Solahr Mehn Mpatail me Mwahu Rahnwet?
“Aramas en mwei wet sohte kin kesempwaliki wia mehn mpe mwahu.”—Benjamin Disraeli, ohl lapalap en wehin England nan senturi 19.
ARAMAS mah kan nan Cuba ahneki ahl tohrohr ieu en kin kangoangehda wiewia kan me katapan ong momour en aramas: Ehupenehn oh miniminpenehn nan kousoan, de círculos de abuelos (pwihn en pahpa/nohno kahlap akan) ni pein arail lokaia.” Nin duwen ripoht ehu en 1997, emen nanpwungen aramas mah limmen nan Cuba kin iang wia kisehn pwihn wet, wasa me re kin diar aramas me re kak werekiong, ale utuht, oh ale kaweid en iaduwen arail pahn kolokol mour me paien roson mwahu. World-Health makisin koasoia: “Ansou me toahkte kan en peneinei kin anahnehda sawas ong katehlapa palien doken silasil, círculos de abuelos me kin kak sawas laud.”
Ahpw, inenen kompoake rahnwet, pwe wasa tohto nan sampah, aramas en mpe kan solahr ahneki madamadau en sawaspene. Karasepe, kilang irair me wiawihiong Wolfgang Dircks, me kin kousoan nan apartment (imwen rent) ehu nan pali kapi en Europe (nan sapwen Sermany). Sounpar ekei samwalahro, The Canberra Times ripohtki me edetehn peneinei 17 me iang Wolfgan kousoan nan apartment oh esehier me re sohlahr kilang ih ahnsou reirei sohte emen irail lemehda letelet ni ah wenihmwo oh diarada ia ire.” Ni ahnsou me aramas me imwaniki apartmento ah lelodo, “e diarada kepen tihkei nan sehr ehu sohsohpai nan TV.” Oh pohn dengehko doaropwe me ntingihdi prokram en audepen dahme pahn wiawi nan TV me mehn December 5, 1993. Wolfgang mehlahr sounpar limau samwalahro. Met wia kadehdeh kansensuwed me solahr aramas nsenohki oh me sewese mehn mparail! E sohte kapwuriamwei emen soun nting en The New York Times Magazine kasalehda me mehn mpehko, pil duwehte mehn wasa tohto, irail kin wia “aramas me I sehse kei.” Iaduwen, met me duwehte wasa me ke kousoan ie?
E mehlel me ekei wasa nan wehi kan, irail kin ahneki pepehm en kadekpene, a ekei wasa aramas akan me kamwahuwiahla epwelpenehn mehn mpe kan. Ahpw, tohnkanihmw tohto pehm me sohte me kin tehk mehn mpe oh aramas akan me mehn mparail kin keper ong irail. Irail kin mihmihte palio arail dihd en imwarail akan oh sohte kak esehla mehn mparail akan. Iaduwe?
Palio Dihd akan en Liaktohrohr
Mehlel, pali tohto en kitail kin kousoan limwahn aramas akan. Lingan neirail TV, ngeningenin aramas ni wenihmw tok kan, kunla oh okadahn dengki kan, ngilen sidohsa kohdo oh kohkohla, ngilen kih kin ritingada oh okehdi loak kan, mepwukat koaros wia kilel kei me irail akan me koukousoan limwahtail akan wie “momour.” Ahpw, ahneki pepehm mehlel ong mehn mpatail kin sohla ni ahnsou me aramas me kousoan kerenpene kan kin rukurukte nan arail pere kan de sohla kin tehk emenemen pwehki irail kin kedirepw oh kalap karuwaruseli. Aramas kin kak pehm me sohte anahnepen kitail en kedirepwiki irail akan me koasoan limwahrail akan de pil sohte men pwukoahkihong mehn mparail akan mehkot.
Nan sampah ieu me aramas akan kin “limpoak ong pein irailte,” mehn mparail akan kin dolung wahn soangen mour en roporop en soangen aramas pwukat. (2 Timoty 3:2) Ia imwi met, iei me imwikihla pepehm en men kelekelepw oh loaloid. Kelekelepw kin imwikihla, sohlikilik, ahpw mehlel ni ahnsou me wiewia lemei oh kauwehla kosonned kin wiawi ong mehn mparail akan. Kahrehda, sohlikilik kin mwadangete kihsang poakepoake mehteikan.
Eri, sohte lipilipil dahme pwarada nan ahmw wasahn kousoan, ke pahn kamehlele me mehn mpe mwahu kin wia mehkot kesempwal oh koukousoanpene en aramas. Soangen pweida laud tohto kin mie ni ahnsou me aramas kin ahnekipene madamadau ehute. Mehn mpe mwahu kak pil wia kapai laud ehu. Artikel en mwurin met pahn kasalehda.