Pwekihda? ‘Koht, Dahme Kahrehda Komw Mweidohng Met en Wiawi?’

RICARDO tamatamante a iang ah pwoud, Maria, mwomwohd nan wasahn awiawih toahkte.a Sohte emen ira ahneki lamalam kehlail en kilang dahme pweida sang nan ahn Maria keseu me wiawi keieu mwuhr. Eri, mwuri Ricardo kihpeseng dewen kisinlikouwo oh kihsang kisinlikouwo loale, ira eri mwadangete wadek lokaiahn palien imwen wini kan me wiahda ripohto. Ira kilangada lepin lokaia “kanser” oh ira koaros tepidahr sengiseng oh met ira wehwehkihdahr mehlel wehwehn lepin lokaia.

Ricardo katamanda me: “Toahkte inenen kadek, ahpw e sansal me e kasawihada uwen aht nsensuwed pwe e kin pwurepwurehng ndaiong kiht en likih Koht.”

Mwohn ah tepiada ale “radiation treatment,” ahn Maria ah toahkte tehkada me paten neh pali koahiek kin pein mwekimwekid. Keseu eri wiawi oh kadiarekada kansero kohselier nan paliwere oh lelohngehr nan ah mwahlielo. E alehki “radiation treatment” wihk ehute. Mwurinte mwo, Maria eri doarala oh sohlahr kehn wasa oh eri mehla mwurin sounpwong riau. Ricardo kawehwehda: “I pil mwahuki pwe e pitsang ahneki medek, ahpw I uhdahn loaleidki ih inenen laud me kahrehda ih pil mentehno ien pil iang mehla. Pak tohto, I kin sengiseng ong Koht oh nda: ‘Dahme kahrehda komw mweidohng met en wiawi?’ ”

Ni Ahnsou me Kahpwal Kin Pwarada, Soangen Peidek Tohto Pil Kin Pwarada

Duwehte Ricardo, aramas tohto nan sampah pwon kin loiong oh pehm soangen apwal duwehte met. Pak tohto, e kin lelohng aramas akan me kaidehn irail me sapwung. Medewehla soangen irair kesengiseng me kin kohsang wiewiahn kepingiping kan (duwehte mahwen) me kin mwuledekiong tohnsampah. De pil medemedewe medeklahn pepehm en aramas tohto me kin lelohng kahpwal tohto kan me duwehte angkehlail, seri wiakaula, pingiping nanpwungen tohnihmw ieu, oh pil soangen mour suwed akan me tohnsampah kin wiewia. Sangete mahs kohdo nan poadoapoad en aramas, likamwete sohte pahn imwin kopwung sapwung oh kamedekalahn aramas teikan me ohl oh lih akan kin epwehnki wia. (Eklesiasdes 4:1-3) Oh pil, mie pwunod akan me aramas kin lelohng pwehki melimel oh mwekimwekid en sampah teikan, de pwunod kan me kohsang palien madamadau, palien pepehm, oh pil soumwahu kan. E sohte kapwonopwon me aramas tohto kin idek: “Dahme kahrehda Koht kin mweidohng soangen apwal pwukat en wiawi?”

Pil rehn irail akan me kin poadidiong sarawi, e sohte wia irair mengei ieu en kanengamah pahn apwal akan. Mwein ke pil kin wahpwonki dahme kahrehda Koht limpoak oh roson unsek menet kakete mweidohngki tohnsampah en lelohng nan lokolok. Rapahkihda pasapeng me kansenamwahu oh mehlel ong ire kapwonopwon wet wia mehkot kesempwal ong kitail en dehr pwunod oh ong atail ehuiong Koht. Paipel kin ketikihda soangen pasapeng duwehte met. Menlau tehkada dahme Paipel mahsanih duwen ah pahn sansal nan artikel en mwurin met.

[Nting tikitik me mi pah]

[Kilels nan Pali 3]

Toahkteo kin pwurepwurehng ndaiong kiht en likih Koht