Peren Soutuk Pahn Wiawi Nanleng De Nin Sampah?
AHMW peren kin keieu poahsoankihda iawasa ke kousoan ie? Pali moron en aramas pahn mwadang pwungki me peren kin poahsoanda keieu laud pohn ire kan me duwehte roson mwahu, ma mie wehwehn arail mour, oh nanpwung mwahu rehn meteikan. Lepin padahk en Paipel koasoiahki met: “Tungoale tehntuhke rehn aramas me ke poakepoake mwahusang tungoale uduk iou wasa me kailok mie.”—Lepin Padahk 15:17.
Ahpw, e kin kansensuwed pwe sapwatail sampah ahneki poadoapoad reirei ehu en kailok, pepei, oh soangen mwomwen wiewia suwed teikan. Ahpw, iaduwen nanleng, de wasa me ngehn akan kin mie, wasa me aramas tohto kin koapworopworki en kohla ie mwurin re mehla? Nanleng kin ahnsou koaros wia wasa ieu me popohl oh meleilei kin mie, sohte mehkot me kin kerempwa, nin duwen me aramas tohto kin lemeleme?
Paipel kin padahngki me Koht kin ketiket nanleng iangahki ngehn soh sansal rar kei me adaneki tohnleng. (Madiu 18:10; Kaudial 5:11) Paipel kahdaneki ngehn pwukat “sapwellimen Koht seri kan.” (Sohp 38:4, 7) Duwehte aramas, tohnleng kan pil ahneki pilipil saledek; kaidehn irail misihn robot kei. Ihme kahrehda, re pil kak pilada en wia dahme pwung de en wia dahme sapwung. Tohnleng kan pahn pilada en wia dahme sapwung? E pahn kapwuriamwei ong ekei en sukuhliki me sounpar kid kei samwalahro, tohnleng tohto wia met, ni mehlel, re dipada ong Koht—re pelianda ih!—Sud 6.
Sounpelian kan Nanleng
Dihp pwarada nanleng pwehki uhwong en tohnleng men, me adanekihla Sehdan (Sounpelian) oh Tepil (Sounlikamw). Tohnleng menet me mahso kin peik pilada en wia dahme sapwung sang ni pein ah pilipil saledek. Ihme kahrehda e kamwekidada tohnleng teikan en pil iang pelianda Koht, ihme lao lel ni mwein Noha, mwohnte Nohliko, tohto irail tohnleng kan me iangala Sehdan pelianda Koht.—Senesis 6:2, footnote; 2 Piter 2:4.
Tohnleng suwed pwukat sohte mwadang pokous sang nanleng. Ahpw, mweimwei ohng ren mihmi nanleng—sansal miehte ekei keinapw kan—ong sounpar kid. Ahpw, ni ahnsou me Koht sohla mweidohng tohnleng suwed pwukat en mihmi nanleng, re “pisikensang” nanleng, pwe ren kedekedeo kamakamala. Ngihl ehu nanleng eri mahsanih: “Eri, ihme kumwail nanleng kan, kumwail perenda, oh koaros me kin kousoan nanleng!” (Kaudial 12:7-12) E sansal me, tohnleng lelepek kan inenen peren pwe solahr tohnleng suwed akan me kin wiahda kahpwal akan nanleng!
Medemedewe oaritik pwukat me aramas tohto sehse, e sansal me popohl mehlel sohte kak mie ahnsou koaros me kapikipik loalokong kan kauwehla sapwellimen Koht kosonned oh mouren kosonned kan. (Aiseia 57:20, 21; Seremaia 14:19, 20) Ni pali teio, ni ahnsou me koaros kin peikiong sapwellimen Koht kosonned, popohl oh meleilei kin pweida. (Melkahka 119:165; Aiseia 48:17, 18) Eri, ma aramas koaros kin poakohng oh peikiong Koht oh limpoak ong emenemen, sampah soh pahn wia wasahn kousoan me uhdahn kaperen oh nsenamwahu? Paipel sapengki ehi!
Ahpw, iaduwen irail ko me ni elen roporop sohte men wekidala arail ahl suwed kan? Re pahn ahnsou koaros kedirepwe popohl en irail kan me uhdahn men wia kupwuren Koht? Soh, Koht kalokeiehr tohnleng suwed kan nanleng, oh e pil pahn kaloke aramas suwed kan nin sampah.
Sampah me Koakoahkda Mwakelekel
“Nanleng iei mwoalei, oh sampah iei utupen aluweluwei kat,” Koht mahsanih. (Aiseia 66:1) Pwehki ih me keieu sarawie, Koht sohte pahn mweidohng “utupen aluweluwe kan” en pwelipwelkihla me suwed kan kohkohlahte. (Aiseia 6:1-3; Kaudiahl 4:8) Duwehte ah ketin kamwakelehda nanleng sang ngehn suwed kan, e pil pahn kamwakehlehda sampah sang aramas suwed koaros, nin duwen me iren Paipel pwukat kasalehda:
“Irail kan me kin likih Siohwa pahn sapweniki sampah, a aramas suwed kan pahn koakoahksang sampah.—Melkahka 37:9, New World Translation.
“Aramas pwung—aramas lelepek—pahn kousoan nan sampah. Ahpw, Koht pahn ketin koakoahksang sampah aramas suwed akan oh irail me widing kan pahn sohrala.”—Lepin Padahk 2:21, 22, NW.
“Sampah wet [wehwehki tohnsampah me suwed] oh mehkoaros nin sampah me aramas kin inengieng pahn sohrala; ahpw me kin kapwaiada kupwuren Koht pahn momour kohkohlahte.”—1 Sohn 2:17.
Sampah Pahn Wie Popohlte?
Mendahki Pwuhk Sarawi kasansalehda me mie ahnsou ehu me Koht sohla pahn mweidohng me suwed en mihmi, iaduwen kitail kak kamehlele me me suwed, ni irail pahn sohrala, sohte pahn pwurehng pwarada? Pwe, mwurin Nohliko ni mwein Noha, suwed pil pwurehng pwarada ni uwen ieu me Koht anahne en kauhdi en aramas suwed kan pilahn kan ni ah kapingada arail lokaia.—Senesis 11:1-8.
Kahrepe keieu me kitail en likih me me suwed kan sohte pahn pwurehng pwarada iei me sampah sohla pahn mih pahn kaunda en aramas duwen me wiawi mwurinte Nohliko. Ahpw, Wehin Koht pahn kaunda sampah. Wehi wet me kakaun sang nanleng, pahn kelehpw wia koperment me pahn kaunda sampah. (Daniel 2:44; 7:13, 14) E pahn pelianda mehmen me song en kapwurehdo me suwed. (Aiseia 65:20) Ni mehlel, e pahn kedekedeo kamwomwala utupen me suwed kan—Sehdan me Tepil—iangahki ngehn saut akan, tohnleng suwed kan me kin idawenla ih.—Rom 16:20.
Dahme Kahrehda Ekei Kohla Nanleng
Ahpw, aramas tohto me kin wadek Paipel, kin ese duwen mahsen kan en Sises me mahsanih: “Pere tohto mie nan tehnpesen Semei; . . . I pahn kohla oh kaunopadahng kumwail deumwail.” (Sohn 14:2, 3) Met soh kin uhwong padahk en mour soutuk nan paradais nin sampah?
Padahk pwukat sohte kin uhpene. Ni mehlel, ehu kin utung meteio. Paipel mahsanih me ihte me malaulau en Kristian lelepek kan—me iei irail 144,000—me pahn iasada nin duwen ngehn kan pwehn mour nanleng. Dahme kahrehda re alehki kating kaselel wet? Pwehki re wiawikihda pwihno me Sohn kilangada nan kapoudial ehu en irail kan me “pwurehng mourda oh iang Krais kaunda nin duwen nanmwarki erein sounpar kid.” (Kaudial 14:1, 3; 20:4-6) Kapahrekiong irail me lik kan nan sampah, irail 144,000 ko uhdahn wia “kisin pwihn tikitik” ehu.—Luk 12:32.
Atail Pilipil—Mour de Mehla
Dahme kitail anahne en wia pwehn alehdi kating en mour kohkohlahte nan Paradais nin sampah? Dahme kitail anahne keieu wia iei en onopki Mahsen en Koht, Paipel Sarawi. Sises mahsanih nan sapwellime kapakap: “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronehdohr.”—Sohn 17:3.
Kapwaiada loalokong wet iei pil ehu ahl en alehdi nsenamwahu soutuk. (Seims 1:22-24) Irail ko me kin momourki Mahsen en Koht kin ahneki koapworopwor en kilang sampah wiahla Paradais ehu, nin duwen me Paipel inoukihda.