Komwi Emen me Kin Kamehlele me Mehkoaros Pahn Imwila Mwahu de Emen me Kin Kasik Imwila Suwed en Mehkoaros?
“IEI IH ahnsou me keieu mwahu, iei ih ahnsou me keieu suwed,. . .e wia ansoun koapworopwor, e wia ansoun pahtou, soahng koaros mih mwohtail, sohte mehkot mwohtail.” Ih tepin lokaia pwukat me Charles Dickens ntingihdi nan nah pwuhko A Tale of Two Cities me kin kasalehda iaduwen wiewia kan kak kamwekid atail lamalam, atail pepehm oh atail madamadau.
Kahnimw riau wet me e koasoia nan pwuhk wet iei London oh Paris ansoun pingiping en Mahwen en French Revolution. Ong tohn wehin Prans kan en nan pahr 1700, karepen Mahweno iei me en wahdo pwung en aramas oh met ni mehlel kin wia “koapworopwor ehu.” Ahpw ong irail ko pahn koasoandi en wehio, e wia “ansoun kansensuwed,” me kin kahluwahlahng mehla oh ohla.
Eri met pahn karehong uhk en kamehlele me mehkoaros pahn imwila mwahu de e pahn imwila suwed? Pasepengo kin pidada mehnia pali me ke iang. Oh e duduhwehte.
Ansoun Tehk Pein Emen Emen Kitail
Komwi emen me kin kamehlele me mehkoaros pahn imwila mwahu? Komw kin kilang wasa mwahu kan en mour, ahnsou koaros kasikasik dahme keieu mwahu? De komw kin kasik imwila suwed en mehkan, oh ahneki madamadau sapwung ong dahme ke kasikasik, oh kin koapworopworki dahme pahn imwila keieu mwahu oh pil ni ahnsouwohte pil kasikasik dahme pahn imwila suwed?
Sounpar weneisek samwalahro emen sounnting en Amerika me adaneki James Branch Cabell oarelapiada padahk wekpeseng riau wet ni ahl wet: “Aramas me kin kamehlele me mehkoaros pahn imwila mwahu kin pakairki me kitail momour nan sampah me keieu mwahu; oh aramaso me kin kasik imwila suwed en mehkan kin masak me met mehlel.” Ma komw pepehm me lamalam wet kin wia madamadau en kauwe, ken kasawih kamwahu kan oh kasuwed kan en ire siluh en sampah en rahn wet me sansalda pah. Mwurin met komw kasawih pein omw lamalam ong ire wet, oh pein kalelepek rehmw, ‘Ngehi emen me kin kamehlele me mehkoaros pahn imwila mwahu de ngehi emen me kin kasik imwila suwed en mehkan?’
Popohl Soutuk: Pingiping en sampah depe me komw kak wadekada? Ireland, oh wehi me mahs adaneki Yugoslavia, oh Middle East, oh Burundi, oh Rwanda—wasa pwukat kitail kin mwadang tamanda. Pingiping pwukat oh kahpwal teikan kak kamwahula pwehn wahdo popohl poatopoat nan sampah pwon? Sampah kohkohieng nan popohl?
Tengeteng en Palien Paien Wehi: Ni ah koapworopworki miniminpenen pelien mwohni nan pahr 1999, sahpw kan en European Union kin lelohng kahpwal en pweilaudlahn dipwisou oh pweipwandlahn koperment. Wasa teikan, wiewia mwersuwed kin kauwehla koasoandi en pelien paien en wehin Amerika oh Aperika tohto, wasa me pweilaudlahn dipwisou kin wia katoutou ehu oh kahpwal en soahngen tiahk en sahpw kan kin kahrehda liaktohrohr. Tengeteng en pelien paien en wehi nan sampah kin mih mwotail?
Sohte Doadoahk En Mwohni: Nan usuhs en 1997, sarawi kan en British kin miniminpene pwehn kangoangehki pwihn en politic koaros en koasoia mahs mwohn mehkoaros doadoahk en mwohni kaukaule. Ahpw ni en persent kereniong 30 en tohndoadoahk en sampah sohla kin doadoahk de sohla doadoahk en mwohni, pahn kak mie doadoahk en mwohni kaukaule, me pahn tengeteng—keieu ong me pwulopwul kan?
Ia uwen mengei en ahnekihla pepehm me mehkoaros pahn imwila suwed! Ahpw mie mehkot sang met me mwahu, oh se luhke komwi en tehk iaduwen komw kak kekeirada lamalam en kamehlele me mehkoaros pahn imwila mwahu.
[Kilel nan pali 3]
The French Revolution
[Credit Line]
Sang pwuhko Pictorial History of the World