November

Ma kowe pahpa de nohno men, sewese noumw me pwulopwul kan en kaunopada arail pasapeng me mwahuong arail sounpar. Ekei pak, kitail kin koasoiapene nan iren onop ehu ire kesempwal kan duwen kahpwal en nan pwopwoud de kaweid kan me pid tiahk. Ahpw e kakete mie parakrap ehu de riau me seri men kak iang sapeng. Pil sewese noumw seri kan en ese me ekei pak irail sohte kak iang pasapeng mehnda ma irail kihda pehrail. Omw kawehwehda met kak sewese irail en dehr mworusala ni meteikan kan ar pasapeng ahpw kaidehn irail. (1 Tim. 6:18) Kitail koaros kak kaunopada pasapeng kangoang kan me kin kawauwih Siohwa oh kangoange riatail Kristian kan. (Lep. Pad. 25:11) Kitail kak wia pasapeng mwotomwot duwen soahng kan me wiawihong kitail, ahpw kitail en dehr nohn koasoakoasoia duwen pein kitail. (Lep. Pad. 27:2; 2 Kor. 10:18) Ahpw, kitail en nantihong koasoiahte duwen Siohwa, sapwellime Mahsen, oh sapwellime aramas akan.—Kaud. 4:11. w23.04 24-25 ¶17-18

Limpoak me kesempwal pwehn sewese kitail en pepehd oh kolokol atail koahiek en madamadau. (Mad. 22:​37-39) Atail poakohng Koht kin sewese kitail en dadaur nan doadoahk en kalohk mehnda ma met kahrehiong kitail nan kahpwal. (2 Tim. 1:​7, 8) Pwehki kitail pil kin poakohng irail kan me sohte kin papah Siohwa, kitail kin pousehlahte kalohk, pil kalohk nan delepwohn oh nting kisinlikou. Kitail sohte kin uhdihsang koapworopworki me ehu rahn mehn mpatail kan pahn wekila oh tepida wia dahme pwung. (Esek. 18:​27, 28) Kitail pil kin poakohng riatail Kristian kan. Kitail kin kasalehda soangen limpoak wet sang ni atail kin “kangkangoange oh kangkakehlailih emenemen.” (1 Des. 5:11) Duwehte sounpei kan ar kin ehupene mahwen, kitail kin kangoange emenemen. Kitail uhdahn sohte pahn men kamedekihala riatail Kristian kan de dupungkihong irail me suwed. (1 Des. 5:​13, 15) Kitail pil kin kasalehda atail limpoak sang ni atail wauneki brother kan me kin tiengla mwohtail nan mwomwohdiso.—1 Des. 5:12. w23.06 10 ¶6; 11 ¶10-11

Ehu ahl me kitail kak en kakehlaka atail pwoson iei sang ni atail en doudouloale pweinen pweipwei sapahlo. Pweinen pweipwei sapahlo kin kamehlelehiong kitail me sapwellimen Koht inou kan pahn pweida. Ni atail kin medemedewe kanahieng dahme kahrehda pweinen pweipwei sapahlo wiawi oh dahme e kin pidada, kitail kin kakehlakahla atail pwoson me sapwellimen Koht inou en mour kohkohlahte nan sampah mwahu ehu pahn uhdahn pweida. Dahme kahrehda kitail kak ndahki met? Dahme pweinen pweipwei sapahlo kin pidada? Siohwa ketin poaronehdo sapwellime Ohlo, me keieu karanih ih, sang nanleng pwehn ipwidi nin duwen aramas unsek men. Erein eh ketiket sampah, Sises ketin lelohng kahpwal koaros. Ih eri ketin lelohng lokolok laud oh pwoula ni ahl me uhdahn kamedek. Ia uwen tounmetei laud me Siohwa ketin wiahda! Atail Koht limpoako sohte pahn ketin mweidohng sapwellime Ohlo en lokolok oh mehla pwe kitail en ahnekihte mour mwahu ehu erein ahnsou kiste. (Sohn 3:16; 1 Pit. 1:​18, 19) Pwehki e ketin wiahda tounmetei laudo, Siohwa pahn ketin tehk mwahu me mour kohkohlahte nan sampah kapwo pahn uhdahn pweida. w23.04 27 ¶8-9

Ia duwe, Siohwa ketin kupwurki kaiasada me melahr kan? Ei uhdahn, e ketin kupwurki wia met. E ketin doadoahngki sounnting en Paipel tohto pwehn ntingihedi sapwellime inou me pid kaiasada ni ahnsou kohkohdo. (Ais. 26:19; Kaud. 20:​11-13) Oh ni Siohwa eh kin ketin wiahda inou ehu, ahnsou koaros e kin ketin kapwaiada. (Sos. 23:14) Ni mehlel, Siohwa ketin kupwurki kaiasada me melahr kan. Medewehla dahme Sohp nda. E kamehlele me ma e pahn mehla, Siohwa pahn ketin kupwurki kaiasada ih. (Sohp 14:​14, 15) Siohwa ketin kupwurki kaiasada sapwellime tohnkaudok kan koaros me melahr. E ketin kupwurki kaiasirailda pwe irail en kak ahneki roson mwahu oh nsenamwahu. Ahpw ia duwen irail kan koaros me melahr ahpw sohte ahneki ahnsou mwahu en sukuhlki me mehlelo duwen ih? Atail Koht limpoako pil ketin kupwurki kaiasirailda. (Wiewia 24:15) E ketin kupwurki irail en wiahla kompoakepah oh mour kohkohlahte nin sampah.—Sohn 3:16. w23.04 9 ¶5-6

Ia duwen omw kak kakehlaka omw koapworopwor? Karasepe, ma ke ahneki koapworopwor en mour kohkohlahte nin sampah, wadek duwen Paipel eh kawehwehda Paradais oh doudouloale. (Ais. 25:8; 32:​16-18) Medewe ia pahn mwomwen mour nan sampah kapwo. Ma kitail kin kalapw wiahda ahnsou en doudouloale duwen koapworopwor en sampah kapwo, atail kahpwal kan pahn “ongete ahnsou kis oh me marahra.” (2 Kor. 4:17) Koapworopwor me Siohwa ketikihong uhk kak seweseiuk en dadaur pahn kahpwal kan. E ketikihonguhkehr dahme ke anahne pwehn ale kehl sang reh. Eri ni omw anahne sawas en kapwaiada pwukoa ehu, anahne dadaur pahn kahpwal ehu, de kolokolete omw peren, kapakapohng Siohwa oh wia pein omw onop pwehn diar sawas. Men ale kangoang sang riomw Kristian kan. Kaukaule wiahda ahnsou en medemedewe omw koapworopwor ong ahnsou kohkohdo. Eri ke pahn “kehlailkihda manaman koaros nin duwen sapwellime [Koht] roson lingaling pwe kumwail en uhdahn dadaurete ni kanengamah oh peren.”—Kol. 1:11. w23.10 17 ¶19-20

Mie kahrepe tohto me kitail ahneki pwehn kalahnganohng Siohwa nan kapakap. Kitail kak kalahngankihong soahng mwahu kan koaros me kitail ahneki; met pwehki kisakis mwahu koaros kohsang reh. (Seims 1:17) Karasepe, kitail kak kalahngankihong ih duwen kaselel en sampah oh soahng mwahu kan me e ketin kapikada. Kitail pil kak kalahngankihong atail mour, atail peneinei, kompoakepatail kan, oh atail koapworopwor. Oh kitail men kalahngankihong Siohwa eh ketin mweidohng kitail en ahneki nanpwungmwahu keren reh. Ele kitail anahne nantihong en medewe kahrepe kan me pein kitail ahneki pwehn kalahnganohng Siohwa. Aramas tohto rahnwet sohte kin kasalehda kalahngan. Aramas kin kalapw medewehte ia duwen arail kak alehdi dahme re mwahuki a kaidehn ia duwen arail kak kasalehda arail kalahnganki dahme re ahneki. Ma kitail tepida alasang madamadauo, atail kapakap kan kak pidadahte pekipek kan. Pwe met en dehr wiawi, kitail anahne pousehlahte kakairada oh kalahnganki soahng koaros me Siohwa ketin wiahiong kitail.—Luk 6:45. w23.05 4 ¶8-9

Nin duwen Samatail limpoak, Siohwa sohte ketin kupwurki kitail en kin lokolok. (Ais. 63:9) Ahpw, e sohte ketin kauhdi atail kahpwal kan koaros, me ele rasehng pillap kan de kisiniei. (Ais. 43:2) Ahpw e ketin inoukihda en ketin sewese kitail en ‘kotehla’ kahpwal kan. Oh e sohte pahn ketin mweidohng atail kahpwal kan en kauhkitaildihsang papah ih. Siohwa pil kin ketikihong kitail sapwellime manaman me uhdahn kehlail pwe kitail en kak dadaur. (Luk 11:13; Pil. 4:13) Pwehki met, kitail kak likih me ahnsou koaros kitail pahn alehdi dahme kitail anahne pwe kitail en kak dadaurete oh lelepekte ong ih. Siohwa ketin kasik me kitail en likih ih. (Ipru 11:6) Ekei pak, ele kitail medewe me kitail sohla kakohng atail kahpwal kan. Mwein kitail tepida medewe ma Siohwa pahn ketin sewese kitail. Ahpw Paipel kamehlelehiong kitail me pwehki kehl sang rehn Koht, kitail kak ‘powehdi kelen mahwen kan.’ (Mel. 18:29) Eri kitail en dehr peikasal, ahpw kitail en kapakap ni pwoson, oh likih me Siohwa pahn ketin sapengala atail kapakap kan.—Seims 1:​6, 7. w23.11 22 ¶8-9

Wehwehn limpoak mehlel wasaht uhdahn kaselel! Mahsen pwukat kin kangoange pwopwoud kan me irail kak ahneki limpoak ehu me uhdahn kehlail. Pwopwoud ehu anahne doadoahk laud pwe ira en kak limpoakpene erein ara mour. Karasepe, kisiniei ehu kak wie lullulte ma emen pahn kin kihkihong tuwi. Ma soh, kisinieio pahn kohkohlao kunla. Duwehte met, limpoak me mi nanpwungen pwopwoud ehu pil kak kehkehlailte ma ira kin kakehlaka ara nanpwungmwahu. Ekei pak, pwopwoud ehu kak pehm me ara limpoak tikitikla, ahpw mehlel ma ira kin dadaur pahn kahpwal en mwohni, soumwahu, de apwalih neira seri kan. Eri, pwehn pousehlahte sasaun “mpwul en Siohwa,” ohl pwopwoud oh lih pwopwoud anahne doadoahk laud pwe ira en ahneki nanpwungmwahu kehlail rehn Siohwa. w23.05 20-21 ¶1-3

Pwehn kakairada eimah, dahme kitail anahne wia? Ele atail pahpa nohno kan kin kangoange kitail en eimah, ahpw irail sohte kak wiahiong kitail en eimah ma pein irail kin eimah. En eimah duwehte omw kin sukusukuhlki doadoahk kapw ehu. Ehu ahl me ke kak koahiekla nan doadoahko iei sang ni omw kilikilang ahn sounpadahko wiewia kan oh eri alasang eh mehn kahlemeng. Duwehte met, kitail kin sukuhlki en eimah sang ni atail tehk mwahu ia duwen meteikan ar kasalehda irair wet oh eri alasang arail mehn kahlemeng. Duwehte Daniel, kitail anahne esehla mwahu Mahsen en Koht. Kitail anahne wiahda nanpwungmwahu keren rehn Siohwa sang ni atail kalapw kapakap ong ih oh padahkihong atail pepehm. Oh kitail anahne likih Siohwa, kamehlele me e pahn ketin ahnsou koaros sewese kitail. Eri ni ahnsou me atail pwoson lelohng kasongosong, kitail pahn eimah. Meteikan kin kalapw wauneki aramas akan me kin eimah. Irail pil kak sewese ekei en esehla Siohwa. Ni mehlel, mie kahrepe mwahu en kakairada eimah. w23.08 2 ¶2; 4 ¶8-9

Lokaiahn Krihs me kawehwehdiong “kasawih” kin kadoadoahk ong mwomwen aramas ar kin song mete kan duwehte kohl oh silper pwehn kilang ma soahng pwukat uhdahn mehlel. Eri, kitail anahne song, de kasawih dahme kitail kin rong de wadek pwehn esehda ma mehlel pwoat. Met pil pahn uhdahn kesempwal ong kitail ni kahn kamakam kowahlapo eh kerendohr. Kitail en dehr kin kamehlele soahng koaros me meteikan nda, ahpw kitail en doadoahngki atail koahiek en madamadau pwehn kapahrekihpene dahme kitail wadek de rong ong dahme Paipel oh sapwellimen Siohwa pwihn kin koasoia. Ma kitail wia met, rohng de soahng likamw kan me ngehn suwed kin wiahda sohte pahn pitihkitaildi. (Lep. Pad. 14:15; 1 Tim. 4:1) Kitail ese me sapwellimen Siohwa aramas akan pahn pitsang kahn kamakam kowahlapo. Ahpw emenemen kitail sehse dahme pahn wiawi lakapw. (Seims 4:14) Sohte lipilipil ma kitail iang pitla nan kahn kamakam kowahlapo de mehla mwohn eh wiawi, kitail pahn alehdi ketingpatail me iei mour soutuk, ma kitail lelepekte. Kitail koaros en medemedewehte duwen atail koapworopwor kaselel oh onohnop ong rahnen Siohwa! w23.06 13 ¶15-16

Kitail sehse ia duwen ekei kokohp en Paipel kan pahn pweida. (Dan. 12:​8, 9) Atail sohte uhdahn wehwehki pweidahn kokohp ehu sohte wehwehki me e sohte pahn pweida. Kitail kak uhdahn likih me Siohwa pahn ketin sewese kitail en wehwehki dahme kitail anahne ese ni ahnsou me konehng, duwehte me e kin ketin wia mahso. Pakairpen “popohl oh sohte keper” pahn wiawi. (1 Des. 5:3) Mwuri, koperment kan en sampah pahn uhwongada pelien lamalam likamw kan oh kasohrehla. (Kaud. 17:​16, 17) Irail eri pahn uhd uhwongada sapwellimen Koht aramas akan. (Esek. 38:​18, 19) Mwekid pwukat pahn tapiada mahwen en Armakedon. (Kaud. 16:​14, 16) Kitail kak uhdahn kamehlele me mwekid pwukat pahn kereniong wiawi. Ahpw lao lel ahnsowo, kitail en pousehlahte kasalehda atail kalahngan ong Samatail limpoako nanleng sang ni atail kin tetehk kokohp en Paipel kan oh pil sewese meteikan en wia duwehte. w23.08 13 ¶19-20

Ahnsou me wahnpoaron Pohl koasoia duwen pwoson, koapworopwor, oh limpoak, e koasoia me “me keieu kesempwal rehrail iei limpoak.” (1 Kor. 13:13) Dahme kahrehda Pohl kak ndahki met? Ni ahnsou kohkohdo, kitail sohla pahn anahne pwoson sapwellimen Koht inou kan duwen sampah kapwo pwehki soahng pwukat me kitail kin koapworopworki pahn pweidahr. Ahpw kitail pahn kin ahnsou koaros anahne poakohng Siohwa oh aramas akan. Ni mehlel, atail poakohng irail pahn pousehlahte lalaudla. Oh pil, limpoak kin wia kilelepen Kristian mehlel. Sises mahsanihong sapwellime wahnpoaron kan: “Koaros pahn esehki me kumwail nei tohnpadahk kan—ma kumwail kin limpoakpene nanpwungamwail.” (Sohn 13:35) Pil ehu, atail poakohng emenemen kin kahrehda kitail en miniminpene. Pohl nda me limpoak “kin kapatapene mehkoaros ni unsek.” (Kol. 3:14) Wahnpoaron Sohn ntingkilahng ienge Kristian ko: “Mehmen me kin poakohng Koht pil anahne poakohng rie.” (1 Sohn 4:21) Ni atail kin kasalehda atail poakohng emenemen, kitail kin kasalehda atail poakohng Koht. w23.11 8 ¶1, 3

Paipel kapahrekiong atail mour nin duwen Kristian kei weirentang ehu. Sounweiren tang kan me kanekehla weiro pahn alehdi mour soutuk. (2 Tim. 4:​7, 8) Kitail anahne wia uwen atail kak koaros pwehn tangatangete pwehki kitail uhdahn kerenlahngehr ni imwin weiro. Wahnpoaron Pohl koasoia dahme pahn sewese kitail pwehn kana nan weiro. E kaweidki kitail en “kesehsang kitail mehkoaros me kin katoutou . . . oh kitail en dadaurete tang ni weirentang me pwilidier mwohtail.” Dahme Pohl nda wehwehki me sohte wisik ehu Kristian men anahne wahda? Soh. Ahpw, wehwehn eh koasoio iei me kitail en uhdihsang wahda katoutou kan me kitail sohte anahne wa. Soangen katoutou wet kak kahrehiong kitail en wawaila oh pwangada. Pwehn dadaurete, kitail anahne mwadang esehda oh kesehla katoutou koaros me sohte anahn me kak kahrehda kitail en wawaila. Ahpw ni ahnsowohte, kitail sohte men kesehla wisik kan me kitail anahne wahda. Ma kitail sohla wa katoutou pwukat, kitail sohla pahn mihmihte nan weiro.—2 Tim. 2:5. w23.08 26 ¶1-2

Madamadau toupahrek kin sewese kitail en wauneki ahn meteikan madamadau. Karasepe, ekei riatail sister kan perenki doadoahngki makeup, a meteikan soh. Ekei Kristian kan perenki nim ekis sakau en wai, ahpw meteikan pilada en dehr nim. Kristian koaros men ahneki roson mwahu ahpw re kin pilada soangsoangen wiepen roson mwahu. Ma kitail kin ahnsou koaros medewe me kitail kin pwung oh song en idingkihong riatail Kristian kan en wia dahme kitail kin wia, kitail kak kadipekelekelih meteikan oh kahrehda saminimin. (1 Kor. 8:9; 10:​23, 24) Karasepe, Siohwa sohte ketin padahkihong kitail dahme kitail anahne likawih, ahpw e ketikihong kitail ire mehlel kan pwehn idawehn. Kitail anahne likouda ni ahl me kin kawauwih Koht, kasalehda madamadau toupahrek, wahu, oh “madamadau pwung.” (1 Tim. 2:​9, 10) Eri, kitail sohte men likouda ni ahl me aramas akan pahn medemedewehte mwomwatail. Kaweid en Paipel kan pahn pil sewese elder kan en dehr pein wiahda kosonned kan me pid likou oh sidail en pitenmoang. w23.07 23-24 ¶13-14

Siohwa ketin kasalehiong kitail ia duwen atail pahn ahneki mour nsenamwahu ni ahnsou kohkohdo. Irail kan me ale luhk me kohsang “lih pweipwei” oh ewen wedeio kin medemedewehte peren me kohsang tiahk samin. Arail tiahk kan pahn imwila “nan wasahn me melahr akan.” (Lep. Pad. 9:​13, 17, 18) Ahpw dahme pahn wiawi ni ahnsou kohkohdo ong irail kan me ale luhk sang lih me karasaraskihong erpit mehlel pahn uhdahn weksang! (Lep. Pad. 9:1) Kitail kin sukusukuhlki en poakohng dahme Siohwa ketin poakohng oh kailongki dahme e ketin kalahdeki. (Mel. 97:10) Oh kitail kin peren pwehki kitail kak luke meteikan en sukuhlsang “kupwurokong,” de erpit mehlel. E mwomwen me kitail kin “likwer sang wasa ile kan en kahnimwo, patohwan: ‘Kohdo, kumwail me sehse lamalam akan!’” Kamwahu kan ong kitail oh irail kan me mwekidki sohte kin ongete ahnsou wet. E kin poatopoat, oh kak kahrehiong kitail en “mour” kohkohlahte ni atail “idawehn ahl en loalokong.”—Lep. Pad. 9:​3, 4, 6. w23.06 24-25 ¶17-18

Ia omw pepehm ni emen iengomw tohndoadoahk de tohnsukuhl eh peidengki dahme ke kin kamehlele? Ke kin salohda? Pali laud en kitail kin. Ahpw soangen peidek wet ele kak sewese kitail en wehwehki dahme aramaso uhdahn medewe de kamehlele, oh elehieng kitail ahnsou mwahu en ehukihong ih rongamwahwo. Ahpw ekei pak, emen kakete idek peidek pwehki e sapwungki kitail de men akamaiong kitail. Met kin kalapw wiawi pwehki re kin rong soahng sapwung kan duwen dahme kitail kin kamehlele. (Wiewia 28:22) Patehng met, kitail miher ni “imwin rahn akan,” ahnsou ehu me aramas tohto “sohte men pwungki meteikan” oh pil kin “lemei.” (2 Tim. 3:​1, 3) Ele ke kin medewe, ‘Ia duwen ei kak meleilei oh kadek ni emen eh men akamaikihong ie dahme I kamehlele?’ Mpahi, de opampap, pahn seweseiuk. Aramas mpahi men sohte kin mwadang lingeringerda, ahpw e kin kaunda eh pepehm ni meteikan kan ar akamaiong ih, de ni eh sohte nohn ese dahme e pahn sapengki irail. w23.09 14 ¶1-2

Ekei pak, kitail kin alehdi kaweid me kin pere kitail sang noahroke kepwe oh wiewia kan me kak kahrehiong kitail en kauwehla sapwellimen Koht kosonned. Nan soahng pwukat, kitail pahn paiekihda atail idawehn kaweid me Siohwa ketikihda. (Ais. 48:​17, 18; 1 Tim. 6:​9, 10) Kitail kak kamehlele me Siohwa pahn ketin pousehlahte doadoahngki aramas akan pwehn kihda kaweid erein kahn kamakam kowahlapo oh lao lel ni Kaundahn Pahr Kido. Ia duwe, kitail pahn pousehlahte idawehn kaweido? E pahn mengei ong kitail en wia met ma kitail doulahte idawehn sapwellimen Siohwa kaweid ahnsou wet. Eri, kitail en ahnsou koaros idawehn sapwellimen Siohwa kaweid, pil iangahki kaweid me kohsang irail ohl kan me idihdda pwehn apwalih kitail. (Ais. 32:​1, 2; Ipru 13:17) Kitail kak idawehn atail Sounkaweido Siohwa, oh uhdahn likih pwehki e pahn ketin pere kitail sang mehkot me kak kauwehla atail nanpwungmwahu reh oh kahluwaikitaillahng mour soutuk nan sampah kapwo. w24.02 25 ¶17-18

Wahnpoaron Pohl kin perenki eh papah Siohwa, ahpw met sohte kin mengei ahnsou koaros. Pohl kin kalapw seiloakla wasa doh, oh en seiloakseli soangen ahnsou ko kin apwal. Ni eh kin seiloak, ekei pak Pohl kin lelohng “kahpwal sang nan pillap kan” oh “kahpwal sang lipirap akan.” Pil mie ahnsou kan me eh imwintihti kan kin keme ih. (2 Kor. 11:​23-27) Oh rie Kristian kan sohte kin ahnsou koaros kalahnganki soahng kan me e wiahda pwehn sewese irail. (2 Kor. 10:10; Pil. 4:15) Dahme sewese Pohl en pousehlahte papah Siohwa? Pohl sukuhlki laud duwen sapwellimen Siohwa irair kaselel kan sang nan Paipel oh sang dahme pein ih kin lelohng. Pohl eri kamehlelehla me Siohwa Koht ketin poakohng ih. (Rom 8:​38, 39; Ep. 2:​4, 5) Oh e pil uhdahn poakohngala Siohwa. Pohl kasalehda eh limpoak ong Siohwa ‘sang ni eh kin papah aramas sarawi kan.’—Ipru 6:10. w23.07 9 ¶5-6

Aramas tohto pwungki me kitail anahne koperment kan oh me kitail en peikiong kosonned kan en “irail kan me ahneki manaman.” Ahpw irail ele kin pweiek en kapwaiada kosonned ehu me re sohte mwahuki de mwomwen sapahrek. Paipel pohnese me koperment en aramas akan kin kahrehda lokolok, me Sehdan me kaunda, oh e pahn kereniong sohrala. (Mel. 110:​5, 6; Ekl. 8:9; Luk 4:​5, 6) E pil mahsanih me “mehmen me kin uhwong irail kan me ahneki manaman kin uhwong koasoandi en Koht.” Ahnsou wet, Siohwa ketin mweidohng koperment kan en kaunda pwe soahng kan en kak soandi mwahu, oh e ketin kasik me kitail en peikiong. Eri, kitail anahne “kihong irail soahng koaros me arail,” pil iangahki pwain daksis, kasalehda wahu, oh peik. (Rom 13:​1-7) Kitail kakete medewe me kosonned ehu kin kahpwalihkitailla, sohte pahrek, de pweilaud en peikiong. Ahpw kitail kin peikiongete, pwehki Siohwa ketin mahsanihong kitail en wia met, erein ar sohte nda me kitail en kauwehla sapwellime kosonned.—Wiewia 5:29. w23.10 8 ¶9-10

Ni ahnsou me Samson ipwidi, mehn Pilisdia kan kin kakaun wehin Israel oh kin kahpwalihala arail mour. (Sounkopwung 13:1) Arail kaunda lemei kahrehiong mehn Israel kan en lokolok laud. Siohwa ketin idihada Samson en “tapihada doadoahk en kapitala Israel sang mehn Pilisdia kan.” (Sounkopwung 13:5) Pwehn kapwaiada pwukoa wet, Samson anahne koapworopworki Siohwa. Ehu pak, karis en Pilisdia kan kodohng koledi Samson nan Lihai, me mwein mi nan Suda. Ohl en Suda ko masepwehkada, eri irail koasoanehdi en kihong mehn Pilisdia ko Samson. Pein ahn Samson tohn wehio salihekihdi ih sahl kapw riapwoat oh wahla ih rehn mehn Pilisdia ko. (Sounkopwung 15:​9-13) Ahpw, “manaman en KAUN-O ahpw kakehlailihala” Samson oh e kamweidpeseng sahl ko oh pitla. Ih eri “diarada lapalahn tihn dilin aupahn ahs emen,” poarehngete, oh kemehkihla ohlen Pilisdia 1,000 kei!—Sounkopwung 15:​14-16. w23.09 2-3 ¶3-4

Siohwa kin ketin ekisekis kasalehda sapwellime “koasoandi poatopoat” nan Paipel. Siohwa kak ketin pilada soangsoangen ahl akan pwehn kapwaiada sapwellime koasoandi, oh kin ahnsou koaros pweida. Met pwehki e kin ketin “doadoahngki soahng koaros pwe kupwure en pweida.” (Lep. Pad. 16:​4, NW) Oh imwilahn dahme Siohwa kin ketin wiahda pahn kin poatopoat kohkohlahte. Ia sapwellimen Siohwa koasoandi, oh wekidekla dah kan me e ketin wiahda pwehn kapwaiada kupwureo? Koht ketin mahsanihong tepin aramas ako dahme e ketin kupwurki ong ira. Ira pahn ‘kaparaparala pwe kadaudokara kan pahn kousoanla wasa koaros nin sampah oh kaunda menmour koaros’ nin sampah. (Sen. 1:28) Ni Adam oh Ihp ara pelianda Koht, me kahrehda dihp en lelohng aramas koaros, met sohte kak kauhdihsang Siohwa en ketin kapwaiada kupwureo. E ketin wekidala mwomwen eh pahn ketin kapwaiada kupwure. Mwurinte mwo, e ketin koasoanehdi teng en kauwada Wehi ehu nanleng me pahn kapwaiada dahme e ketin kupwurki nin tapio ong aramas oh sampah.—Mad. 25:34. w23.10 19-20 ¶6-7

Siohwa kak ketin sewese kitail en pousehlahte papah ih. Ele e apwal en wia met ahnsou koaros, ahpw mehlel ma kitail kin apwalki powehdi luwet ehu rehtail erein ahnsou werei. Ekei pak, atail luwet kan ele apwal sang ahn wahnpoaron Piter ko koaros. Ahpw Siohwa kak ketikihong kitail kehl pwe kitail en dehr uhdihsang papah ih. (Mel. 94:​18, 19) Karasepe, emen brother kin iang wia tiahk en ohl mwahuki ohl erein sounpar tohto mwohn eh sukuhlki padahk mehlel. E wekidala douluhl eh mour oh tepida mourki kaweid en Paipel kan. Ahpw ekei pak, e kin apwalki powehdi eh ineng sapwung kan. Dahme sewese ih en pousehlahte papah Siohwa? E koasoia: “Siohwa kin ketin kakehlaka ie.” E pil doula koasoia: “Pwehki sapwellimen Siohwa manaman . . . , I sukuhlki me I kak pousehlahte papah ih ni ahl me e ketin kupwurki . . . Siohwa kak ketin doadoahngkin ie, oh mendahki ei soh unsek kan, e kin ketin pousehlahte kakehlakaiehda.” w23.09 23 ¶12

Brother pwulopwul kan, kumwail pahn anahne nanti laud pwehn wiahla ohl Kristian koahiek men. Kumwail anahne pilada mehn kahlemeng mwahu kan pwehn alasang, kakairada koahiek en madamadau, en kin likilik, esehla koahiek kan me katapan, oh kaunopada ong pwukoa kan me kumwail kakete alehdi. Ni amwail medewe duwen soahng kan me kumwail anahne esehla wia, ele ke pahn pehm me e nohn apwal. Ahpw kumwail kak pweida. Tamataman me Siohwa uhdahn ketin kupwurki sewesei kumwail. (Ais. 41:​10, 13) Ei mehlel, riomw Kristian kan nan mwomwohdiso pahn pil sewesei kumwail. Ni amwail wiahla soangen ohl me Siohwa ketin kupwurki, amwail mour pahn peren oh nsenamwahu. Se poakohng kumwail brother pwulopwul kan! Siohwa en ketin kapaikumwailda laud ni amwail nannanti en wiahla ohl Kristian koahiek kei. w23.12 29 ¶19-20

Medewehla ke iang riomw Kristian kan kohpene mwemweit. Ke perenki ahnsowo oh ke men kilelekumwaildi. Ke pil wiahda kilel riau pwe me ke tepin kilelehdio kakete sohte mwahu. Met mie noumw kilel siluh. Ahpw nan ehu kilel ko, ke tehkada me emen brother sohte sirei. Eri ke pahn delete kilelo sang nan kilel ko pwehki nan kilel riau tehi ko, koaros sirei, pil iangahki brothero. Kitail kin kalapw taman ahnsou mwahu kan me kitail iang riatail Kristian kan. Ahpw ia duwen ma ehu ahnsou ko, emen riatail nda de wia mehkot me sohte kadek? Dahme kitail pahn wia? Kitail sou pahn song en manokehla soangen ahnsowo duwehte atail delete kilel suwedo? (Ep. 4:32) Kitail kak manokehla pwehki kitail kin tamataman ahnsou mwahu tohto me kitail kin iangih. Ih soangen mehn kataman me kitail men nekidala oh kesempwalki. w23.11 12 ¶16-17

Lepin lokaiahn Krihs me e doadoahngki wasaht kasalehda me lih emen anahne ahnsou koaros likouda ni ahl me konehng, oh e anahne wauneki dahme meteikan kin medewehki dahme e kin likawih. Se kapinga sister kan me kin idawehn kaweid wet! Pil ehu irair me sister kan koaros anahne iei en dehdehki irair kan. Ia wehwehn met? Met wehwehki en ahneki koahiek en ese dahme pwung oh sapwung oh eri pilada en wia dahme pwung. Medewehla mehn kahlemeng en Apikail. Eh pwoudo wiahda pilipil sapwung me kahrehda kahpwal laud ong eh peneineio pwon. Apikail mwadangete wia mehkot. Pwehki e wehwehki dahme e anahne wia me pwung, e doarehla arail mour. (1 Sam. 25:​14-23, 32-35) En dehdehki irair kan kin sewese kitail en ese iahd me kitail en koasoi oh en nennenla. Oh met kin sewese kitail en kasalehda toupahrek ni atail kasalehda atail nsenohki meteikan.—1 Des. 4:11. w23.12 20 ¶8-9

Wahnpoaron Pohl ntingkihlahng mwomwohdiso en Rom mahsen pwukat. Irail kan wasao sukuhlkiher duwen Siohwa oh Sises, kasalehda arail pwoson, oh wialahr Kristian kei. Irail “pwunglahr rehn Koht pwehki pwoson,” oh Koht ketin keieirailkihdi sapwellime manaman. (Rom 5:1) Irail kak kasikasik keting kaselel ehu oh kak uhdahn kamehlele me irail pahn alehdi. Mwuhr Pohl ntinglahng Kristian keidi kan nan Episos duwen koapworopworo me Koht ketikihong irail. Irail pahn alehdi “sohso ehu ong aramas sarawi kan.” (Ep. 1:18) Pohl pil padahkihong mehn Kolose ko ia wasa me irail pahn alehdi ketingparail. E kahdaneki koapworopworo “koapworopwor me nekinek ong kumwail nanleng.” (Kol. 1:​4, 5) Eri, koapworopwor me Kristian keidi kan ahneki iei en iasada ong mour soutuk nanleng, wasa me irail pahn iang Krais kaunda.—1 Des. 4:​13-17; Kaud. 20:6. w23.12 9 ¶4-5

Uhdahn wehwehn lepin lokaiao “pere” ong sounpei kin dokedoke sounsilasil kan me kin pere kahnimw ehu pwehn dehr lelohng keper. Aramas akan me kin kousoan nan kahnimw ehu me mie sounsilasil kan sohte kin perki mehkot pwehki re ese me sounsilasil ko pahn pere irail. Duwehte met, ni ahnsou me sapwellimen Koht popohl kin pere atail mohngiong oh madamadau, kitail kin ahneki meleilei oh ese me kitail sohte anahne perki mehkot. (Mel. 4:8) Duwehte Ana, mehnda ma atail irairo sohte mwadangete wekila, kitail kak ahnekihte meleilei. (1 Sam. 1:​16-18) Oh ni atail kin ahneki meleilei, kitail kin kalapw esehda me e mengei en ahneki madamadau pwung oh wiahda pilipil mwahu kan. Dahme kitail kak wia? Duwehte tohn kahnimw kan ar kin eker sounsilasil kan pwehn pere irail, kitail pil kak peki Siohwa en ketin sewese kitail. Ia duwen? Kapakap lao ke alehdi sapwellimen Koht popohl. (Luk 11:9; 1 Des. 5:17) Ma ke lelohng kahpwal ehu, poadidiong kapakap, oh ke pahn ale sapwellimen Siohwa popohl ni eh pere omw mohngiong oh madamadau.—Rom 12:12. w24.01 21 ¶5-6

Pwehn kasarawihala mwaren Semeo, Sises ketin dadaur pahn soangen kalokolok, kanamenek, oh karaunlikamw koaros me wiawihong ih. E mwahngih me e ketin peikiong Semeo ni soahng koaros, oh sohte mehkot me e anahne namenengki. (Ipru 12:2) E pil mwahngih me Sehdan me kalokaloke ih ni ahnsou apwalo. (Luk 22:​2-4; 23:​33, 34) Sehdan uhdahn men kahrehiong Sises en sohla ketin lelepek; ahpw e sohte douluhl pweida! Sises ketin kadehdehda ni sansal me Sehdan uhdahn sounlikamw men oh Siohwa sapwellimanki ladu loalopwoat kan me kin lelepekte pil ni arail kin mi pahn kasongosong keieu laud kan! Ke men kaperenda omw Nanmwarkio me wie kakaun? Pousehlahte kapinga mwaren Siohwa, sewese meteikan ren sukuhlki soangen irair kaselel koaros me atail Kohto sapwellimanki. Ni omw wia met, ke kin kahlemengih Sises. (1 Pit. 2:21) Duwehte Sises, ke kin kaperenda Siohwa oh kadehdehda me sapwellime imwintihtio, Sehdan, uhdahn sounlikamw men! w24.02 11-12 ¶11-13

Erein sounpar limau samwalahro, aramas daulih rar papidaisla nin duwen Sounkadehdehn Siohwa kei. Ni omw inoukihong Siohwa omw mour, ke pilada en wiahla emen sapwellimen Sises Krais tohnpadahk oh kin wiahki kupwuren Koht me keieu kesempwal nan omw mour. Dahme met kin pidada? Sises mahsanih: “Ma mehmen men idawehniehdo, a en tounmeteikihla pein ih.” (Mad. 16:24) Nin duwen emen me wiahda inou ong Siohwa, ke pahn anahne soikala soahng kan me Siohwa sohte ketin kupwurperenki. (2 Kor. 5:​14, 15) Me wehwehki ke pahn soikala “wiewiahn uduk,” me duwehte tiahk samin me pid wia nsenen pwopwoud. (Kal. 5:​19-21; 1 Kor. 6:18) Ia duwe, omw peikiong kaweid pwukat pahn kahrehiong omw mour nan apwal? E sohte pahn ma ke poakohng Siohwa oh kamehlele me sapwellime kosonned kan wia kamwahupomw.—Mel. 119:97; Ais. 48:​17, 18. w24.03 2 ¶1; 3 ¶4

Siohwa kin ketikihong irail kan me e ketin kupwurperenki sapwellime manaman. (Mad. 12:18) Medewehla peidek wet, ‘I kin kasalehda ekei irair kaselel kan me kohsang wahn sapwellimen Koht manaman?’ Omw kanengamahiong meteikan laudla sang ahnsowo mwohn omw esehla Siohwa? Uwen laud en omw kakairada irair kaselel kan me kohsang wahn sapwellimen Koht manaman, ih uwen laud en omw pahn kamehlele me Siohwa kin kupwurperenkin uhk! Siohwa ketikihda pweinen pweipwei sapahlo ong irail kan me e ketin poakohng. (1 Tim. 2:​5, 6) Ahpw ia duwen ma kitail ahnekihte pepehm me Siohwa sohte ketin kupwurperenki kitail, mendahki kitail pwoson pweinen pweipwei sapahlo oh papidaisla? Tamataman, kitail sohte kak ahnsou koaros likih atail pepehm ahpw kitail kak likih Siohwa. E kin ketin wiahki irail kan me pwoson pweinen pweipwei sapahlo aramas pwung kei mwohn silangi, oh ketin inoukihda en kapaiairailda.—Mel. 5:12; Rom 3:26. w24.03 30 ¶15; 31 ¶17