Ripoht En Sounkalohk Kan En Wehio
Tohn Latvia kin Mwekidki Rongamwahuwo
PAIPEL kin kasansalehda me Koht kin kupwurki “aramas koaros en ale komourparail oh marainkihla me mehlel.” (1 Timoty 2:4) Irail ko me erein sounpahr tohto sohte ahneki ahnsou mwahu en rong Rongamwahuwo kin ahnsou wet kakehr rong! Nan Latvia, me duwehte wasa teikan nan sampah, aramas sohte lipilipil ma re sounpahr depe oh wasa re kin kohsang ie kin mwekidki Rongamwahuwo, nin duwen me ekspiriens pwukat kin kasalehda.
• Nan Rēzekne, kahnimw ehu ni pali mesehn Latvia, lih emen oh nah serepein (teenage) idek rehn lih emen pohn ahlo wasao me re men kohla ie. Mwurin liho, me wia emen Sounkadehdehn Siohwa, kihong ira kaweid, e luhke ira en iang towehda mihding en Sounkadehdehn Siohwa kan.
Pwehki nohno oh nah serepeino kin perenki sarawi, re koasoanehdi me re pahn kohla ni mihdingo. Ahnsou me ira kohkohla wasahn mihdingo, ira pwungkipene me ira pahn diarada mehkot me sohte konehng ni mihdingo, re pahn mwadang kohkohla. Ahpw, mihdingo me inenen mwahu, eri, ira sohla medewe me re pahn kohkohla. Re pwungkihda en onop Paipel oh tepida towehda mihding kan kaukaule. Nan erein sounpwong siluhte, re kasalehda ara ineng en iang doadoahk en kalohk oh re kin kilikilangwohng ehu rahn en papidaisla.
• Nan kahnimw ehu ni pali kapi en Latvia, emen Sounkadehde tuhwongada Anna me mahki sounpahr 85, me kasalehda ah perenki oh pwungkihda en onop Paipel. Nah serepeino oh tohn eh peneinei teikan kin uhdahn uhwong ih kehlail. Ahpw, Anna sohte mweidohng met, de ah mahla oh soumwahu, en ireihdisang pousehlahte eh onop Paipel.
Ehu rahn, Anna padahkiong nah serepeino me e pahn papidaisla. Nah serepeino sapengki: “Ma ke papidaisla, I pahn kadaruhkalahng nan imwen me mah kan.” Ahpw, mehn kamasepwehk wet sohte kauhdi Anna. Pwehki paliwere luwetkihla ah mah, e papidaisla nan pein imweo.
Iaduwen nein Anna serepeino mwekidki met? E wekidala ah lamalam, oh e kaunopada kisin mwenge tohrohr kis ong ah nohno mwurin papidaiso. Ih eri idek rehn ah nohno, “Pwehki ahnsou wet ke papidaislahr, ia omw pepehm?” Dahme Anna sapengki? “Duwehte seri pwelel men me ahpwtehn ipwidi!”
• Nan December 1998, Sounkadehdehn Siohwa riemen tuhwongada emen sounpei en wasao me mahso adaneki Soviet Union me kommoal sangehr sounpei. Pwehki ohlo kamehlele Sounkapikada, e pwungkihda onop Paipel, oh mwuri ah pwoudo iangala onopo. Re kekeirada mwadang oh mwadangete mwurin met re wiahla sounkalohk kan me saikinte papidais. Summero mwurin mwo, ohlo papidaisla. Eh pwopwoudo ara limpoak laud ong mehkan en pali ngehn kin wia mehn kangoang ehu ong koaros nan mwomwohdiso. Patehngete met, re kin toukihda pein ira nan doadoahk en pwurehng onehda ehu imwen kousoan wasao ong ehu Kingdom Hall kaselel.