Pwoson Kak Kawekidala Ahmw Mour

“KE UHDAHN kak ahneki mour mwahu ni soh sawas sang rehn Koht.” Met iei koasoi en emen me sohte kin pwoson Koht. Lih menet koasoia me e apwalihkihda nah seri kan mouren tiahk mwakelekel, oh irail uhd, pil kekeirkihda neirail seri kan soangen tiahk ileile kohte​—ni arail sohte kin pwoson Koht.

Met kin wehwehki me kitail sohte anahne pwoson Koht? E sansal me aramas menet lemeleme me iei. Oh e mehlel me mehmen me sohte kin kamehlele Koht kaidehn ih aramas suwed emen. Wahnpoaron Pohl koasoia duwen “aramas akan en wehi kan” me sehse Koht ahpw “kin kapwaiada audepen Kosonnedo sang ni pein nsenarail.” (Rom 2:14) Aramas koaros​—iangahki irail kan me sohte kin pwoson Koht​—ipwikihdi kadeikpen loalerail. Me tohto kin songosong en idawehnla dahme kadeikpen loalerail kin padahkihong irail mendahki re sohte kamehlele Koht me ketikihong irail irair wet en pilada dahme pwung oh sapwung.

Ahpw, pwoson kehlail Koht—⁠me kin poahsoanda pohn Pwuhk Sarawi—​kin wia kehl manaman ehu ong me mwahu sang kaweid en kadeikpen loale me sohte kin ale sawas sang rehn Koht. Pwoson me kin poahsoanda pohn Mahsen en Koht, Paipel, kin kaweidih kadeikpen loale, kahrehong en pehmitikiong kasawihada me pwung sang mehkot me sapwung. (Ipru 5:14) Oh pil ehu, pwoson kin kakehle aramas akan en kolokolte arail tiahk mwakelekel ni ahnsou me re lelohng kapwunod laud kan. Karasepe ehu, erein senturi 20, wehi tohto kin mihla pahn manaman en kaunda mwersuwed kan, me kin idingkihong aramas lamalam marain kan en wiahda tiahk suwed kan. Ahpw, irail ko me kin pwoson mehlel Koht sohte kin men kahmahmkihla dahme re kamehlele, mendahki ma re pil mehla. Patohngete met, pwoson me poahsoanda pohn Paipel kak kawekidala aramas. E kak pwainsapahldo mour kan me mwomwen ohla oh sewese aramas akan en liksang sapwung toutou kan. Tehk ekei karasepe malaulau pwukat.

Pwoson Kak Kawekidala Mouren Peneinei

“Sang ni mehkan me ke kamehlele ke wiahdahr mehkot me mwomwen sohte kak wiawi.” Emen sounkopwung en England koasoia met ni ahnsou me e wiahda ah koasoandi me pid ihs me ahneki pwung en apwalih nein John oh Tania neira seri kan. Ni ahnsou me irail me manaman kan tehkada duwen mouren John oh Tania, ira sohte pwopwoud oh mouren nan imwara me inenen suwed. John, pwehki e kin doadoahngki wini suwed oh kin petki mwohni, kin uhd pirap de wia soangen mwersuwed teikan pwehn pwaineki tiahk suwed pwukat. E pohnsowehla nah seri kan oh arail nohno. Eri, “manaman kapwuriamwei” dahieu me wiawi?

Rahn ehu, John rongada nein rie ohl me laud sang ih nah pwutak koasokoasoia duwen Paradais. Pwehki e pwonopwonki met, e kapeidekih en pwutako pahpa oh nohno. En pwutako pahpa oh nohno iei Sounkadehdehn Siohwa kei, oh re sewese John en sukuhliki duwen Paradais sang nan Paipel. Ekis ekis, John oh Tania ahnekihla pwoson ehu me poahsoanda pohn Paipel me kawekidala ara mour. Re kapwungala nan mwoalen kopwung ara pwopwoud oh powehdi ara tiahk suwed kan. Me manaman kan me kasawih imwara diarada mehkot me mwomwen sohte kak wiawi mahso​—peneinei ehu me nsenamwahu nan ihmw ehu me mwakelekel, wasa ieu me konehng en kekeirada seri kan loale. Sounkopwungo pwung ni ah ikidikiohng “manaman kapwuriamwei” wet pwoson kapw en John oh Tania.

Mwaihl kid kei sang England, emen lih pwopwoud pwulopwul nan ehu sahpw akan nan wasa me adaneki ni lokaiahn wai “Near East” pahn wialahr ehu kisehn nempe kansensuwed ehu. E pilipilahni en iangala irail aramas rar kan ehuehu sounpar me kin kaimwisekla arail pwopwoud ni ahr mweipeseng. Mie nah seri, ahpw ah pwoudo mah douluhl sang ih. Pwehki kahrepe wet, ah peneinei kin kangoangehkin ih en mweisang ah pwoud, oh e tepiadahr wiahda koasoandi kan en wia met. Ahpw, e wie onohnop Paipel rehn emen Sounkadehdehn Siohwa kan. Ni ahnsou me Sounkadehdeo diarada duwen irair wet, sistero kawehwehda dahme Paipel kin kosoaiahki duwen pwopwoud​—me pwopwoud iei kisakis ehu sang rehn Koht oh kaidehn mehkot me emen kak mwamwahliki. (Madiu 19:4-6, 9) Liho medemedewe, ‘E kapwuriamwei pwe lih menet, emen me dohsang ie, kin songosong en doarehla ahi peneinei nindoken irail ko me karanih ie kin men ih en kauwehla ahi pwopwoud.’ Ah pwoson kapw sewese en kolokolte ah pwopwoud.

Irair ehu me suwed me kin pil kak kauwehla mouren peneinei iei kaiohlahn seri nan kapehden nohno. Ehu ripoht sang United Nations kasalehda me nan sounpar koaros mpen kaiohlahn seri nan kapehd kin mihmi ni uwen meh rar pak 45. Soangen wiewia wet me inenen kansensuwed. Loalokong en Paipel sewese emen lih nan Philippines en liksang iang wia soangen tiahk wet.

Sounkadehdehn Siohwa kan tuhwong liho, oh liho men onopki brochure me oaralap koasoia Dahme Koht Kupwurki Kitail en Wia?,a oh e tepiada onopki Paipel. Sounpwong kei mwuri, e kawehwehda ia kahrepen e pwungkihda en onopki Paipel. Liho liseian ahnsou me Sounkadehdeo tepin tuhwong, ahpw ih oh ah pwoudo koasoanehdier en kemehla serio nan kapehde. Ahpw, kilel en serio me saikinte ipwidi ni pali 24 en brochureo kamwekidada mohngiong en liho. Kawehwehn Paipel me mour me kesempwal pwehki ‘Koht me utupen mour’ me iangete kilelo kamehleleiong liho en dehr kemehla nah serio nan kapehde. (Melkahka 36:9) Ahnsouwet liho nainekiehr emen kisin seri pwelel kaselel.

Pwoson Sewese Irail Ko Me Meteikan Kin Mwamwahleki

Nan Ethiopia, ohl riemen me ara likou ko mering kohdo iang mihding en Sounkadehdehn Siohwa kan. Ni ahnsou me mihdingo imwisekla, emen Sounkadehde kan rahnmwahuwih ira ni ahlen kadek. Ohl ko uhd pekih mwohni rehn Sounkadehdeo. Sounkadehdeo sohte kihong ira mwohni, ahpw mehkot me mwahusang met. E kangoangehkin ira en kekeirada ara pwoson Koht, me “kesempwal sang kohl.” (1 Piter 1:7) Emen ira mwekidki met oh tepiada onopki Paipel. Met kawekidala ah mour. Ni ah kekeirada nan pwoson, e uhdisang simok, kamamsakau, tiahk en nenek, oh doadoahngki wini suwed me adaneki “khat.” E sukuhlkihdi en pein apwalih ih oh en dehr kin pekipekseli oh met e kin mourki mour ehu me mwakelekel oh mie katepe.

Nan Italy emen ohl me mahki sounpar 47 selidi nan imweteng oh kohieng nan imwen wini en soumwahu en moahng. Emen Sounkadehdehn Siohwa kan me ale mweimwei en pedolong nan imwen winio pwehn kihda sawas en pali ngehn onopkihong ohlo Paipel. Ohlo kekeirada mwadang. Pwoson inenen kawekidala ah mour me kahrehda tohn imweteng teikan kin sohpeila reh pwehn ale kaweidpen iaduwen ren apwaliala pein arail kahpwal akan. Ah pwoson me poahsoanda pohn Paipel kahrehda meteikan en wauneki ih, oh kaun akan en imwetengo en likihala ih.

Nan pahn kerendo kan, nuhspehpa kan kin ripohtki duwen mahwen kan me kin wiawi nan Aperika. Me keieu kamwasepwehk iei koasoipen kisin pwutak kan me kin kaianda pwehn wiahla sounpei. Wini suwed kan kin dokohng rehn seri pwukat, re kin ale kamakam suwed, oh idihd kin kohwong irail en wia soangen wiewiahn kauwehla mouren aramas pwehn pelianki arail peneinei kan pwe seri pwukat en lelepek ongete arail pali me re kin pepeiki. Pwoson me poahsoanda pohn Paipel me kehlail kak kawekidala mouren seri pwukat? Nan irair riau met wiawi.

Nan Liberia, Alex kin papah nin duwen sounpapah nan mwoahlen ihmw sarawi en Kadolik. Ni ah mahki sounpar 13, e iangala ehu pelien pwihnen mahwen oh wiahla sounpei suwed men. Pwehn kommwad nan mahwen, e kin doadoahngki wunahni. Alex kilang ienge tohto mehla, ahpw pein ih pitla. Nan 1997 e tuhwong Sounkadehdehn Siohwa oh diarada me re sohte kin mwamwahliki ih. Ahpw, re sewese ih en sukuhliki dahme Paipel kin koasoiahki duwen tiahk lemei. Alex sohla iang mahwen. Ni ahnsou me ah pwoson wie kekeirada, e kin idawehnla kaweid en Paipel wet: “E uhdahn anahne mweisang me suwed oh wia me mwahu, oh rapahki popohl ni eh kehl unsek.”​—1 Piter 3:11.

Nin doken met, pil emen seri me kin wia sounpei mahso me adaneki Samson kohdo nan kahnimwo me Alex kin ahnsouwet koukousoan loale. E kin wia emen sounkoul nan ihmw sarawi ahpw nan 1993 e wiahla emen sounpei oh kin iangala doadoahngki wini en kasahliel, wunahni, oh tiahk en nenek. Nan 1997 e kommoaldi sang ah wie doadoahk en sounpei. Samson kohkohla Monrovia pwehn iangala ehu pwihn me adaneki “special security force” ni ahnsou me emen kompoakepah kangoangehkin ih en onop Paipel rehn Sounkadehdehn Siohwa kan, oh imwilahn met, e ahnekihla pwoson ehu me poahsoanda pohn Paipel. Met kihong ih eimah en kesehla ah mouren tiahk lemei. Ira koaros, Alex oh Samson, ahnsouwet kin mourki mour meleilei oh mour mwakelekel. Mie mehkot likin pwoson me poahsoanda Paipel me kak kawekidala mour kan me kin lelohng kalokolok?

Soangen Pwosono Me Pwung

Karasaras pwukat kin wiahte ekei karasaras tohto kan me kin kasalehda duwen manaman en pwoson mehlel me kin poahsoanda pohn Paipel. Ni mehlel, kaidehn aramas koaros me kose me dene re kamehlele Koht kin mourki kosonned ile kan en Paipel. Ni mehlel, irail ko me sohte kin pwoson Koht kin mourki mour kan me mwahusang mouren irail ko me dene irail Kristian. Met pwehki pwoson me poahsoanda pohn Paipel kin pidada laud sang ihte kose me re kamehlele Koht.

Wahnpoaron Paul kawehwe ia wehwehn pwosono oh mahsanih: “Pwoson, iei kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:1) Ihme kahrehda, pwoson kin iangete kamehlele​—me kin poahsoanda pohn mehn kadehde kan me sohte peikidpe​—nan mehkan me soh sansal. E kin keieu pidada sohte peikasalki me Koht ketin mie, me e kin ketin nsenokin kitail, oh me e pahn ketin kapaiada irail ko me kin kapwaiada kupwure. Wahnpoarono pil mahsanih: “Pwe mehmen me men kohwong rehn Koht uhdahn pahn kamelele me Koht ketin mie, oh me Koht kin ketin katingih irail kan me kin raparapahki.”​—Ipru 11:6.

Met iei soangen pwosono me kawekidala mouren John, Tania, oh meteikan me sansalda nan artikel wet. E kin kahrehong irail en likih sapwellimen Koht Mahsen, Paipel, pwehn kaweidih irail en wiahda pilipil kan. E sewese irail en wiahda tounmetei mwotomwot kan pwe ren dehr wiahda pilipil me mengei, ahpw sapwung. Ekperiens pwukat koaros wekpeseng, ahpw koaros tepida duwepenehte. Emen Sounkadehdehn Siohwa kan onop Paipel rehn aramas pwukat, oh re pehmehr mehlel en dahme Paipel mahsanih: “Mahsen en Koht wie momour oh manaman.” (Ipru 4:12) Manaman en Mahsen en Koht sewese emenemen aramas pwukat en kekeirada pwoson kehlail me kawekidala mehlel arail mour.

Doadoahk en Sounkadehdehn Siohwa kan kin wiawi nan sahpw 230 samwa oh iangahki kisin deke kan. Re luhke komwi en onop Paipel. Pwekihda? Pwehki re kamehlele me pwoson me poahsoanda pohn Paipel kak wahdo kamwahu laud kan nan ahmw mour.

[Nting tikitik me mi pah]

[Kilel nan Pali 3]

Pwoson me poahsoanda pohn Pwuhk Sarawi kin kawekidala mehlel mour en aramas akan