Paipel Kak Sewese Kitail Rahnwet?
“PAIPEL nin duwen pwuhk ehu pwon, mwein percent 1 te me mie katepen kitail en wadek, ahpw likin met, e sohte katepe oh mering.” Ih met me emen ohl pwulopwul koasoia. Me tohto kin pwungki dahme ohl menet koasoia. Mendahki Paipel kin wiahte pwuhk ehu me keieu netila tohto, aramas rar kan sohte kin kalapw wadek Paipel oh re sohte wehwehki audepen padahk kan me mihmi loale.
Nan ah pali en Christmas en 1996, nuhspehpa en Sehmeno me adaneki Süddeutsche Zeitung koasoia me “aramas wie malaulaula me kin wadek Paipel. Nan dih ehu me palien sains oh koasoandi en aramas me solahr kin sarawi kin wie kekeirada, ong me tohto koasoi kan nan Paipel kin mwomwen kapwuriamwei oh apwal en wehwehki.” Roporop kan kasalehda me met mehlel. Ekei roporop kan kasalehda me seri tohto sehse ihs me Sises. Nan ehu roporop, malaulau sang elep en uwen aramas ko koaros me re wia peidek rehrail kak koasoiahda koasoi en Paipelo me pid pwutako me salongala oh pwurodo oh duwen mehn Sameria kadeko.
Pwuhken Swiss Evangelical Church me adaneki Reformiertes Forum koasoia me nan Switzerland aramas sohla men wadek Paipel duwehte mahso. Pil rehn irail ko me naineki Paipel, re kin kihdahte pohn dana kan (dewen pwuhk kan) oh eri sohte kin wadek. Met pil duwehte nan Britain. Nin duwen me ehu roporop kasalehda, mendahki pali moron en aramas naineki Paipel, pali tohto sohte kin wadek.
Ni pali teio, aramas rar kan nan sampah pwon ahneki ehu pepehm me weksang met ong Paipel. Re kin kilangwohng Paipel me iei Mahsen en Koht oh re kin wiahki me e kesempwal oh katapan. Ihme kahrehda, re kin kaukaule wadek neirail Paipel. Emen lih pwulopwul ntingihdi: “I kin song en wadekala irelaud ehu de riau en Paipel ehuehu rahn. I inenen perenki met.” Soangen aramas pwukat kin tehk kanahieng dahme Paipel kin padahngki, oh re kin song en kapwaiada kaweid kan me mihmi loale nan arail mour. Re kamehlele me Paipel kak sewese irail nan sampah apwal wet rahnwet.
Ia omw madamadau? Paipel sohte katapan nan ahnsou pwukat? De Paipel wia pwuhk ehu me kesempwal oh katapan? Paipel kak sewese kitail rahnwet?