December

Ia duwe, Siohwa ketin sapwellimanki manaman en kaiasada me melahr kan? Ei uhdahn! Ih me “Keieu Manaman.” (Kaud. 1:8) Eri e sapwellimanki manaman me uhdahn laud me kahrehda e kak ketin kalowehdi imwintihti koaros, pil mehla. (1 Kor. 15:26) Ehu kahrepe me kitail esehki me Koht kak ketin kaiasada me melahr kan iei pwehki sohte irepen dahme e kin ketin tamataman. E kin ketin malipehki ehuehu usu kan adarail. (Ais. 40:26) E pil ketin tamataman irail kan koaros me melahr. (Sohp 14:13; Luk 20:38) E mengei ong ih en kak ketin tamataman ire pisetik koaros duwen irail kan me e pahn ketin kaiasada, iangahki mwomwarail, arail irair, dahme kin wiawi nan arail mour, oh dahme irail kin taman. E sansal me kitail kak kamehlele sapwellimen Siohwa inou me pid kaiasada ni ahnsou kohkohdo pwehki kitail ese me e ketin kupwurki oh pil sapwellimanki manaman en kapwaiada met. Medewehla ehu kahrepen atail kak kamehlele sapwellimen Koht inou en kaiasada: Siohwa ketin wiahier met. Nan Paipel, e ketikihong ohl lelepek kei, pil iangahki Sises, manaman pwehn kaiasada me melahr kan. w23.04 9-10 ¶7-9

Ma kitail kin koasoi ni kadek oh mpahi, aramas akan ele pahn men rong oh pousehlahte koasoiong kitail. Ahpw ma emen kin mente akamai de kauwe kitail, kitail sohte anahne pousehla koasoiong ih. (Lep. Pad. 26:4) Pali laud en aramas ele sohte kin akamai ong kitail. Ni mehlel, ekei—de me tohto—pahn rong. E sansal me e uhdahn kesempwal en esehla kasalehda mpahi. Kapakap ong Siohwa oh peki kehl me ke anahne pwehn kolokolete omw mpahi ni omw sapeng peidek apwal kan de ni meteikan ar kauweiuk. Tamataman, omw mpahi kak kauhdi sawehwe kan me kakete wiahla akamai laud. Oh omw sapeng ni mpahi oh wahu kakete kamwakid ekei sounrongorong kan en wekidala dahme re kin medewehki kitail oh duwen padahk mehlel en Paipel kan. Ke en kin ‘onopada ahnsou koaros pwe ke en sapeng’ irail kan me peidengki dahme ke kin kamehlele, oh “wia met ni mpahi oh wahu laud.” (1 Pit. 3:15) Ei, kasalehda me ke kehlail sang ni omw kin mpahi! w23.09 19 ¶18-19

Tehk ahl pahieu me ke kak kasalehda kanengamah. Keieu, aramas kanengamah men sohte kin mwadang lingeringerda. E kin song en meleilei ni meteikan kin kalingeringerih oh sohte kin wiahiong irail dahme re wiahiong ih. E sohte pil kin lemeiong meteikan ni eh kin pwunod. (Eks. 34:6) Keriau, aramas kanengamah men kin kak awih ni meleilei. Ma mehkot kin pwand sang dahme e kasik, aramaso kin nantihong en dehr lingeringerda. (Mad. 18:​26, 27) Kesiluh, aramas kanengamah men sohte kin pwurur. Ni aramas kanengamah men eh ahneki pwukoa kesempwal ehu, e sohte kin mwadangete tepida wia de mwadang en kanekehla. Ahpw e kin kihong ahnsou en pilahnehda dahme e pahn wia. Ih eri kihong ahnsou pwehn wiahda doadoahko en mwahu. Kapahieu, aramas kanengamah men kin dadaur pahn kahpwal ehu oh sohte kaulim. E kin medewe soahng mwahu kan nan eh mour oh pousehlahte dadaur. (Kol. 1:11) Nin duwen Kristian kei, kitail anahne kasalehda kanengamah ni ahl pwukat koaros. w23.08 20-21 ¶3-6

Ehu kahrepe kesempwal me kitail en pere mohngiongitail iei pwehki Siohwa kin ketin kasawih mohngiongitail. Met wehwehki me e kin ketin mahsanih laudsang dahme meteikan kin kilang rehtail oh ketin mwahngih soangen aramas dah kitail. E pahn ketin poakohng kitail ma kitail kin medemedewehte sapwellime kaweid kan me kak sewese kitail en mour kohkohlahte. (Sohn 4:14) Eri, tiahk samin oh likamw kan en Sehdan oh aramas suwed kan nan eh sampah sohte pahn kauweikitailla. (1 Sohn 5:​18, 19) Ni atail kin karanihala Siohwa, atail poakohng oh wauneki ih pahn laudla. Pwehki kitail sohte men kamedekihala Samatailo, kitail pahn kailongki en pil medewehda en wia dihp. Marta, sister men sang Croatia, me lelohng songosong en wia tiahk samin, ntingihedi: “I kin apwalki en medewe mwahu soahng kan oh powehdi ei ineng en wia me suwed. Ahpw ei lemmwiki Siohwa kin pere ie.” Ia duwen lemmwiki Koht eh sewese ih? Marta koasoia me e kin doudouloale soahng suwed kan me pahn wiawi ma e wiahda tiahk samin. Kitail pil kak wia soahngohte. w23.06 20-21 ¶3-4

Sises mwahngih me kupwuren Siohwa iei en kasarawihala Mwareo, oh kamwekelehsang karaunlikamw koaros me wiawihong. Ihme kahrehda e ketin padahkihong sapwellime tohnpadahk kan en kapakapki: “Samat me ketiket nanleng, mwaromwi en sarawihla.” (Mad. 6:9) Sises mwahngih me ire wet iei me keieu kesempwal oh kin pidada koaros me mi nanleng oh pil nin sampah. Sohte emen nanleng de nin sampah me kasarawihala mwaren Siohwa laudsang me Sises ketin wia. Ahpw ni ahnsou me Sises ketin selidi, sapwellime imwintihti ko karaunehki me e ketin lahlahwe Semeo! Ong Sises, en kauwe de karaunlikamwih mwaren Semeo me sarawi iei dihp me keieu suwed. E uhdahn kupwurtoutoukihla arail pahn karaunehki oh salihedi ih pwehki met. Ele ih kahrepe wet me Sises “ketin pwunodada kowahlap” mwohnte arail salihedi ih.—Luk 22:​41-44. w24.02 11 ¶11

Nan atail weirentang en mour, kitail anahne poakohng Siohwa oh Sises laudsang atail poakohng atail peneinei. (Mad. 10:37) Ahpw met sohte wehwehki me kitail kak pohnsehsehla atail pwukoahn nan peneinei. Weksang met, pwehn kaperenda Koht oh Krais, kitail anahne kapwaiada atail pwukoahn nan peneinei. (1 Tim. 5:​4, 8) Ni atail wia met, kitail pahn peren. Siohwa ketin mwahngih me peneinei kan pahn peren ni pwopwoud ehu ara kin wauneki oh poakohng emenemen, ni pahpa nohno kan ar kin poakohng oh kaiahne neirail seri kan, oh ni seri kan ar peikiong arail pahpa nohno. (Ep. 5:33; 6:​1, 4) Sohte lipilipil ia omw pwukoa nan peneinei, likih kaweid en Paipel erpit kan. Dehr wiahte dahme ke medewe me pwung, de dahme me tohto kin wia, de dahme me saman kin koasoia me ke anahne wia. Doadoahngki mwahu neitail sawasepen Paipel kan. Soahng pwukat audaudki iren sawas kan ong ia duwen atail pahn kapwaiada kaweid en Paipel kan. w23.08 28 ¶6-7

Sister men anahne esehla koahiek kan me katapan. Ekei koahiek kan me serepein men kak esehla ni eh tikitik pahn sewese ih erein eh mour. Karasepe, esehla mwahu wadawad oh nting. Nan ekei tiahk, aramas akan medewe me en esehla wadawad oh nting sohte kesempwal ong lih akan. Ahpw, e mwahu oh kesempwal ong Kristian koaros en esehla wadawad oh nting. (1 Tim. 4:13) Eri dehr mweidohng kahpwal sohte lipilipil en kauhiukdihsang en esehla mwahu wadawad oh nting. Ia duwen omw pahn paiekihda? Soangen koahiek pwukat kak seweseiuk koadoahkihada mwohni me ke anahne. E pil pahn mengeiong uhk en onopki Paipel oh padahkihong meteikan. Me keieu kesempwal, ke pahn karanihala Siohwa ni omw wadek sapwellime Mahsen oh doudouloale.—1 Tim. 4:15. w23.12 20 ¶10-11

Peki sapwellimen Siohwa sawas pwehn pelianda kasongosong. Pwehki atail soh unsek, kitail kin ahnsou koaros anahne pelianda kasongosong en wia dahme sapwung. Sehdan kin wia uwen eh kak koaros pwehn kahpwalihala atail kin nannanti. Ehu ahl me e kin song en kauwehla atail madamadau iei sang ni eh doadoahngki mehn kamweit kan me samin. Mehn kamweit pwukat kak kasaminehla atail madamadau, kahrehiong kitail en samin mwohn silangin Siohwa, oh kak kahrehiong kitail en wiahda dihp laud. (Mark 7:​21-23; Seims 1:​14, 15) Kitail anahne sapwellimen Siohwa sawas ma kitail men powehdi kasongosong en wia dahme sapwung. Sises pil kapatahiong nan kapakap en Samato: “Komw dehr ketin mweidohng kiht sen lohdiong nan songosong, ahpw komw ketin doareikitasang me suwedo.” (Mad. 6:13) Siohwa ketin kupwurki sewesei kitail, ahpw kitail anahne peki sapwellime sawas. Kitail pil anahne mwekid pahrekiong dahme kitail kapakapki. w23.05 6-7 ¶15-17

Ni pwopwoud ehu ara kin kesempwalki ara nanpwungmwahu rehn Samarao nanleng, ira kin mwadang en kapwaiada sapwellime kaweid, oh met kin sewese ira en soikala oh powehdi kahpwal kan me kakete kahrehiong ara limpoakpene en tikitikla. Irail kan me ahneki nanpwungmwahu kehlail rehn Siohwa pil kin wia uwen arail kak en kahlemengih Siohwa oh kakairada irair kaselel kan, duwehte kadek, kanengamah, oh mahk. (Ep. 4:32–5:1) Ni pwopwoud ehu ara kin kasalehda soangen irair pwukat, e pahn mengei ong ara limpoakpene en kekeirda. Sister men me adaneki Lena, me pwopwoudkier daulih sounpar 25, koasoia, “E mengei en poakohng oh wauneki emen me ahneki nanpwungmwahu kehlail rehn Siohwa.” Medewehla mehn kahlemeng wet sang nan Paipel. Ni Siohwa eh ketin pilada pwopwoud ehu en wia pahpa oh nohno en serio me pahn wiahla Mesaia, E ketin pilada Sosep oh Mery sang nanpwungen kadaudok en Depit kan me tohto. Dahme kahrehda? Ira koaros ahneki pein ara nanpwungmwahu rehn Siohwa, oh Siohwa ketin mwahngih me ira pahn kin mwohneki Ih mahs nan ara mouren pwopwoud. w23.05 21 ¶3-4

Sises iei atail Kaun, oh e ketin unsek, ahpw brother kan me e ketin idihada pwehn tiengla mwowe sohte unsek. Ele kitail kin apwalki peikiong irail, ahpw mehlel ma re ndaiong kitail en wia mehkot me kitail sohte men wia. Ehu ahnsowo, wahnpoaron Piter sohte men peikiong kaweid me e alehdi. Ni tohnleng men eh ndaiong en tungoale mahn kan me sohte mwakelekel nan Kosonned en Moseso, Piter sohte wia met, kaidehn pak ehute ahpw pak siluh! (Wiewia 10:​9-16) Dahme kahrehda? Piter sohte wehwehki kaweid kapwo. Ni pali teio, wahnpoaron Pohl peik ni ahnsou me ohl mah Kristian kan nan Serusalem ndaiong ih en kahrehda ohl pahmen oh kohla ni tehnpas sarawio oh kamwakelehda ih ong kaudok pwehn kasalehda me e kin peikiong Kosonnedo. Pohl ese me Kristian kan solahr mi pahn Kosonnedo. E pil sohte wiahda mehkot sapwung. Ahpw Pohl “kahrehda ohl ako oh iang irail kamwakelda ong kaudok.” (Wiewia 21:​23, 24, 26) Pwehki eh peik, Pohl sewese miniminpenehn rie Kristian ko.—Rom 14:​19, 21. w23.10 10 ¶15-16

Ele ke pahn medewe me pepehm en masak de lemmwiki sohte kesempwal pwehn wia kompoakepah mwahu men. Ahpw, irail kan me men ahneki nanpwungmwahu rehn Siohwa anahne lemmwiki ih. Sohte lipilipil ia uwen werei me kitail papahki Siohwa, kitail koaros uhdahn anahne lemmwiki ih. Ahpw, ia wehwehn en lemmwiki Koht? Emen me kin lemmwiki Koht ni pwung kin poakohng ih oh sohte men wia mehkot me pahn kak kauwehla eh nanpwungmwahu reh. Sises pil ahneki “lemmwin Koht.” (Ipru 5:7) E sohte kin masak Siohwa ni ahl me sapwung. (Ais. 11:​2, 3) Ahpw, e kin uhdahn poakohng oh men peikiong. (Sohn 14:​21, 31) Duwehte Sises, kitail kin uhdahn wauneki oh lemmwiki Siohwa pwehki E kin ketin kasalehda limpoak, erpit, pwung, oh manaman. Kitail pil ese me Siohwa kin ketin poakohng kitail oh kin nsenohki ia duwen atail kin mwekidki eh padahkih kitail. Kitail kak kansensuwedihada Siohwa de kaperenda ih.—Mel. 78:41; Lep. Pad. 27:11. w23.06 14 ¶1-2; 15 ¶5

Ni ahnsou me Nanmwarki Usaia kehlaillahr, e sohla kin kalahnganki soahng mwahu koaros me Siohwa ketin wiahiong ih. Ia mehn kasukuhlo? Kitail anahne tamataman me Siohwa me ketikihong kitail soahng mwahu koaros me kitail kin perenki nan mour ni atail papah ih. Kitail dehr suweiki dahme kitail wiadahr ahpw kitail en kalahngankihong Siohwa soahng kan me kitail kak wia. (1 Kor. 4:7) Ni aktikitik kitail anahne pohnese me kitail soh unsek oh kitail anahne kaweid. Brother men me mpen sounpar 60 ntingihedi: “I sukuhlki en sohla kin nsensuwedki ni meteikan ar tehk ei sapwung kan. Ni ei kin alehdi kaweid pwehki sapwung kan me I wiahda ekei pak, I kin kamwahwihala oh doulahte.” Ni atail kin peikiong Siohwa oh aktikitikte, kitail pahn uhdahn nsenamwahu.—Lep. Pad. 22:4. w23.09 10 ¶10-11

Tepin Kristian ko anahne dadaurete. Irail ahneki soangen kahpwal kante me pali laud en aramas akan ahnsowo ahneki. Ahpw irail pil ahneki kahpwal teikan. Tohtohn irail kin lelohng kalokolok, kaidehn sangete kaunen pelien lamalam en mehn Suhs kan oh koperment en Rom, ahpw pil sang pein arail peneinei kan. (Mad. 10:21) Oh irail anahne tehk mwahu me padahk likamw kan en irail me kesehla oh uhwongada kaudok mehlel, me kin songosong en katohrepeseng mwomwohdiso, en dehr kamwakid irail. (Wiewia 20:​29, 30) Kristian ko kin dadaurete. (Kaud. 2:3) Ia duwen? Irail kin medemedewe mwahu mehn kahlemeng kan nan Paipel me pid dadaurete, me duwehte Sohp. (Seims 5:​10, 11) Irail kin kapakapki kehl. (Wiewia 4:​29-31) Oh irail kin tamatamante me Siohwa pahn ketin katingih irail ma re dadaurete. (Wiewia 5:41) Kitail pil kak dadaurete ma kitail kin kaukaule onopki mehn kahlemeng kan en dadaurete nan Mahsen en Koht oh nan neitail sawasepen Paipel kan oh doudouloale. w23.07 3 ¶5-6

Siohwa oh Sises sohte pahn ketin likidmelieikitailla. Mwurin wahnpoaron Piter kahmahmkihla Sises, e anahne wiahda pilipil kesempwal ehu. Ia duwe, e pahn uhdi, de e pahn pousehlahte wia sapwellimen Krais tohnpadahk? Sises patohwan kapakapkihong Siohwa me ahn Piter pwoson en dehr luwetala. Sises ketin padahkihong Piter duwen kapakap wet oh kasalehda eh koapworopworki me mwuhr Piter pahn kak kakehlakahda rie Kristian kan. (Luk 22:​31, 32) Ia uwen met eh kangoange Piter ni eh tamanda mahsen en Sises ko! Ni ahnsou me kitail kin anahne wiahda pilipil kesempwal ehu, Siohwa kak ketin doadoahngki sounsilepen sihpw kadek kan pwehn kihda kangoang me kitail anahne pwehn lelepekte. (Ep. 4:​8, 11) Duwehte Siohwa eh ketin apwalihala ahn Piter oh wahnpoaron teiko arail anahn akan, e pil pahn ketin apwalihala atail anahn akan ni atail kin mwohneki mahs doadoahk en kalohko nan atail mour. w23.09 24-25 ¶14-15

Siohwa kin ketin tehk wiewiahn kadek koaros me kitail kin wiahiong meteikan, mehnda ma pil tikitik. E kin ketin wiahki met meirong kesempwal ehu oh pweipwand ehu me e pahn ketin kapwungala. Ma ke kin wia sounsawas de elder men mahso, Siohwa kin ketin tamataman doadoahk me ke wia mahso oh duwen limpoak me kamwakid uhk en wia met. (1 Kor. 15:58) E pil kin ketin tehk limpoak me ke kin pousehlahte kasalehda. Siohwa ketin kupwurki me kitail koaros en kalaudehla atail poakohng ih oh meteikan. Kitail kak kakehlakahla atail poakohng Siohwa sang ni atail kin wadek sapwellime Mahsen oh doudouloale, oh sang ni atail kin kaukaule kapakap ong ih. Kitail kak kalaudehla atail poakohng riatail kan sang ni atail kin sewese irail ni ahl me konehng arail irairo. Ni atail limpoak eh lalaudla, met pahn kalaudehla atail karanihala Siohwa oh riatail kan. Oh kitail pahn perenki kompoakepahnki irail kohkohlahte! w23.07 10 ¶11; 11 ¶13; 13 ¶18

Emenemen Kristian anahne pilada ia duwen eh pahn pein apwalih eh roson. Ni Kristian kan ar pilada epwelpen wini, irail anahne peikiong kosonned en Paipel en liksang nta oh wunahni. (Wiewia 15:20; Kal. 5:​19, 20) Ahpw, irail kak pein pilada wiepen wini dah me re pahn ale. Ele kitail pein kamehlele me mie soangen wiepen wini ehu me kak sawas de keper, ahpw kitail anahne wauneki ahn riatail Kristian kan pwuhng pwe ren pein wiahda arail pilipil me pid palien wini. Eri kitail anahne tamataman ire pahieu pwukat: (1) Wehin Koht kelehpw me pahn kamwahwihala soangen soumwahu koaros. (Ais. 33:24) (2) Emenemen Kristian anahne “uhdahn kamehlele” dahme keieu mwahu ong ih. (Rom 14:5) (3) Kitail sohte kin kadeik meteikan de wia mehkot me pahn kadipekelekelih irail. (Rom 14:13) (4) Kristian kan kin kasalehda limpoak oh wehwehki me minimin en mwomwohdiso kesempwalsang pein arail pilipil.—Rom 14:​15, 19, 20. w23.07 24 ¶15

Ke kin kesempwalki omw nanpwungmwahu rehn Siohwa? Ei uhdahn! Mahso, aramas tohto pil kin ahneki soangen pepehmohte me ke ahneki. (Mel. 104:​33, 34) Me tohto wiadahr tounmetei kan pwehn kaudokiong Siohwa. Ih met me Nasaraid kan, de me tohrohrla kan, kin wia nan Israel mahso. Nasaraid kan wia mehn Israel ngoang kei me pein pilada en papah Siohwa ni ahl tohrohr ehu. Kosonned en Moseso mweidohng ohl oh lih emen en wiahda inou tohrohr ehu sang ni arail pilada en wia Nasaraid men ong ahnsou ehu. (Nemp. 6:​1, 2) Ni mehn Israel men inoukihda en wiahla Nasaraid men, e anahne idawehn kaweid kan me mehn Israel teikan sohte anahne kapwaiada. Eri, dahme kahrehda mehn Israel men kin pilada en wiahla Nasaraid men? Pwehki eh limpoak laud ong Siohwa oh kalahnganki sapwellime kapai kan.—Deud. 6:5; 16:17. w24.02 14 ¶1-2

Paipel kin kalapw mahsanih duwen loalopwoat de limpoak loalopwoat me Siohwa kin ketin kasalehiong sapwellime aramas akan. Paipel pil mahsanih duwen loalopwoat me sapwellimen Koht ladu kan kin kasalehiong emenemen. (2 Sam. 9:​6, 7) Atail loalopwoat kak kekehlailla. Kitail pahn kilang ia duwen ahn Daniel loalopwoat eh kehlailla. Ahn Daniel loalopwoat ong Siohwa lelohng songosong erein eh mour. Ahpw me keieu apwal me wiawi ni ahnsou me e daulih sounpar 90. Kaun kan me kin papah Nanmwarki Darius kailongki Daniel oh sohte wauneki eh Koht. Eri irail pilahnehda en kemehla Daniel. Irail wiahda nanmwarkio en sainla kosonned ehu me pahn kasonge ma Daniel pahn loalopwoatohng eh Kohto de nanmwarkio. Ihte me Daniel anahne wia pwehn kadehdehda me e loalopwoatohng nanmwarkio iei e sohte pahn kapakap ong Siohwa rahn 30. Daniel pilada en loalopwoatohng Siohwa.—Dan. 6:​12-15, 20-22. w23.08 5 ¶10-12

Siohwa kupwurki kitail en doulahte kasalehiong riatail Kristian kan limpoak. Ma riatail men sohte kasalehda irair en Kristian ong kitail, kitail kak likih me e sohte uhdahn men kamedekihala kitail oh e songosong en wia dahme Siohwa mahsanih me pwung. (Lep. Pad. 12:18) Koht ketin poakohng sapwellime ladu lelepek kan mendahki arail sapwung kan. Mendahki atail wiahda sapwung kan, e kin ketin pousehlahte wia kompoakepatail oh sohte engiengda pahtail. (Mel. 103:9) Ia uwen kesempwal kitail en kahlemengih Samatailo me kin ketin kasalehda mahk! (Ep. 4:32–5:1) Pil tamataman me ni imwio eh kerendohr, kitail anahne karanihte riatail Kristian kan. Kitail kak kasik me kalokolok pahn laudla. Kitail kakete selidi pwehki atail pwoson. Ma met wiawi, kitail pahn anahne riatail Kristian kan laudsang mahs.—Lep. Pad. 17:17. w24.03 15-16 ¶6-7

Paipel kin audaudki koasoipen me pwulopwul kan me kin karanihala Siohwa, oh e kin ketin kupwurperenki irail en ahneki mour nsenamwahu. Depit wia emen irail. Ni eh pwulopwulte, e pilada en karanihala Koht oh mwuhr e wiahla nanmwarki loalopwoat men. (1 Nan. 3:6; 9:​4, 5; 14:8) Ni ahmw kin onopki duwen Depit, eh mehn kahlemeng pahn kangoangeiuk en papah Siohwa ni lelepek. Ke pil kak onopki mehn kahlemeng en Mark de Timoty. Ke pahn kilang me ira kin papah Siohwa sang ni ara pwulopwul oh pousehlahte papah ih ni lelepek. Met kin kaperenda Siohwa. Mwomwen ahmw kin doadoahngki ahmw mour ahnsou wet pahn kamwakid mwomwen ahmw doadoahngki ahmw mour ni ahnsou kohkohdo. Likih Siohwa ahpw kaidehn pein ahmw madamadau. E pahn ketin seweseiuk en wiahda pilipil mwahu kan oh ahneki mour peren oh nsenamwahu. Tamataman me Siohwa kin ketin kesempwalki dahme ke wiahda ong ih. Mie ehu ahl me pahn mwahusang ahmw doadoahngki ahmw mour en papah Semomw limpoako, Siohwa? w23.09 13 ¶18-19

Wahnpoaron Pohl ese me rie Kristian kan sohte unsek. Karasepe, ekei nan mwomwohdisohn Serusalem sohte kamehlele me ih tohnpadahk men ni arail tuhwong. (Wiewia 9:26) Ekei ndahki soahng suwed kan me kahrehiong meteikan en sohla likih ih. (2 Kor. 10:10) Pohl kilang elder men wiahda pilipil sapwung ehu me kakete kahrehiong meteikan en dipekelekel. (Kal. 2:​11, 12) Emen kompoakepah keren, Mark, uhdahn kansensuwedihala ih. (Wiewia 15:​37, 38) Pohl kakete mweidohng soahng pwukat en kahrehiong ih en dehr werekiong irail me kansensuwedihala ih. Ahpw e kin doulahte kesempwalki rie Kristian kan oh kin papah Siohwa ni lelepek. Dahme sewese Pohl en doulahte papah Siohwa? Pohl poakohng rie Kristian kan. Ni Pohl eh poakohng meteikan, met sewese ih en medemedewehte kaidehn arail soh unsek kan, ahpw arail irair kaselel kan. Limpoak kin sewese Pohl en wia dahme iren rahn en rahn wet koasoia. w24.03 15 ¶4-5

Mie koasoipen me tohto nan Paipel me kasalehda kesempwalpen en kin mpahi. Karasepe, medewehla duwen Aisek. Ni ahnsou me e kousoan nan Kerar, mehn mpe peirin kan audehlong pwehl nan pwarer ko me nein eh pahpao ladu ko weirada. Aisek sohte peiki eh pwarer ko, ahpw e kahrehda tohnimweo oh keseula ehu wasa tohrohr oh weirada pwarer teikan. (Sen. 26:​12-18) Ahpw mehn Pilisdia ko nda me dene pihl me mi wasao pil arail. Mendahki met, Aisek meleileite. (Sen. 26:​19-25) Dahme sewese ih en kolokolete eh mpahi ni meteikan ar mwomwen men kalingeringerihada? Ele e kilang mehn kahlemeng en eh pahpa nohno oh sukuhlki laud duwen Eipraam eh kin kasalehda meleilei, oh pil “meleilei oh mpahi” en Sara.—1 Pit. 3:​4-6; Sen. 21:​22-34. w23.09 15 ¶4

Siohwa ketin ni limpoak poaronehdo sapwellime Meseniho nin sampah pwehn padahkihong aramas akan duwen Wehio oh toukihda moure pwehn doarehla kitail sang dihp oh mehla. Siohwa eri ketin kaiasada Sises ong nanleng pwehn kaunda nin duwen Nanmwarki en Wehin Koht. Oaralap en Paipel iei me pid uwen mwaren Siohwa eh pahn sarawihla ahnsou me Koht pahn ketin kapwaiada kupwure nin sampah ni eh ketin doadoahngki sapwellime Wehio me Krais ketin kakaun. Sapwellimen Koht koasoandi sohte kak wekila. E ketin inoukidahr me soahng koaros pahn pweida nin duwen me e ketin mahsanih. (Ais. 46:10; Ipru 6:​17, 18) Sampah pahn wiahla paradais ehu, wasa me kadaudok en Adam oh Ihp unsek oh pwung kan pahn kin “paiamwahu kohkohlahte.” (Mel. 22:26) Ahpw kaidehn ihte met me Siohwa pahn ketin wia. E pil pahn ketin kaminiminpene sapwellime ladu kan koaros nanleng oh nin sampah. Eri koaros nanleng oh nin sampah pahn peikiong Siohwa ni loalopwoat oh wiahki ih arail Kaun. (Ep. 1:​8-11) Ke seu pwuriamweiki uwen kaselel en Siohwa eh ketin kapwaiada kupwure? w23.10 20 ¶7-8

Ni mehn Suhs kan me kohkohsang Papilon ar lella Serusalem, sohte pwand irail tepida ahneki kahpwal en apwalih arail peneinei. Pil mie kahpwal kan nan Wehin Persia, oh mie uhwong kan sang kahnimw kan me kapilirailpene. Ekei irail apwalki en nsenohkihte arail pahn kauwada sapwellimen Siohwa tehnpas sarawio. Eri, Siohwa ketin kadarala soukohp riemen, Akkai oh Sekaraia, pwehn sewese aramas ako en pwurehng kaudokiong Siohwa ni ngoang, oh met imwila mwahu. (Ak. 1:1; Sek. 1:1) Ahpw kereniong sounpar 50 mwuri, irail pil pwurehng anahne mehn kangoang. Eri soun copy koahieko Esra seiloak sang Papilon kohla Serusalem pwehn kangoange sapwellimen Siohwa aramas akan ren mwohneki mahs arail kaudokiong Siohwa. (Esra 7:​1, 6) Kokohp kan en Akkai oh Sekaraia sewese sapwellimen Koht aramas akan mahso pwehn doulahte likih Siohwa ni ahnsoun uhwong. Duwehte met, kokohp ko pil kak sewese kitail rahnwet en likih me Siohwa pahn ketin sewese kitail mendahki kahpwal kan.—Lep. Pad. 22:19 w23.11 14-15 ¶2-3

Ia duwen atail en kasalehda atail poakohng riatail kan? Ehu ahl en wia met iei sang ni atail kin kansenamwahwihirailla. Kitail pahn kak ‘kansenamwahwih emenemen’ ma kitail kin poakeirailla. (1 Des. 4:18) Ia duwen atail kak kangkakehlailihte atail poakohng emenemen? Sang ni atail kin wia uwen atail kak en mahkohng ahn meteikan ar sapwung. Dahme kahrehda e uhdahn kesempwal en kasalehda atail poakohng emenemen rahnwet? Tehk kahrepeo me Piter kihda: “Imwin mehkoaros kerendohr. Kahrehda, . . . kumwail en uhdahn limpoakpene.” (1 Pit. 4:​7, 8) Ni imwin sampah suwed wet eh kerendohr, dahme kitail kak kasik? Sises ketin kohpada duwen sapwellime tohnpadahk kan: “Wehi koaros pahn kailongkin kumwail pwehki mwarei.” (Mad. 24:9) Pwehn dadaur pahn kailok wet, kitail anahne kolokol atail miniminpene. Ni atail kin poakohng riatail kan, Sehdan sohte pahn kak katohrekitailpeseng pwehki limpoak.—Pil. 2:​1, 2. w23.11 13 ¶18-19

Padahk mehlel en Mahsen en Koht uhdahn manaman. Ni atail kin padahkihong aramas akan duwen Siohwa oh soangen Koht dahmen ih, kitail kin kilang soahng kaselel kan wiawi. Aramas akan sohla kamehlele ahn Sehdan likamw kan, oh re kak tepida kilang irair kaselel kan me Samatailo sapwellimanki. Re kin uhdahn waunekihla sapwellime manaman lapalap me sohte irepe. (Ais. 40:26) Irail kin sukuhlki en likih ih pwehki sapwellime pwung pahrek me unsek. (Deud. 32:4) Irail kin sukuhlki soahng tohto sang sapwellime erpit me inenen laud. (Ais. 55:9; Rom 11:33) Oh arail esehla me ih Koht limpoak men kin kansenamwahwihirailla. (1 Sohn 4:8) Ni arail kin karanihala Siohwa, arail koapworopwor en mour kohkohlahte nin duwen sapwellime seri kei kin laudla. E uhdahn wia pwais kaselel ehu ong kitail en sewese aramas akan en karanihala Samarailo! Ni atail wia met, Siohwa kin ketin wiahkin kitail ‘ienge tohndoadoahk.’—1 Kor. 3:5. w24.02 12 ¶15

Ma kowe emen tohnsukuhl en Paipel de ma ke tikida rehn omw papah nohno me wia Sounkadehde kei, ke medemedewe en papidaisla? Mehn akadei mwahu ehu met! Ahpw, mwohn omw papidaisla, ke pahn anahne inoukihong Siohwa omw mour. Ia duwen omw pahn inoukihong Siohwa omw mour? Ke kin inoukihong nan omw kapakap me ke pahn kaudokiong ih kelehpw oh me ke pahn mwohneki mahs kupwure nan omw mour. Eri, ke kin inoukihong Siohwa me ke pahn pousehlahte poakohng “ni omw mohngiong unsek oh omw mour unsek oh omw lamalam unsek oh omw kehl unsek.” (Mark 12:30) Kowe kelehpw me wia met, eri nanpwungen kowehte oh Siohwa. Weksang met, papidais kin wiawi mwohn wehipokon; e kin kasalehiong meteikan me ke wiadahr inou ehu. Inou me ke wiahda uhdahn kesempwal. Omw mehn akadei iei en kolokolete omw inowo oh Siohwa ketin kasik me ke pahn wia met.—Ekl. 5:4. w24.03 2 ¶2; 3 ¶5

Mouren pwopwoud koaros kin ahneki kahpwal kan. Paipel mahsanih me pwopwoud kan pahn ahneki “apwal ong paliwararail.” (1 Kor. 7:28) Dahme kahrehda? Pwehki ohlo oh liho sohte unsek, ara irair kan oh dahme ira mwahuki oh sohte mwahuki wekpeseng. Ara tiahk de wasa me ira tikida wekpeseng. Ele mwuhr, ira diarada soangen irair kan me ira sohte kilang mwohn ara pwopwoudida. Soahng pwukat kakete kahrehda kahpwal. Mwein ira kin kapwukoahki emenemen kahpwal kan nan ara mouren pwopwoud mendahki ira koaros wiahda sapwung oh ira anahne doadoahkpene pwehn kapwungala kahpwal ko. Ira pil kin tepida medewe me ira anahne tohrohrpeseng de mweipeseng. Ahpw ia duwe, ira pahn nsenamwahula ma ira tohrohrpeseng de mweipeseng? Soh. Siohwa ketin kupwurki pwopwoud kan en wauneki koasoandi en pwopwoud mehnda ma met apwal. w24.03 16 ¶8; 17 ¶11

Mwurin omw papidaisla, ni omw esehla mwahu duwen Siohwa oh kalaudehla omw poakohng ih, omw koapworopworo en mour nan paradais nin sampah kin wie lalaudla. (Ipru 5:13–6:1) Ele ke pil lelohng nan soangen irairo me kileldi nan Rom 5:​2-4. Ke lelohng soangsoangen kahpwal kan, ahpw ke dadaurete oh kehn me Siohwa ketin kupwurperenkin uhk. Pwehki omw ese me e ketin kupwurperenkin uhk, met kalaudehla kahrepen omw kamehlele me ke pahn alehdi dahme e ketin inoukihda. Omw koapworopworo laudla sang nin tapio. Ong uhk, met uhdahn mehlel. E uhdahn kamwakid uhk. E kin kamwakid soahng koaros nan omw mour oh wekidala mwomwen omw wiewia ong omw peneinei, omw wiahda pilipil kan, oh pil mwomwen omw doadoahngki omw ahnsou. Wahnpoaron Pohl pil koasoiahda ire uhdahn kesempwal ehu me pid koapworopworo me ke ahneki mwurin omw pwungla rehn Koht. E kamehlelehiong uhk me omw koapworopworo pahn pweida.—Rom 15:13. w23.12 12-13 ¶16-19

Ni atail kin lelohng kahpwal laud ehu, kitail kakete sohla ahneki pepehm, madamadau, de wiewia me kitail kin ahneki mahso. Duwehte sohp ehu nan melimel eh kin pwungpwungdengkiseli ilok kan, atail pepehm pil kak wekiwekidekseli. Ia duwen Siohwa eh kin ketin sewesei kitail ni ahnsou me soangen pepehm pwukat kin tepida poweikitaildi? E ketin inoukihong kitail me e pahn katengeikitaildi. Ni ahnsou me mie melimel ehu nansed, sohp ehu kakete tepida pwungpwungdekseli. Pwe sohpo en kak mwamwahute, mie soahng kei ni pengepengen sohpo me kin katengehdi pwehn dehr nohn mwekimwekid. Pwehki met, aramas akan nan sohpo sohte pahn lelohng keper nan arail seiloak. Ahpw, mehn katengehdi sohp tohto kin keieu doadoahk mwahu ni ahnsou me sohpo kin tangatang kohwei. Duwehte met, Siohwa pahn ketin katengeikitaildi ni atail pousehlahte papah ih ni lelepek ni ahnsou apwal kan. w24.01 22 ¶7-8

Ni omw kin masepwehkada, pein idek rehmw, ‘Dahme Siohwa ketin wiadahr?’ Medemedewe dahme e ketin kapikadahr. Karasepe, “tehk mwahu” ia duwen Siohwa eh kin ketin apwalih menpihr kan oh rohs kan, mendahki re sohte kapikipikda ahneki irair kaselel kan me e sapwellimanki oh sohte kak kaudokiong ih. Eri, ia uwen Siohwa eh pahn ketin apwalih kitail! Atail medemedewe met kak kalaudehla atail likih ih. (Mad. 6:​25-32) Pil medewehla dahme Siohwa ketin wiahda ong sapwellime tohnkaudok kan. Ke kak onopki duwen koasoipen emen nan Paipel me kasalehda pwoson laud, de ke kak wadek duwen dahme wiawihong sapwellimen Siohwa ladu kan nan atail ahnsou. Patehng met, doudouloale duwen Siohwa eh kin ketin apwahpwalihiuk. Ia duwen eh ketin seweseiuk en esehla padahk mehlel? (Sohn 6:44) Ia duwen eh ketin sapengala omw kapakap kan? (1 Sohn 5:14) Ia duwen omw kin paiekihda ehuehu rahn sang meirong en sapwellime Ohlo?—Ep. 1:7; Ipru 4:​14-16. w24.01 4 ¶6; 7 ¶17