Lih Akan Me Kin Kaperenda Siohwa

“Siohwa en ketikihong uhk keting laud ehu pwehki ahmw wiewia kan kin kaperenda Ih.”​—RUD 2:12, NW.

1, 2. Iaduwen kitail kak paiekihda ni atail kin medemedewe duwen mehn kahlemeng mwahu kan en lih akan me ntingihdi nan Pwuhk Sarawi me kin kaperenda Siohwa?

LEMMWIN Koht kamwekid lih riemen en sohte peikiong emen Parao. Oh pil, pwoson kamwekid lihen netiki paliwere men en mweidong pein eh mour en lelong keper pwen perehla mehn Israel lipoahrok ohl riemen. Oh pil, wehwe oh aktikitik sewese lih emen en doarehla aramas tohto sang kahpwal ehu oh pil kin sewese emen me Siohwa ketin pilada en dehr kemehla aramas akan. Pwoson Siohwa oh kadek ong aramas teikan pil kamwekid liohdi men me wiahla nohno en kihong sapwellimen Koht soukohp men kisin mwenge me kaimwiseklahn kenara mwenge. Met iei ekei mehn kahlemeng mwahu kan me ntingdi nan Pwuhk Sarawi me pid duwen lih akan me kin kaperenda Siohwa.

² Kupwuren Siohwa ong lih pwukat oh sapwellime kapai kan me E ketikihong irail kin kasansalehda me E kin keieu kupwurki aramas akan me kin kasalehda irair mwahu kan ni pali ngehn, sohte lipilipil ma irail ohl de lih. Nan sampah rahnwet, aramas akan kin kesempwaliki mwomwen aramas, oh met kin kahrehong aramas akan en apwaliki nsenohki arail pali ngehn. Ahpw, e sansal me kitail kak wia met, pwehki pali laud en sapwellimen Siohwa aramas akan rahnwet me iei lih akan me kin lemmwin Koht. Lih Kristian pwukat kin pwoson, wehwehki oh kadek ong aramas teikan, oh irail kin kasalehda irair kaselel teikan me sapwellimen Koht lih akan pil kin kasalehda me ntingdi nan Pwuhk Sarawi. Ni mehlel, Kristian ohl akan en pil kahlemengih mehn kahlemeng mwahu me irail lih akan en kawao kasalehda. Pwen kilang iaduwen kitail kak wia met, kitail kak sukuhliki ni oaritik duwen lih pwukat me mih nan Pwuhk Sarawi.​—Rom 15:4; Seims 4:8.

Lih akan me Sohte Peikiong Parao

3, 4. (a) Dahme kahrehda Sipra oh Pua sohte peikiong Parao ni ahnsou me e kihda kosonned ehu en kemehla pwutak en Israel me ahpwtehn ipwidi? (b) Iaduwen Siohwa kapaiada soun keneitik lih riemen pwukat me kasalehda eimah oh lemmwiki Koht?

³ Nan kopwung kan en Nuremberg Germany mwurin Mahwen Keriau en Sampah, aramas tohto me ale kadeik pwehki irail kin kemehla aramas tohto, ahpw irail kin akpwung, dene kahrepen irail kin wia met: pwehki re kin kapwaiada kosonned kan me kohsang aramas lapalap kan. Ni ahnsouwet, kitail pahn kapahrekih aramas pwukat oh lihen Israel soun keneitik riemen, Sipra oh Pua, me kin kousoanla nan Isip ni mwehin emen Parao lemei me ede sohte sansal. Pwehki mehn Ipru kan kin mwadang tohtohla, Parao masepwehkada oh padahkiong soun kaneitik lih riemen en kemehla pwutak koaros me ipwidi rehn lihen Ipru kan. Dahme ira wia​—⁠mendahki kosonned suwed ehu kohwong ira? “Soun keneitik ko, lih masak Koht riemen, ihme ira sohte peikiong nanmwarkio; pwe ira kin kamourala kisin pwutak kan.” Dahme kahrehda lih pwukat sohte kin masak nanmwarkio? Pwehki re kin “lemmwiki Koht mehlelo.”​—Eksodus 1:15, 17; Senesis 9:6.

⁴ Ei, soun keneitik lih riemen kin wiahki Siohwa arail wasahn ruk, oh E ketin rasehng “mehn sansar ehu” ong ira, re ese me Siohwa kak pere ira sang Parao. (2 Samuel 22:31; Eksodus 1:18-​20) Ni mehlel, Siohwa kapaiada ira laud sang met. E kapaiada Sipra oh Pua en naineki pein neira seri kan. E pil kin ketin kasalehda wahu ong lih pwukat, pwe E ketin koasoanehdi me edara oh ara wiewia kan en ntingdi nan sapwellime Mahsen pwe dih en mwuri kan pahn kak wadek duwen ira, ahpw sohte aramas nan rahnwet tamanda eden Parao.​—Eksodus 1:21; 1 Samuel 2:30b; Lepin Padahk 10:7.

5. Rahnwet, iaduwen lih Kristian akan kin kasalehda soangen madamadau duwehte Sipra oh Pua, oh iaduwen Siohwa pahn kapaiada irail?

⁵ Rahnwet, mie lih akan me kin duwehte Sipra oh Pua? Ei, mie! Ni ehuehu sounpar, lih kid kid kei kin, ni eimah, kalohki Rongamwahu en Pwuhk Sarawi nan sahpw akan me “sapwellimen nanmwarki kosonned” kin uhwong doadoahk wet, ihme irail kin tohnmeteikihla ahr saledek de pil arail mour. (Ipru 11:23; Wiewia 5:28, 29) Ahpw, pwehki limpoak ong Koht oh mehn mparail, lih eimah pwukat sohte kin mweidong aramas en kauhdi irail sang arail kin kalohki Rongamwahu en Wehin Koht ong aramas teikan. Ihme kahrehda, Kristian lih tohto kin lelong kalokolok kan. (Mark 12:30, 31; 13:9-​13) Duwehte Sipra oh Pua, Siohwa kin ketin mwahngih duwen wiewia kan en irail lih eimah pwukat, oh e pil pahn ketin kasalehda sapwellime limpoak ong irail ni ah kin nekidala adarail kan nan sapwellime “pwuhken komour,” ma irail pahn dadaurete lao lel ni imwi.​—Pilipai 4:3; Madiu 24:13.

Lihen Netiki Paliware men kin Kaperenda Siohwa

6, 7. (a) Dahme Reap esehier duwen Siohwa oh sapwellime aramas akan, oh dahme met kamwekid ih en wia? (b) Iaduwen sapwellimen Koht Mahsen kin wauneki Reap?

⁶ Nan pahr 1473 B.C.E., mie emen lihen netiki paliwere me adaneki Reap me kin kousoan nan kahnimw en mehn Kenan, Seriko. E sansal, Reap kin wehwehki duwen wehin Israel. Pwe ni ahnsou me lipoahrok riemen en mehn Israel men rukila nan imwe, Reap kin koasoiong ira ni oaretik duwen sawas me kohsang rehn Koht ni E ketin kapitala mehn Israel akan sang Isip, edetehn met wiawi sounpar 40 mwowe! E pil kin wehwehki duwen mehn Israel akan me ahpwtehn kalowehdi nanmwarki en Amor riemen, Sihon oh Ok. Ni mehlel, dahme Reap wehwehki duwen sapwellimen Siohwa wiewia kan kin kamwekid ih. E ndaiong lipoahrok riemen, “I ese me Kauno ketikihongkumwailehr sahpw wet, . . . pwe amwail Koht iei Kauno, ih me Koht en nanleng oh sampah.” (Sosua 2:1, 9-​11) Ei, dahme Reap sukuhliki duwen Siohwa oh sapwellime wiewia kan ong Israel kamwekid ah mohngiong oh kahrehong ih en pwoson Koht.​—Rom 10:10.

⁷ Ahn Reap pwoson kin kamwekid ih en wia dahme mwahu. E, “ni kadek,” kasamwo lipoahrok en mehn Israel kan oh e kin peikiong ara kaweid kan ni ahnsou me Israel mahweniong Seriko. (Ipru 11:31; Sosua 2:18-​21) E sansal me ahn Reap wiewia kan me mwekidki ah pwoson kin uhdahn kaperenda Siohwa, pwe Koht kin kamwekid Seims en ntingihdi duwen Reap oh edeo kin pwarada limwahn eden Eipraam, me wia kompoakepahn Koht, nin duwen mehn kahlemeng mwahu ong Kristian akan. Seims ntingihdi: “Pil duwehte lih suwedo, Reap, e pil pwungla rehn Koht pwehki eh wiewia kan, ni eh kasamwo lipoahrok en mehn Suhs akan oh kadarirailla ni apwoat ahl tohrohr.”​—Seims 2:25.

8. Iaduwen Siohwa kapaiada Reap pwehki ah pwoson oh peik?

⁸ Siohwa ketin kapaiada Reap ni ahl tohto. Ehu, e doarehla eh mour oh mour en aramas teikan me mih nan imwe pwen doarehla arail mour​—“oh eh peneinei koaros.” Oh E ketin mweidong irail en kousoan “nanpwungen mehn Israel,” oh mehn Israel akan pahn wiahkinirail mehn Israel akan. (Sosua 2:13; 6:22-​25; Lipai 19:33, 34) Ahpw kaidehn ihte soangen kapai kan me Siohwa ketikihong ih. Siohwa pil ketikihong Reap en ale pwais kaselel ieu en wiahla nohno kahlap en Sises Krais. Wiewia wet kin wia kasalepen sapwellimen Siohwa limpoak-kadek ong lihen Kenan men me mahs kin kaudokiong dikedik en eni kan!a​—Melkahka 130:3, 4.

9. Iaduwen kupwuren Siohwa ong Reap oh ekei Kristian lih akan nan keieun senturi pil kak kangoange lih akan nan rahnwet?

⁹ Duwehte Reap, ekei Kristian lih kan sang ni tepin senturi lel rahnwet pil kesehla arail mour en nenek pwen kak kaperenda Koht. (1 Korint 6:9-​11) Ekei irail tikida nan wasa ieu me duwehte Kenan en mahs, me diren aramas kin wia dipen nenek oh ong irail tiahk wet sohte sapwung. Ahpw, pwehki pwoson me kin poahsoanda pohn loalokong pwung me irail sukuhliki nan Pwuhk Sarawi, irail kin kawekila arail wiewia sapwung kan. (Rom 10:17) Eri, kitail kak nda me soangen lih pwukat me “Koht sohte ketin peikasalki ar kin wiahki ih ar Koht.” (Ipru 11:16) Siohwa kin ketin wauneki irail oh met kin wia pwais kaselel ong irail!

Lih Emen me Ale Kapai Pwehki E Kin Kasalehda Erpit

10, 11. Dahme wiawi nanpwungen Napal oh Depit me kamwekid Apikail en kasalehda erpit?

¹⁰ Lih lelepek tohto en kawao kin kasalehda erpit ni ahl me siksang meteikan, oh wiahkin irail aramas kesempwal nin duwen sapwellimen Siohwa aramas akan. Apikail, lih emen me pwoudiki Napal me wia ohlen Israel kepwehpwe men, iei lih emen me kin kasalehda erpit. Erpit me Apikail kasalehda me doarehla mour en aramas akan oh kauhdi Depit, me pahn wiahla nanmwarki en Israel, en dehr dipkihla ntahn aramas akan. Kitail kak wadek duwen Apikail nan pwuhken 1 Samuel irelaud 25.

¹¹ Poadoapoad wet tepikihda koasoia duwen Depit oh nah aramas akan ahr kin kousoanla limwahn nein Napal mahn akan, oh nein Depit aramas akan kin ni soh isepe sinsile mahn pwukat ni rahn oh ni pwong pwen kasalehda kadek ong Napal, emen riarail mehn Israel. Ni ahnsou me kenen Depit pahn kereniong nek, e kadarala mwahnakapw ehk oh kehkehlingkihong irail re en kohla rehn Napal oh peki mwenge. Ni ahl wet, Napal kak kasalehda eh kalahngan ong Depit oh wauneki ih nin duwen emen me pilipildahr sang rehn Siohwa. Ahpw, Napal sohte men kasalehda ah kalahngan ong Depit. E lingeringerda oh kauwe Depit oh e kapwurehla mwahnakapw oko oh sohte kihong irail mwenge. Ni ahnsou me Depit rong duwen met, e koasoanehdi ohl 400 en mahwen en rapahki Napal pwehn dupuk. Apikail rongada duwen dahme ah pwoud wia oh mwadang kadarala rehn Depit diren mwenge pwe Depit en kak meleileidi. Mwurinte mwo, e pein kohla tuhwong Depit.​—1 Samuel 25:2-20.

12, 13. (a) Ni ahl dahieu me Apikail kasalehda erpit oh loalopwoat ong Siohwa oh sapwellime pilipilo? (b) Dahme Apikail wia ni ahnsou me e pwurala ni imweo, oh dahme wiawi mwurin met?

¹² Ni ahnsou me Apikail tuhwong Depit, e pek mahk reh ni lamalam aktikitik oh met kin kasalehda me e kin wauneki sapwellimen Siohwa aramas pilipil menet. Apikail koasoia, “Kauno [“Siohwa,” NW] pahn ketin wiahkinkomwihla nanmwarki oh pil kadaudokomwi kan, pwehki omwi ketin mahmahwenki sapwellime mahwen kan” oh e pil nda me Siohwa pahn kasapwiladahng Depit nanmwarkien Israel. (1 Samuel 25:28-​30) Apikail kin pil kasalehda eimah ni e kin padahkiong Depit me ah kin men dupuk ohng aramas soahng suwed kan pahn kak kahrehong Depit en kakerehdi nta ni sohte kahrepe. (1 Samuel 25:26, 31) Pwehki Apikail kin kasalehda lamalam en aktikitik, wahu, oh loalokong, met sewese Depit en pwurehng ahneki madamadau pwung. Depit mahsanih: “Kaping ong Kauno [“Siohwa,” NW], Koht en Israel, me ketin poaroneikomwihdo pwehn tuhwong ie. Kalahngan en Koht pwehki omwi kupwuramwahu oh dahme komw wiadahr rahnwet pwe I en dehr wiahda sapwung laud en kemehla aramas oh I en dehr dupukohng ar wiewia suwed ong ie.”​—1 Samuel 25:32, 33.

¹³ Ni ahnsou me Apikail pwurala ni imweo, e koasoanehdi me e pahn padahkiong eh pwoud duwen kisakis me e kihong Depit. Ahpw, ni ahnsou me e diarada eh pwoud, e “sakaula douluhl.” Mwurin sakauo eh sarasangehr nimenseng, liho ahpw ndaiong ih mehkoaros. Dahme Napal wia? Uwen e pwuriamwekihla rohng wet, ih eri mwoatorala. Mwurin rahn eisek, Koht ketin kemehla Napal. Ni ahnsou me Depit rongada me Napal mehlahr, e peki en pwoudiki Apikail. E kesempwaliki Apikail oh wauneki ih. Apikail pwungki en wiahla en Depit ah pwoud.​—1 Samuel 25:34-​42.

Ke Kak Kahlemengih Apikail?

14. Mehnia irair akan me Apikail kin kasalehda me kitail pil men doadoahngki oh kalaudehla nan atail mour?

¹⁴ Kumwail ohl oh lih akan​—⁠kumwail kilang irair kan me Apikail kasalehda me kumwail men kahlemengih oh kalaudehla nan pein amwail mour? Ele mwein ke men wiahda omw pilipil kan ni elen loalokong ni ahnsou me kahpwal akan kin pwarada nan ahmw mour. De mwein ke men doadoahngki lokaia kameleilei oh pwung ni ahnsou me aramas teikan kin lingeringerda. Ma ih duwen, dahme ke soh kapakap ong Siohwa oh peki reh en sewese iuk en wia met? E inoukihong kitail me e pahn ketikihong irail koaros me irail kin peki ma irail pahn “kapakap ni pwoson, erpit oh dehdehkihla dahme konehng.”​—Seims 1:5, 6; Lepin Padahk 2:1-6, 10, 11.

15. Pahn soahngen irair dah kei e pahn keieu kesempwal ong Kristian lih akan en kasalehda irair akan me Apikail kin doadoahngki?

¹⁵ Lih akan me arail pwoud saikinte iang padahk mehlel oh saikinte kapwaiada mouren kaweid kan en Pwuhk Sarawi kin anahne kasalehda irair kaselel pwukat. Mwein ahmw pwoud ohl kin nim sakau daulihla. Mehlel, kitail koapworopworki me soangen ohl pwukat pahn kak kawekihla arail mour ehu rahn. Ohl tohto kawekihla arail mour​—pali laud en ahnsou pwehki arail pwoud lih kin kasalehda lamalam aktikitik, wahu, oh tiahk mwakelekel.​—1 Piter 3:1, 2, 4.

16. Sohte lipilipil soahngen kahpwal kan emen lih Kristian kin lelong nan ihmwe, iaduwen e pahn kak kasalehda me e kin kesempwaliki ah nanpwungmwahu rehn Siohwa?

¹⁶ Sohte lipilipil soangen kahpwal kan me ke anahne en kanengamahiong nan imwomw, tamataman me Siohwa kin ahnsou koaros sewese iuk. (1 Piter 3:12) Eri, ken nantiong kehlail ni pali ngehn. Kapakap ong Siohwa oh peki reh ma E kak ketikihong uhk erpit oh kanengamah. Ei, karanih Siohwa ni ahmw kin kaukaule onop Pwuhk Sarawi, kapakap, doudouloale, oh werekiong iengomw Kristian kan. Mendahki ahn Apikail pwoud sohte kin kehlail ni pali ngehn, e sohte mweidong met en kaluwetala pein ah limpoak ong Koht oh duwen ah madamadau ong sapwellimen Koht laduo me Koht ketin piladahr. Eh wiewia kan kin poahsoankihda mouren kaweid pwung kan. Edetehn ohl pwopwoud kin wia mehn kahlemeng mwahu nin duwen emen me kin papah Koht, Kristian lih pwopwoud men anahne pohnese me e anahne nantihong doadoahk laud pwe pein ih en kehlail ni pali ngehn. Ni mehlel, ah pwoud ohl kin ale pwukoa sang Pwuhk Sarawi me e anahne apwaliada ah pwoud lih ni pali ngehn oh ni pali war, ahpw lih pwopwoud kan pil anahne doadoahk laud pwehn “ale komour sang arail lemmwiki Koht oh poadidiong papah Ih.”​—Pilipai 2:12; 1 Timoty 5:8.

E Iang Ahneki “Pwaisen Soukohp Men”

17, 18. (a) Liohdien Serepad kin lelong kasongpen eh pwoson kapwuriamwei dahieu? (b) Iaduwen liohdio mwekidkihda ahn Elaisa pekipek, oh iaduwen Siohwa kin kapaiada liho?

¹⁷ Ni ahl me Siohwa ketin apwaliahda emen liohdi semwehmwe ni mwehin soukohp Elaisa kin kasalehda uwen laud e kin kalahnganki aramas akan me kin utungada kaudok mehlel oh tounmeteiki pein arail kehl, ahnsou oh mwohni. Pwehki e sohte keteu ni ahnsou reirei ni mwehin Elaisa, lehk lapalapo eh uklahr oh lelpeseng wasa koaros, oh pil liohdi men oh nah pwutak pwulopwul me kin kousoan nan Sarepad lelong kahpwal wet. Ni ahnsou ira pahn kang kaimwiseklahn kenara mwenge, emen ohl mwemweitala reira​—ohl menet iei soukohp Elaisa. E wiahda pekipek kapwuriamwei ieu. Mendahki e wehwehki duwen kahpwal me liohdi menet lelohng, e peki reh en wiahda “ekis kisin lopwon tikitik” oh met pahn kaimwiseklahn ahr leh oh pilawa. Ahpw, e padahkiong liho: “Pwehki ih met me Kauno [“Siohwa,” NW], Koht en Israel mahsanih, ‘Sohte pilawa pahn neksang nan pwohl wet, oh sohte leh pahn neksang nan sah wet, mwohn rahno me ngehi, Kauno [“Siohwa,” NW], pahn kadarodo keteu.’ ”​—1 Nanmwarki 17:8-​14.

¹⁸ Dahme ke pahn wia ma emen pahn wiaiong uhk soangen pekipek kapwuriamwei duwehte met? Liohdien Serepad kin wehwehki me Elaisa iei sapwellimen Siohwa soukohp, oh ih “wiahda duwen me Elaisa padahkiong.” Ni ahl dahieu me Siohwa mwekidkihda ahn liho kin kasalehda kadek? E ketikihda mwenge ong liho, nah pwutak, oh Elaisa ni erein ahnsou ehu me sohte keteu. (1 Nanmwarki 17:15, 16) Ei, Siohwa ketikihong liohdien Serepad “pwaisen soukohp men,” edetehn lih menet kaidehn mehn Israel. (Madiu 10:41) Sapwellimen Koht Ohl pil kapinga lih menet ni ahnsou me e kasalehda me lih menet wia mehn kahlemeng mwahu ong aramas soh pwoson kan nan kahnimwen Nasared, wasa me Sises tikida ie.​—Luk 4:24-​26.

19. Rahnwet, ni ahl dah kei Kristian lih tohto kin kasalehda ngehn me liohdien Serepad kin kasalehda, oh ia kupwuren Siohwa ong aramas pwukat?

¹⁹ Rahnwet, lih Kristian tohto kin kasalehda soangen ngehnohte me liohdien Serepad kasalehda. Karasepe ieu, ni ehu ehu wihk, sister Kristian soh roporop kan​—oh tohto rehrail me semwehmwe oh kin apwalih arail peneinei kan⁠—kin kasalehda kadek oh kasamwo sounapwalih kan oh arail pwoud kan. Ekei kin kamwenge irail akan me kin wia doadoahk en kalohk kaukaule, oh ekei irail kin sewese me semwehmwe kan, de ni ahl teikan irail kin kihda pein arail ahnsou, kehl oh mwohni pwen utungada doadoahk en Wehio. (Luk 21:4) Eri, Siohwa kin wehwehki duwen tohnmetei pwukat? Uhdahn! “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasaledahr oh pil kin kasalehiong riamwail Kristian kan.”​—Ipru 6:10, NW.

20. Dahme kitail pahn sukuhliki nan artikel en mwuhri?

²⁰ Nan keieun senturi, ekei lih kan me kin lemmwiki Koht kin ahneki pwais kaselel en papah Sises oh sapwellime wahnpoaron kan. Nan artikel en mwurin met, kitail pahn sukuhliki iaduwen lih pwukat kin kaperenda Siohwa, oh kitail pil pahn koasoia duwen mehn kahlemeng mwahu kan en lih nan rahn pwukat me kin papah Siohwa ki arail mohngiong unsek, mendahki irail kin lelong kahpwal akan.

[Nting tikitik me mi pah]

Kohsapahl

• Iaduwen lih pwukat kin kaperenda Siohwa?

• Sipra oh Pua

• Reap

• Apikail

• Liohdien Serepad

• Iaduwen atail kin medemedewe duwen mehn kahlemeng mwahu me lih pwukat kin kasalehda, pahn kak sewesehda pein kitail? Kihda karasaras.

[Kilel nan Pali 9]

Lih lelepek tohto kin papah Koht mendahki “sapwellimen nanmwarki kosonned”

[Kilel nan Pali 10]

Dahme kahrehda Reap kin wia mehn kahlemeng mwahu nin duwen emen me kin ahneki pwoson?

[Kilel nan Pali 10]

Mehnia irair akan me Apikail kin kasalehda me ke men pil alasang?

[Kilel nan Pali 12]

Rahnwet, lih Kristian tohto kin pil kasalehda ngehn me liohdien Serepad kin kasalehda