Peidek kan Sang Sounwadawad kan
Iaduwen Kristian kan Pahn Kilangwong (Birthstones) Takai Kesempwal kan me kin Kileledi Sounpwong me Emen Ipwidi?
Nan ekei tiahk kan, birthstones kin kileledi sounpwong me emen ipwidi. En doadoahngki ring me mie soangen takai kesempwal iei pilipil en emenemen. (Kalesia 6:5) Ni ahmw pahn wiahda pilipil wet, mie ekei ire kan me ke anahne medemedewe.
Encyclopaedia Britannica kasalehda me birthstone iei “takai kesempwal me kin kileledi sounpwong me emen ipwidi, oh doadoahngki soangen takai wet pahn wahdo paiamwahu oh rosonmwahu.” E pil kapatahiong: “Aramas me kin pwohngih usu kan kin koasoia me mie kehl tohrohr nan ekei takai kesempwal pwukat.”
Irail kan en mahs kin kamehlele me emen me kin naineki birthstone pahn paiamwahu. Kristian mehlel kin kamehlele met? Soh, pwehki e ese me Siohwa keriahla irail kan me kohkohsang ih oh uhd kamehlele “koht en paiamwahu (good luck).”—Aiseia 65:11.
Nan pahr kan en mahs soun kosetipw kan kin pilada ehu takai kesempwal ong ehu ehu sounpwong. Re kin kangoange aramas en doadoahngki birthstones ong sounpwong me irail ipwidi, pwehn perehirailsang kahpwal. Ahpw e pahn uhwong padahk en Pwuhk Sarawi en rong soun ketieni kan, pwe Pwuhk Sarawi kin kalahdeki wiewia pwukat.—Deuderonomi 18:9-12.
E pil pahn sapwung emen Kristian en kesempwaliki ehu ring pwehki mie birthstone patehng ring. Sounkadehdehn Siohwa kan sohte kin kasarawi rahn me emen ipwidi. Pwe, soangen kamadipw pwukat kin kahrehda petehkpen emen me nohn daulihla oh ihte ipwidi me ntingdi nan Pwuhk Sarawi iei en irail kaun kan me sohte kin pahpa Koht.—Senesis 40:20; Madiu 14:6-10.
Ekei aramas kin kamehlele me ma aramas pahn doadoahngki ring me mie birthstone, met kak kamwahuiala arail irair akan. Ahpw Kristian mehlel sohte kin kamehlele met, pwe re ese me “mour kapw” kin kohsang sapwellimen Koht ngehn sarawi oh pil sang ni atail kin doadoahngki kaweid en Pwuhk Sarawi.—Episos 4:22-24.
Ehu ire kesempwal iei ia kahrepe emen men doadoahngki birthstone. Ni emen kin pilada en doadoahngki ring me mie birthstone, e kak pein idek reh, ‘I men doadoahngki ring wet pwe I kin leleki takai kesempwal wet oh e kin kasaingdi birthstone pohn ring? De I kamehlele kilenwo kan me ekei kin koasoia duwen takai kesempwal pwukat?’
Kristian men anahne en tehk mwahu ah mohngiong pwen kak diarada ia kahrepe kan e men doadoahngki takai pwukat. Pwuhk Sarawi mahsanih, “Kanahieng omw madamadau, pwe omw madamadau kan kin kahrehda mwomwen omw mour.” (Lepin Padahk 4:23) Ni ahnsou me Kristian men kin wia ah pilipil me pid birthstone, e pahn mwahu ma Kristian men pahn medemedewe duwen ia kahrepe e perenki birthstone oh duwen imwilahn ah pilipil ong pein ih oh aramas teikan.—Rom 14:13.