Iaduwen Aramas akan Kin Tamataman Duwen Ekei Aramas
MPEN sounpahr silikid samwalahr oko, Depit kin tangatangasang Nanmwarki en Israel me mware Sohl. Depit ileklahng Napal, ohl kepwehpwe me naineki sihpw oh kuht tohto, oh peki reh mwenge oh pihl. Ni mehlel, Napal pweipwandikihong Depit oh nah ohl kan kadek, pwe irail kin sewese oh dondoare nein Napal pelin mahn akan. Ahpw, Napal sohte men sapankihong irail mepwukat. E pil lokaia lemei oh lipwoare nein Depit ohl akan. Napal kihong pein ih nan apwal, pwe Depit sohte me kin mwamwahleki.—1 Samuel 25:5, 8, 10, 11, 14.
Ahn Napal wiewia kan sohte duwehte uhdahn tiahk en kadek nan Middle East ong aramas en kohdo kan. Kahrehda, soangen soar en aramas dah me Napal wiaiong pein ih? Paipel kasalehda me ih aramas “lemei oh sehse tiahk” oh pil “aramas soh katepe men.” Ede kin wehwehki “salamalam” oh mehlel ih soangen aramaso. (1 Samuel 25:3, 17, 25) Ke men aramas en taman uhk ni ahl duwehte met? Ke kin lemei oh loalsuwediong aramas teikan, ahpw mehlel ni ahnsou me re mih nan paisuwed? De ke kin kadek, sapan oh kadek lamalam?
Dahme Aramas akan Kin Tamatamanki Duwen Sises?
Sapwellimen Sises doadoahk en kalohk nin sampah reireiki sounpahr siluh elep. Ahpw, iaduwen sapwellime tohnpadahk kan ahr pahn kin tamataman Sises? Pwehki ih aramas unsek, sohte dipe, e sohte kin karanih irail? E kin lemeiong irail, pwehki ah esehier me ih sapwellimen Koht Ohl? E kin kamasak oh idingki sapwellime tohnpadahk kan en peikiong ih? E soh kin kesempwaliki pwe e dehpa sarohdi de mwomw suwedla mwohn aramas kahrehda e sohte ese koasoia mehkot kaperen? E soh kin inenen kedirepw oh sohte ah ahnsou en tuhwong irail akan me luwet, soumwahu oh pil seri kan? E kin aklapalapiong aramas me kohsang wehi teikan oh pil lih kan, duwehte me ohl akan kalap epwehnki wia nan ahnsowo? Dahme poadoapoad kasalehiong kitail duwen Sises?
Sises kin nsenohki aramas akan. Ni ahnsou me kitail kin sukuhliki duwen sapwellime doadoahk en kalohk, kitail sukuhliki me e kin kakehlahda aramas mwoator oh soumwahu kan pak tohto. E kin ketikihong ah ahnsou pwehn sewese irail me mihla nan anahn, oh kasalehda nsenohki irail me pwulopwul akan.
Aramas akan kin maiauda ni arail kin keieng mpen Sises. E sohte kin mwamwahleki sapwellime tohnpadahk, kahrehda irail sohte kin perki kasalehda arail madamadau kan. Ni mehlel, e kin wia peidek iong irail pwe irail en kasalehda arail madamadau kan.—Mark 8:27-29.
Aramas akan kin tamatamanki Sises sapwellime irair en kupwurohkihla aramas akan, iangahki sapwellime ngenen tohnmetei. Ih me wia kasalepen sapwellimen Koht limpoak. Sises ketikihdi elen kaweid ohng koaros me kin idawehnla ih. Ia uwen loal en ahmw kahlemengih sapwellime mehn kahlemeng mwahu?—1 Korint 13:4-8; 1 Piter 2:21.
Iaduwen Aramas akan ahr Kin Tamataman Kristian akan Nan Rahn Pwukat?
Nan atail ahnsou, Kristian lelepek tohto mehlahr, me tohto mahla, ah ekei me pwulopwul. Ahpw, irail pwilikihdiong kitail karasepe mwahu kan.
Eri, iaduwen aramas teikan pahn tamatamankin uhk ma ke mehla? Ma ke mehlahr aio, dahme aramas akan pahn ndahkin uhk rahnwet? Met wia peidek ieu me pahn kamwekidada atail lamalam koaros pwe kitail en kamwahuwihala atail wiewia kan.
Dahme kitail kak wia pwe aramas akan en tamatamankin kitail dahme mwahu? Ahnsou koaros kitail kak kamwahuwihala atail wahn ngehn—limpoak, kanengamah, kadek, opampap, oh liksang me suwed iei ekei irair akan. (Kalesia 5:22, 23) Ei, ni mehlel, “adamwahu mwahusang oil mwahu, oh rahn en mehla mwahu sang rahn en ahn emen ipwidi.”—Eklesiasdes 7:1.