Noha oh Nohliko—Poadopoad Mehlel Ehu, Kaidehn Soai Pwoat
KE KIN kasikasik ehu sampah me mwahu—sampah ehu me aramas koaros kin kousoanpene ni popohl? Sampah ehu me sohte mahwen, sohte mwersuwed, sohte lokolok kan? Ma ei, komw kak diarada mehn kangoang sang poadopoad ehu me mwein ele komw kin wehwehki mehlel. Met iei poadopoad en Noha, emen ohl mwahu me kauwada warihmw ehu oh komourala eh peneinei sang nohlik lapalap me kamwomwala koaros aramas suwed kan en ni ahnsowo.
Poadopoad malaulau keite me kereniong aramas koaros nin sampah kin ese duwe. Poadopoad en dahme wiawi ni mwehin Noha kin dierekda nan pwuhk en Senesis irelaud 6 lel 9, oh e pil kin pwurehng pwarada nan pwuhk me adaneki Koran oh nan poadopoad kan en aramas wasa tohto nin sampah. Uhdahn nohliko wiawi, de ihte soai pwoat me wiawihda pwehn kangoange aramas akan en wia dahme pwuhng? Irail kan me kin sukuhliki duwen palien lamalam kin akpwungki ire wet erein sounpar epwiki kei. Ahpw Pwuhk Sarawi kin ni sansal kasalehda me poadopoad wet uhdahn mehlel—poadopoad mehlel ehu, kaidehn soai pwoat. Iet kahrepe kan me kitail kak kamehlelehki me poadopoad en Noha mehlel:
Ire kan nan Senesis kasalehong kitail ni oaritik mehnia sounpar, mehnia sounpwong, oh mehnia rahn me Nohliko tepida, iahd oh iawasa warihmwo mihmi ie mwurin nohliko, oh iahd me sampah madekengda. Oaritik kan duwen warihmwo pil kin sansalda—pilahn en warihmwo, sosohng kan, oh dipwisou kan me kadoadoahk pwehn kauwada warihmwo. Ahpw soai kan ni pali teio, sohte kin sansal oaritik kan oh sohte kin kawehwe mwahu.
Wasa riau nan Pwuhk Sarawi duwen ireirekidien peneinei kin kadehde me Noha uhdahn emen aramas me momour nin sampah. (1 Kronikel 1:4; Luk 3:36) Esra oh Luk, ira koaros kin wia sounnting kei me kin wiahda roporop mwahu ni ara kin kileledi duwen ireirekidien peneinei kan. Luk kasalehda me Sises kohsang nan kadaudok en Noha.
Mehn kadehde duwen mehlelpen koasoipen Noha pil sansalda sang rehn soukohp Aiseia oh Esekiel oh pil wahnpoaron Pohl oh Piter.—Aiseia 54:9; Esekiel 14:14, 20; Ipru 11:7; 1 Piter 3:19, 20; 2 Piter 2:5.
Sises Krais pil koasoia duwen Nohliko, mahsanih: “Me wiawiher ni mwehin Noha, e pil pahn wiawi ni rahn akan en Nein-Aramas. Aramas koaros kamakamadipw, kangkang sakau, wiewie pwopwoud, lao lel rahn me Noha pedolong nan warihmwo, nohlik lapalapo ahpw leledo oh kamwomwirailla koaros.” (Luk 17:26, 27) Ma Nohliko sohte wiawi, eri mahsen en Sises duwen “ni rahn akan en Nein-Aramas” pahn sohte katepe.
Wahnpoaron Piter kohpada me mie irail akan me pahn pwarada me kin ‘kepitki’ dahme Pwuhk Sarawi kin mahsanih. Piter ntingihdi: “Irail sohte kin men ese duwen Koht eh ketin mahsenier kawao, oh . . . duwen eh [sampah ni mwehin Noha] ohkihla pihl kawao, iei pilen Nohlik Lapalapo.” Eri, kitail en pil iang pohnsehsehla ‘mahsen en kawao wet’? Uhdahn soh! Piter pousehla mahsanih: “Nanleng oh sampah en ahnsou wet mihmiehki mahsenohte en Koht oh wie nekinek ong ni ahnsou re pahn ohkihla kisiniei. Re wie nekinek ong ni rahnen kadeik, iei rahnen kamwomwmwomwlahn me suwed kan.”—2 Piter 3:3-7.
Koht pahn pwurehng kasorehla aramas suwed akan oh mie me pahn pitila. Sang ni atail pahn alasang mehn kahlemeng en Noha kitail kak iang mih nanpwungen me pwung kan me pahn komourla nan sampah kapw mwahu ehu.