Peidek 3: Dahme Kahrehda Koht Ketin Mweidohng I en Lokolok?
AHN Ian pahpao perenki kang sakau en wai. Ian tikida ahneki dahme e anahne, ahpw e sohte ahneki utuht me e men eh pahpao en kihong ih. E nda: “I sohte nohn poakepoake ih ahpw mehlel pwehki eh kin kalapw sakau oh pil mwomwen eh wiewia ong ei nohno.” Ni Ian eh lalaudla, e tepida peidengki ma mie Koht. E nda: “Ma Koht uhdahn mie, dahme kahrehda e ketin mweidohng aramas akan en lokolok?”
Ia kahrepen aramas kin idengki peidek wet? Mehnda ma omw mour sohte nohn ahneki kahpwal, omw pepehm en pwung-pahrek ele kin kahrehiong uhk ken lingeringerda ni ahnsou me ke kilang irail kan me sohte arail sapwung lelohng lokolok. Ahpw, peideko me pid duwen lokolok ele kin miehla wehwe laud ong uhk ma ke kin lelohng apwal laud duwehte Ian, de ma emen ke poakohng kin soumwahuda de mehla.
Dahme ekei kin sapengki peidek wet? Ekei aramas kin kamehlele me Koht ketin mweidohng lokolok en mie pwehn kasonge kitail oh padahkihong kitail en aktikitik oh kadek. Ekei kin medemedewe me aramas kin lokolok nan mour wet pwehki dihp kan me re wiahda mahs.
Dahme pasapeng ko kin kasalehda? Koht sohte kin ketin mwekidki lokolok kan en aramas, kahrehda e sohte mengei en poakohng ih. Koht kin ketin lemei.
Dahme Paipel padahngki? Paipel kin kasalehda ni sansal me kaidehn Koht me ketin pwukoahki lokolok kan en aramas. E mahsanih: “Mehmen me lelohng nan songosong pwehki apwal me kohiengehr en dehr nda me, ‘Kasongosong wet sang rehn Koht.’ Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Ni mehlel, madamadau me dene Koht ketin pwukoahki lokolok kan sohte kin pahrekiong dahme Paipel mahsaniheki irair me Koht sapwellimanki. Ia duwen?
Ehu rehn sapwellimen Koht irair kan me keieu kesempwal iei limpoak. (1 Sohn 4:8) Pwehn kawehwehda mwahu ire wet, Paipel kasalehda duwen Koht eh ketin sapwellimaniki pepehm kan rasehng nohno men me naineki seri pwelel. Koht ketin mahsanih: “Kakete lih emen en manokehla uhdahn nah seri pwelel, oh sohte poakepoake wahnedio? Mehnda ma nohno men kak manokehla nah seri, ahpw ngehi, I sohte kak manokeiukala.” (Aiseia 49:15) Ke kak medewehla nohno limpoak men eh kin men kamedekihala nah serio? Uhdahn soh. Pahpa de nohno limpoak men me kin poakohng nah serio pahn song en katikala lokolok me nah serio ahneki. Pil duwehte, Koht sohte ketin kahrehiong aramas akan me sohte arail sapwung ren ahneki lokolok.—Senesis 18:25.
Ahpw mendahki met, aramas akan me sohte arail sapwung kin wie lokolok. Mwein ke kin medewe, ‘Ma Koht ketin nsenohki kitail oh sapwellimaniki kehl me uhdahn laud, dahme kahrehda e sou ketikihsang mehkan me kin kahrehda lokolok?’
Mie kahrepe mwahu kan me Koht ketin mweidohng lokolok en pousehlahte wiawi ahnsou wet. Medewehla ehute kahrepe ko: Pali laud en ahnsou, aramas me kin kahrehda lokolok ong meteikan. Me tohto me kin doadoahngki arail kehl oh manaman pwehn kaloke aramas, sohte kin men wekidala arail wiewia kan. Eri, pwe Koht en ketikihsang ehu kahrepe laud me kin kahrehda lokolok, e pahn anahne ketin kasohrehla soangen aramas pwukat.
Wahnpoaron Piter kawehwehda dahme kahrehda Koht saikinte ketin kasohrehla irail kan me kin wia me sapwung ni eh ntingihedi: “Kaun-o sohte kin ketin pwapwand ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9) Sapwellimen Siohwa irair en kanengamah kin wia kasalepen sapwellime limpoak oh mahk.
Ahpw kereniong Siohwa Koht pahn ketin mwekid. E pahn ketin “kaloke irail kan me kin kalokei” aramas akan me sohte arail sapwung. Irail kan me kin kahrehda lokolok ong meteikan pahn “lokolongki kalokolok en mehla soutuk.”—2 Deselonika 1:6-9.
Pwehn kalaudehla omw wehwehki dahme kahrehda Koht ketin mweidohng lokolok en mie oh dahme e pahn ketin wiahiong met, menlau kilang irelaud 11 en pwuhken Dahme Paipel Uhdahn Padahngki? Ke kak rong de ale pwuhk wet sang www.jw.org
[Koakon nan pali 9]
Dahme Sises Ketin Mahsaniheki Duwen Lokolok?
Sises sohte ketin kapwukoahki Koht lokolok me kin wiewiawi eh ahnsou. Ahpw e kin ketin wia soahng pwukat.
Sises kasalehda me Koht sohte kin ketin kaloke aramas akan me sohte arail sapwung oh kahrehiong ren lokolok. Sises ketin kamwahwihala me soumwahu kan, me nehtuk kan, oh me maskun kan. (Madiu 15:30) Manaman kan me e ketin wiahda kin padahkihong kitail ire kesempwal riau: Keieu, Sises ketin doadoahngki sapwellimen Koht manaman pwehn ketin katikala lokolok, ahpw kaidehn en kahrehda. Keriau, Sises kin ketin poakehla irail kan me e ketin kamwahwihala. Ni eh mahsanihada irail kan me kin lokolok, e ketin kupwureirailla. (Madiu 20:29-34) Sises kasalehda ni unsek pepehm me Semeo sapwellimaniki duwen lokolok. Kahrehda, sang sapwellimen Sises mahsen oh wiewia kan, kitail sukuhlki me Koht kin ketin kupwur toutoukihla medek de lokolok me kin wiawi mwohn silangih, oh E ketin kupwurki kamwahwihala.—Sohn 14:7, 9.
Sises ketin kasalehda me Sehdan me Tepil iei me uhdahn utupen lokolok laud me aramas ahneki. Sises mahsanih: “Sangete nin tapio, ih sounkam aramas emen.” (Sohn 8:44) Sises pil ketin kasalehda me Sehdan me Tepil iei “kaunen sampah wet” oh ih me kin “pitipitih sampah pwon.”—Sohn 12:31; Kaudiahl 12:9.
Sises ketikihong kitail koapworopwor ong ahnsou ehu me lokolok koaros pahn imwisekla. E ketin padahkihong sapwellime tohnpadahk ko ren kapakap: “Samat me ketiket nanleng: . . . mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:9, 10) Ni ahnsou me Wehin Koht pahn pweida, solahr pahn mie lokolok nin sampah, duwehte eh sohte lokolok nanleng.
Nan kaudiahl me e ketin kasalehiong wahnpoaron Sohn, Sises ketin kawehwehda ia pahn duwen mour ong irail kan me mihmi pahn kaundahn Wehin Koht. Ni ahnsowo, Koht “pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 1:1; 21:3, 4.