Aramas Mwakelekeldahr Kan Ong Doadoahk Mwahu Kan
“Eri, kitail kamwakeleikitailsang mehkoaros me kin kasaminehla paliwar oh pali ngehn, oh kitail song en sarawihla unsek, ni atail pahn kin momour nan atail lemmwiki kupwur en Koht.”—2 KORINT 7:1.
1. Dahme Siohwa kin kupwurki aramas akan me kin kaudokiong ih en wia?
“IHS me warohng kohdalahng pohn dohlen Siohwa, ihs me pahn kak pedolong nan Tehnpese Sarawio?” Nanmwarki Depit en Israel en mahs, kihda peidek loal wet me kin pid soangen kaudok me Siohwa kin kupwurki. E ahpw kihda pasepeng: “Irail kan me mwakelekel ni ar wiewia kan oh pil ni ar lamalam, me sohte kin kaudokiong dikedik en eni kan, oh me sohte kin wia inou likamw.” (Melkahka 24:3, 4, NW) Pwehn kenikenla rehn Siohwa, me wia Koht sarawi men, emen anahne en mwakelekel oh sarawi. Ekis mwowe, Siohwa katamanda mwomwohdiso en Israel: “Kumwail eri pahn sarawihla, pwehki ngehi me sarawi.”—Lipai 11:44, 45; 19:2.
2. Iaduwen Pohl oh Seims kasansalehda duwen kesempwalpen mwakelekel nan kaudok mehlel?
2 Sounpar epwiki kei mwuri, wahnpoaron Pohl ntingihdi ong irail ienge Kristian akan me mih nan kahnimw suwed en Korint oh mahsanih: “Kompoakepahi ko, inou pwukat koaros wiawihong kitail. Eri, kitail kamwakeleikitailsang mehkoaros me kin kasaminehla paliwar oh pali ngehn, oh kitail song en sarawihla unsek, ni atail pahn kin momour nan atail lemmwiki kupwuren Koht.” (2 Korint 7:1) Met kin kasansalehda ire kesempwal wet, me kitail anahne en mwakelekel oh liksang mehkoaros me kin kasaminehla paliwar oh pali ngehn ma kitail men ahneki nanpwung mwahu rehn Koht oh ale sapwellime kapai kan me E inoukihda. Tohnpadahk Seims ntingihdi duwen kaudok me Koht kin kupwurki: “Eri, iet duwen poadidi ong papah Koht me uhdahn pwung oh unsek mehlelen, me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan, oh dehr saminkihla tiahk suwed kan en sampah wet.”—Seims 1:27.
3. Dahme kitail anahne nsenohki en wia pwen atail kaudok pahn kak pwungla mwohn silangin Koht?
3 Pwehki mwakelekel kin wia irair kesempwal kan nan kaudok mehlel, aramas akan me men kenikenla rehn Koht anahne nsenohki en mwakelekel nan arail mour. Pwehki aramas akan nan rahnwet kin ahneki pein arail koasondi oh madamadau ong mwakelekel, kitail anahne wehwehki oh kapwaiada dahme Siohwa kin kupwurki duwen mour mwakelekel. Kitail anahne wehwehki dahme Koht kin kupwurki sapwellime tohnkaudok akan en wia me pid irair duwen mwakelekel oh iaduwen E kin ketin sewese irail en kolokol irair en mwakelekel oh kenikenla reh.—Melkahka 119:9; Daniel 12:10.
Mwakelekel ong Kaudok Mehlel
4. Kawehwe ni ahl dah kei Paipel kin doadoahngki lepin lokaia wet: mwakelekel.
4 Pali laud en aramas kin lemeleme me mwakelekel kin ihte wehwehki sohte pwelipwella de samin. Ahpw, Paipel kin kasalehda sang ni e kin doadoahngki ekei lepin lokaia kan ni lokaiahn Ipru oh Krihk me mwakelekel kaidehn ihte mehkot me kin pid duwen paliwar, ahpw pali laud en ahnsou e kin wehwehki mwakelekel ni tiahk oh kaudok. Ehu encyclopedia en Paipel koasoia: “ ‘Mwakelekel’ oh ‘samin’ iei lepin lokaia riau me sohte kin kalapw pid mwakelekel ni paliwar, ahpw e kin kalapw pid duwen kaudok kan. Kawehwe wet kin kasansalehda me mouren kaweid en ‘mwakelekel’ kin pid kereniong wiewia kan koaros.”
5. Ni ahl dah kan me Kosonned en Moses kin kaweidih mehn Israel akan duwen irairen mwakelekel nan arail mour?
5 Ni mehlel, audepen Kosonned en Moses kin pid kosonned akan me kin ni oaritik sair kereniong wiewia kan koaros en mehn Israel kan oh Kosonnedo kin kasalehda dahme mwakelekel oh pwung oh dahme samin. Karasepe ieu, nan pwuhken Lipai irelaud 11 lel 15, kitail kak diar kosonned oaritik kan me kin pid duwen dahme mwakelekel oh dahme samin. Ekei mahn akan me samin, oh mehn Israel akan sohte ale mweimwei en kang soangen mahn pwukat. Emen lih me neitik pahn samin erein ahnsou ieu. Soangsoangen soumwahu en kihl akan, ahpw mehlel soumwahu en tokutok, oh pil ma nahn kin pwilisang ni dipwisou en kaparapar en ohl oh lih kan—mehpwukat pahn kahrehong aramas pwukat en saminla. Kosonnedo pil kin oaretikiada dahme aramas akan anahne wia ni ahnsou me emen pahn saminla. Karasepe ieu, nan pwuhken Nempe 5:2, kitail wadek: “Koasoanediong mehn Israel kan re en kesehsang nan kahnimpwalo koaros me soumwahu tokutok oh me nahn kin pwilisang ni paliwere oh koaros me saminkilahr ar sairada aramas mehla.”
6. Ia kahrepe kosonned kan me kin pid mwakelekel wiawihda?
6 E sansal mwahu me kosonned pwukat oh pil kosonned teikan me kin kohsang rehn Siohwa me kin pid palien wini oh doadoahk en paliwar kan kin kasalehda loalokong me inenen dei mehlel oh daulih dahme mie nan irair en ahnsou pwuko, oh aramas akan kin paiekihda ma re kin idawehn kosonned pwukat. Ahpw, kosonned pwukat kohwong aramas akan kaidehn ihte pwe ren wia koasoandi en roson en paliwar de kaweid kan ong palien wini. Kosonned pwukat kin wia kisehn kaudok mehlelo. Pwehki kosonned pwukat kin sair mouren aramas rahn koaros—duwehte kosonned akan me pid mwenge, neitik, koasoandi kan nanpwungen pwopwoud kan, oh soahng pwukat—met kin kasalehda me arail Koht, Siohwa, kin sapwellimaniki pwung en pilada dahme konehng oh dahme sohte konehng irail en wia, oh Siohwa kelepw me sapwellimaniki pwung wet.—Deuderonomi 7:6; Melkahka 135:4.
7. Ma mehn Israel akan kin kapwaiada Kosonnedo, soangen kapai dah kan re pahn ale?
7 Kosonnedo pil kin perehla mehn Israel akan sang wiewia suwed akan en wehi kan me kin kapilpene irail. Ma mehn Israel akan pahn lelepek kapwaiada Kosonnedo, iangahki koasoandi kan me kin pid mwakelekel mwohn silangin Siohwa, irail pahn kak papah Koht oh ale sapwellime kapai kan. Ihme kahrehda, Siohwa mahsanih ong wehin Israel: “Eri, ma kumwail pahn peikiong ie oh dadaur ei inou, kumwail pahn wiahla nei aramas kesempwal. Tohn sampah pwon uhdahn nei, ahpw kumwail me pahn wiahla nei aramas pilipil. Kumwail eri pahn wiahla wehi ehu me pahn papah ie nin duwen samworo, pwihnen aramas ehu me kasarawihong iehte.”—Eksodus 19:5, 6; Deuderonomi 26:19.
8. Dahme kahrehda Kristian akan nan rahnwet anahne tehk kanahieng duwen dahme Kosonnedo kin kasalehda me pid mwakelekel?
8 Pwehki Siohwa kin oaretikiada nan Kosonnedo kaweid kan ong mehn Israel akan me pid iaduwen re pahn wiahla aramas mwakelekel, sarawi oh pwungla reh, eri, e soh konehng ong Kristian akan nan rahnwet en tehk kanahieng ma pein irail kin kapwaiada kosonned pwukat? Mendahki Kristian akan sohlahr mih pahn Kosonnedo, irail anahne tamanda dahme Pohl kawehwehda, me soangen koaros me mih nan Kosonnedo “mwetehn soahng me pahn pwarodo, a uhdahn waro, iei Krais.” (Kolose 2:17; Ipru 10:1) Pwehki Siohwa Koht me mahsanih, “I sohte pahn wekila” kin kupwurki mwakelekel en wia irair kesempwal ieu nan kaudok mehlel mahs, eri, e pahn kesempwal ong kitail rahnwet en pil nsenohki oh kesempwaliki mwakelekel ni paliwar, ni tiahk kan, oh pil ni pali ngehn ma kitail men pwunglahr oh kenikenla reh oh ale kapai kan.—Malakai 3:6; Rom 15:4; 1 Korint 10:11, 31.
Mwakelekel en Paliwar kin Wia Kasalepe Mwahupatail
9, 10. (a) Dahme kahrehda e kesempwal Kristian kan anahne mwakelekel ni paliwar? (b) Dahme ekei aramas koasoia duwen wasahn kapokon kan me Sounkadehdehn Siohwa kan kin doadoahngki?
9 Mwakelekel ni paliwar kin wia irair kesempwal ieu nan kaudok mehlel? En ihte mwakelekel ni paliwar sohte pahn wehwehki me aramas emen kin wia tohnkaudok mehlel en Koht, ahpw e konehng emen tohnkaudok mehlel en wia uwen me e kak en mwakelekel ni paliwar. Keieu kesempwal en wia met nan rahn pwukat pwehki aramas tohto sohte kin nsenohki en mwakelekel ni paliwar oh re sohte kin kamwakelehda arail wasahn kousoan kan, ahpw aramas akan kin kilang irail akan me kin mwakelekel ni paliwar oh kin kamwakelehda arail wasahn kousoan kan. Met pahn kak imwikihla mwahu, nin duwen Pohl padahkiong Kristian akan nan Korint: “Se sohte men aramas emen en kahdsuwedih at kohwa doadoahk, ihme se sohte kin men kadirapwahki emen. Eri, se kin kasalehda ni mehkoaros me se kin wia, me kiht ladun Koht kei, ni at kin kanengamah ni ahnsoun lokolok, ni at apwal akan, ni ahnsoun at pwunod akan.”—2 Korint 6:3, 4.
10 Pak tohto, kaun akan en palien koperment kin kapinga Sounkadehdehn Siohwa kan pwehki irail kin mwakelekel, soandi mwahu, oh tiahk pwung, oh met kin sansal nan arail kapokon laud kan. Karasepe ieu, nuhspepa en La Stampa koasoia duwen kapokon ehu me wiawi nan Savona, Italy: “Ni ahnsou me emen pahn pedolong nan wasahn kapokon kan, mehkot me kin inenen sansal—irail me kin doadoahngki wasahn kapokon kin mwakelekel oh soandi mwahu.” Mwurin ehu kapokon en Sounkadehde kan me wiawi nan São Paulo, Brazil, emen kaun en wasahn kapokono padahkiong nah tohndoadoahk me kin apwalih palien kamwakel: “Sang met kohla, se men kumwail en kamwakelehda wasahn kapokon wet pwehn mwakelekel duwehte ahnsou me irail Sounkadehdehn Siohwa kan kin kamwakele wasaht.” Pil emen kaun en wasahn kapokonohte koasoia met: “Ni ahnsou me Sounkadehdehn Siohwa kan men rent wasaht, ihte se kin anahne koasoanehdi mehnia rahn me irail pahn doadoahngki wasaht. Likin met, se sohte anahne pwunodki mehkot.”
11, 12. (a) Kaweid en Paipel dahieu kitail anahne tamataman me pid mwakelekel nan pein atail mour? (b) Peidek dah kan kitail kak idek pein rehtail me pid mwakelekel nan pein atail mour?
11 Ma irairen mwakelekel oh soandi mwahu nan atail wasahn kaudok pahn kak wahdo kaping ong Koht me kitail kin kaudokiong, eri, e sansal me mwakelekel nan pein atail mour kin pil wia mehkot kesempwal. Ahpw, nan pein imwatail kan, ele mwein kitail kin ahneki madamadau me kitail kak wia dahme kitail men wia. Oh pil, me kin pid atail likou kan oh mwomwatail kan, ni mehlel kitail kin ahneki saledek en pilada dahme kitail kin ahn oh dahme kitail linganki de lelki! Ahpw, saledek wet sohte kin unsek. Tamanda me Pohl kihong kaweid ong ienge Kristian akan duwen arail pilipil en kang ekei mwenge kan: “Ahpw kumwail kanahieng pwe amwail nsenen saledek ni irair wet dehr kahrehiong nan dihp irail kan me luwet ni pwoson.” Oh mwurin met, e koasoia duwen mouren kaweid kesempwal ieu: “Ekei kin nda, “E mweimweiong kiht se en wia mehkoaros.” Mehlel, ahpw mehkoaros sohte mwahu ong kitail. ‘E mweimweiong kitail, kitail en wia mehkoaros’—ahpw mehkoaros sohte kin wia mehn sawas mwahu ehu ong kitail.” (1 Korint 8:9; 10:23) Me kin pid mwakelekel, iaduwen kaweid en Pohl kin kamwekid kitail?
12 E inenen konehng me aramas akan pahn kasikasik me emen me kin papah Koht uhdahn pahn wia aramas mwakelekel oh soandi mwahu. Eri, kitail anahne en tehk mwahu imwatail kan oh likin imwatail kan pwe e sohte pahn kahrehong aramas en kauwehla mwaren Siohwa de kahrehong irail en mwamwahleki atail pwukoa nin duwen sounkalohk kan en Mahsen en Koht. Imwatail kan kin wia kadehde dahieu ong soangen aramas dah kitail oh soangen padahk dah kan me kitail kin kamehlele? E kin kadehde me kitail uhdahn men mour nan sampah kapw mwakelekel, soandi mwahu oh pwung, nin duwen kitail kin ngoangki kalohk ong aramas teikan? (2 Piter 3:13) Mwomwatail kan—sohte lipilipil ma kitail wia komkommoal de mwadmwadong de ni ahnsoun kalohk—met pahn kak kahrehong aramas akan en men rong de sohte men rong dahme kitail kin padahkih. Karasepe ieu, nan sapwen Mexico, emen sounwia nuhs ong nuhspepa en wasao koasoia: “Pali laud en Sounkadehdehn Siohwa kan, iei irail me pwulopwul kan, oh se men kapinga irail pwe irail kin mwakelekel, pitenmoangarail kan oh arail likou kan kin konehng oh soandi mwahu.” Ia uwen kaperen en kilang irail me pwulopwul kan nanpwungatail duwehte irail me pwulopwul kan nan Mexico!
13. Dahme kitail kak wia pwe soangen wiewia koaros nan atail mour en mwakelekel oh soandi?
13 Ahpw, e sohte mengei ahnsou koaros en mwakelekel oh soandi mwahu ni paliwar, soahng kan me kitail ahneki oh naineki oh pil imwatail kan. Tamataman me kitail sohte anahne ahneki dipwisou en kamwakel tohto de dipwisou en kamwakel me pweilaud, ahpw ihte kitail anahne koasoandi mwahu en kamwakel oh nantihong kapwaiada koasoandi wet. Kitail anahne koasoanehdi ahnsoun duhdu, lopworda atail likou kan, kamwakelehda nan imwatail kan oh waratail sidohsa kan, oh soahng pwukat. Mendahki kitail kin soupisengki atail doadoahk en kalohk, iang towehda mihding kan, oh wia pein atail onop kan—iangahki pwukoa teikan rahn koaros—ahpw atail wia soahng pwukat sohte pahn wehwehki me kitail sohte anahne mwakelekel pwehn pwungla mwohn silangin Koht oh aramas akan. Kitail en tamataman mouren kaweid wet: “mie ahnsou me konehng ong soahng koaros” oh kaweid wet pil kin pid koasoanehdi atail ahnsou ong kamwakel.—Eklesiasdes 3:1.
Mohngiong Ehu me Mwakelekel
14. Dahme kahrehda kitail kak nda me mwakelekel ni tiahk kan oh ni pali ngehn me kesempwal sang mwakelekel ni paliwar?
14 Mehlel, e kesempwal en mwakelekel ni paliwar, ahpw, kesempwal sang met: en mwakelekel ni pali ngehn oh tiahk kan. Kitail kin kamehlele met pwehki kitail kin tamanda me Siohwa ketin soikala Wehin Israel, kaidehn pwehki re samin ni paliwararail kan, ahpw pwehki re samin ni arail tiahk kan oh pil ni pali ngehn. Siohwa doadoahngki soukohp Aiseia en padahkiong mehn Israel akan me pwehki irail wiahla “wehi dipan ehu me melahr; [irail] ohlahr oh wialahr aramas suwed,” arail meirong kan, arail kin sarawi en Maram Pwul kan oh rahnen Sapad, oh pil arail kapakap kan kin wiahla mehkot katoutou ong Ih. Dahme irail anahne wia pwehn pwurehng kenikenla rehn Koht? Siohwa mahsanih: “Kumwail kamwakeleikumwailda. Kumwail tokedihsang amwail wiewia suwed pwukat mwohn silangi. Kumwail tokedihsang amwail wia me suwed.”—Aiseia 1:4, 11-16.
15, 16. Dahme Sises mahsanih me kin kasaminehla aramas akan, oh iaduwen kitail kak paiekihda sang mahsen kan en Sises?
15 Pwehn kalaudehla atail wehwehki duwen kesempwalpen tiahk mwahu oh mwakelekel ni pali ngehn, medemedewe dahme Sises mahsanih ni ahnsou me Parisi kan oh sounkawehwehn kosonned akan kose me sapwellime tohnpadahk kan me samin pwehki irail sohte kin emwiemw mwohn irail kin mwenge. Sises kapwungala irail: “Kaidehkin me kohieng nan ewen aramas me kin kasaminehla, pwe me kin kohsang nan ewe.” Sises eri kawehwehong irail: “A mehkan me kin kohieisang nan ewe, kin tepisang nan kapehde, oh ih me kin kasaminehla aramas. Pwe lamalam suwed kan kin pwilisang nan kapehd en aramas oh kin kahrehda kamaramas, kamwahl, nenek, pirap, likamw, oh karaun likamw ape. Ih soahng pwukat me kin kasaminehla aramas; a kaidehkin mwenge ahpw sohte omwiomw.”—Madiu 15:11, 18-20.
16 Dahme kitail kak sukuhliki sang sapwellimen Sises mahsen kan? Sises kin kasansalehda me wiewia suwed akan oh samin kan kin tepisang nan mohngiong. Nin duwen tohnpadahk Seims koasoia, “a aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp.” (Seims 1:14, 15) Eri, ma kitail sohte men pwupwudi nan dihp me Sises kawehwehda duwen, kitail anahne kihsang rehtail ni unsek ineng suwed akan oh dehr mweidong ineng suwed pwukat en kekeirada nan mongiongitail kan. Ihme kahrehda, kitail anahne en tehk kanahieng dahme kitail kin wadek, kilang, oh rong. Nan rahnwet me mie saledek en koasoakoasoi oh saledek en pilada soangen wiepe kan me pahn kahrehda dahme aramas kin perenki, e kin kahrehong palien kamweit oh palien kasaledahn dipwisou kan en kalapw wiahda ngihl akan oh kilel akan me kin kahrehdo ineng suwed en uduk. Kitail en nantihong dehr mweidong soangen madamadau pwukat en kekeirada nan mohngiongitail kan. Mouren kaweid wasaht: ma kitail men kaperenda oh pwung mwohn silangin Koht, kitail anahne ahnsou koaros tehk me kitail ahneki mohngiong mwakelekel oh mehlel.—Lepin Padahk 4:23.
Mwakelekel Ong Doadoahk Mwahu kan
17. Dahme kahrehda Siohwa kin sewese sapwellime aramas akan en mwakelekel?
17 Kitail inenen paiekihda atail ahneki nanpwung mwahu oh mwakelekel mwohn silangin Koht—pwe kitail ale sawas sang reh—oh met wia kapai kesempwal ieu oh mehn perepe ieu. (2 Korint 6:14-18) Ahpw, kitail kin pil kalahnganki me Siohwa kin ketin sewese sapwellime aramas akan en mwakelekelda pwen wia mehkot tohrohr ieu. Pohl padahkiong Taitus me Krais Sises “ketin tounmeteikihla pein ih pwehki kitail, pwe en kapitkitailsang soahng suwed koaros oh kamineikitailda pwe kitail en wiahla sapwellime kelehpw oh ngoangkihte wiewia me mwahu.” (Taitus 2:14) Nin duwen aramas mwakelekel kan, soangen doadoahk dah kan kitail anahne ngoangki wia?
18. Iaduwen kitail kak kasalehda me kitail kin ngoangki wia doadoahk mwahu kan?
18 Keieu, kitail anahne nantihong kalohkiseli Rongamwahu en Wehin Koht ong aramas koaros. (Madiu 24:14) Sang ni atail kin wia met, kitail kin sewese aramas akan nan wasa koaros en alehdi koapworopwor en mour soutuk nin sampah oh sohlahr pahn mie soangsoangen samin kan koaros. (2 Piter 3:13) Atail wiewia mwahu kan kin pil pid atail kin kasansalehda wahn ngehn en Koht nan atail mour rahn koaros, oh met kin kalinganahda Samatail nanleng. (Kalesia 5:22, 23; 1 Piter 2:12) Oh pil, kitail en dehr manokehla irail akan me sohte iang padahk mehlel oh lelong kahpwal akan duwehte melimel kan, rerrer en sahpw, lapake de kahpwal teikan. Kitail en tamataman kaweid en Pohl: “Eri, nin dokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Soangen sawas pwukat koaros me kin kohsang mohngiong mwakelekel kin kaperenda Koht.—1 Timoty 1:5.
19. Kapai dah kei pahn kohwong kitail ma kitail pahn nantihong kolokol koasoandi mwahu en mwakelekel—ni paliwar, tiahk kan, oh ni pali ngehn?
19 Pwehki kitail kin wia sapwellimen Siohwa ladu kan, kitail anahne kapwaiada dahme Pohl mahsanih: “Eri, riei ko, pwehki reken sapwellimen Koht kalahngan ong kitail, I wia pekipek ngidingid wet ong kumwail: kumwail mweidala paliwaramwail kan pwe en wiahla mehn meirong momour, me sarawi oh kaperen pahn kupwur en Koht. Met ih soahngen kaudok mehlel me kumwail pahn kin wia.” (Rom 12:1) Kitail en nantihong kesempwaliki pwais kaselel me kitail ahneki en mwakelekel mwohn silangin Siohwa oh wia uwen me kitail kak en mwakelekel ni paliwar, tiahk kan, oh pil ni pali ngehn. Ma kitail pahn kapwaiada met, kitail pahn kaidehn ihte ahneki peren ahnsouwet, ahpw pil ahnsou kohkohdo—ahnsou me kitail pahn kilang “soahng mering kan”—koasoandi suwed wet—sohrala ni ahnsou me Koht pahn ‘onehda sapahl mehkoaros.’—Kaudiahl 21:4, 5.
Ke Tamanda?
• Dahme kahrehda Siohwa ketikihong mehn Israel akan kosonned tohto me pid duwen mwakelekel?
• Iaduwen mwakelekel ni paliwar pahn kak kahrehong aramas akan en perenki rong atail padahk kan?
• Dahme kahrehda tiahk mwakelekel oh mwakelekel ni pali ngehn kin wia mehkot kesempwal sang mwakelekel ni paliwar?
• Iaduwen kitail kak kasalehda me kitail kin wiahla aramas akan “me kin ngoangki wia doadoahk mwahu kan”?
[Kilels nan Pali 17]
Atail kin mwakelekel oh min kin kahrehong aramas en men rong dahme kitail kin padahkih
[Kilel nan Pali 18]
Sises kasalehda me madamadau suwed akan pahn kak kahrehong aramas akan en wia dahme suwed
[Kilels nan Pali 19]
Nin duwen aramas mwakelekeldahr kan, Sounkadehdehn Siohwa kan kin ngoangki wia doadoahk mwahu kan