Ke Kak Ahneki Peren me Uhdahn Mehlel?
GEORGE kin rahnmwahuwih aramas koaros ki pohkomwokomw. Ong ih, mour kin wia kisakis kesempwal ehu me emen en perenkihda. Ah peren oh madamadau me mehkoaros pahn imwila mwahu kin wiahla irair kei reh me e kin ndandki—irair pwukat pil miehte reh ni ah tepiada mahla. Lao lel rahno me e mehla, koaros kin ese me George kin wia aramas peren men. Ke kin ahneki peren duwehte George? Ke kin kilangwohng ehu ehu rahn kapw duwehte kisakis me ken perenkihda? De ehu ehu rahn kin kahrehong uhk en soukautih de pwunod? Mie mehkot me kin kihsang ahmw peren?
Peren kin wehwehki irair en meleilei oh nsenamwahu nan mour me kin mihmi werei. E kin sansalkihda pepehm akan en peren laud oh ineng me peren wet pahn wiwiawihte erein mour. Ahpw, soangen peren duwehte met uhdahn mie?
Rahnwet, koasoandi en aramas kin utungada madamadau me aramas kak peren ihte ma re kepwehpwe. Aramas rar kan kin ahneki mour me inenen kedirepw pwehki arail nannanti en kepwehwehla. Ni ahr wia met, me tohto kin tounmeteikihla arail ehu ong meteikan oh soahng kesempwal teikan nan mour. Duwehte kisin ketitik kan pohn pese, re kin karukaruwaruseli ahnsou koaros, oh sohte arail ahnsou en medemedewe mehkan nan mour de medemedewe meteikan. Ihme kahrehda, “nempehn aramas akan me toahkte kasawihada me kin pwunod ahnsou koaros nan arail mour kin wie tohtohla,” koasoia ehu ripoht nan Los Angeles Times, “oh aramas me kin lelohng soumwahu en pwunod kin pwullahr. . . . Wini en soumwahu en pwunod iei wini me keieu netila tohto nan list en kompani en wini.” Aramas rar kan kin doadoahngki wini en kasaliel kan de song en manokehla arail kahpwal akan ni ahr kin kamamsakau. Ekei kin kohla netinet ni ahnsou me re pwunod. Nan ehu roporop, “lih kan me kin keieu kalap wiahki arail wini en kihsang nsensuwed ni ahr kin netinet,” koasoia nuhspepa en mehn Britain adaneki The Guardian. “Lih kan pak siluh kin tohto sang ohl akan me ni ahnsou me re kin pwunod, irail kin kohla net.”
Ahpw, peren mehlel sohte kin dierek nan sidohwa, ni sakau, ni waren wini, ni dikek, de ni mwohni en nan pangk. Peren mehlel sohte kin pweipweida; sohte isepe. Iawasa kitail kak diar ie soangen kisakis kesempwal wet? Se pahn koasoia met nan artikel en mwuri.