Ke Kin Poadidiong Padahk Mehlel?

“Kumwail dehr kahlemengih wiewia kan en sampah wet, ahpw mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwuren Koht, dahme mwahu, oh dahme e kin ketin kupwurperenki, oh dahme unsek.”​—ROM 12:2.

1, 2. Dahme kahrehda e sohte mengei en wia Kristian mehlel men nan rahnwet?

PWEHN wia Kristian mehlel nan imwin rahn pwukat​—“ahnsou apwal” pwukat—​inenen apwal. (2 Timoty 3:1) Ni mehlel, ma emen men kahlemengih mehn kahlemeng mwahu en Krais, e anahne kalowehdi sampah. (1 Sohn 5:4) Tamanda dahme Sises mahsanih duwen elen Kristian: “Kumwail keid nan ewen kehl wetikitik, pwe elen kolahng nan ehl me tehlap oh mengei, oh aramas ngeder kin keid ie. A wenihmw me kolahng mour me wetikitik oh elen kolahng ie me apwal, eri, me malaulau me kin diar.” E pil mahsanih: “Mehmen me men idawehniehdo e uhdahn pahn tounmeteikihla pein ih, kapaikada eh tuhke rahn koaros, oh idawehn ie.”​—Madiu 7:13, 14; Luk 9:23.

² Ni ahnsou me emen Kristian kin diaradahr ahl tehtik me kohlahng mour, ahn Kristiano ah mehn akadei mwurin met iei en kekeidweite nan ahl tehtik. Dahme kahrehda met kin apwal en wia? Pwehki atail inou oh papidais kin kahrehong Sehdan en doadoahngki eh widing suwed kan pwehn kaluwetala kitail. (Episos 6:11; footnote) E kin tehk duwen pein atail luwet akan oh e pahn doadoahngki mehpwukat pwehn kauwehla atail kehl en pali ngehn. Pwehki e songehr en kaluwetala Sises, kitail sohte kak ahneki madamadau me e sohte pahn song en kaluwetala kitail.​—Madiu 4:1-11.

Ahn Sehdan Widing Kan

3. Iaduwen Sehdan kahrehong Ihp en ahneki madamadau en peikasal?

³ Ehu ahl me Sehdan kin doadoahngki en kaluwetala kitail iei en ahneki madamadau en peikasal. E kin rapahki luwet akan nan atail tetehn mahwen en pali ngehn. Nin tepio, e doadoahngki met pwehn kaluwetala Ihp, oh e idek reh: “Mehlel apwoat me Kauno Koht ketin keinepwihsang kumwa en dehr tungoale wahntuhke kan en nan mwetuwelet?” (Senesis 3:1) Met wehwehki me Sehdan mwomwen nda met: ‘Koht uhdahn kak kihong uhk soangen kosonned wet? E pahn kak keinepwihsang uhk mehkot mwahu? Koht mwahngih me ni ahnsowohte me kumwa pahn tungoale wahntuhkehn, kumwa pahn marainla oh duwehla Koht, pwe kumwa pahn esehla dahme mwahu oh dahme suwed.” Sehdan kahrehong Ihp en tepida peikasal.​—Senesis 3:5.

4. Soangen peikasal dah kei pahn kak kaluwetala ekei aramas nan rahn pwukat?

⁴ Iaduwen Sehdan kin doadoahngki lidip wet nan rahnpwukat? Ma kitail pahn soukautih en wia atail wadawad en Pwuhk Sarawi, pein atail onop, atail kapakap kan, oh atail doadoahk en Kristian oh mihding kan, kitail kak tepida ahneki peikasal kan me aramas teikan kin koasoia. Karasepe ehu: “Iaduwen kitail ese me met padahk mehlel me Sises kin kasukuhliki sapwellime kan?” “Kitail kin uhdahn mih ni imwin rahn akan? Pwe ni mehlel, kitail miher nan senturi 21.” “Armakedon pahn kereniong wiawi, de e saikinte keren?” Ma kitail ahneki soangen peikasal duwehte mehpwukat, dahme kitail kak wia pwehn kihsang?

5, 6. Dahme kitail anahne wia ma kitail ahneki peikasal kan?

⁵ Seims kin kihda kaweid konehng kan ni eh ntingihdi met: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie. Ahpw kumwail uhdahn pahn kapakap ni pwoson oh sohte peikasal; pwe me kin peikasal rasehng iloak en nan madau kan me kin pwungupwungudengkiseli kisinieng. Soangen aramas menet sohte kak koasoanehdi eh lamalam, oh pil aramas kohwei kohdo ni eh mwekid koaros, eri, en dehr lemehiong me e pahn kak ale mehkot sang rehn Kauno [“Siohwa,” New World Translation].”​—Seims 1:5-8.

⁶ Eri, dahme kitail anahne wia? Kitail anahne kapakap oh “peki rehn Koht” en ketikihdo pwoson oh sawas pwehn wehwehki soahng kan me kitail sukuhliki oh pil sawas pwe kitail en nantihong wia pein atail onop me pid atail peidek kan de peikasal kan me kitail kin ahneki. Kitail pil kak peki sawas sang rehn irail akan me kehlail nan pwoson, oh kitail en dehr peikasalki me Siohwa sohte pahn kihong kitail sawas me kitail anahne. Seims pil koasoia met: “Eri, kumwail peikiong Koht, oh pelianda Tepil, e ahpw pahn tangasang kumwail. Kumwail keido mpen Koht, oh e pahn ketin keiong mpamwail.” Ei, kitail sohlahr pahn peikasal ni ahnsou kitail pahn karanih Koht ni atail onop oh kapakap.​—Seims 4:7, 8.

7, 8. Ia ekei kasalepen kaudok mehlel me Sises padahki, oh ihs me kin kapwaiada mehpwukat?

⁷ Karasepe ehu, peidek wet: Iaduwen kitail ese me atail kaudok iei kaudok me Sises kin kasukuhliki aramas akan? Pwehn kak sapeng peidek wet, kitail anahne tehk duwen kasansalpen kaudok mehlel. Pwuhk Sarawi kin kasansalehda me irail Kristian mehlel akan anahne kasalehda limpoak mehlel nanpwungarail. (Sohn 13:34, 35) Irail anahne kasarawihla mwaren Koht, Siohwa. (Aiseia 12:4, 5; Madiu 6:9) Re anahne kalohkiseli mwaren Koht.​—Eksodus 3:15; Sohn 17:26.

⁸ Pil ehu kasansalpen kaudok mehlel iei kaudok me kin kawauwih Mahsen en Koht, Pwuhk Sarawi. Pwuhk kaselel wet kin kasansalehda duwen sapwellimen Koht irair akan oh sapwellime kupwur kan. (Sohn 17:17; 2 Timoty 3:16, 17) Oh pil, Kristian mehlel akan anahne kalohkiseli duwen Wehin Koht me ihte koapworopwor ong aramas akan ong alehdi mour soutuk nin paradais sampah. (Mark 13:10; Kaudiahl 21:1-4) Irail pil anahne katohrohrsang politik suwed kan en sampah wet iangahki mour samin kan en sampah wet. (Sohn 15:19; Seims 1:27; 4:4) Ihs nan rahnpwukat me kin kapwaiada koasoandi pwukat? Ire mehlel kan kin kasansalehda me mie pasepeng ehute ong peidek wet​—Sounkadehdehn Siohwa kan.

Dahme Ke Pahn Wia Ma Peikasal kin Mihmihte Nan Ahmw Madamadau?

9, 10. Dahme kitail kak wia pwehn kihsang peikasal kan me kin mihmihte nan atail madamadau kan?

⁹ Dahme kitail pahn wia ma kitail kin ahneki peikasal tohto? Dahme kitail anahne wia? Nanmwarki loalokong Solomon sapengki peidek wet: “Samwa, padahngki dahme I padahkihwei, oh dehr manokehla dahme I ndaiong uhk ke en wia. Rong kanahieng ngilen me kupwurokong kan oh nantihong dehdehkihla mehlel. Ei, peki loalokong oh peki erpit ni ngidingid. Rapahki uwen omw kak, rasehng me kin rapahki silper de takai kesempwal me rir kan. Ma ke pahn kapwaiada met, eri, ke pahn esehla dahkot lemmwiki Siohwa oh ke pahn pweida ni omw pahn padahngki duwen loalokong me pid duwen Koht.”​—Lepin Padahk 2:1-5, NW.

¹⁰ Kaidehn met madamadau kapwuriamwei ehu? Ma kitail kin nsenohki rong kanahieng duwen sapwellimen Koht erpit, kitail pahn “diarada loalokong me pid duwen Koht.” Ei, kitail kak sukuhliki loalokong duwen Kaunepen lahng oh sampah ma kitail men alehdi oh kesempwaliki sapwellime mahsan kan. Met wehwehki me kitail pahn kapakap ong Siohwa oh wia pein atail onop. Pai kesempwal rir kan en sapwellime Mahsen pahn kak kihsang peikasal kan oh sewese kitail en kilang marain en padahk mehlel.

11. Iaduwen laduhn Elisa kin mweidong peikasal en powehdi ih?

¹¹ Karasepe sansal ehu duwen kapakap me sewese sapwellimen Koht ladu men me kin masak oh peikasal me dierekda nan 2 Nanmwarki 6:11-18. Sapwellimen Elisa laduwo sohte kin ahneki dehde ni pali ngehn. E sohte kak dehdehki me tohnleng tohto mihmihte wasao oh re kaunopada pwehn sewese sapwellimen Koht soukohp, me ni ahnsowohte karis en sounpei kan en Siria me kapilpenehr kahnimwo. Laduwo tepida masapwehkada werlahng Elisa: “Maing, kita pahn mehla! Dahme kita pahn wia?” Iaduwen Elisa sapeng? “Ke dehr masak, pwe iangata kan tohtohsang irail.” Ahpw, iaduwen laduo pahn kak kamehlele met? E sohte kak kilang tohnleng tohto pwukat.

12. (a) Iaduwen peikasal me laduo kapwungpwungla? (b) Iaduwen kitail kak kapwungala peikasal kan me kitail kin ahneki?

¹² “Elisa tepida kapakap oh nda: ‘Maing Siohwa, komw ketin kapehdpeseng mese pwe en kilang.’ Ni ahnsowohte, Siohwa ketin kapehdpeseng mesen laduwo, ih eri kilangada duwen nahna kan ar direkihla oahs oh werennansapw kisiniei me kapilpene Elisa.” Ni ahnsowo, Siohwa kahrehong laduo en kilangada karis en nanleng kan me kapilpene Elisa oh perehla ih. Rahnwet, kitail en dehr kasik me kitail pahn alehdi soangen sawasohte me kohsang nanleng. Tamanda me sapwellimen soukohp laduo sohte naineki Pwuhk Sarawi unsek pwehn onop oh kakehlahda eh pwoson. Ahpw, met, kitail naineki Pwuhk Sarawi pwon. Ma kitail pahn doadoahngki Pwuhk Sarawi ni ahl me keieu mwahu, atail pwoson pahn kak pil kehlailda. Karasepe ieu, kitail kak doudouloale duwen iren Pwuhk Sarawi kan me mahsanih duwen Siohwa me kin ketiket nan sapwellime mwoahl nanleng. Rahnwet sohte peikidpe me Siohwa kin sapwellimaniki pwihn en nanleng me kin utungada oh sewese sapwellime ladu kan nan doadoahk en kasukuhl me kin wiawi wasa koaros nan sampah.​—Aiseia 6:1-4; Esekiel 1:4-28; Daniel 7:9, 10; Kaudiahl 4:1-11; 14:6, 7.

Kaleke Ahn Sehdan Widing kan!

13. Ni ahl dah kei Sehdan kin song en kaluwetala kitail pwehn kesehla padahk mehlel?

¹³ Ia pil ekei ahl akan me Sehdan kin doadoahngki en kaluwetala atail kehl ni pali ngehn oh atail kin poadidiong padahk mehlel? Ehu me e kin kalap doadoahngki iei dipen nenek oh dipen kamwahl iangahki soangsoangen dihp me pid nsen en pwopwoud. Nan rahnpwukat, sampah wet kin perenki wia nsen en pwopwoud: met wehwehki re pahn salelepek ong arail pwoud oh wia dipen kamwahl de wia dipen ni pwong ehute (dipen nenek de dipen kamwahl ni saledek) oh soangen tiahk wet aramas kin wia ahnsou koaros, oh irail kin wia met mendahki ma re pahn lelohng kahpwal. Kasdo, TV, oh video kin utungada soangen mour wet. Kilel suwed kan kin kohda nan TV oh kasdo kan, keieu kilel suwed pwukat kin kohda nan Internet. Pwuhk kan me kin kasalehda kilel suwed kan pil kin kohpeseng wasa koaros nan sampah. Kasongosong kan kin awiawih irail akan me men kilang kilel suwed pwukat.​—1 Deselonika 4:3-5; Seims 1:13-15.

14. Dahme kahrehda ekei Kristian akan kin lohdi pahn widing kan en Sehdan?

¹⁴ Ekei Kristian akan kin mweidong pein arail men ese duwen mehkan me sohte konehng en kalowehdi irail oh kasaminehla arail madamadau kan ni ahr kin kilang kilel suwed kan. Re kin mweidong pein irail en lohdi nan lidip kan en Sehdan. Met kin kalap kahrehong irail en luwetala ni pali ngehn. Aramas pwukat sohte kin duwehte irail akan me “ni mehkan me pidada mehkot me suwed irail en rasehng kisin seri pwelel kan.” Re saikinte “duwehte ohl mehlel koahiek men nin duwen arail dehdehki dahme pwung.” (1 Korint 14:20, NW) Ehu ehu sounpar, aramas kid kei kin lelohng kahpwal akan pwehki irail sohte kin kapwaiada kosonned akan me kohsang Mahsen en Koht. Irail kin soukautih nin duwen arail pwuhriong “nan tehtehn mahwen koaros me Koht ketikihong irail.”​—Episos 6:10-13; Kolose 3:5-10; 1 Timoty 1:18, 19.

Kesempwaliki Dahme Kitail Ahnekihla

15. Dahme kahrehda ekei pahn apwaliki en kesempwaliki ahr sohso ni pali ngehn?

¹⁵ Sises mahsanih, “Kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:32) Pali moron en Sounkadehde kan, mwohn re iangala padahk mehlel, re anahne mweisang ahr mouren mahs oh pelien lamalam me re iang mahs. Ihme kahrehda, re kin kesempwaliki saledek me re alehier ni ahnsou re sukuhliki padahk mehlel. Ahpw, ni pali teio, ekei pwulopwul kan me tikida nan padahk mehlel (pwe arail pahpa oh nohno kan iang padahk mehlel) kin apwaliki kesempwaliki ahr sohso ni pali ngehn. Irail sohte iang kisehn kaudok likamw de kisehn sampah wet me kin kesempwaliki kaitarala pein omw ineng kaperen kan, wini suwed kan, oh dipen nenek. Ih kahrepe mwein irail sohte kak kilang wekpeseng laud nanpwungen atail paradais en ngehn oh sampah suwed wet en Sehdan. Mwein ekei, pwehki re saikinte song “poison” en sampah wet, re kin lohdi pahn kasongosong kan pwe ren kak song oh kilang dahme pahn wiawi!​—1 Sohn 2:15-17; Kaudiahl 18:1-5.

16. (a) Mehnia peidek kan kitail kak wia ong pein kitail? (b) Dahme kitail sukuhliki oh ale kangoang en wia?

¹⁶ Ahpw, kitail anahne kamwasikala sendin peh kat pwehn esehla dahkot medek oh kalokolok? Kitail soh kak sukuhliki sang meteikan oh kahpwal kan me re lelohng ahnsou me re wia dahme suwed? Kitail anahne mihmi nan “pwelmatak” en sampah wet pwehn kilang ma kitail katiasang mehkot? (2 Piter 2:20-22) Nan keieun senturi, Piter katamankihong Kristian akan me mahs irail iangala sampah en Sehdan: “Pwe ahnsou reirei en amwail mouren mahs, kumwail wiewiahier dahme me rotorot akan kin mwahuki wia. Kumwail wiadahr tiahk suwed kanamenek kei, tiahk en nenek, kamam sakau, kapehd en mwenge, kamwoaronge wasa, oh tiahk en kaudok kasaut ong dikedik en eni kan.” Ni mehlel, kitail sohte anahne iang patehng ahn sampah “wia soangen mwoarong suwed oh kanamenek kan” pwehn esehla uwen suwed soangen mouro. (1 Piter 4:3, 4) Ni pali teio, kitail kin sukuhliki duwen sapwellimen Siohwa koasoandi ileile kan me pid tiahk mwakelekel oh mehpwukat kitail kin sukuhliki nan atail Kingdom Hall kan (wasahn kasukuhlih aramas akan duwen Pwuhk Sarawi). Oh pil, kitail kin ale kangoang en doadoahngki pein atail kehlen kasawihada dahme pwung oh dahme sapwung pwehn kak poadidiong padahk mehlel.​—Sosua 1:8; Rom 12:1, 2; 2 Timoty 3:14-17.

Edetail kan Kaidehn Mehn Kapwat

17. Iaduwen kitail kak wiahla Sounkadehdehn Siohwa koahiek kei?

¹⁷ Ma kitail pahn poadidiong padahk mehlel, kitail pahn nantihong ehukihong meteikan padahk mehlel ahnsou koaros. Met sohte kin wehwehki me kitail pahn song en idingkihong aramas akan padahk mehlel ma re sohte perenki rong. (Madiu 7:6) Ahpw, e wehwehki me kitail sohte pahn masak padahkiong aramas akan me kitail iang Sounkadehdehn Siohwa kan. Ma emen kin kasalehda me e perenki rong sang ni e wia peidek mehlel ehu de ale neitail sawaspen Pwuhk Sarawi, kitail pahn kaunopada en padahkiong ih duwen atail koapworopwor. Ni mehlel, e pahn mwahu ma sawaspen Pwuhk Sarawi kan en kin mihmi rehtail ahnsou koaros​—ni pein imwatail kan, nan wasahn doadoahk, nan sukuhl, nan sidohwa kan, oh wasahn mwadong kan.​—1 Piter 3:15.

18. Ma kitail pahn kasalehong aramas teikan ni sansal me kitail Kristian kei, iaduwen met pahn kak sewese kitail?

¹⁸ Ni ahnsou kitail kin ni sansal kadehde ong koaros me kitail Kristian akan, kitail kin kakehlada pein atail mehn perepe sang widing kan en Sehdan. Ma mie party en rahnen ipwidi de Kristmas de office lottery, iengatail kan pahn kalap nda, “Ke dehr idek reh ma e pahn iang kitail. Pwe ih emen Sounkadehdehn Siohwa kan.” Pwehki kahrepe ohte, aramas akan pahn pweiek en wia kamwan suwed akan mwohtail. Ihme kahrehda, ma kitail pahn kasalehong aramas koaros me kitail Kristian, met pahn wia sawas laud ehu ong atail mour, nin duwen wahnpoaron Piter mahsanih: “Ihs me kak kauweikumwailla, ma kumwail kin ngoangkihte wia dahme mwahu? Ahpw ma kumwail pahn kamakamki amwail wiewia pwung kan, meid pai kumwail!”​—1 Piter 3:13, 14.

19. Iaduwen kitail ese me kitail kin mih nan imwin rahn akan?

¹⁹ Pil ehu kahrepe me e pahn mwahu kitail en poadidiong padahk mehlel iei me kitail pahn kamehlele me kitail kin mih nan imwin rahn akan en koasoandi suwed wet. Kitail pahn esehla me kokohp tohto en Pwuhk Sarawi kin pweida nan atail ahnsou.a Wiewia kapwuriamwei kan me wiawi nan senturi me ahpwtehn nek kin kadehde duwen sapwellimen Pohl kaweid me “uhdahn pahn mie ahnsou apwal ekei ni imwin rahn akan.” (2 Timoty 3:1-5; Mark 13:3-37) Nan artikel en nuhspepa kapw ehu me koasoia duwen senturi 20, me oaralap koasoia “Kitail Pahn Tamataman Ahnsowo nin duwen Ahnsou Suwed ehu.” Artikel mahsanih: “nan pahr 1999 iei pahr me tohto kamakamalahn aramas wiawi nan senturi me keieu suwed.”

20. Met iei ahnsoun dah?

²⁰ Met kaidehn ahnsou en ahneki lamalam en kohwei kohdo. E sansal me sapwellimen Siohwa kapai kan kin kohwong doadoahk en kasukuhlih aramas akan duwen Pwuhk Sarawi oh doadoahk wet kin wiawi wasa koaros nan sampah pwehn kadehde en mie ong wehi kan koaros. (Madiu 24:14) Poadidiong padahk mehlel, oh ehukihong meteikan padahk mehlel. Mour soutuk ong uhk ni ahnsou kohkohdo kin poahsoankihda dahme ke wia nan ahnsou wet. Dangahngala nan doadoahk en Siohwa pahn kahrehda ken sohte warohng ale kapai en Siohwa. (Luk 9:62) Ahpw, met iei ahnsoun “kehlail oh dadaur oh loalenohng atail doadoahk ong Kauno ahnsou koaros, pwe kumwail ese me papah Kauno kaidehk doadoahk mwahl ehu.”​—1 Korint 15:58.

[Nting tikitik me mi pahs]

Ke kin Tamanda?

• Iaduwen kitail kak kihsang peikasal kan sang atail madamadau kan?

• Dahme kitail kak sukuhliki sang dahme wiawiong sapwellimen Elisa laduo?

• Kasongosong dah kei me kin pid tiahk kan me kitail pahn anahne tehk pwe kitail dehr lohdi pahn kasongosong pwukat?

• Dahme kahrehda kitail anahne ndaiong aramas teikan, ni sansal, me kitail Sounkadehdehn Siohwa kan?

[Kilel nan pali 20]

Kaukaule onop Pwuhk Sarawi oh kapakap kak sewese kitail en kihsang atail peikasal kan

[Kilel nan pali 21]

En sapwellimen Elisa laduo ah peikasal kan kohsangehr reh pwehki kasansal ehu me e kilangada

[Kilel nan pali 22]

Kitail kin sukuhliki duwen sapwellimen Siohwa koasoandi ileile kan me pid tiahk mwakelekel nan Kingdom Hall kan duwehte Kingdom Hall wet nan Benin