Dahme Paipel Mahsanih?

Aramas akan me kin pein wiahda pelien lamalam akan?

EKEI ARAMAS KIN KAMEHLELE me pelien lamalam iei koasoandi en aramas; a ekei kin medewe me Koht me ketin doadoahngki pelien lamalam pwehn sewese aramas akan en karanihala ih. Ia omw madamadau?

DAHME PAIPEL MAHSANIH

Mie ehu kaudok me pwung oh mehlel “me Samatail Koht kin ketin kupwurki.” (Seims 1:27) Pelien lamalam pwung de mehlel pwildohsang rehn Koht.

DAHME KITAIL PIL SUKUHLKIHSANG PAIPEL

• Pwehn kaperenda Koht, pelien lamalam ehu anahne poahsoandahsang padahk mehlel en Paipel.​—Sohn 4:23, 24.

• Pelien lamalam kan me poahsoankihda ahn aramas madamadau kan sohte katepe.​—Mark 7:7, 8.

Mie anahnepen ken iang pwihn en pelien lamalam ehu?

DAHME KE PAHN NDA?

• Ei

• Soh

• Ma mie kahrepe

DAHME PAIPEL MAHSANIH

“Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene.” (Ipru 10:24, 25) Koht kupwurki sapwellime tohnkaudok kan en pokonpene nin duwen pwihn ehu me soandi.

DAHME KITAIL PIL SUKUHLKIHSANG PAIPEL

• Irail kan me kin ehupene kaudokiong Koht anahne miniminpene nan ar pwoson.​—1 Korint 1:10, 11.

• Tohn pelien lamalam me Koht kupwurki kin ehupene nin duwen pirien ehu nan sampah pwon.​—1 Piter 2:17.