Ripoht En Sounkalohk Kan En Wehio

Doadoahk en Wehio Laudla nan Namibia

Rongamwahu en Wehin Koht tepin lel Namibia ni imwin 1920 samwa. Sangete ahnsowo, aramas mohngiong mehlel epwiki kei peikiongehr sapwellimen Koht rohng en komourala. Eksperiens kan me kilikilel pah kin kasalehda iaduwen Siohwa kin ketin kihkihpene me mwahu pwukat nan sapwellime pwihn.​—Akkai 2:7.

◻ Paulus, emen sounmwet me kin kousoan ni paliepeng en palimese en Namibia, tepin tuhwong Sounkadehdehn Siohwa kan ni ah mwemweitlahng Windhoek, poason kauno. Paulus mwadangete kamehlele me e diaradahr padahk mehlel. E pwurelahng imweo wahda pwuhko Ke Kak Mour Kohkohlahte Nan Paradais Nin Sampah. Eri, nan ehu seiloak ong Rundu, ehu kahnimw keren wasa me ehu Kingdom Hall mie, Paulus diarada Sounkadehde kan oh peki rehrail ren mwemweitla reh.

Ahpw, wasao doh ong Sounkadehde kan en kohdo wia onop en Paipel ehu ehu wihk rehn Paulus. Mendahkihla met, Paulus tepiada pein kin onopki Paipel. Patohngete met, e kin ni ngoang kalohkiohng meteikan duwen mehkan me e sukusukuhliki. Kedekedeo, ehu pwihn en onop Paipel wiawihda. Ni ahnsou me kisin pwihn wet rongada nan radio me mie ehu kapokon en Sounkadehdehn Siohwa kan me pahn wiawi nan Rundu, re kihpene neirail kisin mwohni kan oh koasoanehdi mehn peidaid pwehn iang towehda.

Ia uwen met kin wia eksperiens kaselel ehu ong irail ni arail pahn ehdin iang werekiong Sounkadehdehn Siohwa kan! Koasoandi kan eri mwadang wiawihda me brother koahiek kan en pwarek pwihn wet kaukaule. Rahnwet, mie sounkalohk wenemen nan kisin kousapw me Paulus kin kousoan ie.

◻ En Johanna men ese mwaren Koht tepida ni ahnsou me e rongada aramas men kin koasoia suwed en Sounkadehdehn Siohwa kan. E tamanda: “Tepin ahi rongada mwareo Siohwa, e tengala nan ahi madamadau, oh I tepiada medemedewe duwen ihs me Siohwa. I kin koukousoan rehn ahi pwoudo limwahn Walvis Bay ni oaroahr en Namibia. Ehu ahnsou, se kohla nan kahnimw, oh I kilangada ekei Sounkadehde kan me kihkihseli makisihno Watchtower nanial. I alehda ehu kopi oh peki ren onop Paipel rehi, pwehki diren ahi peidek. I sengiseng ni ahnsou me re kehsehkin ie me re sohte kak kohdo pwehki wererail sidohsa ohla. Mwurinte met ahi pwoudo mehla, oh I kohla oh kousoanla nan Keetmanshoop. Emen special pioneer (sounkalohk kaukaule) ale pwais en kalohk wasao, oh I alehsang reh pwuhken Padahk Mehlel me Kahluwalahng Mour Soutuk. Sangete nin tepio, I ese me met padahk mehlel.

“Kedekedeo, I ale luhk en iang doadoahk en kalohk, ahpw I masak aramas. Nindoken ahi kin aluhsang ehu ihmw kohlang ehu ihmw, I kapakap ong Siohwa me en mweidohng ie en mehla ahpw I en dehr kalohk. Ni ahnsou me I tepin iang kalohk nan ahl akan, I kin rukala nan kisin ahl akan nanpwungen ihmw akan, ni ahi kin kasikasik me sohte aramas kak kilang ie. Mwurin mwo, I doadoahngki uwen ahi eimah koaros en kihong aramas emen nanial makisihn, oh ihte ahnsowo me I kak ndawei mehkot. Rahno, ki sawas sang rehn Siohwa, I ehukihong aramas tohto ahi koapworopwor me poahsoanda pohn Paipel.

“Rahnwet, mwurin sounpar 12, mendahki ahi semwehmwe, I kin kesempwalkihte doadoahk en pioneer oh kaukaule alehdi peren laud sang ni ahi kin ehukihong meteikan padahk mehlel en Wehio.”