Soangen Soaren Aramas Dah Me Ke Wiahda Ahmw?
KE IANGEHR wadek pakair en mehla me kin pwarada nan nuhspepa kan nan ahmw wasa de pil kilang ripoht reirei kan me pid mour en aramas emen me mehlahr oh soahng kan me e wiahdahr nan ah wie momour? Ke kin wia pein idek rehmw met: ‘Dahme aramas pahn ndahkin ie?’ Aramas depe kin medemedewe duwen dahme aramas pahn tamatamankin irail mwurin arail pahn mehla? Kahrehda, medemedewe peidek pwukat: Dahme aramas akan pahn ndindahkin uhk rahnwet ma ke mehlahr aio? Soangen soaren aramas dah me ke wiewiahda ahmw? Dahme ke men aramas akan en esei iuk oh Koht en tamataman kin uhk?
Soun nting erpit me ntingihdi pwuhken Eklesiasdes koasoia: “Adamwahu mwahusang oil mwahu, oh rahn en mehla mwahu sang rahn en ahn aramas emen ah ipwidi.” (Eklesiasdes 7:1, New World Translation) Dahme kahrehda rahn en ahn aramas emen mehla mwahu sang ah rahn en ipwidi? Pwehki ahnsou en ipwidi en aramas menet sohte mehkot me e wiahda me meteikan kak tamatamanki duwen ih. Pwehki ahnsou en ipwidi—aramas menet sohte mehkot me e wiahda me meteikan kak tamatamanki duwen ih. Ah mour en mwurin met me pahn ahpw kasalehda ma aramas pahn tamatamanki ih me mwahu de me suwed. Pwe irail oko me pahn wiahda adamwahu ni erein pahr akan, ahr rahn en mehla ni mehlel mwahu sang rahn en ipwidi.
Kahrehda, mie atail pilipil. Ni mehlel, nan rahn koaros mie atail pilipil me pahn kahluwa dahme aramas pahn tamatamankin kitail ni rahn en atail mehla, ahpw mehlel, e kin pid iaduwen Koht a pahn tamataman kitail. Kahrehda, ohlen Ipru erpit ohte pil ntingihdi: “Mehn katamanpen aramas pwung emen kin wia kapai ieu, ahpw eden aramas suwed emen kin pwohsuwed.” (Lepin Padahk 10:7, NW) Pwe Koht en tamataman kitail pwehn ale kapai ieu—ia uwen ah nohn wia irair kesempwal ieu!
Ma kitail ahneki erpit, atail mehn akadei pahn wia kitail en kaperenda Koht pwehki atail mourki sapwellime koasoandi kan. Met wehwehki me kitail kin peikiong poahsoan en kosonned akan me Krais ketikihda: “‘Ken poakohng Siohwa ahmw Koht ki mohngiongomw unsek oh ni ngehnomw unsek oh ki omw lamalam unsek.’ Met iei kosonned me tapi oh keieu kesempwal. Keriau, me duwehte, iei met, ‘Ken poakohng mehn mpomw duwen omw kin poakohng pein uhk.’ Kosonned riau pwukat iei me poahsoanen pelien Kosonned en Moseso oh padahk en soukohp ako.”—Madiu 22:37-40, NW.
Ekei aramas meteikan kin tamankin irail pwehki arail kin wia aramas nsenohki aramas teikan, de sewese aramas teikan, utung pwung en aramas, de pwehki re pweida nan palien pisnis, de palien sains, de palien wini de pil soangen doadoahk teikan. Eri, dahme ke men aramas teikan en tamatamankin uhk?
Soun ntingihada koasoi lingan akan, mehn Scotland, me ede Robert Burns (mour sang pahr 1759 lel pahr 1796) kawehwehda me “Kehl ehu” (me wehwehki Koht) pahn ketikihong kitail kisakis me kitail kak kilang pein kitail nin duwen meteikan ahr kilang kitail. Ke kak kasawih pein ahmw doadoahk oh nda me aramas teikan pahn tamankin uhk me ke wia aramas me kin mwahu ong aramas teikan oh pil Koht? Ni imwio, duwen atail ehuiong aramas teikan pahn kesempwal sang atail pweida kan nan ehuehu lepin ahnsou nan palien mwadong oh palien pisnis. Kahrehda, peidek wet me kesempwal: Ia mwomwetail ong meteikan me pid atail koasoi, atail wiewia, oh soaretail? Irail kin wiahkin kitail aramas aktikitik oh mengei en koasoiong de aramas aklapalap? Irail kin wiahkin kitail aramas mas kadek de aramas lemei? Ke kak wehwehki aramas teikan de ke kin lemehdahte mehkot oh wia ahpw sohte men rong kaweid en aramas teikan? Ke wia aramas me kin poakpoake meteikan de ke kin kailongki aramas? Ke kin lemeidihd iong aramas teikan de ke kin rongorong mwahu oh kihda kaweid? Kitail kak kasawih ekei wiewia kan me wiawihier mahs oh pil wiewiawi nan atail ahnsou pwe kitail en diarada dahme kitail kak sukuhl kihsang wiewia pwukat.