Kamweit Ni Ahnsoun Apwal
NUHS nan rahnpwukat kin sohte kalap kansenamwahu. Aramas emen ntingihdi met: “Rongen sampah nan rahnpwukat kin kansensuwed, kahrehda kitail kin kalap sohte kak pilada ma kitail kakohng kilang nuhs en kuloak weneu de soh.” Sampah kihrlahr pahn mahwin oh wiewiahn kamasak aramas, lokolok kan, wiewiahn loallap oh soumwahu keper kan—irair suwed ekei me pahn ahnsou keren wia kahpwal ong atail mour.
Paipel kin mehlel ni ah kohpadahr irair pwukat mahso. Ni Sises ah mahsanihki atail ahnsou, e mahsanih me pahn mie mahwen laud, soumwahu, apwal en mwenge, oh rerrer en sahpw. (Luk 21:10, 11) Oh pil wahnpoaron Pohl ntingihdi duwen “ahnsou apwal me kitail sohte pahn kakohng,” ni ahnsou me aramas akan pahn lemei, noahrok mwohni, oh sohte poakohng me mwahu. E kahdaneki irair en ahnsou wet “imwin rahn akan.”—2 Timoty 3:1-5.
Eri, ni nuhs kan arail kin koasoia duwen irair en sampah kan e kin pahrekiong kokohp en Paipel akan. Ahpw, duwepenehte pwukat kin idte wasaht. Paipel kin kihda mehkan me nuhs sohte kin wia. Sang ni Mahsen en Koht, kitail kak wehwehki me kaidehnte wiewia suwed akan wie tohtohla, ahpw pil dahme pahn wiawi ni ahnsou kohkohdo.
Ia Kupwuren Koht ong Suwed akan
Paipel kin kawehwehda duwen kupwuren Koht ong irair kansensuwed kan me wiwiawi nan atail ahnsou. Edetehn E mwahngihier sangete mahso duwen kahpwal akan en atail ahnsou, E sohte kin kupwurki mepwukat oh e pil sohte pahn ketin mweidong ren wiwiawi kohkohlahte. Wahnpoaron Sohn ntingihdi me “Koht iei limpoak.” (1 Sohn 4:8) Siohwa kin ketin kupwure aramas akan oh ketin kalahdeki soangen suwed koaros. E inenen konehng kitail en rapahki kamweitpen loalatail sang rehn Koht, pwehki Ih me mwahu oh limpoak oh sapwellimaniki kehl oh kin kupwurki en ketikihweisang suwed akan sang sampah. Sounmelkahka ntingihdi: “[Sapwellimen Koht Nanmwarki en nanlengo] pahn kamaiouda me loal ohla kan ni arail kin pek sawas, oh me apwal akan me sohte sawasepahr. E pahn ketin kupwurehla irail me tikitik kan oh me semwehmwe kan, oh mour en irail me mih nan apwal akan e pahn ketin doarehla. E pahn ketin doarehiraillahsang nan apwal oh keper oh ntahrail akan pahn kesempwal mwohn sihlangi.”—Melkahka 72:12-14.
Ke kin poakehla irail me mihlahr nan apwal? Mwein ke kin wia met. Poakehla iengetail akan iei pepehm ieu me Siohwa ketikihong nan loaletail, pwehki kitail wiawihda ni mwomwe. (Senesis 1:26, 27) Kitail kak likih me sohte kin pohnsehse atail tungoal apwal akan. Sises, me keieu mwahngih duwen Siohwa sang aramas koaros, padahkki me Siohwa kin nsenohki laud kitail oh poakohng kitail loal.—Madiu 10:29, 31.
Sapwellime kepikipik kan pil wia kadehdehpen me Koht kin kupwure aramas. Sises mahsanih me Koht “ketin wiahda sapwellime ketipin en daker aramas suwed oh mwahu kan oh ketikihdi keteu pohn me pwung oh me sapwung.” (Madiu 5:45) Ong aramas akan en Listra, wahnpoaron Pohl mahsanih: “[Koht] sohte kin ketin karirihala ih pwe e kin ketin wiahda me mwahu, ketikihong kumwail keteu sang nanleng oh pil rahk kan, oh kadirehkihla mongiongimwail kan mwenge oh mehn kaperen mwahu.”—Wiewia 14:17.
Ihs Me Pwukoahki Suwed akan?
E katapan ong kitail en ese me Pohl pil mahsanihiong aramas akan en Listra: “Ong dih kan en mahs [Koht] ketin mweidong wehi kan koaros keid nan pein arail ahl akan.” Kahrehda, wehi kan—de pein aramas akan—kin pwukoahki pali laud en irair suwed akan me re kin lelohng. Koht sohte ketin pwukoahki mepwukat.—Wiewia 14:16.
Dahme kahrehda Siohwa kin mweidohng soahng suwed akan en wiawi? Mie mehkot me E pahn ketin wia pwehn kamwahuwihala? Pasapengpen peidek pwukat kak dierek nan Mahsen en Koht kelepw. Pwehki pasapeng kin pidada pil emen ngehn tohrohr oh pil pidada irair kesempwal ieu me e peideki ni ah kin mihmi wasa sohte sansal ong mesetail kan.
[Kilels nan Pali 4]
Aramas akan kin poakpoake aramas teikan. Koht soh pahn pil poakpoake aramas akan me kin lelohng lokolok?
[Kilel Credit Lines nan Pali 2]
Tank: UN PHOTO 158181/J. Isaac; earthquake: San Hong R-C Picture Company
[Kilel Credits Lines nan Pali 3]
Upper left, Croatia: UN PHOTO 159208/S. Whitehouse; starving child: UN PHOTO 146150 BY O. MONSEN