Rapahki Popohl Mehlel Oh Nantiong En Ale!
“Mehmen me kin men nsenamwahuki mour oh rahn kaperen kan, . . . e uhdahn anahne mweisang me suwed oh wia me mwahu, oh rapahki popohl ni eh kehl unsek.”—1 PITER 3:10, 11.
1. Mahsen ndand dah kei en Aiseia pahn uhdahn pweida?
“ERI re pahn wekidohng neirail kedlahs akan ong ni mehn deipwel, oh neirail ketieu kan ong ni naipokos. Sohte ehu wehi pahn pwurehng pelianda ehu wehi, de pil kaunopada nair sounpei kan ong mahwen.” (Aiseia 2:4) Edetehn iren Paipel ndand wet me kileledi limwahn poahsoan kaun en United Nations nan kanihmw en New York, pwihn en sampah wet sohte douluhl kapwaiada mahsen en Aiseia. Ahpw, nin duwen mahsen en Siohwa Koht me sohte kak likamw, kokohp wet en Aiseia uhdahn pahn pweida.—Aiseia 55:10, 11.
2. Dahme pahn “wiawi ni imwin rahn akan,” nin duwen Aiseia 2:2, 3 mahsanih?
2 Mahsen kan me diarekda nan pwuhken Aiseia 2:4 iei kisehn kokohp kaselel ehu, kokohp ehu me pid duwen popohl mehlel—oh e kin pweida nan atail ahnsou. Mwohn kokohp wet koasoi duwen sohlahr mahwen oh dipwisohn mahwen kan e kin koasoi duwen met: “Ni rahn ekei me pahn kohdo, nahnao, wasa me Tehnpas Sarawio kokouda ie, pahn wiahla nahna keieu ile, ilehsang dohl akan koaros. Wehi tohto pahn kin pokondohng rehi, oh towe kan pahn kin nda, “Nna, kitail kohdalahng pohn dohlen Kauno [Siohwa], nan Tehnpas Sarawien Koht en Israel. E ahpw pahn ketin kasalehiong kitail kupwure, pwe kitail en keid nan sapwellime ahl akan. Pwe sapwellimen Kauno padahk kin kohsang Serusalem, oh e kin ketin mahseniong sapwellime aramas akan sang Saion.”—Aiseia 2:2, 3.
Aramas akan kak Wiahla Aramas Popohl kei
3. Iaduwen emen kak wekidala pein ih en wiahla aramas popohl men?
3 Tehk duwen irewet, mwohn aramas akan kak rapahki elen popohl ehu, re anahne sukuhlikihsang Siohwa. Peikiong sapwellimen Siohwa padahk kan pahn kak kawukihla en aramas akan ahr madamadau oh wiewia kan, me pahn kahrehong aramas men me kin men akamai de pei en miniminpene oh popohl. Iaduwen wekideklahn wiewia pwukat pahn pweida? Rom 12:2 mahsanih: “Kumwail dehr kahlemengih wiewia kan en sampah wet, ahpw mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwur en Koht dahme mwahu, oh dahme e kin ketin kupwurperenki, oh dahme unsek.” Kitail kin wekidala atail madamadau kan, ni atail kin medemedewe duwen kaweid kan oh kosonned akan me kohsang sapwellimen Koht Mahsen. Kaukaule onop Paipel kin pil sewese kitail en wekila oh kadehdehong pein kitail ia kupwuren Siohwa ong kitail, pwe elen kekeid pahn sansal ong kitail.—Melkahka 119:105.
4. Iaduwen emen pahn pwuriehng aramas kapw en popohl?
4 Padahk mehlel kan en Paipel sohte kin ihte wekidala atail madamadau kan, ahpw e kin pil wekidala atail wiewia kan oh irair kan en pein emen emen kitail. E kin sewese kitail en wia dahme wahnpoaron Pohl kangoange: “Eri, kumwail kesehla amwail mouren mahs, me kahrehiongkumwailehr nan mour suwedo-amwail mour me kin ohkihla ineng widingan kan. Mohngiongimwail oh amwail lamalam uhdahn pahn onohnsapahlda. Eri, kumwail pahn onehda sapahl pein kumwail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.” (Episos 4:22-24) Kehl me kin kamwakid atail madamadau kan kin kohsang loalatail. E kin kehlailla ni ahnsou atail limpoak ong Siohwa oh sapwellime kosonned akan kin laudla, oh e kahrehong kitail en wiahla aramas ngehnen kan oh popohl.
5. Iaduwen “kosonned kapw” me Sises ketikihong sapwellime tohnpadahk kan sewese irail en popohlpene nanpwungarail?
5 Anahn en wekidala irairen aramas akan kin sansalda sang kaweid en Sises ong sapwellime tohnpadahk kan aua kei mwohn e matala: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Limpoak en Krais wet me soh-roporop, kin kaminiminpene tohnpadahk kan. (Kolose 3:14) Ihte irail kan me men kapwaiada “kosonned kapw” wet me pahn paiekihda popohl me Koht inoukihda. Mie aramas nan rahnpwukat me kin wia met?
6. Me weksang aramas en sampah wet, dahme kahrehda Sounkadehdehn Siohwa kan kin paiekihda popohl?
6 Sounkadehdehn Siohwa kan kin nantiong en kasalehda limpoak nin duwen pirien ehu nin sampah pwon. Edetehn irail kin kohsang wehi kan koaros en sampah wet, re sohte kin iang akamaipene de uhpene nan sampah wet, mehndahki re kin lelong uhweng laud sang politik kan oh pelien lamalam kan. Nin duwen aramas akan me kin miniminpene, re kin ale kasukuhl sang rehn Siohwa, oh re kin paiekihda popohl. (Aiseia 54:13) Re sohte kin poupali nan uhpenen wehi kan, oh re sohte kin iang mahwen kan. Ekei aramas me kin lemei mahs, ahpw met irail wekidala ahr mour. Irail wiahla Kristian akan me kin popohl oh limpoak, oh kin kahlemengih Krais Sises. Oh re kin ni mour-unsek idawehn ahn Piter kaweid: “Mehmen me kin men nsenamwahuki mour oh rahn kaperen kan, en perehsang ewe lokaia suwed, oh tokedihsang lokaia likamw. E uhdahn anahne mweisang me suwed oh wia me mwahu, oh rapahki popohl ni eh kehl unsek.”—1 Piter 3:10, 11; Episos 4:3.
Irail kan me kin Utungada Popohl
7, 8. Koasoiahda duwen mehn kahlemeng kan en aramas akan me sohla iang mahwen ahpw ahnsowet irail kin rapahki popohl mehlel. (Pil kak koasoi duwen aramas teikan me ke ese.)
7 Karasepe ieu, ohl me adaneki Rami Oved, mahs e wia ohpiser en pwihn tohrohr ehu me kin peiong pwihn en aramas akan me kin uhwong koperment kan. E iang sukuhl en kamehla imwintihti kan. E kin ngoangki utungada wehin Israel, ahpw rahn ehu, e diarada me kaun en pelien lamalam en wehin Israel sohte mweidong ih en pwoudki emen lih me e men pwoudki, ihte pwehki liho emen mehn Asia, emen Mehn Liki. E tepida rapahki padahk mehlel nan Paipel. Eri, mwuhrin met e tuhwong Sounkadehdehn Siohwa kan. Eri, sang eh onop Paipel rehn Sounkadehde kan, e kamehlele me e sohlar kak utungada eh wehi. Limpoak en Kristian wehwehki emen pahn sohla iang mahwen oh doadoahngki dipwisohn mahwen kan, ahpw anahne en poakohng aramas akan me kin kohsang wehi kan koaros. E inenen kapwuriamweikihla ni ahnsou e ale kisin likou kadek ehu me tepkihda lepin loakaia pwukat, “Riei brother Rami”! Dahme kahrehda met mehkot kapwuriamwei? Sounnting en kisinlikou, emen Sounkadehde en Palestin. Rami koasoia, “Met mehkot kapwuriamwei, pwehki mehn Palestine kan iei ai imwintihti, ahpw ni ahnsowet, emen mehn Palestine likwerihkin ie, ‘Riei.’” Ahnsowet, Rami oh eh pwoud kin utungada popohl mehlel ni elen Koht.
8 Pil ehu kahlemeng mwahu, iei emen me adaneki Georg Reuter, me iang sounpei en mehn German kan me mahweniong Russia erein Mahwen II. Ahpw mwuhr e sohte itarki de pwungki ahn Hitler pilahn ong kaunda sampah pwon. Ni ahnsou e pwurodo sang mahwen, e tepida onop Paipel rehn Sounkadehdehn Siohwa kan. E ntingidi: “Ni ahnsouwet, mehpwukat kin sansalongie. I pohnese me kaidehn Koht me kin pwukoahki mahwen pwukat. . . I sukuhliki me sapwellime kupwure iei en wiahla sampah paradais ehu ki kapai soh imwi kan ong aramas akan me kin peik. . . . Hitler suweiki duwen eh ‘Kaunda en Pahr-Kido’ ahpw e wia kaun ong sounpar 12 te—oh imwila suwed! Krais kaidehn Hitler . . . me kak oh pahn wiahda wehi ehu me pahn kaunda sampah erein sounpahr kid.” Erein sounpar 50, Georg kin iang wia doadoahk kaukaule ong utungada popohl mehlel wet.
9. Ni ahl dahkei me wiewia kan me lelohng Sounkadehdehn Siohwa kan nan Nazi Germany kasansalehda me irail kin wiahla aramas eimah ahpw popohl?
9 Lelepek oh sohpoupalih en Sounkadehdehn Siohwa kan nan Germany erein kaunda en Nazi kan kin wia ehu mehn kadehdepen ahr limpoak ong Koht oh ong popohl, edetehn sounpahr 50 mwuhro. Ehu booklet me wiawihda sang rehn United States Holocaust Memorial Museum nan Washington, D.C., koasoi: “Sounkadehdehn Siohwa kan kin dadaurete pahn kalokolok laud ahnsouhn mehn Nazi kan kaunda. . . . Pali moaron en irail kin kasalehda eimah ni ahr sohte men kesehla ahr palien lamalam, oh mendahki irail kin lelong kalokolok, kalokolok nan imweteng kan, oh ekei pak kamakamala, oh ihme kahrehda aramas teikan ni ahnsowo kin wahuneki irail.” Oh booklet pousehla koasoia: “Ni ahnsou irail saledeksang imweteng, Sounkadehdehn Siohwa kan pousehlahte ahr doadoahk, irail kin mihseli rehn aramas teikan me pil pitsang kamakamala, oh katohnpadahk.”
Ehu Wekidekla Laud me Pahn Wiawi
10. (a) Wekidekla laud anahne wiawi mwohn popohl mehlel pahn kak pweida? (b) Dahme pwuhken en Daniel koasoia duwen wiewia wet?
10 Met kin wehwehki me Sounkadehdehn Siohwa kan kin kamehlele me irail pahn kak wahdohng kitail popohl ma irail pahn sewese aramas koaros en uhd kamehlele irairen sohpoupalih? Soh! Pwe sampah wet en pwurehng ahneki popohl, wekidekla laudsang ehu anahn. Dahkot met? Kaunda en aramas akan me kin karehda saminimin oh lemei pahn anahne sohla oh mweidong kaunda en Wehin Koht en uhd kaunda, ihme Sises padahkiong sapwellime tohnpadahk kan en kapakapki. (Madiu 6:9, 10) Ahpw iaduwen met pahn wiawi? Koht ketikihong soukohp Daniel auremen ehu me e sukuhliki me ni imwin rahn akan, Wehin Koht, rasehng lapalahn takai ehu, ‘pwupwusang ni aul ehu, ni eh sohte me doahke,’ oh pahn kawehla sansalo me karasaraihong kaunda en aramas akan pohn sampah. Oh e koasoia: “Eri, ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”—Daniel 2:31-44.
11. Ni ahl dah me Siohwa pahn wahdo popohl?
11 Dahme kahrehda kitail ese me wekidekla laud wet pahn wiawi? Pwehki Siohwa inoukihda me e pahn kamwakelehsang sampah irail akan me kin kasaminehla de kawehla sampah. (Kaudiahl 11:18) Wekidekla wet pahn wiawi ni ahnsohn mahwen pwung en Siohwa ong Sehdan oh eh sampah suwed wet. Kitail wadek nan pwuhken Kaudiahl 16:14, 16: “Eri, iei irail ngehn suwed kan me kin wiahda kilel kapwuriamwei kei. Ngehn silimen pwukat kin pwarala rehn nanmwarki kan en sampah pwon, pwe en kaminiminirailpene ong ni mahwen me pah wiawi ni Rahn Lapalap en Koht, Wasa Lapalahpie. Ngehn ko eri kapokonepene nanmwarki kan wasa me adaneki ni mahsen en Ipru Armakedon.”
12. Ia mwomwen Armakedon?
12 Ia mwomwen Armakedon? Met kaidehn mahwen en nuklear de kahpwal laud ehu me pahn wiawi pwehki aramas akan. Soh, met iei mahwen en Koht, oh mahwen wet pahn katokedi mahwen en aramas akan oh pil kasorehla aramas koaros me kin utungada mahwen pwukat. Met iei mahwen en Koht me pahn wahdo popohl mehlel ong irail akan me poakohng irairen popohl. Ehi, Armakedon pahn kohdo nin duwen Siohwa kupwureki. E sohte pahn pwand. Koht me padahkiong Sapwellime soukohp Apakuk en ntingihdi met: “Ntingihedi, pwehki e saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” (Apakuk 2:3) Pwehki atail ahneki pepehm en aramas, ele mwein e pahn mwomwen pwand ong kitail, ahpw Siohwa kin kosonedi pein eh ahnsou. Armakedon pahn wiawi ni aua me Siohwa kosonnedier.
13. Dahme Koht pahn wiaiong utupen kahpwal kan koaros, Sehdan me Tepil?
13 Wiewia pilipil wet pahn uhdahn pweida oh kaunopada ehu ahl ong wahdong kitail popohl mehlel! Ahpw mwohn popohl mehlel pahn kak tengedi, pil mehkot tohrohr pahn anahne wiawi—kasohrehla meno me kin kahrehong aramas akan en tohrorpeseng, kailokpene, saminiminpene. Oh kokohp en Paipel kohpadaher me met pahn wiawi mwuhr—Sehdan pahn salihdi, ih meno me kin tepiada mahwen oh sahmw en likamw akan. Wahnpoaron Sohn kilangada wiewia wet nan kapoudiahl ehu, oh met ntingidi nan pwuhken Kaudiahl 20:1-3: “Ngehi eri kilangada tohnleng men me wa kihen ritingada pwoahr loalo me soh kapi oh selmete toutou pwoat. E ahpw poarokedi drakono, iei serpent en kawao, me iei Tepil de Sehdan-e ahpw salihedi erein sounpar kid. Tohnlengo eri kesepwekehdilahng nan pwoahr loalo, me soh kapi, loakehdi oh katengehdi powe, pwe e dehr kin pitih wehi kan, pahr kido lao imwisekla. Mwuri, e ahpw pahn sapwadada ahnsou kis.”
14. Iaduwen kitail kak kawehwehda ahnsou Siohwa pahn kalowehdi Sehdan?
14 Met kaidehn auremen ieu; met iei inou en Koht—oh Paipel mahsanih: “Koht me sohte kak ketin wiahda likamw.” (Ipru 6:18) Ihme kahrehda Siohwa kak padahkiong sapwellime soukohp Seremaia met: “‘Ngehi me Siohwa: pwehki ei limpoak me poatopoat, oh I kin wia dahme pwung oh mehlel. Ih mepwukat me I kin kupwurperenki. Ngehi, Kaun-o [Siohwa] me mahmahsen.” (Seremaia 9:24) Wiewiahn Siohwa me pwung, oh e kupwureki popohl me e pahn wahdohng tohnsampah wet.
Kaundahn Soupeidi en Popohl
15, 16. (a) Ihs me Siohwa pilada en kaunda nin duwen Nanmwarki men? (b) Ia mwomwen kaunda wet, oh ihs me pahn iang kakaun?
15 Pwen katengedi koapworopwoar en popohl mehlel en kohdohng aramas koaros me momour pahnangin koasondi en sapwellime Wehio, Siohwa ketikihong Soupeidi en Popohl mehlel me iei Sises Krais en kaunda kitail nin duwen me pwuhken Aiseia 9:6, 7 kohpada: “Kisin seri kis ipwidiongkitailehr! Neitail pwutak emen kohiengkitailehr! Oh e pahn ketin wiahla atail kaun. E pahn mwarenki, “Sounkaweid Kupwurokong,” “Koht, Wasa Lapalahpie,” “Sahm Poatopoat,” “Nanmwarkien Popohl.” Sapwellime manaman pahn wie lapalapala, oh popohl pahn poatopoat nan sapwellime wehi . . . Kauno, Wasa Lapalahpie, ketin ngoangki kowahlap mepwukat koaros en pweida.”—Melkahka 72:7.
16 Patehng met, 144,000 rien Krais me keidi kan ni pali ngehn pahn iang ih kakaun nanleng. Irail me iengehn Krais me Pohl ntingihdi duwen: “Eri, Koht, me tepin atail popohl, pahn mwadang kamwutepene Sehdan pahn nehmwail kan. Kupwurkalahngan en atail Kaun Sises Krais en ieiang kumwail.” (Rom 16:20) Ehi, irail pwukat sang nanleng pahn iang Krais kalohweida Sehdan me Tepil!
17. Dahme kitail anahne wia pwen kak sohsohki popohl mehlel?
17 Eri, peideko, Dahme kitail anahne wia pwen kak sohsohki popohl mehlel? Popohl mehlel kak pweida ihte ni elen Koht, oh ma kitail men alehdi met, kitail anahne kapwaiada met. Ke anahne kamehlele Soupeidi en Popohl oh sohpeiwong ih. Met kin wehwehki me ke anahne kamehlele me Krais iei ih me tomwki dipen aramas soh unsek kan. Pein Sises mahsanih mahsen ndand pwukat: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Ke men pwoson Krais Sises nin duwen sapwellimen Koht TohnDoadoahk Men ong wahdohng aramas popohl mehlel oh kamourala irail? Sohte pil ehu ahd pahn nanleng me pahn kak wahdohng kitail popohl. (Pilipai 2:8-11) Pwekida? Pwehki Sises iei Meno me Koht ketin piladahr. Ih me Soun Wah Rongamwahu en Popohl me keieu lapalap me ketiket nin sampah sangete mahs lel met. Ke pahn rong mahsen en Sises oh ihdawenla ih?
18. Dahme kitail anahne wia pwehn mwekidki mahsen en Sises me ntingihdier nan pwuhken Sohn 17:3?
18 “Oh iet mour soutuk,” Sises mahsanih, “aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.” (Sohn 17:3) Met iei ahnsou en audaudki loalokong pwung ni emen en iang kaukaule mihding kan en Sounkadehdehn Siohwa kan nan ahr Kingdom Hall kan. Mihding en kasukuhl pwukat pahn kak kamwekid uhk en pil padahkiong aramas teikan duwen omw loalokong oh koapworopwoar. Ke pil kak wiahla emen tohndoadoahk ong sapwellimen Koht popohl. Ke pil kak paiekihda popohl ni ahnsowet ni omwi liki Siohwa Koht, nin duwen me Aiseia 26:3 mahsanih, New International Version: “Maing Kaun, komwi me kin ketikihdo popohl mehlel ong irail kan me nan kapehd kehlail oh tengeteng oh kin likih komwi.” Ihs me kitail anahne liki? “Kumwail liki Kauno [Siohwa] kohkohlahte; e pahn ketin sinsilei kitail ahnsou koaros.”—Aiseia 26:4.
19, 20. Dahme awihawih irail kan me kin rapahki popohl?
19 En kesinenda teng ahnsowet pwen utungada mour kohkohlahte nan sapwellimen Koht sampah kapw popohl ehu. Nan Kaudiahl 21:3, 4, Mahsen en Koht ketitihki: “I ahpw pil rongada ngihl laud ehu sang nan mwoahlo, me mahsanih, “Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail, oh irail pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” Kaidehn met iei irairen popohl kitail kin men ahneki?
20 Eri tamanda dahme Koht inoukihda. “a me aktikitik kanpahn sapwenikihla sahpwo oh re pahn paiamwahu oh popohl. Tehk mwahu aramas mwahu, kilang aramas pwung; aramas meleilei kin mie kadaudoke.” (Melkahka 37:11, 37) Ni ahnsou me rahn kapereno pahn leledo, kitail pahn kalahnganki nda, “Popohl mehlel, leledohr! Kalahnganong Siohwa Koht, iei utupen popohl mehlel!”
Komw Kak Kawehweh?
◻ Dahme kak sewese emen en wekidala eh madamadau kan oh wiewia kan?
◻ Iaduwen pwihn en Sounkadehdehn Siohwa kan oh pein emen emen irail koaros, kasansalehda pein ahr limpoak ong popohl mehlel?
◻ Dahme Siohwa pahn wia ong irail kan me kin utungada kailok oh mahwen?
◻ Dahme kaunda en Soupeidi en Popohl wia ong aramas akan
[Kilel kan nan pali 12]
Ohl riemen pwukat wekidala ahr mour oh utungada popohl
[Kilel kan nan pali 12]
Rami Oved
Georg Reuter
[Kilel nan pali 13]
Popohl mehlel pahn pweida pahnangin kaunda en Soupeidi en Popohl