Peidek Dah kan me Ke Men Idek Rehn Koht?

ARAMAS akan wasa koaros nan sampah ahneki peidek kesempwal akan me pid duwen mour. Iaduwen​—⁠mie ahmw peidek? Me tohto tuhkihongehr sounkaweid en pelien sarawi kan, ahpw sohte alehdi pasapeng kan me wehwe oh kaitar arail peidek kan. Ekei kin pein medemedewe duwen arail peidek kan. Ekei kin kapakapki irail en kak alehdi kaweid pwung. Iaduwen​—⁠ke kak alehdi pasapeng sang rehn Koht ong mehkan me ke kin pwonopwonki? Nanpwungen peidek ngeder kan me aramas akan kin men idek rehn Koht ma E pahn ketikihong irail arail ahnsou mwahu iei mehpwukat.

Uhdahn ihs Komwi, Koht?

Duwen aramas akan ahr kin medemedewe duwen Koht kin poahsoankihda ia mwomwen pein arail tiahk, de pelien lamalam me arail pahpa/nohno kin towehda, de pelien lamalam me re pein pilada en iang. Ekei aramas kin kahdaneki Ih eden koht likamw akan me re kin ese; a ekei kin nda me iei mware: Koht. Ahpw, iaduwen​—⁠mwaren Koht mehkot kesempwal? E mehlel me Koht mehlel mehtehmen oh E kin kasalehong kitail ia uhdahn mware?

Dahme kahrehda lokolok en aramas nohn laudiki?

Ma ahn aramas emen ah sohte kanahieng de mour suwed kahrehong ah roson en war eh ohla de lelohng irair en semwehmwehla, e kak nda me irair me e mihla loale me suwed. Ahpw, e wehwehkier kahrepen e lelohng irair en lokolok.

Ahpw, irail me tohto kin lelohng apwal laud ahpw kaidehn irail me sapwung. Ekei kohwahki soumwahu laud kan. Ekei nannanti ahpw apwaliki diar ihmw oh mwenge me itar ong arail peneinei. Aramas rar kei kin mihla nan mour apwal oh keper pwehki aramas en kauwehla kosonned akan, pwehki mahwen, tiahk lemei, melimel de mehn kauwe sahpw, de pil kopwung sapahrek me kin kohsang aramas me kakaun irail.

Kahrehda, e wehwe mwahu kahrepen aramas tohto ahr kin idek: ‘Dahme kahrehda irair pwukat nohn ikiparpeseng wasa koaros nan sampah? Dahme kahrehda Koht kin mweidohng aramas akan en lokolok?’

[Kilel Credit Line nan Pali 2]

Cover: Chad Ehlers/Index Stock Photography

[Kilel Credit Line nan Pali 3]

Mountain: Chad Ehlers/Index Stock Photography