October

Ke kin apwalki peik ekei pak? Nanmwarki Depit kin wia met, eri e kapakap ong Koht: “Komw ketin . . . kupwurehkin ineng en peikiong komwi.” (Mel. 51:12) Depit poakohng Siohwa. Ahpw ekei pak, e kin apwalki peik, pil duwehte kitail. Dahme kahrehda? Keieu, kitail kin sapeik pwehki kitail sohsohki sang Adam oh Ihp. Keriau, Sehdan kin kalapw song en kahrehiong kitail en uhwongada Siohwa, duwehte me e wia. (2 Kor. 11:3) Kesiluh, kitail mi nan sampah ehu me aramas akan kin kasalehda madamadau en uhwong, “elen madamadau me kin doadoahk ahnsou wet rehn irail kan me kin sapeik.” (Ep. 2:2) Eri, kitail anahne doadoahk laud pwehn peiong atail soh unsek kan, Tepil, oh sampah wet pwehn peikiong Siohwa oh irail kan me e ketikihong manaman. w23.10 6 ¶1

Dahme kitail kak sukuhlkihsang Sises eh ketin wekidohng pihl wain? Kitail sukuhlki duwen aktikitik. Sises sohte ketin suweiki duwen manamano. Ni mehlel, e sohte kin ketin suweiki soahng koaros me e ketin wia. Ahpw ni aktikitik, e kin pwurupwurehng patohwanohng Semeo lingan oh kaping koaros. (Sohn 5:​19, 30; 8:28) Ma kitail alasang Sises oh kasalehda aktikitik, kitail sohte pahn suweiki soahng kan me kitail wiahda. Kitail en suweiki kaidehn pein kitail, ahpw duwen atail Kohto me kitail ahneki pwais kaselel en papah. (Ser. 9:​23, 24) Kitail anahne patohwanohng wahu me e ketin warohng sapwellimanki. Kitail sohte kak wiahda mehkot mwahu ma sohte sawas sang rehn Siohwa. (1 Kor. 1:​26-31) Ni atail kin aktikitik, kitail sohte anahne ale kapingpen atail wia soahng mwahu kan ong meteikan. Ahpw kitail kin itarki atail ese me Siohwa ketin mwahngih oh kesempwalki dahme kitail kin wia. (Pil kilang Madiu 6:​2-4; Ipru 13:16) Eri, kitail kin kaperenda Siohwa ni atail kin alasang Sises oh kasalehda aktikitik.—1 Pit. 5:6. w23.04 4 ¶9; 5 ¶11-12

Pahn sapwellimen Koht kaweid, wahnpoaron Pohl kangoange Kristian kan en rapahki kamwahupen meteikan. Ia duwen atail kak doadoahngki kaweido erein mihting kan? Sang ni atail tamataman me meteikan, duwehte kitail, kin men iang pasapeng. Medewehla met. Ni omw koasoakoasoiong kompoakepahmw kan, ke pahn koasokoasoitohr me kahrehda sohla arail ahnsoun koasoi? Uhdahn soh! Ke men irail en iang koasoi. Duwehte nan mihting kan, kitail men mweidohng me tohto en iang pasapeng. Ni mehlel, ehu ahl me keieu mwahu en kangoange riatail Kristian kan iei en kihong irail ahnsou mwahu en kasalehda arail pwoson. (1 Kor. 10:24) Eri wiahiong atail pasapeng kan en mwotomwot pwehn mweidohng meteikan en iang pasapeng. Mehnda ma ke wia pasapeng mwotomwot, dehr koasoia ire tohto. Ma ke koasoia soahng koaros nan parakrapo, e pahn tikitikla dahme meteikan pahn koasoia. w23.04 22-23 ¶11-13

Kitail anahne tamataman ia uwen eh kesempwal en pousehlahte sewese meteikan, ahpw mehlel sang ni atail kalohk. Nan atail doadoahk en kalohk, kitail anahne madamadau toupahrek. Aramas akan me kitail kin kalohk ong ahneki madamadau wekpeseng duwen Koht oh re kohsang soangsoangen wasa kan oh tiahk. Wahnpoaron Pohl kin madamadau toupahrek, oh kitail kak sukuhlsang eh mehn kahlemeng. Sises ketin idihada Pohl nin duwen “wahnpoaron men ong mehn liki kan.” (Rom 11:13) Eri Pohl kin kalohk ong mehn Suhs kan, mehn Krihs kan, aramas me neksang sukuhl, tohn kousapw kan, kaunen koperment kan, oh nanmwarki kan. Pwehn sair mohngiong en soangsoangen aramas pwukat koaros, Pohl wiahla “soahng koaros rehn soangen aramas koaros.” (1 Kor. 9:​19-22) E medemedewe laud wasa me aramas ako kohsang oh dahme re kin kamehlele. Met sewese ih en madamadau toupahrek oh koasoiong emenemen ni ahl ehu me pahn kakerenihirailla rehn Koht. Kitail pil kak kamwahwihala atail kalohk ma kitail kin madamadau toupahrek oh song en medewehda ahl me keieu mwahu en sewese emenemen aramas. w23.07 23 ¶11-12

Aramas mpahi men sohte kin luwet, ahpw e kin kehlail. Kitail anahne kehlail pwehn kak meleileite nan irair apwal ehu. Mpahi wia kisehn “wahn sapwellimen Koht manaman.” (Kal. 5:​22, 23) Lokaiahn Krihs me kawehwehdi ong “mpahi” kin ekei pak karasaraskihong oahs lawalo men me mandala. Medewehla oahs lawalo men me mandala. Mendahte oahso mandala, ahpw e kehlailte. Ia duwen atail kak kakairada mpahi oh pil ni ahnsowohte kehlail? Kitail sohte kak kelehpw wia met. Kitail anahne kapakapki sapwellimen Koht manaman, oh peki Siohwa en ketin sewese kitail en kakairada irair kaselel wet. Mie me tohto me sukuhlkiher en kin kasalehda mpahi. Karasepe, riatail Kristian tohto kin kasalehda mpahi ni aramas akan ar song en akamaiong irail. Oh met sewese meteikan en kamwahwihala dahme irail kin medewehki Sounkadehde kan.—2 Tim. 2:​24, 25. w23.09 14 ¶3

Nan kaudiahl kapwuriamwei ehu, wahnpoaron Sohn kilangada lapalap 24 nanleng ar kaudokiong Siohwa. Irail kapinga Koht oh nda me e ketin warohng sapwellimanki “lingan, wahu oh roson.” (Kaud. 4:​10, 11) Tohnleng lelepek kan pil ahneki kahrepe tohto en kapinga oh kawauwih Siohwa. Irail kin patopato reh nanleng oh esehla mwahu ih. Irail kin kilang sapwellime irair kaselel kan ar sansalda ni soahng kan me e kin ketin wia. Ni arail kin kilang wiepen nin lime kan, met kin kamwakid irail en kapinga ih. (Sohp 38:​4-7) Kitail pil men kapinga Siohwa nan atail kapakap kan. Kitail kak wia met sang ni atail padahkihong kahrepen atail poakohng ih oh dahme kahrehda kitail kin waunekihki ih. Ni omw wadek oh onopki Paipel, song en diarada sapwellimen Siohwa irair kaselel kan me ke keieu mwahuki. (Sohp 37:23; Rom 11:33) Kowe eri padahkihong Siohwa ia omw pepehm ong irair ko. Kitail pil kak kapinga Siohwa pwehki e kin ketin sewesei kitail oh riatail Kristian kan koaros.—1 Sam. 2:​1, 2. w23.05 3-4 ¶6-7

Nan pahr 1919, sapwellimen Koht aramas akan saledeksang Papilon Lapalap. Nan pahro, “ladu lelepek oh loalokong” tepida doadoahk pwe me ahneki mohngiong mehlel kan en tepida kekeid nan “Ahl en Sarawi.” (Mad. 24:​45-47; Ais. 35:​8, NW) Doadoahk me meteikan wia mahso pwehn kaunopada ahl wet sewesehier aramas akan me tepida kekeid nan ahl wet en kalaudehla arail sukuhlki duwen Siohwa oh kupwure kan. (Lep. Pad. 4:18) Irail pil kak wekidala arail mour pwehn pahrekiong dahme Siohwa kin ketin kupwurki. Siohwa sohte ketin kasik sapwellime aramas akan en wiahda wekidala kan ni ahnsowohte. Ahpw ekisekis, e ketin kamwakelehda sapwellime aramas akan. Ia uwen kaperen en ahnsowo me kitail koaros pahn kak kaperenda Koht ni soahng koaros me kitail kin wia! Ahl koaros kin anahne epwel mwahu pwehn kak mwamwahute. Sang pahr 1919, doadoahk en wia ‘Ahl en Sarawio’ pousehlahte wiewiawi pwe aramas tohto en kak kohkohsang Papilon Lapalap. w23.05 17 ¶15; 19 ¶16

Pwihn me Kin Apwalih Mwomwohdiso nan Sampah Pwon kin kaiakaiahne sounsawas kan nan soangsoangen committee kan nan pwihn wet. Met sounsawas pwukat kin ni lelepek apwahpwalih pwukoa tohto nan sapwellimen Siohwa pwihn. Irail uhdahn onopada mwahu pwehn pousehlahte apwalih sapwellimen Krais sihpw kan. Ni lahsen me keidi kan kohdahla nanleng ni imwin kahn kamakam kowahlapo, sapwellimen Siohwa aramas akan nin sampah pahn pousehlahte kaudokiong ih ni lelepek pwehki irail mi pahn kaundahn Sises Krais. Kitail ese me ni ahnsowo, pwihn ehu me Paipel kin kahdaneki Kok en Makok pahn uhwongada sapwellimen Koht aramas akan. (Esek. 38:​18-20) Ahpw uhwong wet sohte pahn pweida; e sohte pahn kauhdi sapwellimen Koht aramas akan en kaudokiong Siohwa. E uhdahn pahn ketin doareirailla! Nan Kaudiahl ehu, emen lapalap ko padahkihong Sohn me “pokon kalaimwun” wet pahn “kohieisang nan kamakam kowahlap.” (Kaud. 7:​9, 14) Eri kitail uhdahn kamehlele me Siohwa pahn ketin doareirailla! w24.02 5-6 ¶13-14

Dahme kitail wia pwehn alehdi sapwellimen Koht manaman? Kitail kak kapakapki, onopki Mahsen en Koht, oh iang wia doadoahk kan nan sapwellime pwihn. Atail wia met pahn sewese kitail en kakairada “wahn sapwellimen Koht manaman.” (Kal. 5:​22, 23) Koht kin ketikihong sapwellime manaman irail kante me kin kolokol madamadau oh wiewia mwakelekel. E sohte pahn pousehlahte ketikihong kitail sapwellime manaman ma kitail kin medemedewehte soahng samin kan oh kapwaiada. (1 Des. 4:​7, 8) Pwehn alialehte sapwellimen Koht manaman, kitail pil anahne “dehr mwamwahliki kokohp kan.” (1 Des. 5:20) “Kokohp kan” kin dokedoke mahsen kan me Koht ketikihda sang ni eh ketin doadoahngki sapwellime manaman, me iangahki mahsen kan me pid rahnen Siohwa oh karuwaru en atail ahnsou. Kitail sohte kin medewe me rahnen Siohwa, de Armakedon, sohte pahn wiawi nan atail ahnsou. Ahpw kitail kin medemedewehte, me e pahn leledo ahnsou keren ni atail kin soupisengki “wiewia kan . . . me pid poadidiong Koht,” oh pousehlahte kasalehda tiahk mwakelekel.—2 Pit. 3:​11, 12. w23.06 12 ¶13-14

Dahme kitail, nin duwen Kristian kei, anahne wia ma ni soh kasikpe, kilel suwed ehu pwarada nan neitail tablet de sehlpwohn ape? Kitail anahne mwadangete dehr kilang. E pahn mengei en wia met ma kitail tamanda me dahme keieu kesempwal rehtail iei atail nanpwungmwahu rehn Siohwa. Pil ekei kilel me sohte uhdahn samin kak kahrehiong kitail en ahnekihda ineng suwed. Dahme kahrehda kitail anahne soikala met? Pwehki kitail sohte pil men medewehda en wia tiahk samin. (Mad. 5:​28, 29) Elder men nan Thailand me adaneki David koasoia: “I kin pein idek rehi: ‘Mendahte ekei kilel ele sohte uhdahn suwed, ia duwe, Siohwa pahn ketin kupwurperenki ma I kilikilang?’ Soangen madamadau wet kin sewese ie en wiahda pilipil loalokong.” Atail perki en wia mehkot me pahn kansensuwedihada Siohwa pahn sewese kitail en mwekid ni elen loalokong. Lemmwiki Koht iei “tepin,” de poahsoanpen, “erpit.” w23.06 23 ¶12-13

“Imwamwail kan” ele dokedoke atail mwomwohdiso kan. Erein kahn kamakam kowahlapo, Siohwa ketin inoukihda me e pahn ketin perei kitail ma kitail pousehlahte miniminiong riatail Kristian kan. Eri, kitail en nantihong doadoahk laud ahnsou wet pwe kitail en uhdahn poakohng riatail kan. Atail pitla kakete poahsoandahsang atail wia met! Rahn lapalap en Siohwa pahn wia ahnsou uhdahn apwal ehu ong aramas koaros. (Sep. 1:​14, 15) Sapwellimen Siohwa aramas akan pahn pil lelohng lokolok. Ahpw ma kitail kaunopada ahnsou wet, kitail pahn kak meleilei oh sewese meteikan. Kitail pahn dadaurete pahn kahpwal sohte lipilipil. Ni ahnsou me riatail kan lelohng lokolok, kitail pahn wia uwen atail kak en sewese irail sang ni atail kasalehda poakehla meteikan oh kihda soahng kan me re anahne. Oh kitail pahn karanihete riatail kan me kitail poakohngalahr. Siohwa eri pahn ketin katingihkin kitail mour soutuk nan sampah ehu me kahpwal oh lokolok koaros pahn manokonokla.—Ais. 65:17. w23.07 7 ¶16-17

Mahsen en Koht kin kalapw mahsaniheki ohl lelepek kan nin duwen ohl ekei me ahneki pwoson kehlail. Ahpw irail sohte kin ahnsou koaros pehm me re kehlail. Karasepe, ekei pak Nanmwarki Depit pehm me e kehlail duwehte “nahna ehu,” ahpw ekei pak e kin “masepwehkada.” (Mel. 30:7) Sapwellimen Koht manaman kihong Samson kehl laud. Ahpw Samson ese me ma sohte manaman sang rehn Koht, e pahn “luwetala duwehte aramas teikan.” (Sounkopwung 14:​5, 6; 16:17) Siohwa me ketikihong sapwellime ohl lelepek pwukat kehl. Wahnpoaron Pohl pohnese me e pil anahne kehl sang Siohwa. (2 Kor. 12:​9, 10) E ahneki kahpwal en roson. (Kal. 4:​13, 14) Ekei pak, e pil kin apwalki wia dahme pwung. (Rom 7:​18, 19) Oh ekei pak e kin masak dahme kakete wiawihong ih. (2 Kor. 1:​8, 9) Ahpw, ni ahnsou me Pohl kin luwet, e kin kehlailla. Ia duwen? Siohwa ketikihong Pohl kehl me e anahne pwehn dadaur eh kahpwal kan. w23.10 12 ¶1-2

Ma ekei pak kitail kin pehm me sohte katepatail, kitail kak tamataman me pein Siohwa me ketin kakerenihkitailla reh. (Sohn 6:44) E ketin mwahngih soahng mwahu kan rehtail me pein kitail sohte kak kilang, oh e ketin mwahngih dahme mi nan mohngiongitail. (2 Kron. 6:30) Eri kitail kak likih ni eh ketin mahsanih me kitail kesempwal. (1 Sohn 3:​19, 20) Mwohn atail esehla padahk mehlel, ekei kitail kin wia soahng kan me met kitail kin suwedkihte. (1 Pit. 4:3) Pil Kristian lelepek kan kin pelipeliante arail luwet kan. Ia duwen pein kowe? Ke kin ekei pak pehm me Siohwa sohte kak ketin mahkohng uhk? Ma ei, e kak wia mehn kangoang ehu en ese me sapwellimen Siohwa ladu lelepek kan pil kin ahneki soangen pepehmohte. Karasepe, wahnpoaron Pohl kin nsensuwedla ni eh medewe duwen eh soh unsek kan. (Rom 7:24) Ei mehlel, Pohl koluhkihlahr dipe kan oh papidaisla. Ahpw, e kin wiahkihte ih “me keieu tikitik nanpwungen wahnpoaron kan” oh “me keieu dipan.”—1 Kor. 15:9; 1 Tim. 1:15. w24.03 27 ¶5-6

Ehu mehn kasukuhl me kitail kak sukuhlkihsang en Nanmwarki Sohas pilipil suwed iei me kitail anahne pilada kompoakepah mwahu kan me kin poakohng Siohwa oh kaperenda ih. Kitail kak kompoakepahnki irail kan me mah de pwulopwul sang kitail. Tamataman me Sohas uhdahn pwulopwul sang kompoakepaho Sehoiada. Pwehn pilada kompoakepahmw kan, pein idek rehmw: ‘Kompoakepahi kan kin sewese ie en kakehlakahda ei pwoson Siohwa? Irail kin wia uwen arail kak en peikiong ih oh kangoange ie en wia soahngohte? Irail kin koasoia duwen Siohwa oh soahng kan me re sukuhlkihsang nan Paipel? Irail kin kihong ie kaweid ni ahnsou me I uhdahn anahne?’ (Lep. Pad. 27:​5, 6, 17) Ni mehlel, ma kompoakepahmw kan sohte poakohng Siohwa, ke sohte anahne irail. Ahpw ma kompoakepahmw kan poakohng Siohwa, irail pahn ahnsou koaros seweseiuk!—Lep. Pad. 13:20. w23.09 9-10 ¶6-7

Alpa iei tepin mesen nting en lokaiahn Krihs, oh omeka iei lahsen mesen nting. Ni eh ketin mahsanih “Alpa oh Omeka,” Siohwa ketin sewese kitail en wehwehki me ni eh kin ketin tapiada mehkot, e pahn ketin kaimwisekala. Mwurin Siohwa ketin kapikada Adam oh Ihp, E ketin mahsanih, “Kumwa kaparaparala pwe kadaudokamwa kan pahn kousoanla wasa koaros.” (Sen. 1:28) Ni ahnsowo, Siohwa mwomwen mahsanih “Alpa.” E ketin kasalehda kupwure ni sansal: Ahnsowo pahn kohdo me kadaudok en Adam oh Ihp unsek oh peik kan pahn kadirehla sampah oh kaparadaisihala. Ni ahnsou me met pahn pweida, e pahn mwomwen me Siohwa pahn ketin mahsanih “Omeka.” Mwurin Siohwa eh ketin kanekehla eh kapikada “sampah oh pahnlahng oh audepara kan koaros,” e ketin mahsanih mehkot me kasalehda me kupwure uhdahn pahn pweida. E ketin inoukihda me e pahn uhdahn ketin kapwaiada kupwure ong sampah oh aramas akan. Met pahn uhdahn pweida ni kaimwiseklahn rahn keisuhwo.—Sen. 2:​1-3. w23.11 5 ¶13-14

Seiloak apwalo sang Papilon lel Israel kakete reireiki sounpwong pahieu, ahpw Siohwa ketin inoukihda me e pahn ketikihsang mehn kerempwa koaros me mwomwen pahn kauwe arail pwuralao. Mehn Suhs lelepek kan ese me kamwahupen arail pwurala Israel uhdahn laudsang tounmetei kan me re pahn wiahda. Kapai me keieu laud kin pidada arail kaudok. Sohte ehu tehnpas sarawi en Siohwa nan Papilon. Sohte pei sarawi ehu me mehn Israel ko kak wia arail meirong nin duwen me kosonned en Moseso koasoanehdi, oh pil sohte pwihn en samworo kan me pahn wia meirong ko. Patehng met, aramas akan nan kahnimwo me kin kaudokiong koht likamw kan tohtohsang me kin wauneki Siohwa de sapwellime koasoandi kan. Eri, mehn Suhs kid kid kei me kin poakohng Siohwa, kin kasikasik en pwurala sapwarailo, wasa me re kak pwurehng wia kaudok min. w23.05 14-15 ¶3-4

Kitail anahne sapwellimen Koht manaman pwe kitail en kak doulahte wia “seri en marain.” Dahme kahrehda? Pwehki e sohte mengei en kolokolete atail mwakelekel nan sampah samin wet. (1 Des. 4:​3-5, 7, 8) Sapwellimen Koht manaman kak sewese kitail en pelianda madamadau en aramas akan nin sampah me kin uhwong sapwellimen Koht madamadau. Sapwellimen Koht manaman pil kak sewese kitail en kakairada “soangen mwahu koaros oh pwung oh mehlel.” (Ep. 5:9) Ehu ahl me kitail kak ale sapwellimen Koht manaman iei sang ni atail kapakapki. Sises mahsanih me Siohwa pahn “ketikihong irail kan me peki reh sapwellime manaman!” (Luk 11:13) Oh ni atail kin kapinga Siohwa nan mihting kan, kitail pahn pil alehdi sapwellime manaman. (Ep. 5:​19, 20) Soahng kan me kin kohsang sapwellimen Koht manaman pahn sewese kitail en mour ni ahl me kin kaperenda Koht. w24.03 23-24 ¶13-15

Ke anahne kalaudehla kanengamah? Kanengamah iei ehu wahn sapwellimen Koht manaman. (Kal. 5:​22, 23) Eri kitail kak kapakapki sapwellimen Koht manaman oh peki rehn Siohwa en ketin sewese kitail en kakairada wah kan. Ma kitail lelohng irair ehu me kasonge atail kanengamah, kitail “pousehlahte peki” sapwellimen Koht manaman pwehn sewese kitail en kin kanengamah. (Luk 11:13) Kitail pil kak peki Siohwa en ketin sewese kitail en kilengwohng soahng kan nin duwen me e kin ketin wia. Eri mwurin atail kapakap, kitail anahne wia uwen atail kak en kin kanengamah ehuehu rahn. Ma kitail kin kapakapki en pousehlahte kasalehda kanengamah, Siohwa pahn ketin sewese kitail en kalaudehla atail kanengamah mehnda ma mahso kitail sohte kin kanengamah. E pil kin sewese en doudouloale mehn kahlemeng kan nan Paipel. Paipel kin audaudki mehn kahlemeng tohto en aramas akan me kin kanengamah. Ni atail kin doudouloale mehn kahlemeng pwukat, kitail kak sukuhlki ahl akan en kasalehda kanengamah. w23.08 22 ¶10-11

Sises kamehlelehiong wahnpoaron Piter me Siohwa pahn ketin apwaliheki eh anahn kan. Sises me iasadahro ketin wiahda pil ehu manaman ong Piter oh ienge wahnpoaron teiko en koledi mwahmw tohtohie. (Sohn 21:​4-6) Manaman wet kamehlelehiong Piter me e sohte apwal ong Siohwa en ketikihda soahng kan me e anahne. Ele wahnpoarono tamanda mahsen en Sises ko me Siohwa pahn ketin apwalih irail kan me kin pousehlahte “rapahki mahs Wehio.” (Mad. 6:33) Soahng pwukat koaros sewese Piter en kin mwohneki mahs doadoahk en kalohko ah kaidehn eh pesines en mwahmwo. E kalohk ni eimah ni rahnen Pendekos pahr 33, oh sewese me kid kei en alehda rongamwahwo. (Wiewia 2:​14, 37-41) Mwuhr, e sewese mehn Sameria kan oh pil irail kan me kaidehn mehn Suhs ren sukuhlki oh pil idawehnla Sises. (Wiewia 8:​14-17; 10:​44-48) Siohwa ketin doadoahngki laud Piter pwehn kahrehdo nan mwomwohdiso soangsoangen aramas koaros. w23.09 20 ¶1; 22 ¶11

Mpen sounpar riau mwurin mehn Papilon kan kamwomwala Serusalem, Nanmwarki Nepukadnesar en Papilon ouramankihda ouraman kamasepwehk ehu duwen lapalahn sansal ehu. E ruwese me nah ohl loalokong kan, iangahki Daniel, ren kawehwehiong dahme e ouramankihdao oh ia wehwehn ouramano. Ma irail sohte kak wia met, e pahn kemeirailla koaros. (Dan. 2:​3-5) Daniel anahne mwadang mwekid; pwe ma soh, aramas tohto pahn mehla. E “mwadang pwuralahng me lapalap akan oh peki re en awih mahs pwe en song kawehwehiong nanmwarkio sapwellime alimano.” (Dan. 2:16) Met kasalehda me Daniel eimah oh pwoson. Ia duwen? Paipel sohte mahsanih me Daniel kin kawehwehda ouraman kan mwoweo. E peki rehn kompoakepah kan ren “kapakapohng Koht en nanleng pwe en kupwurkalahngan oh kawehwehiong irail ouraman riro.” (Dan. 2:18) Siohwa ketin sapengala kapakap ko. Sang ni sapwellimen Koht sawas, Daniel kawehwehda ahn Nepukadnesar ouramano. Daniel oh kompoakepah ko sohte mehla. w23.08 2 ¶4

Medewehla kamwahupen en kin kanengamah. Ni atail kin kanengamah, kitail kin peren oh meleilei. Eri, kanengamah kak kamwahwihala atail madamadau oh roson. Ni atail kin kanengamahiong meteikan, kitail kin ahneki nanpwungmwahu rehrail. Meleilei nan atail mwomwohdiso kin laudla. Ma emen kansensuwedihkitailla, kitail sohte pahn mwadang lingeringerda oh kitail sohte pahn kalaudehla kahpwalo. (Mel. 37:8; Lep. Pad. 14:29) Laudsang met, kitail kin kahlemengih Samatailo nanleng oh karanihala ih. Kanengamah uhdahn wia irair kaselel ehu me kitail koaros kin paiekihda! E sohte kin ahnsou koaros mengei en kanengamah, ahpw pwehki sapwellimen Siohwa sawas, kitail kak pousehlahte kakairada irair kaselel wet. Oh ni atail kin kanengamah awiawih sampah kapwo, kitail kak kamehlele me “silangin Siohwa kin ketin mwasamwasahn irail kan me kin lemmwiki ih, irail me kin awiawih sapwellime limpoak loalopwoat.” (Mel. 33:​18, NW.) Kitail koaros en koasoanehdi teng en pousehlahte kasalehda kanengamah. w23.08 21 ¶7; 25 ¶16-17

Seims koasoia me emen kakete nda me e pwoson ahpw eh wiewia kan kasalehda me e sohte pwoson. (Seims 2:​1-5, 9) Seims pil koasokoasoia me ni emen eh kilang ‘rie ohl de lih emen me sohte eh likou oh kene mwenge’ ahpw sohte sewese. Mehnda ma aramaso nda me e pwoson, eh wiewia kan kadehdehda me e sohte pwoson. (Seims 2:​14-16) Seims koasoia me Reap wia mehn kahlemeng mwahu en pwoson sang ni eh wiewia kan. (Seims 2:​25, 26) E rong duwen Siohwa oh ese me e kin ketin utung mehn Israel ko. (Sos. 2:​9-11) Eh wiewia kan kasalehda me e pwoson. Pwehki eh pwoson, e kapitala lipoahrok en Israel riemen ni ara mour mihla nan keper. Pwehki met, lihen Israel soh unsek menet pwungla rehn Koht, duwehte Eipraam. Kitail sukuhlkihsang Reap me e uhdahn kesempwal en kasalehda ni atail wiewia me kitail pwoson. w23.12 5 ¶12-13

Nin duwen Kristian kei, kitail sohte men wehwehkilahte padahk mengei kan en Paipel. Pwehki sawas sang sapwellimen Koht manaman, kitail kin men sukuhlki “pil ire loal kan en Koht.” (1 Kor. 2:​9, 10) Ke sou wiahda omw koasoandi en pein onop de wia roporop me pahn kalaudehla omw karanihala Siohwa? Karasepe, ke kak onopki kanahieng duwen eh kin ketin kasalehda sapwellime limpoak ong sapwellime ladu kan mahso, oh ia duwen met eh kadehdehda me e pil kin ketin poakohng uhk. Ke pil kak onopki duwen sapwellimen Siohwa koasoandi ong kaudok nan Israel oh kapahrekiong koasoandi en kaudok en Kristian kan rahnwet. De ke kak onopki kanahieng soahng pisetik kan duwen kokohp kan me Sises ketin kapwaiada erein eh mour nin sampah. Ke kak uhdahn perenki omw onopki oaralap pwukat sang ni omw doadoahngki Sawas ong Wia Roporop en Sounkadehdehn Siohwa kan de Watch Tower Publications Index. Omw onopki kanahieng Paipel kak kakehlakahla omw pwoson oh seweseiuk en “diar loalokong me pid duwen Koht.”—Lep. Pad. 2:​4, 5, NW. w23.10 18-19 ¶3-5

Lepin lokaia me wahnpoaron Piter doadoahngki me kawehwehdi ong “uhdahn” kin wehwehki en “kadangpeseng.” Pali keriau en iretikitiko kawehwehda dahme kitail pahn wia ni atail kin uhdahn limpoakpene. Kitail pahn pwaindi dipen meteikan. Kitail kak karasahda met ni ahl wet: Medewehla pohn tehpel ehu me mie mwahi de ohla tohto ie. Ke kak ale lepin likou kis oh kadangpeseng pohn tehpelo pwehn pwaindi kaidehn ohla ehute de riau, ahpw ohla tohto. Ni ahlohte, ma kitail kin uhdahn poakohng riatail Kristian kan, kitail kak pwaindi, de mahkohng, diparail kan, kaidehn ehute de riau ahpw “dihp tohto.” Atail poakohng riatail kan anahne kehlail pwe kitail en kak mahkohng arail soh unsek kan—mehnda ma met uhdahn apwal. (Kol. 3:13) Ni atail kin mahkohng meteikan, kitail kin kasalehda me atail limpoak kin kehlail oh kitail men kaperenda Siohwa. w23.11 11-12 ¶13-15

Ni ahnsou me Nanmwarki Sosaia sounpar 26, e tepida onohnsapahlihada tehnpaso. Ni eh wia met, “pwuhken Kosonned en KAUN-O, Kosonned me Koht ketikihong Moses,” dierekda. Ni nanmwarkio eh rong arail wadek Kosonnedo, e mwadangete wiahda wekidekla kan pwehn peikiong dahme ntingdi. (2 Kron. 34:​14, 19-21) Ke men kaukaule wadek Paipel? Ma ke kin wia met, ke kin perenki? Ke kin kilelehdi ire tikitik kan me kak seweseiuk? Ni ahnsou me Sosaia sounpar 39, e wiahda sapwung laud ehu me kahrehiong en mehla. E sohte peki sapwellimen Siohwa kaweid, ahpw e likih pein ih. (2 Kron. 35:​20-25) Ia mehn kasukuhlo? Sohte lipilipil atail sounpar de ia uwen werei en atail onopki Paipel, kitail anahne pousehlahte karanihala Siohwa. Met kin pidada kaukaule kapakapki sapwellime kaweid, onopki sapwellime Mahsen, oh paiekihda kaweid sang riatail Kristian koahiek kan. Kitail sohte pahn kalapw wiahda sapwung kan oh atail peren pahn laudla.—Seims 1:25. w23.09 12 ¶15-16

Paipel koasoia duwen lih tohto me kin poakohng Siohwa oh papah ih. Irail kin “ese kaunda arail wiewia kan, oh lelepek ni mehkoaros.” (1 Tim. 3:11) Patehng met, sister kan kak diarada mehn kahlemeng mwahu en lih Kristian koahiek kan nan mwomwohdiso me re kak alasang. Sister pwulopwul kan, mie sister kan me ke ese me kin wia mehn kahlemeng mwahu me ke kak alasang? Tehk arail irair kaselel kan; kowe eri medewe ia duwen omw kak kasalehda soangen irair ko. Pwehn wiahla Kristian koahiek men, ke anahne aktikitik. Ma lih emen kin aktikitik, e pahn ahneki nanpwungmwahu rehn Siohwa oh rehn meteikan. Karasepe, lih emen me kin poakohng Siohwa pahn ni aktikitik pilada en idawehn dahme ntingdi nan 1 Korint 11:​3, wasa me Siohwa ketin kawehwehda ihs me e ketikihong pwukoa en kaweid mwomwohdiso, oh nan peneinei. w23.12 18-19 ¶3-5

Siohwa ketin kasik ohl pwopwoud men en poakohng eh pwoud oh apwalih eh anahn kan, wia kompoakepah mwahu, oh sewese en mihmihte karanih Siohwa. Kakairada koahiek en madamadau, wauneki lih akan, oh en kin likilik, pahn seweseiuk en wia ohl pwopwoud mwahu men. Mwurin omw pwopwoudla, ke kakete wiahla pahpa men. Dahme ke kak sukuhlkihsang Siohwa duwen en wia pahpa mwahu men? (Ep. 6:4) Siohwa ketin mahsanihong sapwellime Ohlo, Sises, me e ketin poakohng oh kupwurki ih. (Mad. 3:17) Ma ke wiahla pahpa men, tehk mwahu me ke kin kalapw kamehlelehiong noumw seri kan me ke poakohng irail. Kalapw kapingahkin irail soahng mwahu kan me re wia. Pahpa kan me kin alasang sapwellimen Siohwa mehn kahlemeng kin sewese neirail seri kan en wiahla Kristian koahiek. Ke kak kaunopada ahnsou wet en wia pahpa mwahu ni omw kasalehda limpoak ong irail kan nan omw peneinei oh nan mwomwohdiso oh apwalih mwahu irail. Oh sukuhlki en padahkihong irail me ke poakohng irail oh me re kesempwal ong uhk.—Sohn 15:9. w23.12 28-29 ¶17-18

Nin duwen sapwellimen Siohwa ladu lelepek kei, kitail pil kin ahneki kahpwal kan oh soumwahuda, duwehte me aramas koaros kin wia. Kitail pil kin dadaur pahn uhwong de kalokolok sang irail kan me kin kailongki sapwellimen Koht aramas akan. Mendahki Siohwa sohte kin ketin pere kitail sang soangen kahpwal pwukat, e ketin inoukihda en sewesei kitail. (Ais. 41:10) Pwehki sapwellime sawas, kitail kak ahnekihte peren, wiahda pilipil mwahu kan, oh loalopwoatohngete ih pil ni ahnsou kan me keieu apwal. Siohwa ketin inoukihda en ketikihong kitail dahme Paipel kahdaneki “sapwellimen Koht popohl.” (Pil. 4:​6, 7) Popohl wet kin dokedoke pepehm en meleilei me kitail ahneki ihte pwehki atail nanpwungmwahu keren rehn reh. Popohl wet “inenen siksang madamadau en aramas koaros” oh e uhdahn kaselel sang dahme kitail kak medewehla. Karasepe, mie pak me ke kapakap ngidingid ong Siohwa oh mwuri ke pwuriamweikihla pwehki ke pehmw me ke ahneki meleilei? Ke ahneki pepehmo pwehki Siohwa ketikihong uhk ‘sapwellime popohl.’ w24.01 20 ¶2; 21 ¶4

Irail kan me kin poakohng Siohwa kin men kapinga mware sang arail mohngiong unsek. Nanmwarki Depit ese me atail kapinga mwaren Siohwa kin duwehte atail kapinga Ih. Ni atail rong mwaren Siohwa, kitail kin medewe duwen soangen Koht dahmen ih, sapwellime irair kaselel koaros oh sapwellime wiewia kapwuriamwei kan. Depit men wiahki mwaren Semeo mwar sarawi ehu oh kapinga. E men wia met sang ni ‘soahng koaros loale’—me iei ni mohngiong unsek. Duwehte met, mehn Lipai ko kin tiengla mwowe en kapinga Siohwa. Ni aktikitik irail pohnese me dahme irail nda sohte kak itar en uhdahn kasalehda kaping laud me warohng mwaren Siohwa me sarawi. (Neh. 9:5) Ei uhdahn, soangen kaping karakarahk wet kin kaperenda kupwuren Siohwa. w24.02 9 ¶6

Siohwa sohte pahn ketin medewe me ke sohte pweida ma ke sohte lel mehn akadei ehu me ke sohte kakohng. (2 Kor. 8:12) Sukuhlsang ahnsou kan me mehkot wiawi me kalekeiukasang omw en lel omw mehn akadei. Medemedewe dahme ke kapwaiadahr. Paipel mahsanih me “Koht me pwung oh e sohte pahn ketin meliehla amwail doadoahk.” (Ipru 6:10) Eri ken pil dehr manokehla dahme ke wiadahr. Medewehla mehn akadei kan me ke kapwaiadahr duwehte, kakairada nanpwungmwahu rehn Siohwa, koasoiaiong meteikan duwen ih, de papidaisla. Duwehte omw nantihong oh lel omw mehn akadei kan mahso, ke kak pousehlahte nantihong pwehn lel omw mehn akadeio met. Pwehki sapwellimen Siohwa sawas, ke kak lel omw mehn akadei. Ni omw pousehlahte nantihong lel omw mehn akadeio, dehr manokehla en kilang ia duwen Siohwa eh kin ketin seweseiuk oh kapaiaiukada ni omw kin nantihong lel omw mehn akadeio. (2 Kor. 4:7) Ma ke sohte uhdi, ke pahn ale kapai me laudsang.—Kal. 6:9. w23.05 31 ¶16-18

Siohwa kin ketin rapahki ahl akan en kasalehda me e ketin kupwurperenki irail kan me e ketin poakohng. Paipel kasalehda ahnsou riau me E ketin mahsanihong Sises me ih iei sapwellime Ohl kompoake oh me e kin ketin kupwurperenki. (Mad. 3:17; 17:5) Ke men Siohwa en ketin mahsanihong uhk me e kupwurperenkin uhk? Siohwa sohte kin ketin mahseniong kitail sang nanleng, ahpw e kin mahseniong kitail sang nan sapwellime Mahsen. Ni atail kin wadek duwen Sises eh mahseniong sapwellime tohnpadahk kan ni limpoak, e kin mwomwen me kitail “rong” Siohwa eh mahsanihong kitail mahsen kohte. Sises ketin kahlemengih ni unsek irair kaselel kan en Semeo. Eri ni atail wadek me Sises ketin kasalehda eh kupwurperenki sapwellime tohnpadahk lelepek kan me sohte unsek, kitail kak medewehla Siohwa eh mahsanihong kitail mahsen kohte. (Sohn 15:​9, 15) Ma kahpwal kan pwarada, met sohte wehwehki me Koht sohla ketin kupwurperenkin kitail. Ahpw met kin kihong kitail ahnsou mwahu en kadehdehda uwen atail poakohng Koht oh likih ih.—Sei. 1:12. w24.03 27-28 ¶10-11