengamah? De irail kin wiahkin ie emen me kakos, lemei, de keptakai? I kin rong meteikan oh kapwaiada dahme re men wia ni ahnsou me kak?’ Uwen laud en atail kin kasalehda madamadau toupahrek, ih uwen laud en atail kin kahlemengih Siohwa oh Sises. Kitail anahne madamadau toupahrek ni atail irair kan wekila. Wekidekla pwukat kak kahrehda kahpwal kan me kitail sohte kasik. Ele kitail kak ahnekihda soumwahu laud ehu me kitail sohte kasik. De wekidekla ehu me mwadang wiawi nan koperment wasa me kitail kin mi ie kakete kahrehiong atail mour en uhdahn apwal. (Ekl. 9:11) E pil kak apwal ong kitail ma sapwellimen Siohwa pwihn peki kitail en papah ni ehu ahl tohrohr de ehu wasa tohrohr. Kitail kak wia soahng pahieu pwukat: (1) pohnese me omw irair en ahnsou wet wekila, (2) kilengwohng ahnsou kohkohdo, (3) medemedewe soahng mwahu kan, oh (4) wia soahng kan ong meteikan. w23.07 21-22 ¶7-8

Soukohp Daniel pwulopwul ni ahnsou me mehn Papilon kan wahla en sensel nan Papilon wasa me dohsang Serusalem. Ahpw mendahki e pwulopwul, kaunen Papilon ko kasawihada mwomwen Daniel. Irail kasawih “mwomwen aramas”—me Daniel “masamwahu, paliwar kehlail,” oh me e kohsang peneinei kesempwal ehu. (1 Sam. 16:7) Eri irail kaiahnehda en papah nan tehnpaso. (Dan. 1:​3, 4, 6) Siohwa ketin poakohng Daniel pwehki mwahnakapw menet pilada en loalopwoatohng Siohwa. Ni mehlel, ele Daniel sounparte 20 ni ahnsou me Siohwa ketin mahsanih me e duwehte Noha oh Sohp, ohl kei me kin papah Ih ni lelepek erein sounpar tohto. (Sen. 5:32; 6:​9, 10; Sohp 42:​16, 17; Esek. 14:14) Oh Siohwa ketin pousehlahte poakohng Daniel erein eh mour me mwahu oh werei.—Dan. 10:​11, 19. w23.08 2 ¶1-2

Ni ahnsou me ke pilahne en pwainda ihmw ehu, ke pahn men pein kasawih wasa koaros en ihmwo me ke men pwaindao. Kitail pil kak wia duwehte met ni atail wadek oh onopki Paipel. Ma ke sohte kin wadek Paipel ni wawai, ele ke pahn esehlahte ire mengei kan—“keieun padahk kan duwen sapwellimen Koht mahsen sarawi.” (Ipru 5:12) Ahpw duwehte omw pahn pedolongala nan ihmw ehu pwehn esehla mwahu duwen ihmwo, ke pil anahne onopki mwahu Paipel pwehn kalaudehla omw wehwehki. Ehu ahl me keieu mwahu en onopki Paipel iei en kilang ia duwen ire kan nan Paipel ar dokpene. Nantihong en wehwehkihla kaidehn ihte dahme ke kamehlele ahpw pil dahme kahrehda ke kamehlele. Pwehn wehwehkihla douluhl Mahsen en Koht, kitail anahne sukuhlki padahk loal kan en Paipel. Wahnpoaron Pohl kangoange rie Kristian kan en pwerisekiong arail onopki Mahsen en Koht pwe irail en kak “wehwehkihla douluhl uwen tehlap oh uwen reirei oh uwen ile oh uwen loal” en padahk mehlel. Eri arail pwoson pahn kak “poadidi oh kokouda teng.” (Ep. 3:​14-19) Kitail pil anahne wia duwehte. w23.10 18 ¶1-3

Paipel audaudki mehn kahlemeng en aramas kan me kin kanengamah. Ele e pahn mwahuong uhk ken onopki duwen irail. Karasepe, mendahki Depit pwulopwul ni eh idihdida nin duwen nanmwarki men nan Israel, e anahne awih sounpar tohto mwohn eh pahn wiahla nanmwarki. Simion oh Ana kin kaudokiong Siohwa ni lelepek nin doken ara awiawih Mesaiao me inoupe mie. (Luk 2:​25, 36-38) Ni omw onopki mehn kahlemeng pwukat, kilang pasapengpen peidek pwukat: Ele dahme sewese aramas menet en kasalehda kanengamah? Ia duwen eh paiekihda pwehki eh kanengamah? Ia duwen ei kak alasang ih? Ke pil kak paiekihda ni omw sukuhlki duwen irail kan me sohte kin kasalehda kanengamah. (1 Sam. 13:​8-14) Ele ke pahn idek: ‘Dahme kahrehiong irail en sohte kanengamah? Soahng suwed dah kan me wiawihong irail?’ w23.08 25 ¶15

Wahnpoaron Piter uhdahn loalopwoat; e sohte mweidohng mehkot en kauhdihsang eh kin idawehnte Sises. Karasepe, e kasalehda eh loalopwoat ehu pako ni ahnsou me Sises mahsanih duwen mehkot me sapwellime tohnpadahk ko sohte wehwehki. (Sohn 6:68) Me tohto sohte awih Sises en ketin kawehwehda, ahpw re uhdihsang idawehn ih. A Piter soh. E pohnese me Sises kelehpw me sapwellimanki “mahsen en mour soutuk.” Sises mwahngih me Piter oh wahnpoaron teiko pahn tangasang ih. Mendahki met, Sises ketin kasalehda eh koapworopworki me Piter pahn pwurodo oh pahn lelepekte. (Luk 22:​31, 32) Sises mwahngih me “mohngiong me ngoang, ahpw paliwar me luwet.” (Mark 14:38) Eri, Sises sohte ketin meliehla Piter pil mwurin Piter eh kahmahmkihla ih. Mwurin eh ketin iasada, e ketin pwarohng Piter, ni ahnsou me Piter kelehpw. (Mark 16:7; Luk 24:34; 1 Kor. 15:5) Medewehla ia uwen met eh kakehlakahda Piter me uhdahn nsensuwedkihla dahme e wiahdao! w23.09 22 ¶9-10

Koht kin ketin mahkohng de pwainla dipen irail kan me kin pwoson ih. E kin ketin mahkohng irail douluhl. (Mel. 32:​1, 2) E kin ketin kilengwohng irail nin duwen aramas pwung kei oh sohte sapwung kis rehrail pwehki arail pwoson. Mendahki irail wia aramas pwung kei rehn Koht, Eipraam, Depit, oh sapwellime tohnkaudok lelepek teikan kin wiahte aramas dipan kei. Ahpw pwehki arail pwoson, Koht kin ketin kilengwohng irail nin duwen aramas kei me sohte sapwung kis rehrail, ni mehlel ni atail kapahrekiong irail aramas akan me sohte kin pwoson Koht. (Ep. 2:12) Nan nah kisinlikowo ong mehn Rom kan, wahnpoaron Pohl kawehwehda me kitail anahne pwoson pwehn wiahla kompoakepahn Koht. Eipraam oh Depit wia kompoakepahn Koht pwehki ira pwoson ih. Kitail pil kak wiahla kompoakepah pwehki atail pwoson. w23.12 3 ¶6-7

Rahnwet Kristian kan koaros ahneki pai kaselel en kaudokiong Siohwa sang ni arail doadoahngki arail ahnsou, kehl, oh kepwe kan pwehn papah ih. Kitail kak kasalehda me kitail kesempwalki atail pai kaselel en kaudokiong Siohwa sang ni atail wia uwen atail kak koaros nan sapwellime doadoahk. Wahnpoaron Pohl koasoia duwen soahng kan me kitail anahne ahnsou koaros wia ni atail kaudokiong Siohwa. (Ipru 10:​22-25) Soahng pwukat iei kapakap ong Siohwa, kalohk ong meteikan, iang mihting en mwomwohdiso kan, oh kangoange emenemen ‘oh wia mepwukat laud sang mahs ni atail kilang rahnen Siohwa kerendohr.’ Kerenlahng kaimwiseklahn pwuhken Kaudiahl, tohnlengo koasoia met pak riau pwehn kasalehda uwen kesempwal en met: “Kaudokiong Koht.” (Kaud. 19:10; 22:9) Kitail en dehr manokehla kesempwalpen padahk mehlel loal wet duwen sapwellimen Siohwa tehnpas sarawi lapalapo oh atail pai kaselel en kaudokiong atail Koht lapalapo! w23.10 29 ¶17-18

Kitail koaros men “pousehlahte limpoakpene.” Ahpw e kesempwal en tamataman me Sises mahsanih me “limpoak en pali laud en aramas pahn loula.” (Mad. 24:12) Sises sohte mahmahsanih me pali laud en sapwellime tohnpadahk kan pahn uhdihsang arail kin limpoakpene. Ahpw kitail anahne kanahieng kitail en dehr mweidohng madamadau en aramas akan nin sampah me sohte kin limpoak en kamwakid mwomwen atail wiewia ong emenemen. Eri, kitail pahn koasoiapene peidek kesempwal wet: Dahme pahn sewese kitail en ese ma atail poakohng riatail kan kehlail? Ehu ahl en esehda uwen laud en atail limpoak iei sang ni atail tehk ia duwen atail kin mwekidki soangen irair kan en mour. (2 Kor. 8:8) Wahnpoaron Piter koasoia duwen ehu soangen irair pwukat: “Mwohn mehkoaros, kumwail en uhdahn limpoakpene, pwehki limpoak kin pwaindi dihp tohto.” (1 Pit. 4:8) Eri, luwet oh soh unsek en meteikan kak kasonge atail limpoak. w23.11 10-11 ¶12-13

Kitail sohte kak peikiong sapwellimen Sises kehkehlik duwen limpoak ma kitail kin kasalehda limpoak ong ekei nan mwomwohdiso ahpw kaidehn ong meteikan. Mehlel, ele kitail kin karanih ekei laudsang atail karanih meteikan, duwehte Sises. (Sohn 13:23; 20:2) Ahpw wahnpoaron Piter katamankihong kitail me kitail en nantihong ahneki “limpoak en pirien”—duwehte limpoak me mi nan peneinei ehu—ong riatail Kristian kan koaros. (1 Pit. 2:17) Piter kangoange kitail en “poakpene mehlel sang nan mohngiong.” (1 Pit. 1:22) Me pid met, “uhdahn poakpene mehlel” kin wehwehki en poakohng emen mehnda ma e apwal en kasalehda. Karasepe, ia duwen ma riatail men kansensuwedihala de kamedekihkitailla? Nin tapio, ele kitail men dupukohng a kaidehn en kasalehiong limpoak. Ahpw, Piter sukuhlkihsang Sises me en dupukohng emen sohte kin kaperenda Koht. (Sohn 18:​10, 11) E ntingihedi: “Kumwail dehr dupungki me suwed ong me suwed de kauwe ong kauwe. Ahpw kumwail wia me mwahu.” (1 Pit. 3:9) Ma ke ahneki limpoak mehlel, ke pahn kadek oh nsenohki. w23.09 29 ¶9-11

E kapwurimwei en kilang ia duwen seri men eh kin mwadang keirda oh laudla. E mwomwen me e sohte kin nantihong en wia met. Ahpw, ma kitail men wiahla Kristian koahiek kei, kitail anahne nanti laud. (1 Kor. 13:11; Ipru 6:1) Pwehn lel mehn akadeio, kitail anahne ahneki nanpwungmwahu keren rehn Siohwa. Kitail pil anahne sapwellime manaman pwehn kakairada irair kan me kin kaperenda ih, koahiek kan me anahn, oh kaunopadahng pwukoa kan me kitail kakete alehdi. (Lep. Pad. 1:5) Siohwa ketin kapikada ohl oh lih. (Sen. 1:27) E mengei en kilang me paliweren ohl oh lih wekpeseng, ahpw irail pil wekpeseng ni ahl teikan. Karasepe, Siohwa ketin kapikada ohl oh lih pwe ren kapwaiada soangen pwukoa kei, eri irail anahne irair oh koahiek me pahn sewese irail en kapwaiada arail pwukoa kan.—Sen. 2:18. w23.12 18 ¶1-2

Ia duwe, Sises kupwurki meteikan en doadoahngki mwaren Semeo? Ei uhdahn. Ekei kaunen pelien lamalam ele kamehlele me en nda mwaren Koht kin kasalehda atail sohte wauneki, ahpw Sises sohte ketin mweidohng soangen madamadau wet me sohte poahsoankihda Paipel en kauhdi ih sang en kawauwih mwaren Semeo. Medewehla ahnsou me e ketin kamwahwihala ohl me ngehn suwed tiada powe nan sapwen mehn Kerasa kan. Aramas ako masepwehkada oh peki Sises en ketila sang wasao. (Mark 5:​16, 17) Ahpw Sises kupwurkihte aramas ako en esehla mwaren Siohwa. Eri e kehkehlingkihong ohlo me e kamwahwihala en padahkihong aramas ako, kaidehn dahme e wiahda, ahpw dahme Siohwa ketin wiahda. (Mark 5:19) E pil kupwurkihte kitail en wia met rahnwet—en kalohkihong sampah pwon duwen mwaren Semeo! (Mad. 24:14; 28:20) Ni atail kin wia met, kitail kin kaperenda atail Nanmwarkio Sises. w24.02 10 ¶10

Kitail uhdahn paiekihda atail wia kisehn sapwellimen Siohwa pwihn erein imwin rahn apwal pwukat. Mour nin sampah wet kin wie apwahpwalla, ahpw Siohwa ketikihong kitail riatail Kristian kan pwehn sewese kitail. (Mel. 133:1) E ketin sewese kitail en ahneki mouren peneinei nsenamwahu. (Ep. 5:33–6:1) Oh e ketikihong kitail erpit me kitail anahne pwehn dadaur pahn kahpwal kan oh ahneki peren. Ahpw kitail anahne doadoahk laud pwehn papah Siohwa ni lelepek. Dahme kahrehda? Ele met pwehki kitail kakete nsensuwedkihla dahme meteikan nda de wia. Kitail pil kin mworusala ni atail kin wiahda sapwung kan, ahpw mehlel ma kitail kin pwurupwurehng wia met. Kitail anahne pousehlahte papah Siohwa, (1) ni riatail Kristian men eh kansensuwehdihkitailla, (2) ni atail pwoud eh kansensuwehdihkitailla, oh (3) ni atail mworuskihla atail sapwung kan. w24.03 14 ¶1-2

Mie ahnsou kan me ke pahn rong duwen dahme wiawihong riatail Kristian kan me pilada en kalaudehla arail papah Siohwa. Ele re iang Sukuhl ong Sounkalohki Wehio kan de keseula wasa kan me anahn laud mie ong sounkalohk. Ma omw irairo kakohng, met pil wia mehn akadei ehu me uhdahn mwahu. Sapwellimen Siohwa aramas akan kin ngoangki kalaudehla arail papah Ih. (Wiewia 16:9) Ahpw ia duwen ma ahnsou wet ke sohte kak wia met? Dehr medewe me ke sohte kesempwal duwehte irail kan me kak wia met. Dahme kesempwal iei me ke pousehlahte dadaur. (Mad. 10:22) Dehr manokehla me ke kin uhdahn kaperenda Siohwa ni omw wia uwen omw kak nan omw irairo. Met iei ehu ahl kesempwal me ke kak wia pwehn ideidawehnte Sises mwurin omw papidaisla.—Mel. 26:1. w24.03 10 ¶11

Samatailo nanleng ketin inoukihda en mahkohng kitail ma kitail koluhla. (Mel. 86:5) Eri ma kitail uhdahn koluhkihla dipatail kan, kitail kak uhdahn kamehlele Siohwa ni eh mahsanih me e ketin mahkohngkitailehr. Tamataman me Siohwa kin ketin toupahrek. E sohte kin ketin kasik laudsang me kitail kak wia. E ketin kalahnganki sohte lipilipil dahme kitail wiahiong ih erein atail kin wiewia uwen atail kak. Pil ehu, medewehla mehn kahlemeng en irail kan me kin papah Siohwa sang arail mohngiong unsek. Medewehla wahnpoaron Pohl. E kin uhdahn doadoahk laud erein sounpar tohto, seiloangki mwail kid kid kei, oh pil tapiada mwomwohdiso tohto. Ahpw ni eh irairo wekila oh katikala eh doadoahk en kalohk, ia duwe, met wehwehki me Siohwa sohla ketin kupwurperenki ih? Soh. Pohl doulahte wia dahme e kak wia, oh Siohwa ketin kapaiahda. (Wiewia 28:​30, 31) Pil duwehte met, dahme kitail kak patohwanohng Siohwa kak wekila. Ahpw dahme kesempwal ong ih iei dahme kin kamwakid kitail en papah ih. w24.03 27 ¶7, 9

Sang ni eh kin kapakap ong Siohwa, Sises ketin wiahda mehn kahlemeng ehu ong sapwellime tohnpadahk kan en idawehn. Erein sapwellime doadoahk en kalohk, e kin kalapw ketin kapakap. E anahne ketin wiahda ahnsou en kapakap pwehki e kin kalapw kedirepw, oh aramas tohto kin patohdo reh. (Mark 6:​31, 45, 46) E kin ketin sangkenei pwehn kak mie ahnsoun eh kelehpwla oh kapakap. Ehu ahnsowo, e ketin kapakap pwohng ehu pwon mwohn eh ketin wiahda pilipil kesempwal ehu. (Luk 6:​12, 13) Oh Sises ketin pwurupwurehng kapakap pwohngo mwohn eh pwoula mwohnte e ketin kanekehla eh pwukoa keieu apwalo nin sampah. (Mad. 26:​39, 42, 44) Sapwellimen Sises mehn kahlemeng padahkihong kitail me sohte lipilipil ia uwen atail kedirepw, kitail anahne wiahda ahnsou en kapakap. Duwehte Sises, ele kitail anahne koasoanehdi ahnsou en kapakap. Mwein kitail kak mwadang pirida nimenseng de pepehd ekis werei nipwong kan. Ni atail wia met, kitail kin kasalehiong Siohwa me kitail kalahnganki kisakis tohrohr wet. w23.05 3 ¶4-5

Tehk lepin lokaiao “pwilidohngehr” nan iren rahn me mi powe. Ehu dikseneri en Paipel koasoia me met kin duwehte “pillap ehu me kin pwilidohng kitail.” Karasaras wet kasalehda uwen laud en Siohwa eh ketin poakohng me keidi kan! Me keidi kan ese me Koht “ketin poakohng” irail. (Sud 1) Wahnpoaron Sohn kasalehda arail pepehm ni eh ntingihedi: “Kilang uwen lauden limpoak me Sahmo ketin kasalehiong kitail, pwe kitail en adaneki sapwellimen Koht seri kan!” (1 Sohn 3:1) Ia duwe, Siohwa kin ketin poakohng me keidi kante? Soh, Siohwa ketin kasalehiong kitail koaros sapwellime limpoak. Dahme kin keieu kamehlelehiong uhk sapwellimen Siohwa limpoak? Pweinen pweipwei sapahlo—wiewiahn limpoak me keieu laud nin sampah!—Sohn 3:16; Rom 5:8. w24.01 28 ¶9-10

Iren Paipel me mi powe kasalehda ehu ahl me sewese Depit en powehdi eh masak. Mendahki eh mour mi nan keper, e kin doudouloale dahme Siohwa pahn ketin wiahiong ih ni ahnsou kohkohdo. Depit ese me Siohwa pahn ketin doarehla ih ni ahnsou me konehng. Met pwehki Siohwa ketin mahsaniher me Depit pahn uhd wiahla nanmwarki en Israel. (1 Sam. 16:​1, 13) Ong Depit, sohte lipilipil dahme Siohwa ketin inoukihda, e pahn uhdahn pweida. Dahme Siohwa ketin inoukihda en wiahiong uhk? Kitail sohte kasik me e pahn ketin pere kitail sang kahpwal koaros. Ahpw tamataman me sohte lipilipil soangen kahpwal dah ke ele ahneki erein koasoandi wet, Siohwa pahn ketikihsang kahpwal pwukat koaros nan sampah kapwo me kohkohdo. (Ais. 25:​7-9) Sounkapikpatailo sapwellimanki manaman laud en ketin kaiasada me melahr kan, kamwahwihala atail soumwahu kan, oh ketikihsang koaros me kin uhwong kitail.—1 Sohn 4:4. w24.01 6 ¶12-13

Medemedewehte omw inou oh papidais. Ke wiahda kahk pwukat pwehki ke men uhpalih Siohwa. Medewehla dahme seweseiuk en kamehlele me ke diaradahr padahk mehlel. Ke esehla Siohwa oh tepida wauneki oh poakohng ih nin duwen Semomw nanleng. Ke kakairada pwoson oh mwekidki en koluhla. Ke uhdihsang wia soahng kan me Siohwa ketin kalahdeki oh tepida wia dahme kin kaperenda ih. Ke nsenamwahula ni omw pehm sapwellimen Koht mahk. (Mel. 32:2) Ke iang towehda mihting en Kristian kan oh ehukihong meteikan soahng mwahu kan me ke sukuhlki. Nin duwen emen me inoudahr oh papidaisla, ahnsouwet ke kin kekeid nan ahl me kohlahng mour, oh koasoanehdi teng en wia uwen omw kak en mihmihte nan ahl wet. (Mad. 7:​13, 14) Kitail en kesihnenda teng oh doulahte poakohng Siohwa oh peikiong sapwellime kehkehlik kan ahnsou koaros. w23.07 17 ¶14; 19 ¶19

Sang ni omw kin medemedewe kapakapo me ke wia ni ahnsou me ke inoukihong Siohwa omw mour, ke pahn diar kehl en pelianda soangen kasongosong koaros. Karasepe, ke pahn kalahiong ahn emen pwoud? Uhdahn soh! Ke inoukihongehr Siohwa me ke sohte pahn wia mehkot me duwehte met. Ma ke sohte mweidohng madamadau sohte konehng kan en kekeirda, eri ke sohte anahne nannanti mwuhr en kihsang soangen madamadau wet. Ke pahn “sohpeisang” “wasa aramas suwed kan kin kohla ie.” (Lep. Pad. 4:​14, 15) En doudouloale sapwellimen Sises mehn kahlemeng kak sewese kitail. Sises ketin koasoanehdi teng en kaperenda Semeo. Duwehte Sises, ken koasoanehdi teng en mwadang soikala soahng koaros me ke ese pahn kansensuwedihada Kohto me ke inoukihongehr omw mour. (Mad. 4:10; Sohn 8:29) Kahpwal oh kasongosong kan kin kihong uhk ahnsou mwahu en kasalehda me ke men doulahte ideidawehn Sises. Ni omw wia met, ke kak kamehlele me Siohwa pahn ketin seweseiuk. w24.03 9-10 ¶8-10