Dahme Karehda Re Kesekihla Pelien Lamalam?
NAN werengen 1800, sohte tohn Prussia (ahnsouwet ni paliepeng en Sehmen) kin nda me sohte ah pelien lamalam. Ni mehlel, ma emen pahn wekidala ah pelien lamalam sang ehu pelien lamalam laud kan ong ni ehu tohrohr pahn karehong polihs kan en tetehk ah wiewia. Ia uwen ahnsouwet ah wekila!
Rahnwet, mehn Sehmen tohto kin sohla iang sarawi kan. Ripoht kasalehda me, emen sang nanpwungen meh pahmen kin kose me sohte ah pelien lamalam. Met kin pil wiawi nan Austria oh Switzerland. Ma ntahn pelien lamalam iei towe kan, eri, nin duwen me sounnting en Sehmen Reimer Gronemeyer koasoiahki met, “Sarawi kan en Iurop kin mehla ni nta kin pwilipwilsang.”
Dahme Karehda Re Soikala Pelien Lamalam
Dahme karehda me tohto kin soikala pelien lamalam laud kan? Pak tohto, pwehki pelien mwohni, keieu nan sahpw kan me tohn sarawio pahn anahne pwain taks en sarawio. Me tohto kin kalelepek, ‘Ia kahrepe I en kihong pelien sarawi nei mwohni me I doadoahk laud koadoahkehda?’ Ekei sapwungki kepwehpwe oh manaman en sarawi kan. Ele re kin pwungki dahme Cardinal Joachim Meisner en Cologne, Sehmen koasoia, me dene kepwehpwehn sarawio pahn karehong en kesempwalkihla kepwe kan oh “sohte pahn kesempwalki pwoson Krais.”
Ekei aramas kin kesehla ahr sarawi pwehki arail sarawio kapwang, sohte kin kamwekid irail, oh e sohte kak kaitarala arail duhpek en pali ngehn. Re kin lokolongki duhpeko me soukohp Eimwos kohpada, “aramas akan pahn duhpekla, ahpw kaidehk duhpek en men kang pilawa; re pahn men nimpilda, ahpw kaidehk duhpek en pihl. Pwe re pahn men tungoalehda oh nim ehu mahsen en sang rehn Kauno (Siohwa).” (Eimwos 8:11) Pwehki arail pelien lamalam sohte kin kamwenge irail ni pali ngehn, irail eri kesehla.
Nin doken kahpwal pwukat me mehlel, e pwung en kesehla pelien lamalam koaros? Medewehda duwen ohl emen me duhpek me kilangada mehkot me duwehte mwomwen lopwon en pilawa ehu. Ahpw, ni ahnsou me e song en tungoale pilawa wet, e diarada me e wiawihkihda kiden rasaras. E pahn sohla mwenge oh sohla song en kaitarala ah duhpek? Soh, e pahn rapahki mwenge douluhl. Me rasehng met, ma pelien lamalam ehu sohte kak kaitarala duhpek en pali ngehn en towe kan, met pahn karehong ren kesehla douluhl kaudok? De re pahn loalokong en rapahki ahl ehu en kaitarala arail duhpek en pali ngehn?