Dahme Karehda E Inenin Suwekkihla Nan Ahnsou Pwukat?
NI ahnsou me ke kin mwohndi pwehn wadek nuhspehpa de kilang nuhs nan TV de rong nuhs sang nan radio, ke kasik me ke pahn kilang de karonge rong suwed, kaidehn? Elemwein ke sohte pwuriamweiki en ese me mahwen kin wiawi wasa koaros, oh me mwersuwed kin wie kekeiradahte, de me lehk kin kawehla kehl en irail kan nan sahpw semwehmwe kan.
Ma ke kin kouson dohsang mepwukat, ele komw sohte pahn kalap insensuwedki soahngen ripoht pwukat. Pwe ihs me kak insensuwedki lokolok en aramas kidalap pwukat? Ahpw, mendahki met, e inenin apwal en soh mwekidki lokolok kan me kin lelohng aramas akan me kitail kin kilang. Met kin wehwehki me, kitail sohte pahn mwekidki atail wadek duwen mahwen de pil sohte mwekidki atail pahn medemedewe tohtohn irail kan me mehla, ahpw kitail uhdahn pahn mwekidki atail wadek duwen kisin Adnan, emen kisin pwutak en Bosnia me pakidang ehu kemehla ah nohno ni ahnsou me e kawehla imwerailo. En Adnan pahpa kesikdi sounpwong keite mwuri ni ahnsou me irail aluhwei pohn ahlo. Oh mwurin wihk keite ehu kanengen kasik kasikihdi rie serepeino nan wasahn sukuhl oh e kilang rieo mehla. Toahkte kan me winie Adnan diarada me pwutako soumwahukihda mepwukat lelahng ni irair me e solahr kak kasalehda pepehm—pil sohla reh ineng en men ese dahme wiawi. Ni ahnsou me e kin pepehd e kin masepwehk oh nan ah lamalam e kin kilang soahng suwed kan me wiawiohng ah peneinei; oh ni ahnsou me e kin meir e kin auraman suwedki mepwukat. Adnan sohte wiahte ehu wad en uwen tohtohn irail kan me kin lelohng soahngen kalokolok pwukat. E wia emen seri lokolok; kitail sohte kak en sohte poakehla ih.
Met pil duwehte apwal teikan nan sampah. E sohte kin wia mehkot en wadek duwen me duhpek kan; ahpw ni ahnsou me kitail kin kilang kilel en kisin serepein men me sounpar limau me kapehde umpwospeseng oh neh kan tikitikla, me mihal nan irair wet pwehki lehk en mwenge, e kin kamwekid kitailda. E sohte wia mehkot en wadek duwen tohtohn mwersuwed kan; ahpw e pahn wia mehkot en rong duwen liohdi mah men me kamakamda, pirap sang ah kepwe kan, oh angkehlaildi. E sohte wia mehkot en wadek duwen ohlahn peneinei; ahpw e kin wia mehkot en wadek duwen nohno men ah pein kadupekih oh wie kau pein nah serio.
E kin inenin kansensued en wadek soahng pwukat. Ahpw ia uwen suwed ma ehu kalokolok pwukat kin lelohng pein kitail! Ma pein uhk kin lelohng apwal akan, eri ni ahnsou me nuhs en sampah kan kin kasalehda met e kin inenin kansensuwed. E kin inenin kamasepwehk en kilang ire mehlel kan me kalokolok kan sang mwersuwed, mahwen, lehk, oh soumwahu kin wie kekeirada laud sang mahso nan poadoapoad en aramas. Lipweh kan nan senturi 20 wet me inenin kehlail—wahpon, masak, oh insensuwed reklahr wasa koaros.
Aramas kan en pelien lamalam tohto kihn raparapahki pasepeng kan ong soahngen peidek kapwunod kan duwehte, Dahme karehda mehkan inenin suwedkihla? Ia wasa me tohnsampah kohkohla ie?
E inenin kansensuwed, pwe pelien lamalam kan nan rahnpwukat sohte kin kalap kihda pasepeng pwung kan. Ni ahnsou me ke tepin kilang peidek wet pohn kilin makasihn wet, elemwein ke kasalehda amw peikasal—lamalam ehu me wehwe. Pelien lamalam en fundamentalism kin kalap padahngki padahk kan me sohte kileledi nan Paipel—duwen rahn oh awa me sampah wet pahn ohla. (Kilang Madiu 24:36) Irail akan me intingihdi makasihn wet men mweidohng Paipel en pein kihda pasepeng kan. Ke pahn pwuriamweiki en sukuhlki me padahk en Paipel me pid duwen imwin rahn akan me mehlel oh pwung. Oh Paipel kin wia laud sang ihte kawehwehda karepen mehkan inenin suwedkihla. E kin pil kihda koapworopwor en ahnsou kohkohdo, koapworopwor ehu me uhdahn kansenamwahu. Se luke komwi en tehk artikel en mwuhr pwehn kilang iaduwen met pahn pweida.
[Credit Line]
Jobard/Sipa Press