Iaduwen Ekei Aramas Alehdi Pasapeng kan en Arail Peidek kan

ARAMAS tohto kin kapakap. Ekei kin kamehlele me arail kapakap akan kin mie pasapengpe. Ekei kin sehse ma Koht kin karonge arail kapakap de soh. Ahpw, pil ekei raparapahkihte pasapeng kan ahpw saikinte lemehda ren wahdohng Koht arail pekipek kan ni kapakap.

Paipel kin kadehdehda me Koht mehlel iei “Soun Karonge Kapakap.” (Melkahka 65:2) Ma ke kapakap, ke uhdahn ese me ahmw kapakap kin lelowohng mwohn Koht mehlelo? Ahmw kapakap akan kin mih ni soangen mwohmw en kapakap me Koht pahn ketikihda pasapengpe?

Aramas tohto wasa koaros nan sampah, pasapengpen peidek pwukat irail kak nda ehi! Iaduwen arail kin alehdi pasapengpen arail peidek kan? Dahme re sukuhlikier?

Koht​—Ihs Ih?

Sounpadahk en sukuhl men nan wehin Portugal me sukuhlda rehn lih kadek oh padre kan kin inenen poadidiong ah pelien lamalam. Ni ahnsou me a pelien sarawi wekidala oh kesehla wiewiahn sarawi kan me e sukuhliki me mehpwukat me kesempwal, e inenen pwonopwonkihda. Ni lih menet ah seiloak oh kohla ni wehi kan me kin adaneki Orient, e kin sukuhliki duwen arail kaudok, oh e tapidahr medemedewe ma mie Koht tehmen me mehlel. Ia mwomwen ah pahn kaudok? Ni ah idek rehn ah padre soahng kan me pid Paipel, e sohte sapeng ah peidek ko, oh e inenen pahtoukihla.

Sarawi en Kadolik kin kihseli kisin pwuhk kis nan kahnimw me sounpadahk en sukuhlo kousoan ie oh kalekehki tohn arail lamalam akan en dehr koasoiong Sounkadehdehn Siohwa kan. Ahpw, ahn lih menet kan mihmihte oh saikinte pasapengla. Ehu rahn, ni ahnsou me Sounkadehdehn Siohwa kan kalohk ni imweo, liho rong arail padahk kan oh kasalehda me e perenki rong arail padahk kan. Ehdin e koasoiong irail.

Pwe ah peidek kan en alehdi pasapengpe, liho tepida onop Paipel rehn Sounkadehdehn Siohwa kan. Ehu ehu wihk, liho kin ntingihdi kahngen peidek tohto oh awihekin irail. E men ese mwaren Koht, ma Koht mehlel mehtehmen, ma E kin kupwurki aramas en doadoahngki sansal takai kan nan arail kaudok, oh pil peidek tohto teikan. E tehkadahr me pasapeng koaros me e alehdi kin kohsang nan Paipel, a kaidehn pein ahn aramas madamadau, eri e pwuriamweiki met oh perenkihda dahme e sukuhliki. Ekis ekis e alehdi pasapengpen ah peidek tohto kan. Rahnwet, e kaudokiong Siohwa ki ngehn oh mehlel, nin duwen me Sises Krais mahsanih me “tohnkaudok mehlel akan” pahn wia.​—Sohn 4:23.

Lokolok​—Dahme Kahrehda?

Ohlo me ede Sohp ale lokolok me inenen laud. Nah seri kan koaros melimel kemeirailla, oh ih eri semwehmwehla. E pil ahnekihla soumwahu weirek ieu oh alehdi pwunod laud sang rehn kompoakepah kan. Ni eilepen mepwukat koaros, Sohp pak kan wiahda koasoi salamalam ekei. (Sohp 6:3) Ahpw, Koht kin medemedewehki ih irair akan me e mihla loale. (Sohp 35:15) E mwahngih dahme mih nan mohngiong en Sohp oh Ih eri ketikihda kaweid me Sohp kin anahne. E pil kin ketin wiahiong aramas akan nan rahnwet.

Nan Mozambique, Castro sounpahrte 10 ni ah nohno mehla. E inenen nan kapehd ohla. E peidek ki: “Dahme kahrehda e koasoanehdi en mehla oh kohkohweisang kiht?” Mendahte ah keirida rehn pahpa/nohno me kin lahn Koht, nan irair en ahnsou wet sohte wehwehn met ong ih. Dahme pahn kaitar ah madamadau oh ah mohngiong? E diar kamweitpen loale ni a wadek Pwuhk Sarawi tikitik ieu oh ih eri koasoiahiong rie pwutak laud oko.

Castro eri ekis ekis wehwehkihlahr me ah nohno melahr, kaidehn koasoandi sapahrek me Koht ketin wia, ahpw e kohsang sou-unsek me aramas sohsohkihdahr. (Rom 5:12; 6:23) Inou en Paipel me pahn mie kaiasada oh met kihong ih kamweit laud pwehki e kilang me pahn mie koapworopwor en pwurehng kilang ah nohno. (Sohn 5:28, 29; Wiewia 24:15) E kapahtou pwe sounpahr pahieu mwuri, ah pahpa pil mehla. Ahpw, ahnsowo, Castro kakehr wehwehki apwal wet. Rahnwet, e kin limpoak ong Siohwa oh lelepek doadoahngki ah mour en papah Koht. Peren me e ahneki kin sansal mwahu ong aramas koaros me ese.

Aramas tohto me kompoakparail akan melahr kin diar kamweitpen loalarail akan sang iren Paipel kohte me kin kamweit kapehden Castro. Ekei aramas me kin lelohng kahpwal laud pwehki wiewiahn aramas suwed akan kin wia peidek kan duwehte ahn Sohp: “Dahme kahrehda irail aramas suwed akan me wie momour?” (Sohp 21:⁠7) Nin doken aramas akan arail rong kanahieng dahme Koht ketin mahsanih, sang ni pasapeng en sapwellime Mahseno, irail wehwehkihdahr me ahl me Koht kin ketin doadoahngki kin wia kamwahu ong aramas akan.​—2 Piter 3:⁠9.

Barbara, me keirida nan United States, saikinte kilang dahkot keper en mahwen. Ahpw, e keirida ni ahnsou me wehi tohto nan sampah kin wie mahmahwen. Kahpwal en mahwen kin ahnsou koaros wia ripoht nan nuhs akan rahn koaros. Ni ah kin mih nan sukuhl, e kin pwonopwonki dahme kahrehda wiewia kan nan poadopoad ar kin wiawi ni ahl akan me sohte kasikpahr. Dahme kahrehda met? Koht kin nsenohki dahme wiewiawihiong aramas? E kamehlele me mie Koht, ahpw ah pepehm akan ong Koht sohte nohn soandi mwahu nan ah madamadau.

Ahpw, ahn Barbara madamadau duwen mour ekis ekis wekidekla ni ah tepida patehng Sounkadehdehn Siohwa kan. E kin rong irail oh onop Paipel rehrail. E iang towehda mihding kan nan Kingdom Hall. E pil iang towehda kapokon laud ehu. Oh pil, ni ah kin idek rehrail peidek kan, e kilang me pasapeng kan me e kin rong sang irail sohte kin wekpeseng. Weksang met, arail koasoi kan kin duwepenehte pwehki arail madamadau kan kin kohsang de poahsoankihda Paipel.

Sounkadehde kan kin kasalehda sang nan Paipel me sampah kin ale kaweid en Sehdan me Tepil, kahrehda Sehdan kin kakaun pali laud en aramas, oh irail kin kasalehda ngehn en Sehdan. (Sohn 14:30; 2 Korint 4:4; Episos 2:1-3; 1 Sohn 5:19) Iren Paipel kan kin kasalehda me wiewia lap akan me Barbara kin pwonopwonki kin mie kokohppe nan Paipel. (Daniel, irelaud 2, 7, oh 8) Koht kohpadahr mepwukat pwehki e sapwellimaniki manaman en mahsanih dahme pahn wiawi mwuhr me e kupwurki en mwahngih. Ekei wiewia lap pwukat, Koht kin ketikihdo. Ekei E kin ketin mweidohng ren wiewiawi. Sounkadehde kan kasalehiong Barbara me Paipel kohpadahr me pahn mie sampah kapw ehu me aramas pwung kan pahn kadirehla oh medek oh apwal akan pahn solahr mie.​—2 Piter 3:13; Kaudiahl 21:3, 4.

Ekis ekis, Barbara tepida wehwehkihla me mendahki Siohwa Koht a sohte kin kaloke aramas akan, E sohte kin irehdi met ni a kin idingki aramas akan en peikiong sapwellime kosonned akan ma re sohte kin kapwaiada. (Deuderonomi 30:19, 20) Barbara eri inengkihda en sukuhliki sapwellimen Koht koasoandi kan oh ih kapwaiada. E pil diar rehn Sounkadehdehn Siohwa kan soangen limpoak me Sises mahsanih me pahn wia mehn kadehdehpen sapwellime tohnpadahk mehlel kan.​—Sohn 13:34, 35.

Ke kak pil ale kamwahupen koasoandi kan me seweseier Barbara.

E sohte koasoandier me irail me pwarada nan artikel wet pahn diar elen mour nsenamwahu. Ahpw, irail pil sukuhlikier me Siohwa Koht sapwellimaniki koasoandi limpoak me pahn sewese irail koaros me kin pilada en peikiong sapwellime kosonned akan. (Wiewia 10:34, 35) Koasoandi wet pil pidada ahneki mour soutuk nan sampah ieu me sohte mahwen, saledek sang soumwahu oh duhpek​—oh pil sohte mehla. (Aiseia 2:4; 25:6-8; 33:24; Sohn 3:16) Iaduwen​—⁠iei met me ke mwahuki? Ma iei, eri ke kak kalaudehla omw sukuhliki poahsoan en mour kaperen ni omw pahn iang towehda mihding kan wasa me sukuhl en Paipel kin wiawi nan Kingdom Hall en Sounkadehdehn Siohwa kan. Luhk kohwong uhk pwe ken kak iang towehda.

[Kilel Credit Line nan Pali 4]

Hiker: Chad Ehlers/Index Stock Photography