Sampah Pwon Ohla!

Nna, kilang sampah me pidahkihiukpene, iangahki ah kahnimw akan, ah tiahk kan, pweidahn palien sains, oh towe me lik kei (billions). E soh mengei ong kitail en wadekala duwen ah nohn pweida mwahu oh likamwete soahng pwukat pahn mihmi kohkohla? Ke lemeleme me ehu rahn sampah pwon pahn ohla oh sohla mie? Met ele apwal aramas en wehwehki. Ahpw, ke wehwehki me nin duwen emen me likilik koasoia, me mie sampah ieu me miehier mahs oh sampaho eri ohlahr?

KITAIL sohte koasoakoasoia sampah en aramas rotorot en kawao. Sampah me ohlahro wia sampahn aramas marain ekei, me mie arail kahnimw kan, sounwiahda dipwisou lingan akan, oh pil mie arail loalokong en palien sains. Ahpw, poadoapoad en Paipel mahsanih ong kitail me mwadangete, nan kaeisek isuh en keriau en sounpwong, pahr 352 mwohn Eipraam ah ipwidi, Nohlik Lapalap ieu wiawi oh wahweisang sampah pwon.a

Poadoapoad wet mehlel? Soangen irair wet uhdahn wiawi? Mie sampah ieu mahso me keirada laud eri mwuhr ohla? Ma iei, dahme e ohkihla? Dahme sapwungala? Mie mehkot kitail kak sukuhliki sang dahme wiawi mahs (sampah en mahs a ohla)?

Mie Sampah en Kawao Me Uhdahn Ohla?

Soangen kahpwal kapwuriamwei ehu, ma e uhdahn wiawi, pahn wia mehkot me sohte me pahn manokehla. Kahrehda, nan wehi tohto, mie mehn kataman kan me ohla wet uhdahn wiawi. Karasepe ieu, tehk duwen mehn kadehde mehlel me pid rahn oh pahr me nting nan Pwuhk Sarawi. Nin duwen calendar en mahs: keriau en sounpwong kin sang nan werengen sounpwong en October lel nan werengen sounpwong en November. Kahrehda, rahn kaeisek isuh kin pahrekiong November 1. Eri, e sohte wia mehkot kapwuriamwei me nan sahpw tohto, kataman en aramas mehlahr akan kin kalap wiawi soangen ahnsowo nan pahr akan.

Mehn kadehde teikan me pid Nohliko kin pwarada nan tiahk kan me aramas akan kin wia. Kereniong soi kan en kawa kan​—⁠wasa koaros nan sampah​—⁠kin koasoia me arail keinek kan de arail wehi kan pitsang nohlik ehu me kipehdi sampah pwon. Pygmies nan Africa, Celts nan Europe, oh Incas nan South America​—irail koaros kin mie arail soi kan me pid nohlik, iangahki aramas akan nan Alaska, Australia, China, India, Lithuania, Mexico, Micronesia, New Zealand, oh pil ekei wasa kan nan North America​—⁠iei ekei wasa pwukat me mie arail soi kan me kasalehda me nohlik wiawi nan arail wasa mahs.

Mehlel, ahnsou werei dower powe, oh aramas akan kin kalaudehla soi pwukat kahrehda soi pwukat mie wekidekla kan, ahpw soi pwukat ahnekihpene mehkan me duwepenehte: me Koht engiengda pwehki suwedlahn aramas. Ih eri ketikihdi Nohlik Lapalapo. Pali laud en aramas eri mehla. Aramas pwung malaulau kei me pitla. Aramas pwukat kauwada wararail me aramas oh mahn doadoahngki oh eri pitla. Menpihr eri pekederieila pwehn kilangada pwehl madekeng. Mwurin mehpwukat wiawi, warihmwo eri sukada pohn nahna ieu. Aramas me mourla ko eri pedoi oh irail wia meirong.

Dahme mehpwukat kin kadehdehda? Eri, pahrekpenehn soi pwukat sohte kak katiala mie. Mehn kadehde kapatapat pwukat kin kasansalehda me poadoapoad en Paipel me aramas koaros iei kadaudok en irail me mourla nan Nohlik me kauwehla sampah en aramas ieu pwon mahso. Kahrehda, kitail sohte anahne kehliki soi de koasoi mwahl akan pwe kitail en ese dahme wiawi. Mie poadoapoad me ni keneinei wie nekinekiong kitail nan palien Pwuhk Sarawi ni lokaiahn Ipru.​—Senesis, irelaud 6-8.

Paipel audaudki poadoapoad me ntingkihda sapwellimen Koht ngehn sarawi me kapwureikitaillahng tepin mour a miehla. Ahpw, mehn kadehde kan mie me laud mehlel sang ihte en wia poadoapoad. Kokohp akan loale oh erpit loal kan kin kadehde me audepe iei uhdahn mahsen en Koht ong kitail aramas. E weksang soi en aramas akan pwe Paipel kin mie ahd oh rahn akan oh poadoapoad eri keinek kan oh oaritik kan duwen wasa kan ntingdi nan ah poadoapoad akan. E kin kasalehong kitail iaduwen mour mwohn Nohliko oh kasalehda dahme sampah pwon wiahkinteieu ohkihla.

[Nting tikitik me mi pah]

[Chart nan Pali 4]

Koasoipen Nohlik Mie Wasa Koaros Nin Sampah

(For fully formatted text, see publication)