Rahn Kesempwal Ehu en Tamataman

IEI rahno me wekidala douluhl mour en aramas ong mehkot me pahn kahrehdo kamwahu soutuk ong mour en aramas. Sohte ehu rahn tohrohr nan poadoapoad me kesempwal ong mour en aramas ong rahn akan me kohkohdo mwohtail me pahrekiong met. Iei rahno me Sises kaunsekila soahng koaros me e ketidohng sampah pwe en wia. E poasdahng ni tuhkehn kalokolok, oh e wia eh kaimwiseklahn esingek oh werkihda: “E pweidahr!” (Sohn 19:30) Eri, ia kahrepen Sises ah ketido?

Paipel mahsanih: “Nein-Aramas me ketido, kaidehn pwe aramas akan en papah, a pwe en papah aramas akan; oh pwe en tounmeteikihla moure, pwe me ngeder en maiauda.” (Madiu 20:28) Sises ketikihda mouri pwe aramas en kak pitsang nan dihp me re sohsohki oh imwikihla mehla. “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Ia uwen ah nohn kesempwal sapwellimen Sises meirong me e ketikihda!

Rahn me Sises ketin pwoula wia rahn ehu me kesempwal aramas en tamataman, pwehki pil ehu kahrepe kesempwal. Ni rahno, sapwellimen Koht ohlo padahkiong sapwellime wahnpoaron akan mehkot kesempwal me pahn sewese irail en tengetengete nan arail pwoson. Ia uwen kaimwiseklahn mahsen oko ah nohn sair mohngiong en sapwellime tohnpadahk kan! Ia audepen sapwellime padahk kan? Iaduwen atail kak ale kapai sang dahme Sises ketin padahkiong irail? Peidek pwukat kitail pahn tehkpene nan artikel en mwurin met.