Ahl Ehu Me Mwahu
SOUNKADEHDEHN SIOHWA kan kin pwunodki ohlahn pali ngehnin sampah oh tiahk samin oh reklahn sawehwehn pelien lamalam nan koasoandi en aramas. Pwehki met, meteikan kin leme me irail fundamentalist kei. Ahpw irail wia soangen aramas pwukat? Soh. Mendahki re pwoson mehlel arail padahk kan, ong nin duwen wehwehn lepin lokaia wet irail sohte wia soangen aramas pwukat. Re sohte kin idingkiong kaun en politic kan en alehda ehu soangen lamalam, oh re sohte kin wiahda mworomwor kan oh mwersuwed kan ong irail ko me re sapwungki. Re diaradahr ahl ehu me mwahusang met. Re kin idawen arail Kaun, Sises Krais.
Sounkadehde kan en Siohwa kamehlele me padahk mehlel en kaudek mie, me e kin dierek nan Paipel. (Sohn 8:32; 17:17) Ahpw Paipel kin padahkiong Kristian kan en kadek, kamwahu, opampap, oh materek—irair kan me sohte kin mih rehn irail kan me kin idingkiong meteikan arail lamalam. (Kalesia 5:22, 23; Pilipai 4:5) Nan Paipel pwuhk en Seims, e kin kangoangehkin Kristian kan en kekeirada “erpit sang powe,” me sansalda me iei “mwakelekel, kapohl, materek, peik, diren mahk oh wah mwahu kan.” Seims kapataiong: “Pwung, iei wahn wiewia mwahu me irail kan me kin wia doadoahk en kamwahu kin kamwerehdi ni popohl.”—Seims 3:17, 18.
Sounkadehde kan en Siohwa kin tamanda me Sises kin insenohki padahk mehlel. E padahkiong Pontius Pilate: “A iei, ong ni karehpe wette me I kohkidohng sampah, pwe I en kadehdehda duwen me mehlel.” (Sohn 18:37) Mendahki e wia emen me kin utung padahk mehlel, e sohte kin rapahki en idingkiong meteikan dahme e kamehlele. Ahpw e kin padahk pwehn kamwekid arail madamadau kan oh mongiong kan. E mwahngih me Semeo nanleng, Koht emen me “mwahu oh pwung,” pahn koasoanehdi iaduwen oh iahd me e pahn ketin kihsang padahk likamw oh kopwung sapwung pohn sampah. (Melkahka 25:8) Ihme karehda, e sohte kin rapahki en irehdi irail ko me kin sapwungki ah padahk. Me weksang met, irail kaun en lamalam kan en ah ahnsouwo me kin songosong en irehdi Sises.—Sohn 19:5, 6.
Sounkadehde kan en Siohwa kin pwoson kehlail padahk kan en arail lamalam, oh re kin kasalehda kesemwpwalki iren tiahk mwakelekel. Duwehte wahnpoaron Pohl, re kamehlele me “Kaun tehmen mie, pwoson tehieu, papdais tehieu.” (Epsos 4:5) Irail pil wehwehki mahsan en Sises: “A wenihmw me kolahng mour me wetikitik oh elen kolahng ie me apwal, eri, me malaulau me kin diar.” (Madiu 7:13, 14) Eri mendahki met, re sohte kin idingkiong meteikan en idawenla dahme re kamehlele. Ahpw, re kin kalimengih Pohl oh “pekih” irail ko koaros me inengieng en “wekiohng Koht.” (2 Korint 5:20) Met iei wiepe me keiou mwahu. Met iei elen Koht.
Lamalam en fundamentalism, duwen me lepin lokaiahn wai wet kin kadoadoahk nan rahnwet me inenin weksang met. Irail (fundamentalist) kan kin doadoahngki wiepe tohto—iangahki mwersuwed—pwehn idingkiong koasoandi en aramas arail lamalam. Ni arail wia met, re wialahr kisehn koasoandi en pelien politic. Ahpw, Sises, mahsani me sapwelime werek kan “en dehr iang kisehn sampah.” (Sohn 15:19; 17:16; Seims 4:4) Me parekiong mahsan ko, Sounkadehde kan en Siohwa kin kolokol arail soh poupali nan wiewiahn politic kan. Oh, nin duwen me nuhspehpa en Itali Fuoripagina kosoia, re “sohte kin idingkiong meteikan mehkot; koaros saledek en ale de soikala dahme re kosoia.” Ia imwilahn met? Rohng en Paipel meleilei me Sounkadehde kan kin kalohki kin kaperen ong soangen aramas koaros, pil ong irail kan me mahs wia fundamentalist kan.—Aiseia 2:2, 3.
Sampah Ehu Me Audaudki Irair Tengeteng Kan
Sounkadehde kan kin pohese me aramas sohte kak kamwahuwiala kahpwal kan me irail fundamentalist kan kin pwunodki. Ke sohte kak idingkiong aramas men en kamehlele Koht de en pwungki pein amw padahk kan. Aramas ahr kin medemedewe me soahng wet kak wiawi kin karehda ekei wiewia kan me keiou suwed nan poadoapoad, duwehte Crusades, Inquisition, oh “pwosonlahn” mehn Indian kan nan America. Ahpw, ma ke likih Koht, ke pahn men mweidong soang pwukat nan lime.
Nin duwen me Paipel kasalehda, Koht koasoanehdier ahnsou kis me e ketin mweidong aramas en kauwehla sapwelime kosonned kan oh eri karehda lokolok, oh medek. Ahnsouwo kereniongehr imwisekla. Ahnsouwet, Sises kin wie kakaun nin duwen Nanmwarki men nan Wehin Koht nanleng, oh ahnsou keren Wehio pahn kihsang koperment kan en aramas oh uhd alehda pwukoahn kaweidih tohnsampah ehu ehu rahn. (Madiu 24:3-14; Kaudial 11:15, 18) Imwin met iei me paradais pahn miehla pohn sampah pwon wasa me popohl oh pwung pahn miehla. Ni ahsouwo sawehwehki mwomwen kaudekiong Koht mehlelo pahn sohla mie. “Me pwung kan pahn sapwenikihla sampah, oh re pahn koukousoan powe kohkohlahte.” (Melkahka 37:29) Soahng kesemwpwal poatopoat kan me duwehte limpoak-kadek, mehlel, kopwung pwung, oh kamwahu pahn pweida ong kamwahupen tohnsampah peik koaros.
Ni ah kin kilikilangwohng ahnsouwo, sounmelkahkao kosoia: “Limpoak oh loalopwoat ahpw pahn wiakihteieu kohdo; pwung oh popohl ahpw pahn tuhpene. Atail loalopwoat ahpw pahn wosada sang nan sampah, oh pwungen Koht ahpw pahn iroirdihdo sang nanleng. Kauno (Siohwa) pahn ketin kakepwehpwehkitailla, oh wahnsapwatail kan pahn kaparaparala. Pwung ahpw pahn kin tieng mwohn Kauno pwe en kaunopada sapwelime ahl.”—Melkahka 85:10-13.
Mendahki atail sohte kak kamwahuwiala sampah, kitail nin duwen emen emen aramas kak kekeirada irair kesemwpwal kan en Koht rahnwet. Eri, kitail kak wia soangen aramas me Koht pahn kupwurki en wia sapwelime tohnkaudek nan sampah kapw. Kitail eri pahn iang kisehn irail me opampap kan me sounmelkahkao kosoia: “A me aktikitik kan pahn sapwenikihla sahpwo oh re pahn paiamwahu oh popohl.” (Melkahka 37:11) Koht kin ketin utung oh kapai irail ko me kin wia kupwure, oh e ketin inoukihda soang mwahu kan ong arail mour ahnsou kohkohdo. Wahnpoaron Sohn kosoia: “Sampah wet oh mehkoarso nin sampah me aramas kininengieng kin sosohrala; ahpw me kin kapwaiada kupwuren Koht pahn momour kohkohlahte.”—1 Sohn 2:17.
[Kilel nan pali 7]
Sounkadehde kan en Siohwa kin luke koaros en wehwehkihla rongamwahu en Wehin Koht
[Credit Line]
Lamp nan pali 3, 4, 5, and 6: Printer’s Ornaments/by Carol Belanger Grafton/Dover Publications, Inc.