Sounapwalih Kan Oh Ministerial Servant Kan Kin Idihdda Sang Powe
“Eri, kumwail mwasamwasahn pein kumwail oh pil sihpw akan koaros me ngehn sarawi ketikihong kumwail en apwahpwalih.”—WIEWIA 20:28.
1, 2. Iaduwen pwuhken Aiseia 60:22 pweida?
MAHS MAHSIE Siohwa kohpadahr me pahn mie mehkot kapwuriamwei pahn wiawi ni imwin ahnsou. Soukohp Aiseia mahsanih: “Pil peneinei ehu me keieu tikitik oh sohte wede rehmwail pahn lapalapala rasehng wehi lapalap ehu. I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me Kauno [“Siohwa, New World Translation].”—Aiseia 60:22.
2 Mie mehn kadehde me kokohp wet kin pweida nan rahnpwukat? Ei, uhdahn mie! Mpen pahr 1870, ehu mwomwohdiso en sapwellimen Siohwa aramas wiawihda nan Allegheny, Pennsylvania, U.S.A. Sangete tepida tikitik wet, rahnwet mwomwohdiso wie tohtohkihla mwomwohdiso nen kei nin sampah pwon. Sounkalohk en Wehio rar kei—wehi kehlail ehu—kin ni ahnsouwet tuhpene nan mwomwohdiso me tohtosang 91,000 oh nan sahpw 235 nin sampah pwon. Ni soh peikidpe, met kin wia mehn kadehde ehu me Siohwa kin ketin koasoanehdi en kamwadangala doadoahk en kihpene tohnkaudok mehlel akan mwohn “kahn kamakam kowahlap” pahn tepida, me inenen kerendohr.—Madiu 24:21; Kaudiahl 7:9-14.
3. Ia wehwehn papidaisla ‘ni mwaren Sahm, Sapwellime, oh Ngehn Sarawi’?
3 Mwurin irail pahn wiahda pein arail inou ong Siohwa, nin duwen me Sises kaweidki, aramas me tohtohki rar kei kin papidaisla “ni mwaren Sahm oh Sapwellime oh Ngehn Sarawi.” (Madiu 28:19) Papidaisla ni “mwaren Sahm” kin wehwehki me aramas akan me inoukihong ahr mour ong Siohwa kin pohnese Ih nin duwen Samarail nanleng oh Utupen Mour oh irail kin uhpaiong sapwellime kaunda. Papidaisla ‘ni mwaren Sapwellime’ kin wehwehki me re kin wehkada me Sises Krais nin duwen ahr Sounkomour, Kaun, oh Nanmwarki. Irail pil kin kamehlele pwukoa en sapwellimen Koht ngehn sarawi, de manaman, me kin kahluwa arail mour. Met kin kasalehda me re papidaisla ‘ni mwaren ngehn sarawi.’
4. Iaduwen Kristian sounpapah kan kin kamanamanla?
4 Ni ahnsou irail kin papidaisla, irail kin wiahla sounkalohk kapw kan me kamanamanla nin duwen sounpapah kan en Siohwa Koht. Ihs me kin kamanahla irail? Mahsen kan me ntingihdi nan pwuhken 2 Korint 3:5 kin kadoadoahk ong irail: “Atail koahiek en wia doadoahk wet kin kohsang rehn Koht.” Irail kin kesempwaliki wahu kaselel wet pwe pein Siohwa Koht kin kamanahla irail! Mwurin ahr kin papidais, irail pahn kak pousehla kekeirada nin duwen sounpapah kan en “rongamwahu” ihte ma irail pahn mweidong sapwellimen Koht ngehn sarawi en kahluwa irail oh ma irail pahn kapwaiada sapwellime Mahsen.—Madiu 24:14; Wiewia 9:31.
Idihdda sang Koasoandi en Diokrasi (Theocracy) Kaidehn sang Koasoandi en Democracy
5. Irail Kristian sounapwalih kan oh ministerial servant kan kin pilipilda ni koasoandi en democracy? Kawehwe.
5 Sounapwalih koahiek kan oh ministerial servant kan kin anahne apwalih anahn akan ni pali ngehn en irail sounkalohk kan me kin wie tohtohla. (Pilipai 1:1) Iaduwen soangen ohl ngehnin pwukat kin idihdda? Kaidehn duwehte dahme Kristendom kin wia. Karasepe ehu, Kristian sounapwalih kan sohte kin pilipilkihda koasoandi en democracy (me wehwehki kaunda en aramas) me pali moron en aramas me iang mwomwohdiso pahn usuda emen. Ahpw, idihdda pwukat kin wiawihda ni koasoandi en diokrasi. Ia wehwehn diokrasi?
6. (a) Ia wehwehn diokrasi? (b) Dahme kahrehda kitail kak nda me idihdda kan en irail sounapwalih kan oh ministerial servant kan kin wiawihda ni koasoandi en diokrasi?
6 Pwehn mengei en wehwehki, diokrasi kin wehwehki kaunda en Koht. Sounkadehdehn Siohwa kan kin pein utungada sapwellime kaunda oh doadoahkpene pwehn kapwaiada kupwuren Koht. (Melkahka 143:10; Madiu 6:9, 10) Idihdda kan me kin wiawiong Kristian sounapwalih kan (me wehwehki elder kan) oh ministerial servant kan kin wiawihda ni koasoandi en diokrasi pwehki pilipil oh idihddahn ohl koahiek pwukat kin wiawihda nin duwen sapwellimen Koht koasoandi me kileledi nan Pwuhk Sarawi. Nin duwen “Kaun Lapalap en mehkoaros,” Siohwa kin sapwellimaniki pwung en koasoanehdi koasoandi kan en sapwellime pwihn sansal.—1 Kronikel 29:11; Melkahka 97:9.
7. Iaduwen Sounkadehdehn Siohwa kan kin wia arail koasoandi kan?
7 Sounkadehdehn Siohwa kan kin weksang pelien lamalam tohto nan Kristendom pwe re sohte kin pein wiahda arail koasoandi ni pali ngehn. Kristian mehlel pwukat kin nantihong kolokolete sapwellimen Siohwa koasoandi kan. Arail sounapwalih kan sohte kin ale arail pwukoa sang mwomwen koasoandi en mwomwohdiso, kaunen pelien lamalam kan. Ma koasoandi kan en sampah wet kin songen kerempwa idihdda pwukat, sapwellimen Siohwa aramas akan sohte kin mweidohng koasoandi en sampah en kauwehla koasoandi sarawi kan. Re kin kolokolete arail pwoson nin duwen me wahnpoaron kan nan keieun senturi mahsanih: “Se uhdahn pahn peikiong Koht, a kaidehn aramas.” (Wiewia 5:29) Ihme kahrehda, Sounkadehde kan kin uhpaiong Koht ni mehkoaros. (Ipru 12:9; Seims 4:7) Idawehnla koasoandi en diokrasi kin kahrehong emen en kenikenla rehn Koht.
8. Iaduwen koasoandi kan en democracy oh diokrasi (theocracy) wekpeseng?
8 Nin duwen ladu kan en Siohwa, Kaunen lahng oh sampah, kitail wehwehki duwen ia wekpeseng en koasoandi en democracy oh diokrasi (theocracy). Koasoandi en democracy (kaunda en aramas) kin koasoanehdi aramas akan pwe ren songen kaitar wiliepen aramas en kak kipe koaros oh arail koasoandi kin kalap wiawi ni mwomwen kampein oh alehda usuhs en pali moron en aramas. Koasoandi en diokrasi ong idihada aramas akan nan mwomwohdiso sohte kin pid soangen koasoandi pwukat. Idihdda pwukat sohte kin kohsang rehn nsenen aramas akan; oh re pil sohte kin poahsoankihda pwihn akan me kosonned en aramas kin kauwada. Pohl, ni sansal, kin koasoia duwen ni ahnsou Sises oh Siohwa idihada ih en “pwaisanki pwukoahn wahnpoaron en mehn liki kan,” e padahkiong mehn Kalesia kan me “eh malipilip ong wahnpoaron sohte tepisang rehn aramas de sang ni paeker en aramas, ahpw sang rehn Sises Krais oh Koht Sahm me ketin kaiasada Sises sang mehla.”—Rom 11:13; Kalesia 1:1.
Idihddahki Ngehn Sarawi
9. Dahme Wiewia 20:28 mahsanih duwen irail Kristian sounapwalih idihdda kan?
9 Pohl katamanki irail sounapwalih kan me kin koukousoan nan Episos me Koht ketin idihiraildahki manaman en ngehn sarawi. E mahsanih: “Eri, kumwail mwasamwasahn pein kumwail oh pil sihpw akan koaros me ngehn sarawi ketikihong kumwail en apwahpwalih. Kumwail en wia silepen mwomwohdisohn Koht, me e ketin sapwellimankilahr pwehki ntahn sapwellime Iehros.” (Wiewia 20:28) Irail Kristian sounapwalih kan anahne en mweidong ngehn sarawi en kahre irail kapwaiada ahr pwukoa kan nin duwen sounapwalih kan en sapwellimen Koht pwihn. Ma ohl emen idihdda en ahneki pwukoa ehu ahpw mwuhr e sohlahr kin kapwaiada kosonned kan me kohsang powe, ehu rahn ngehn sarawi pahn kihsang reh ah pwukoa.
10. Iaduwen ngehn sarawi kin wia mehkot kesempwal ong idihada brother kan?
10 Iaduwen ngehn sarawi kin wia mehkot kesempwal ong idihdda pwukat? Keieu, irail akan me kileledi me kesempwal en mih rehn irail pwukat me wia sounepwelpen pali ngehn en tohnmwomwohdiso kin kohsang ni kaweid en ngehn sarawi. Nan sapwellime kisinlikou kan ong Timoty oh Taitus, Pohl kileledi irair akan me irail sounapwalih kan oh ministerial servant kan anahne kapwaiada. E koasoia duwen irair 16. Karasepe ieu, sounapwalih kan uhdahn pahn pwung, kak kaunda nsene, oh e pahn ese dahme e wiewia, oh ese koasoandi, e uhdahn pahn kasamwolong aramas en keiru men nan imwe, e uhdahn pahn kak padahk, oh e uhdahn pahn kak apwahpwalih mwahu eh peneinei. Re sohte pahn kamamsakau, oh sohte pahn poakohng mwohni, oh irail pahn kak kaunda pein nsenarail. Duwehte ong irail ohl akan me kin men idihdda nin duwen ministerial servant kan, irail pil anahne kapwaiada irair kesempwal kan.—1 Timoty 3:1-10, 12, 13; Taitus 1:5-9.
11. Ia ekei irair akan me ohl akan anahne kasalehda ma re men ahneki pwukoa nan mwomwohdiso?
11 Kousapahl en irair pwukat kin kasalehda me irail akan me kin tiengala mwowe nan sapwellimen Siohwa kaudok pahn anahne tiahk mwahu nin duwen Kristian mehlel men. Ohl akan me kin men ahneki pwukoa en mwomwohdiso pahn anahne kasalehda me ngehn sarawi kin doadoahk rehrail. (2 Timoty 1:14) E pahn anahne sansal me sapwellimen Koht ngehn sarawi me duwehte wahn ngehn en “limpoak, peren, popohl, kanengamah, kadek, loalopwoat, opampap, oh liksang me suwed” kin doadoahk rehn ohl pwukat. (Kalesia 5:22, 23) Wah pwukat pahn sansalda ni ahr wiewia kan ong iengarail me pwoson akan oh pil aramas teikan. Ahpw, ni mehlel, ekei pahn inenen mwahu en kasalehda ekei wahn ngehn akan, ahpw ekei pahn mwahu en kasalehda irair teikan nin duwen sounapwalih kan. Ahpw, ong aramas akan me men wiahla sounapwalih oh ministerial servant idihdda kan, arail mour ni ehu ehu rahn pahn anahne kasalehda me re wiahla ohl ngehnen kei me kin kapwaiada koasoandi kan en Mahsen en Koht.
12. Ihs me kitail kak ndahki me ngehn sarawi idihada irail?
12 Ni ahnsou Pohl kangoange meteikan en kahlemengih ih, e kak ni nsenmwakelekel wia met pwehki pein ih kin kahlemengih Sises Krais, me ‘ketikihong kitail karasepe mwahu, ih pil duwen kitail pahn idawehn oh kahlemengih.’ (1 Piter 2:21; 1 Korint 11:1) Irail akan me kin ahneki irair en ngehn me anahn ong idihdda pwukat ni ahnsou me irail idihdda ong wia sounapwalih kan oh ministerial servant kan, kitail kak koasoia me irail idihdda sang ni manaman en ngehn sarawi.
13. Iaduwen ngehn sarawi kin sewese irail akan me kin pilada ohl akan en ahneki pwukoa nan mwomwohdiso?
13 Pil mie ahl ehu me ngehn sarawi kin kadoadoahkong pilada oh idihada sounapwalih kan. Sises mahsanih me ‘Sahm me ketiket nanleng soh pahn ketikihong ngehn sarawi irail kan me kin peki reh.’ (Luk 11:13) Ni ahnsou elder kan nan mwomwohdiso pahn tuhpene pwehn pilada ohl akan me kak alehdi pwukoa en mwomwohdiso kan, irail kin kapakap pwe sapwellimen Koht ngehn sarawi en sewese irail wia pilipil mwahu. Arail pilipil kan kin poahsoankihda Mahsen en Koht, oh ngehn sarawi kin sewese irail en dehdehki ma aramaso kin kapwaiada koasoandi en Pwuhk Sarawi. Irail akan me pahn pilada aramas akan, sohte pahn mweidong mwomwen aramas akan, de eh sukuhl laud kan de koahiek kan ong en kamwekid irail en wiahda arail pilipil kan. Irail kin keieu tehk ma aramaso kin wia emen me mah ni pali ngehn oh ma tohn mwomwohdiso sohte pahn pweiek tuhwong ih pwehn ale kaweid en pali ngehn.
14. Dahme kitail sukuhliki sang Wiewia 6:1-3?
14 Edetehn pwihn en sounapwalih kan oh sounapwalih en Circuit kan kin pilada brother kan en wiahla sounapwalih kan oh ministerial servant kan, idihdda kan en brother pwukat kin wiawi duwehte dahme wiawi nan keieun senturi. Ehu ahnsou, anahn ehu pwarada ong ohl koahiek ngehnen kan en apwalihada pwukoa kesempwal ehu. Pwihn en Governing Body kihda kaweid wet: “Eri, riat ako, kumwail pilada sang nanpwungamwail ohl isimen me kumwail ese me diren ngehn sarawi oh erpit, se ahpw pahn mweidohng irail doadoahk wet pwe re en pwaisanki.” (Wiewia 6:1-3) Edetehn mie ohl akan me kin wiahda arail pilipil kan ong ihs me re leme pahn kak ahneki pwukoa pwukat, ohl likilik kan nan Serusalem me idihada ohl akan. Rahnwet pil mie soangen koasoandi duwehte met.
15. Iaduwen Governing Body kin iang pidada idihada ohl akan?
15 Governing Body en Sounkadehdehn Siohwa kan kin idihada irail brother kan koaros me kisehn pwihn en “Branch Committee.” Ni ahnsou irail pahn tehk ihs me pahn kak kapwaiada pwukoa laud wet, Governing Body kin medemedewe duwen mahsen en Sises: “Pwe aramas me aleier uwe ehu me laud, uhdahn pahn kihda uwe ehu me laud; a me kohwahkier uwe ehu me inenen laud mehlel, uhdahn pahn kapwurehdo uwe ehu me pil inenen laud mehlel.” (Luk 12:48) Likin ahr kin idihada irail brother kan nan “Branch Committee,” pwihn en Governing Body kin idihada Sounapwalih kan nan Bethel (Bethel elders) oh Sounapwalih en Circuit oh District kan. Ahpw, re pil kin kihong pwukoa kan ong irail brother likilik kan en wiliandi irail en idihada ohl teikan. Pwuhk Sarawi kan pil kin mahsanih duwen koasoandi wet me wiawier mahs.
‘Ke en Idihdda Ekei, Tamataman ei Koasoien Peneu kan’
16. Dahme kahrehda Pohl pwilikihdi Taitus nan Krihd, oh dahme met kin kasansalehda duwen idihdda kan me kohsang powe nan rahnwet?
16 Pohl padahkiong ienge tohndoadoahk Taitus: “I pwilkinuhkedi nan Krihd pwe ke en kapwungala soahng koaros me anahnepe mie en wiawi, oh ke en idihada ekei me mah kan en mwomwohdiso nan kahnimw kan koaros. Tamataman ei koasoien peneu kan.” (Taitus 1:5) Mwurin met, Pohl kileledi duwen irair akan me Taitus pahn kilang ma ohl akan me pahn kak wia pwukoa pwukat. Rahnwet, Governing Body kin idihada brother koahiek kan nan rahn ohpis kan (Branches) pwehn wiliandi irail idihada sounapwalih kan oh ministerial servant kan. Ihme kahrehda, irail akan me kin wiliandi Governing Body kin, ni keneinei, wehwehki oh idawehn sawas en Pwuhk Sarawi ni ahnsou irail pahn idihada ohl akan. Ihme kahrehda, Governing Body kin apwalihada idihdda kan en ohl koahiek kan me kin papah nan mwomwohdiso kan en Sounkadehde Siohwa kan nin sampah pwon.
17. Iaduwen rahn ohpis kin idihada ohl akan ni ahnsou mwomwohdiso kan kin kadaralahng rehrail arail pilipil kan en sounapwalih kan oh ministerial servant kan?
17 Ni ahnsou pilipil kan ong idihada ohl akan en wiahla sounapwalih kan oh ministerial servant kan kin pekederalahng rahn ohpis en Watch Tower Society, ohl koahiek kan kin likih sapwellimen Koht ngehn sarawi en sewese irail en pilada ihs me re pahn idihada. Ohl pwukat sohte kin karuwaru en idihada emen pwe irail ese me irail pil pahn kak pwukoahki ma brother me re pilada sohte konehng ale pwukoa.—1 Timoty 5:22.
18, 19. (a) Iaduwen ekei idihdda kan kin wiawi? (b) Iaduwen koasoandi en pilipil kan oh idihdda kan kin wiawi?
18 Mie soangen idihdda kei me pakairpe kin wiawi ni kisinlikou me stamp en ohpis kin mie oh kohsang rehn pwihn ehu me kosonned kin kauwada. Soangen kisinlikou wet kin wiawi pwehn wia idihddahn brother kan me pahn tohto sang mehtehmen nan mwomwohdiso.
19 Idihdda kan en diokrasi kin kohsang rehn Siohwa ki sapwellime Ohl oh sapwellimen Koht pwihn nin sampah, “ladu lelepek oh loalokong” oh Governing Body. (Madiu 24:45-47) Soangen pilipil oh idihdda pwukat koaros kin kaweid sang ni manaman en ngehn sarawi. Met kin wiawi pwehki irair kan me kileledi me kesempwal en mih rehn irail sounapwalih kan oh ministerial servant kan, irair pwukat kin kohsang Mahsen en Koht oh irail me ntingihdi Mahsen en Koht mih pahn kaweid en ngehn sarawi, oh pil, emen me idihdda kin kasalehda me e kin kapwarehda wahn ngehn kan. Ihme kahrehda, kitail pahn kak kamehlele me idihdda kan kin kohsang rehn ngehn sarawi. Duwehte dahme kin wiawi nan keieun senturi duwen koasoandi en idihada irail sounapwalih kan oh ministerial servant kan, koasoandiohte kin pil wiawi nan rahnpwukat.
Kalahnganki Sapwellimen Siohwa Kaweid kan
20. Dahme kahrehda kitail pil ahneki soangen pepehm kan duwehte Depit me sansalda sang sapwellime koul me ntingihdi nan Melkahka 133:1?
20 Pwehki ni ahnsou wet, ketinain en pali ngehn oh doadoahk en kalohki Wehio kin wie kekeirada, kitail kak kalahnganki me Siohwa kin keieu pwukoahki idihada sounapwalih oh ministerial servant kan. Koasoandi wet me kohsang Pwuhk Sarawi kin sewese kitail en kolokolete sapwellimen Koht koasoandi pwung kan nanpwungatail nin duwen Sounkadehdehn Siohwa kan. Oh pil, ngehnen Kristian oh ngoang me ohl pwukat kin kasalehda kin kihda sawas laud ong atail popohl oh miniminpene nin duwen sapwellimen Siohwa ladu kan. Duwehte sounmelkahka Depit, kitail kak mwekidki dahme e koulki: “Ia uwen lingan, ia uwen kansenamwahu en sapwellimen Koht aramas akan ar kin miniminpene!”—Melkahka 133:1.
21. Iaduwen Aiseia 60:17 kin pweida rahnwet?
21 Ia uwen laud atail kalahnganki sapwellimen Siohwa kaweid kan ki sapwellime Mahsen oh ngehn sarawi! Ia uwen wehwe mwahu mahsen ako me ntingihdi nan Aiseia 60:17: “I pahn ketikihong uhk kohl a kaidehn prons, silper oh prons a kaidehn mete oh tuhke, oh mete, kaidehn takai. Omw kaun akan solahr pahn kahpwalihiuk; pwe I pahn koasoanehdi pwe re en kakaun ni pwung oh popohl.” Nin duwen koasoandi en diokrasi kin kekeirada nanpwungen Sounkadehdehn Siohwa kan, kitail kin paiekihda irair mwahu kan nan sapwellimen Koht pwihn sansal nin sampah.
22. Dahme kitail kin kalahnganki, oh dahme kitail anahne nantiong en wia?
22 Atail kalahnganki koasoandi en diokrasi kin wiawi rehtail. Oh kitail pil kalahnganki doadoahk laud ahpw katapan kan me sounapwalih idihdda kan oh ministerial servant idihdda kan kin wiewia. Kitail sang mongiongatail unsek kin kapinga Samatail nanleng limpoak men, me ketikihong kitail kepwehpwe ni pali ngehn. (Lepin Padahk 10:22) Eri, kitail pahn nantihong peipeian sapwellimen Siohwa pwihn. Me keieu kesempwal, kitail en pousehla ehupene nanpwungatail pwehn kawauwih, kapinga, oh kalinganahda mwaren Siohwa.
Iaduwen Ke Pahn Sapeng?
• Dahme kahrehda kitail kak ndahki me idihddahn sounapwalih oh ministerial servant kan kin ale arail pwukoa sang koasoandi en diokrasi (theocracy), kaidehn democracy?
• Iaduwen Kristian ohl koahiek kan kin idihdkihda ngehn sarawi?
• Iaduwen Governing Body kin iang pidada idihada sounapwalih oh ministerial servant kan?
• Dahme kahrehda kitail en kalahnganki sapwellimen Siohwa koasoandi kan (koasoandi en diokrasi) me pid idihddahn ohl koahiek kan nan mwomwohdiso?
[Kilel nan pali 11]
Sounapwalih kan oh ministerial servant kan kin ale kapai kaselel en doadoahk sang ni arail kin idihdkihda koasoandi en diokrasi