Ripoht En Sounkalohk Kan En Wehio
“Amwail Marain En Sansal Mwohn Aramas Akan”
NAN SAPWELIME Padahk pohn Dohlo, Sises mahsanihong sapwelime tohnpadahk kan: “Kumwail me kamarainpen sampah.” E pil pousehla oh kangoangehkin irail: “Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.”—Madiu 5:14-16.
Nan Itali doadoahk mwahu en Sounkadehde kan en Siohwa pil sansalda ong koaros. Karaspe ehu, arail wiewia mwahu kan ni arail kin towehda arail kapokon en nan ehu ehu sounpar kin wahdo kaping ong Koht, duwen me ripoht wet kasalehda:
▪ Erein sounpar tohto lih emen me kin kouson nan Terni, Itali, kin sewese nah serepein wasahn mwenge ehu me mih limwahn imwen mwadong (stadium) nan kahnimwo. Liho kosoia: “I kilang me mie wekpeseng nanpwungen irail ko me kodohng mwadong en umwpwei (soccer) oh irail kan me kin towehda kapokon kan en Sounkadehdehn Siohwa kan wasao. En Sounkadehde kan arail likou kan kin soandi mwahu, oh re kin mehlel oh kasalehda wau. I kin kalap pein idek reh iaduwen aramas kan sang songsongen keinek kan kak miniminpene.
“Rahn ehu emen sounkadehde kauhiedi pohn ahlo oh kalelepek rehi ma I ese eden Koht. I sehse, oh pwehki I ese me Sounkadehde kan en Siohwa aramas mwahu kei, I pwungki me Sounkadehdeo en pwarekie. Mie ahi peidek me pid irair en me melahr kan, oh e sapengla sang ni ah doadoahngki Paipel. Ni soh peikasal, I pwungki en onop en Paipel rehi, oh wihk riau mwuri I tepiada towehda mihding kan.
“Nin tepio nei serepein kin uhwong ie, ahpw ahi wiewia oh ngoang wekidala ah lamalam. I tepiada onop Paipel sounpwong duwau samwalahro. Rahnwet nei serepein oh ah pwoudo kin kapinga Sounkadehde kan me kin kohdohng mwenge nan ara kisin imwen mwenge. Ah pein ngehi, I papdaisla ni ehu kapokon nan imwen mwadong (stadium) wet.”
▪ Mwurin kapokon ehu nan Roseto degli Abruzzi, emen sounapwalih en wasahn mwemweit (campsite) kosoia: “I tehkadaiehr me Sounkadehde kan en Siohwa me inenin mehlel nan soang kan koaros me re kin wia. Nan wihk samwalahro, irail meh 40 me mih nan ahi wasahn mwemweit, oh sohte kahpwal ehu me re wiahda. Me weksang mehteikan, irail kelepw me kohdo oh padahkiong ie ma mie emen tohror likin irail me iang mihmi nan arail imwpwal. Ong pein ngehi, irail me keiou mwahu.”
▪ Mwurin kapokonohte, emen kaun en otehl kosoia: “Sounkadehdehn Siohwa koaros me kin popohl. Irail sohte katairong, oh re kin meirla mwadang. Irail inenin kadek, mehlel, oh tiahk mwahu. E pahn inenin kaperen ma koaros kin duwehte irail. Meteikan kin pirapahla soang koaros—kisin pwoatol kan, aisara kan, pil iangahki doarepwehn poahr kan oh sukeh kan! Sounkadehde kan sohte kin wia met. Ni ahnsou me nohmwail seri kan kin ale aihs kirihm sang nan aihs poahks ni soutik kan, I sohte kin kohla oh kilang dahme re ale. Re kin kapatahda dahme re pweipwandki oh mwadang kohdo pwainla. I uhdahn likih irail. Ia uwen kaperen ma koaros kin wia duwehte met! I men aramas kan koaros me kin kohdo ni otehl wet en wia Sounkadehde kan en Siohwa.”
Sounkadehde kan en Siohwa me indand mwahu nan Itali, duwehte nan sahpw tohto nan sampah. Re kin ‘kolokol arail wiewia mwahu nanpwungen wehi kan’ oh eri kin wahdo kaping ong Koht mehlelo, me mwareo re kin weuwa.—1 Piter 2:12.