Iawasa Nsenamwahu Mehlel Kak Dierekie?

ARAMAS tohto kin lemeleme me nsenamwahu kin kohsang ahneki kepwe tohto. Iaduwen komwi? Mehlel me nin doken kepwe kan kin kak wahdo kapai, met sohte kin poatopoat; de nsenamwahu sohte kin pil wahdo pwoson de kaitarala anahn akan en pali ngehn.

Nan ah kapahrek pohn Dohlo, Sises Krais mahsanih: “Meid pai me kin pohnese arail anahn en pali ngehn, pwe arail wehi iei wehin nanleng.” (Madiu 5:3, New World Translation) Sises pil mahsanih: “Kumwail kalekeikumwailsang noahrok suwed koaros, pwe mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.”​—Luk 12:15.

Me tohto kin rapahki nsenamwahu ni arail kin wia tiahk en nenek oh “wiewiahn uduk” teikan. (Kalesia 5:19-21) Ahpw, dukla pahn peren en uduk pwukat sohte pahn wahdo nsenamwahu mehlel de pai poatopoat. Ni mehlel, irail ko me kin wiewia soahng pwukat sohte pahn sohsoki Wehin Koht.​—1 Korint 6:9, 10.

Meteikan kin raparapahki nsenamwahu ni arail kin nannanti en wiahda soahng kan me pahn kasalehda me mie kateparail. Laipreri kan oh stowahn pwuhk kan kin dirkihla soahngen pwuhk pwukat, ahpw pwuhk pwukat sohte kak wahdo nsenamwahu soutuk. Eri, ihme karehda, iawasa kitail kak diar nsenamwahu mehlel?

Pwehn uhdahn nsenamwahu, kitail en pohnese atail anahn en pali ngehn me kitail ipwikihdi. Sises mahsanih: “Meid pai irail kan me kin pohnese arail anahn en pali ngehn.” Ni mehlel, e sohte pahn wia mehkot mwahu ong kitail en wehwehki met, ahpw sohte wia mehkot pwehn kapwaiada met. Pwehn karasahda met: Dahme pahn wiawihong emen sounweirentang me mwurin ah weir sohte kapwaiada anahn en paliwere en nim pihl? E soh pahn sohla pilen nan paliwere oh ih eri lelohng irair en apwal kan? Me pil duwehte met, ma kitail sohte kapwaiada atail anahn en mwengehn pali ngehn, kedekedeo kitail pahn luwetala ni pali ngehn. Met pahn karehong kitail kansensuwed.

Sises uhdahn kin pohnese ah anahn en pali ngehn, ni ah kin kaukaule onop oh doudouloale Mahsan en Koht. E mengeiki rapahkihda ire kan nan Pwuhk Sarawi, oh e kin padahkiong meteikan en wia soahng wette. (Luk 4:16-21; Kaparekiong Epsos 4:20, 21) Sises kin pil kaparekiong wia kupwuren Semeo nanleng duwehte kene kisin mwenge. Wia kupwuren Koht kin wahdong ih nsenamwahu mehlel.​—Sohn 4:34.

Ehi, nsenamwahu mehlel sohte kin kohsang ni en emen kin ahneki kepwe kan; de nsenamwahu sohte kin pil kohsang kaitarala anahn akan en uduk. Nsenamwahu mehlel iei irair ehu en mongiong, me kin poahsonda pohn pwoson mehlel oh en ahneki nanpwung mwahu rehn Siohwa Koht. Eri, ihme e konehngki sounmelkahkao Depit en koulki: “Mei pai aramas akan me arail Koht iei Kauno (Siohwa).​—Melkahka 144:15b.

[Kilel nan pali 31]

Pwoson oh ahneki nanpwung mwahu rehn Koht me pahn wahdohng uhk nsenamwahu mehlel