Mahsen En Kamweit Ong Irail oko me Kin Lelohng Apwal
EREIN pahr epwiki kei, aramas loalokong kan oh aramas me kin tehk Mahsen en Koht akan sohte kak diar pasapengpen peidek wet ong dahme kahrehda Koht ketin mweidohng lokolok en lelohng aramas akan. Ekei aramas koasoia me pwehki Koht me sapwellimaniki kehl unsek, Ih me pahn ale kapwukoapen ahn aramas lelohng apwal. Aramas me ntingihda The Clementine Homilies, pwuhk ehu me sohte ahnekihdi kamanaman en wia kisehn Pwuhk Sarawi nan senturi keriau, pwuhk wet kose me dene Koht ketin kaunkihda sampah lime kan koaros. Sapwellime “pali meing,” iei Tepil, e kin wahdo kahpwal oh kalokolok, oh sapwellime “pali maun,” iei Sises, e kin ketin doarehla oh kapaiada aramas.
Pil ekei aramas, pwehki irail sohte kak kamehlele me Koht kak ketin mweidohng lokolok en lel aramas mendahte ma kaidehn Ih me kahrehdo, oh irail aramas pwukat eri pilada me re sohte kamehlele me kalokolok kin wiawi. Mary Baker Eddy ntingihdi: “Wiewia suwed kin wia me mih nan madamadau en aramaste, oh sohte poahsoan mehlelpe. Ma dihp, soumwahu oh mehla—aramas kin ahneki wehwe me mehpwukat sohte wia mehkot kesempwal, eri mehpwukat pahn sohrala.”—Science and Health With Key to the Scriptures.
Imwilahn wiewia suwed oh apwal akan nan poadoapoad, ahpw mehlel sangete nan Mahwen Keieu en Sampah lao lel atail ahnsou, aramas tohto nda me dene Koht uhdahn sohte kak irehweisang kalokolok.
Pakaraun kan dene Koht, ni soangen ahl ehu, kin wahdo kalokolok, oh me e sohte kak irehdi met, oh me pwunod akan kin wia mehkot tikitik kisehn atail madamadaute, oh kin kalap uhdahn sohte katepe ong irail oko me kin ahneki mehn kapwunod pwukat. Dahme keieu kesempwal kitail en tamataman me: soangen madamadau siluh pwukat kin uhwong sapwellimen Koht irair en kopwungpwung, kehl oh nsenohki aramas me kin sansal mwahu nan Paipel. (Sohp 34:10, 12; Seremaia 32:17; 1 Sohn 4:8) Ahpw, dahme Paipel kasalehda duwen kahrepen Koht a mweidohng lokolok en mihmiehki rehtail?
Iaduwen Lokolok ah Tepin Miehla?
Koht sohte kapikada tohnsampah en ale lokolok. E ketikihong tepin pwopwoud, Adam oh Ihp, madamadau oh paliwar unsek, oh kaunopadahng ira mwetuwel kaselel ehu en wia ara wasahn kousoan, oh ketikihong ira doadoahk me katapan oh kaperen ira en kin wiewia. (Senesis 1:27, 28, 31; 2:8) Ahpw, pwe ira en kolokol kohla ara irair en pereperen, ira anahne pohnese sapwellimen Koht manaman en wia ara kaun oh sapwellime pwung en pilada ong ira irair en dahme mwahu oh dahme suwed.
Ahpw, e kansensuwed pwe Adam oh Ihp sohte peikiong Koht ni irair pwukat oh met kahrehong ira nan apwal. Ngehn suwed, iei Sehdan me Tepil, pitihdi Ihp kahrehda e kangada wahn “tuhkehn kehsehki aramas dahme mwahu oh dahme suwed.” (Senesis 2:17) Ni ah lohdiongehr pahn madamadau en uhdatohr, Ihp eri kangada wahn tuhke me keinepwiho oh mwurinte mwo, Adam pil wia duwehte.
Pwehki ara pohnsewehla sapwellimen Koht irair en kaunda, E ketin kasarehsang Adam oh Ihp sang nan Paradais oh ira eri lelohngehr irair en soumwahu, medek, mahla oh mehla. Lokolok wiahlahr kisehn mehkan me tohnsampah kin lelohng.—Senesis 5:29.
Koasoanehdi Kahpwalo
Ekei aramas kin wia peidek wet, ‘Koht sohte kak ouda pohnsehsehla ahn Adam oh Ihp dihpo?’ Soh, pwehki met pahn kamwamwahlihala sapwellimen Koht manaman en kakaun, oh mwein ele pahn kanaitikihada pil ekei elen sapeik kan oh kak imwikihla kahpwal laud kan. (Eklesiasdes 8:11) Pil patehng met, ma Koht pahn mweidala soangen sapeik wet e pahn wiahiong en iang pwukoahki sapwungo. Pwe en kak ketin mehlel ong pein Ih, Koht uhdahn pahn ketin mweidala Adam oh Ihp en lelohng imwin ara sapeik.
Dahme kahrehda Koht sohte mwadangete kemehla tepin pwopwoudo iangahki Sehdan, me wia sounkasongosong soh sansal oh eri kese Adam oh Ihp ong nan irair en pelianda Koht? Mie sapwellimen Koht manaman roson en wia met. Ma Siohwa wia met, Adam oh Ihp sohte pahn wiahda kadaudokara me pahn alehdi sohso en ale lokolok oh mehla. Ahpw, soangen wiepen kasalehda manaman roson wet sohte pahn wia mehn kadehde mwahu ong me Koht sapwellimaniki pwung en kakaun sapwellime kepikipik loalokong kan. Oh pil, ma Adam oh Ihp pahn mehla oh sohte neira seri, met pahn wia kasalepen me koasoandi en Koht ong sampah me dene kadaudok en pwopwoudo en kadirehkihla sampah aramas unsek kan pahn wia mehkot me sohte pweida. (Senesis 1:28) “Koht sohte duwehte aramas . . . Dahme E kin ketin inoukihda, e pahn ketin kapwaiada; e kin mahsen, ah e kin pweida.”—Nempe 23:19, Today’s English Version.
Nan sapwellimen Koht irair unsek en erpit, E ketin pilada en mweidohng irair en uhwong Ih en doula oh mihmi erein ahnsou ieu me sohte pahn poatoapoat. Ira me uhwong ko pahn ahneki ahnsou itar en lelohng imwin arail men uhtohrada sang sapwellimen Koht manaman en kakaun. Irair akan nan momour en tohnsampah nan poadoapoad pahn kasalehda ni sansal mwahu ahn aramas arail anahne sapwellimen Koht elen kaweid sarawi oh me sapwellimen Koht kaunda mwahusang ahn aramas oh ahn Sehdan kaunda.
Imwilahn Lokolok
Uhwong sapwellimen Koht manaman en kakaun kahrehdohr soangen lokolok tohto. Eri, e konehng Koht en ketin doadoahngki sapwellime manaman ni ahl tohrohr ehu en ketin irehdier ahn aramas lokolok oh ketin kapwurehdo tepin sapwellime koasoandi ong sampah. Sises mahsanihada sapwellimen Koht koasoandi wet ni ahnsou me e ketin padahkiong sapwellime werek kan duwen arail pahn kapakap ni ahl wet: “Samat me ketiket nanleng, . . . Wehiomwi en ketido. Kupwuromwi en kin wiawi nin sampah duwen eh kin wiawi nanleng.”—Madiu 6:9, 10, New World Translation.
Ahnsou me Koht ketin mweidohng aramas en songosongseli en kaunda pein irail pahn kereniong imwisekla. Nin duwen pweidahn kokohp en Paipel, sapwellime Wehio kokoudahr nanleng nan pahr 1914 oh Sises Krais me wia Nanmwarki. Ni ahnsou keren, Wehin Koht pahn kauwehla wehin aramas akan koaros.—Daniel 2:44.
Ni ahnsou me Sises kin wia sapwellime doadoahk en kalohk nin sampah, Sises kohpadahr duwen kapai kan me pworodohn kaunda sarawi pahn wahdohng aramas. Pwuhk en Rongamwahu kan ketikihda mehn kadehde me Sises kin poakehla aramas akan me kin lelohng kanaudok kan. E kin kakehlahda irail me soumwahu, kamwenge me duhpeklahr akan, oh kaiasada me mehlahr akan. Pil lelohng mwekid apwal en nan wehwe pil kin peikiong sapwellime pahngok. (Madiu 11:5; Mark 4:37-39; Luk 9:11-16) Medewehla dahme Sises pahn wiahda ni ahnsou keren! Paipel ketin inoukihda sang ni kaundahn Krais, Koht “pahn ketin limwihasang pilen mesen aramas akan. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”—Kaudiahl 21:4.
Mahsen en Kamweit Ong Irail oko me Kin Lelohng Apwal
Ia uwen a wia kakehlepen nan kapehd kitail en ese me atail Koht roson, Siohwa, kin ketin poakohng kitail oh E ketikihweisang kahpwalpen tohnsampah ni ahnsou keren! Kitail en koapworopworki me kapai kan en Wehin Koht kitail kak alehdi ma kitail pahn idawehn kaweid en Paipel: “Rapahki Siohwa . . . ni ah kakete dierek. Likweriong Ih ahnsou me E wie karakaranihiuk.”—Aiseia 55:6, NW.
Pwehn sewese iuk en wia met, wiahki wadawad oh onop Mahsen en Koht ni keneinei en wia mehkot me keieu kesempwal nan ahmw mour. Esehla Koht oh ih me E ketin kadarodo, Sises Krais. Nantihong kapahrekiong ahmw mour sapwellimen Koht elen kaweid akan oh eri kasalehda me ke pwungki en mih pahn sapwellime kaun lapalap en lahng oh sampah. Soangen ahl wet pahn wahdohng uhk peren me laudsang ahnsou wet mendahki ahmw pahn lelohng kasongosong kan me tohto. Oh ni ahnsou kohkohdo, met pahn imwikihla ken ahneki mour peren nan sampah ieu me sohte lokolok oh kahpwal.—Sohn 17:3.
[Kilel nan Pali 5]
Adam oh Ihp pohnsewehla sapwellimen Koht irair en kaunda