Sukuhliki Duwen Sapwellimen Sises Madamadau ong Irairen Lapalap

“Mehmen me men lapalap rehmwail, e pahn papah meteikan.”​—MADIU 20:26.

1. Ia madamadau en tohn sampah wet ong lapalap?

KARANIH kanihmw en Thebes (rahnpwukat kin adanekihla Karnak), mpen mwail 300 dohsang Cairo, mie dikedik en Parao Amenhotep III me ileile piht 60. Ni ahnsou me emen pahn kilang lapalahn dikedik wet, e pahn ahneki pepehm ieu me e tikitik. Takai sansal wet wiawihda pwen kahrehong aramas akan en wauneki ohlo, oh met kin wia kasalepen madamadau en sampah wet ong lapalap​—iei en kasalehda me pein emen me kesempwal de lapalap, oh kahrehong aramas teikan en ahneki madamadau me irail sohte kesempwal.

2. Mehn kahlemeng dahieu me Sises wia ong sapwellime tohn padahk kan, oh peidek dah kei kitail kak pein idek rehtail?

² Kapahrekihpene soangen madamadau wet ong madamadau me Sises Krais padahkiong kitail. Edetehn ih me “Kaun oh Sounpadahk” ong sapwellime tohnpadahk kan, Sises padahkiong irail me lapalap kin kohsang papah mehteikan. Ni kaimwiseklahn rahn me e pahn momour nin sampah, Sises kasalehda mouren ah padahk ni ah kin wuden nehn sapwellime tohnpadahk kan. Wiewia aktikitik ieu! (Sohn 13:4, 5, 14) En papah aramas akan de aramas akan en papah kowe​—mehnia me ke mwahuki? Kahlemeng mwahu en Krais kin kamwekid uhk en kasalehda aktikitik duwehte e kin wia? Eri, kitail kak kasawiahda madamadau en Krais me pid duwen lapalap ah kin weksang madamadau en tohnsampah wet.

En Dehr Ahneki Madamadau en Sampah wet me Kin Pid Lapalap

3. Mehnia poadopoad kan nan Pwuhk Sarawi kin kawehwehda duwen imwikihla suwed ong aramas akan me kin perenki ale kaping sang rehn aramas teikan?

³ Poadoapoad tohto me mih nan Pwuhk Sarawi me kin kasalehda me madamadau en sampah wet me kin pid lapalap kin kahrehong aramas akan en lelong kahpwal laud. Medemedewe duwen Aman, aramas lapalap men nan wehin Persia ni mwehin Ester oh Mordekai. Pwehki Aman kin men aramas teikan en kapinga ih, met kin kahrehong ih en lelong kanamenek laud oh mehla. (Ester 3:5; 6:10-12; 7:9, 10) Iaduwen ohl pohnmwahso Nepukadnesar, me iahkala nan eilepen ah manaman en kaunda? Ah madamadau sapwung duwen lapalap kin sansalda sang ah mahsen pwukat: “Ia uwen lingan laud en Papilon! Pein ngehi me kauwada pwe en wia poahsoan kaunen ei wehi oh kasalehda uwen ei kehl oh manaman, uwen ei lingan, oh lapalap en ei wehi.” (Daniel 4:30) Oh pil mie ohl aklapalap emen, Erod Akripa I, me sohte warohng ahpw e kin alehdi kaping kan ong pein ih oh sohte kapinga Koht. “Mwahs eri kangala oh e ahpw mehla.” (Wiewia 12:21-23) Pwehki ohl pwukat sohte kin wehwehki duwen sapwellimen Siohwa kupwur kan duwen lapalap kahrehda irail pwupwudi, namenekda oh mehla.

4. Ihs me kin kahrehda tohn sampah kin ahneki madamadau aklapalap?

⁴ E konehng ong kitail en perenki doadoahngki pein atail mour ni ahl me pahn wahdohng pein kitail wahu. Ahpw, Tepilo kin doadoahngki ineng wet en kahrehong kitail en ahneki madamadau aklapalap, pwe met kin kasalehda duwen ahn pein Tepilo ah ineng kan. (Madiu 4:8, 9) Dehr manokehla me ih me “koht en koasondi wet,” oh e kin nantihong en ehukihong aramas akan nin sampah wet duwen ah madamadau kan. (2 Korint 4:4; Episos 2:2; Kaudiahl 12:9) Pwehki Kristian akan ese utupen soangen madamadau wet, irail kin liksang ahn sampah madamadau duwen lapalap.

5. Pweida mwahu ong mehkan me pid sampah, wiahla aramas ndand, oh kepwehpwela, pahn kak wahdohng aramas nsenamwahu mehlel? Kawehwehda.

⁵ Ehu madamadau me Tepilo kin kahrehong aramas en ahneki, iei en ndandkihla nin sampah wet, men ale kaping tohto sang rehn aramas teikan, oh naineki mwohni tohto pwe met pahn kahrehong kitail en ahneki peren nan atail mour. Ahpw madamadau wet me mehlel? Aramas me kin pweida mwahu nin sampah wet, ndandla, oh naineki mwohni tohto kin ahneki mour nsenamwahu? Pwuhk Sarawi kin kihong kitail kaweid en dehr mweidong soangen madamadau pwukat en pitihdi kitail. Nanmwarki Solomon ntingihdi: “I pil dehdehkiher kahrepen aramas ar kin nohn doadoahk laud pwe re en paiamwahula: pwehki ar kin peirinki dipwisou kan me mehn mparail kan kin ahneki. Ahpw met iei mehkot me sohte katepe. Met rasehng pwakipwakih kisinieng.” (Eklesiasdes 4:4) Aramas tohto me kin nantihong pwehn ndandla oh naineki mwohni tohto kak kadehde duwen mehlelpen kaweid en Pwuhk Sarawi wet. Karasepe ieu, mie emen ohl me sewese wiahda pilahn oh pil wiahda oh tehk ma wahr en nan wehwe me wahla aramas en kohdahla lel maram kin mwahu de soh, oh pein ih kin medemedewe: “I doadoahk laud oh koahiekla nan ai wasahn doadoahk. Ahpw sohte katepe, pwe met sohte kin kahrehong ie en peren oh nsenamwahu.”a Nin duwen wehwehn lapalap ong aramas akan nin sampah wet, mendahki e pid pisnes, mwadong, de mehn kamweit kan, e sohte kak wahdohng irail nsenamwahu mehlel.

Lapalap kin Poahsoankihda Doadoahk Me Kin Mwekidkihda Limpoak

6. Dahme kin kasalehda me Seims oh Sohn kin ahneki madamadau sapwung ieu me kin pid lapalap?

⁶ Dahme wiawi nan mouren Sises kin kasansalehda dahkot lapalap. Sises oh sapwellime tohnpadahk kan seiseiloak ong Serusalem ong Pasohpa nan pahr 33 C.E. Kisehn Sises riemen, Seims oh Sohn kin ahneki madamadau sapwung ieu ong dahkot lapalap. Ira doadoahgki ara nohno en peki rehn Sises pekipek wet: ‘Maing, komw inoukihong ie me ei tungoal pwutak riemenet en iang mwohd mpomwi nan mwoalomwi, emen ni palimaun, a emen ni palimeing, ni omw pahn wiahla Nanmwarki.’ (Madiu 20:21) Ong mehn Suhs ako, en mwohd mpen emen ni palimaun de pali meing, iei pwais lapalap ehu. (1 Nanmwarki 2:19) Seims oh Sohn kin ni sohte konehng nantiong en alehdi ong pein ira wasa keieu mwahu kan. Ira mwahuki pwais lapalap ong pein ira. Ahpw Sises kin wehwehki duwen dahme ira kin medemedewe oh e isaneki ahnsou mwahu ehu en kapwungala ara madamadau sapwung me kin pid ong irairen lapalap.

7. Iaduwen Sises kawehwehda duwen lapalap en Kristian mehlel akan?

⁷ Sises kin ese me nan sampah aklapalap wet, aramas akan kin kilangwong emen nin duwen emen lapalap ma e kin kaunda meteikan. Ahpw, nanpwungen sapwellimen Sises tohnpadahk kan, papah mehteikan iei aramas lapalap men. Sises mahsanih: “Mehmen me men lapalap rehmwail, e pahn papah meteikan; a mehmen rehmwail me men soumasala, e uhdahn pahn wiahla lidu.”​—Madiu 20:26, 27.

8. Ia wehwehn wiahla soun papah emen, oh mehnia peidek kan kitail kak idek pein kitail?

⁸ ”Soun papah” ni lokaiahn Krihk nan Pwuhk Sarawi kin wehwehki emen me kin nantiong wia uwen me e kak koaros en papah aramas teikan. Sises padahkiong sapwellime tohnpadahk kan duwen mehn kasukuhl kesempwal ieu: Padahkiong aramas teikan en wia mehkot ong uhk sohte kin kahrehiong uhk en lapalap; ahpw papah mehteikan me kin poahsoankihda limpoak kin kahrehiong uhk en lapalap. Idek pein kowe: ‘Dahme ien wia ma ngehi me Seims de Sohn? I pahn wehwehki ni mehlel me lapalap kin poahsoankihda limpoak?’​—1 Korint 13:3.

9. Kahlemeng dahieu me Sises wia, ni ah kin mih rehn aramas teikan?

⁹ Sises kasalehiong sapwellime tohnpadahk kan me koasoandi en lapalap ong sampah wet kin weksang koasondi en lapalap me Krais kin ketin kasalehda. Sises sohte kin ahneki madamadau ieu me ih me lapalap sang aramas akan me e kin papah de e sohte kahrehong irail en ahneki madamadau ieu me irail sohte itar. Aramas koaros​—ohl, lih, seri kan, kepwehpwe, semwehmwe, oh me ahneki manaman laud, iangahki aramas dipan akan—​kin nsenamwahu oh perenki mihmi rehn Sises. (Mark 10:13-16; Luk 7:37-50) Aramas akan kin kalapw sohte kasalehda kanengamah ong irail akan me kin luwet de ahneki irairen soh unsek teikan. Ahpw, Sises me weksang irail. Mendahki sapwellime tohnpadahk ko kin ekei pak sehse lamalam oh kin akamaipene, Sises kin ni kanengamah kaweidih irail, kasalehiong irail me e kin ahneki lamalam aktikitik oh mpahi.​—Sekaraia 9:9; Madiu 11:29; Luk 22:24-27.

10. Iaduwen mouren Sises kin kasalehda me e sohte kin roporop ong pein ih ni ahnsou me e kin papah meteikan?

¹⁰ Mehn kahlemeng mwahu duwen soh roporop me sapwellimen Koht Ohl keieu laud kin kasalehda duwen ia wehwehn lapalap. Sises sohte ketidohng sampah pwe aramas teikan en papah ih, ahpw ih en papah meteikan, kamwahuiahla “soangen soumwahu koaros” oh kasaledek kihla aramas akan sang rehn ngehn saut akan. Edetehn e pil kin pwang oh anahne kommoal, e kin ahnsou koaros sewese mehteikan mahs mwohn pein ah. (Mark 1:32-34; 6:30-34; Sohn 11:11, 17, 33) Sapwellime limpoak kin kamwekid ih en seiseiloak wasa doh nan ahl pwelepwel akan pwen kalohki rongamwahu oh sewese aramas teikan ni pali ngehn. (Mark 1:38, 39) E sansal me Sises kin kesempwaliki papah aramas teikan.

Kahlemengih Lamalam Aktikitik en Krais

11. Mehnia irair akan me irail brother pilipilda kan en wiahla sounapwalih kan en mwomwohdiso pahn anahne en kapwaiada?

¹¹ Ni imwin sounpar kan en nan pahr kan en 1800 samwa, madamadau pwung kan me irail sounapwalih en Kristian akan anahne kakairada nan loalarail kan kin kohda ohl kei pilipilda en wiahla Sounapwalih en Circuit oh District kan pwen sewese sapwellimen Koht aramas akan. Nin duwen Zion’s Watch Tower en September 1, 1894 kawehwehda me irail kin rapahki ohl akan me kin kasalehda “opampap​—pwe re en dehr aklapalap . . . , lamalam aktikitik oh irail sohte kin suweiki pein irail ahpw kapinga Krais—kaidehn en suweiki pein arail loalokong, ahpw suweiki sapwellime Mahsen.” E sansal me e sohte konehng ong Kristian mehlel akan en men aleir pwukoa kan pwen kaitarala pein ahn emen ineng en ahneki manaman pohn meteikan de wia aramas ndand. Sounapwalih aktikitik emen kin tamanda me ah pwukoa kan me e kin ahneki iei “doadoahk mwahu ehu,” ahpw kaidehn pwukoa laud ehu ong kapinga pein ih. (1 Timothy 3:1, 2) Elder oh Ministerial Servant koaros anahne en wia uwen me irail kak en papah meteikan ni lamalam aktikitik oh tiengla mwowe ong mehkan me kin pid papah Koht, oh wia mehn kahlemeng mwahu pwe aramas teikan pahn kak kahlemengih.​—1 Korint 9:19; Kalesia 5:13; 2 Timoty 4:5.

12. Mehnia peidek kan irail akan me kin men alehda pwais akan nan mwomwohdiso pahn kak idek pein irail?

¹² Irail brother kan me kin men ahneki pwais akan, pahn anahne pein idek rehrail peidek pwukat: ‘I kin rapahki ahnsou kan en papah mehteikan, de I men aramas teikan en papah ie? I kin perenki wia doadoahk kan ong sewese aramas teikan mendahki irail sohte pahn kilang?’ Karasepe ieu, ohl pwulopwul emen mwein kin perenki wia padahk kan nan mwomwohdiso en Kristian, ahpw e sohte kin perenki sewese irail me mah kan. De mwein e kin perenki mih rehn ohl akan me kin ahneki pwukoa nan mwomwohdiso ahpw e sohte kin perenki iang doadoahk en kalohk. Soangen ohl pwulopwul duwehte met kak pein idek reh peidek pwukat: ‘I kin pilida wia doadoahk kan en papah Koht, ahpw ihte ma e pahn wahdohng pein ie kaping sang rehn aramas teikan? I kin nantihong en wia doadoahk pwe aramas teikan pahn kak kilang ie?’ Ma kitail kin rapahki pein atail kaping kan, met wehwehki me kitail sohte kin kahlemengih Krais.​—Sohn 5:41.

13. (a) Iaduwen mehn kahlemeng mwahu en sounapwalih emen pahn kak kamwekid meteikan? (b) Ong Kristian akan, dahme kahrehda kasalehda lamalam aktikitik kaidehn pilipil ieu?

¹³ Ni ahnsou me kitail kin nantiong en kahlemengih lamalam aktikitik me Krais kin kasalehda, met kin kamwekid kitail en papah meteikan. Medemedewe duwen mehn kahlemeng mwahu en Sounapwalih men me kin tehk doadoahk kan en ehu Branch Ohpis en Sounkadehdehn Siohwa. Edetehn e inenen kedirepw oh ahneki pwukoa laud, sounapwalih menet kin uhdi sang ah doadoahk oh sewese brother pwulopwul emen me kin apwaliki doadoahngki misihn en wiahda makisihn kan. Brother pwulopwul menet tamanda, “I inenen pwuriamwei!” Pwe e padahkiong ie me e pil kin doadoahngki soahngen misihn ni ahnsou me e pwulopwul doadoahk nan Bethel, oh e tamanda me e pil kin apwaliki doadoahngki misihno. Edetehn e anahne wia doadoahk kesempwal teikan, e sewese ie en wia misihn ni ahnsou werei. Met kin inenen kamwekid ie.” Brother pwulopwul menet lalaudla oh ni ahnsouwet e wiahla sounapwalih men nan ehu Branch Ohpis en Sounkadehdehn Siohwa kan, oh e tamatamante lamalam en aktikitik me brothero kasalehda. Kitail en dehr lemeleme me kitail lapalap de kesempwal, ahpw kitail pil kak wia doadoahk tikitik kan. Kitail anahne en ahneki “lamalam en aktikitik.” Oh met kaidehn pilipil ieu. Met iei kisehn “aramas kapw” me Kristian akan anahne en kasalehda.​—Pilipai 2:3; Kolose 3:10, 12; Rom 12:16.

Iaduwen Kitail kak Alehda Madamadau en Krais Me Pid Irairen Lapalap

14. Iaduwen sang ni atail kin doudouloale duwen nanpwungen kitail oh Koht oh iengatail kan pahn kak sewese kitail en kakairada madamadau pwung ong irairen lapalap?

¹⁴ Iaduwen kitail kak alehda madamadau pwung ong lapalap? Ehu ahl kitail kak wia met, ma kitail pahn doudouloale duwen nanpwungen kitail oh Siohwa Koht. Sapwellime kaunda, manaman, oh erpit kin inenen siksang aramas akan. (Aiseia 40:22) Doudouloale duwen nanpwungen kitail oh iengatail kan kin pil sewese kitail en kakairada lamalam aktikitik. Karasepe ieu, mwein kitail kin koahiek sang meteikan ong ni ekei wiewia kan, ahpw mwein irail kin koahiek sang kitail ni irairen mour me kesempwal sang, de riatail brother Kristian kan mwein kin kasalehda ekei irair en Kristian kan me kitail sohte kin kasalehda. Ni mehlel, tohto me kin kesempwal mwohn silangin Koht sohte kin sansal mwohn mehteikan pwehki irail kin aktikitik.​—Lepin Padahk 3:34; Seims 4:6.

15. Iaduewn lelepek me sapwellimen Koht aramas akan kin kasalehda me sohte aramas emen me pahn kak lemehda me ih mwahu sang meteikan?

¹⁵ Sounkadehdehn Siohwa kan kin lelong kalokolok kan pwehki ahr pwoson, oh met kin kasalehda duwen met. Pak tohto, irail kan me sampah wet kin mwamwahleki kin kolokolte arail pwoson Koht edetehn irail kin lelong kalokolok laud kan. Doudouloale duwen mehn kahlemeng mwahu pwukat pahn kak sewese kitail en ‘dehr medemedewe me kumwail me lapalap.’​—Rom 12:3.b

16. Iaduwen koaros nan mwomwohdiso kak alasang Sises ni arail kin nantiong en kasalehda irairen lapalap ni ahl me konehng?

¹⁶ Kristian koaros, pwulopwul oh mah, anahne en kakairada nan loalarail kan madamadau en Krais me pid lapalap. Nan mwomwohdiso, soangsoangen doadoahk tohto mie. Dehr nsensuwed ni ahnsou me emen idek rehmw en wia doadoahk kan me mwomwen sohte kesempwal. (1 Samuel 25:41; 2 Nanmwarki 3:11) Pahpa oh nohno kan, kumwail kin kangoange noumwail seri kan oh mwahnakapw oh peinakapw kan en perenki wia doadoahk me kohwong irail en wia, sohte lipilipil nan Kingdom Hall de wasahn kapokon? Irail kin kilang kumwail kin pil iang wia doadoahk sohte kesempwal kan? Emen brother me kin doadoahk nan poahsoan kaun en Sounkadehdehn Siohwa kan, kin tamanda kahlemeng mwahu en ah pahpa oh nohno. E koasoai: “Ara madamadau ong kamwakel Kingdom Hall de wasahn kapokon kin kasalehiong ie me ira kin kesempwaliki doadoahko. Ira kin kalapw pein toukihda ara ahnsou en wia doadoahk kan me kin sewese mwomwohdiso de pirien en brother kan ni pali ngehn, edetehn doadoahko me mwomwen tikitik. Madamadau wet kin sewese ie en pil perenki wia sohte lipilipil doadoahk ieu me kohwong ie en wia nan Bethel.”

17. Ni ahl dah kei me irail lih aktikitik kan kak sewese mwomwohdiso?

¹⁷ Esther, me wiahla nanmwarki lih nan wehin Persia nan senturi kalimau B.C.E., oh e wia mehn kahlemeng mwahu ong emen me kin nsenohki anahn en meteikan mwohn pein ah. Mendahki e kin koukousoan nan tehnpas ehu, e perenki kapwaiada kupwuren Koht ni ah kin mweidong pein ah mour en mihla nan keper ieu pwen doarehla sapwellimen Koht aramas akan. (Ester 1:5, 6; 4:14-16) Sohte lipilipil ma Kristian lih akan en rahnwet me semwehmwe de kepwehpwe, irail pil kak kasalehda soangen ngehnohte me Ester kasalehda ni ahr kin kangoange aramas pahtou kan, mwemweitla rehn me soumwahu kan, iang doadoahk en kalohk, oh utungada koasoandi en elder kan. Ia uwen kaperen oh sawas laud me sister aktikitik pwukat kak wia ong mwomwohdiso!

Kapai kan en Lapalap me Krais kin Kasalehda

18. Kapai dah kei kin kohsang atail kin kasalehda irairen lapalap me Krais kin kasalehda?

¹⁸ Ke pahn kak alehdi kapai tohto ma ke pahn kolokolete madamadau en Krais duwen lapalap. Papah mehteikan ni soh roporop pahn kak kahrehong uhk oh mehteikan en ahneki peren laud. (Wiewia 20:35) Ma ke pahn perenki oh ngoangki papah riomw kan ni pali ngehn, irail pil pahn poakohng uhk. (Wiewia 20:37) Ahpw keieu kesempwal, Siohwa kin kupwurki dahme ke kin wia ong sewese iengomw Kristian akan nin duwen meirong en kapinga Koht.​—Pilipai 2:17.

19. Dahme kitail anahne nantiong en wia me kin pid madamadau en Krais ong irairen lapalap?

¹⁹ Emen emen kitail anahne en kasawih pein atail mohngiong oh idek pein kitail: ‘I pahn koasoite duwen kakairada madamadau en Krais me pid lapalap, de I pahn nantiong en kapwaiada?’ Kupwuren Siohwa ong aramas aklapalap kan kin inenen sansal. (Lepin Padahk 16:5; 1 Piter 5:5) Eri, atail wiewia kan kak kasalehda me kitail kin perenki kasalehda madamadau en Krais me pid lapalap, sohte lipilipil ma nan mwomwohdiso en Kristian, atail peneinei, de atail wiewia kan ong iengatail kan ni ehu ehu rahn—kitail wia mehkoaros ong ni kalinganpen Koht.​—1 Korint 10:31.

[Footnotes]

Ke Kak Kawehwe?

• Dahme kahrehda kitail en dehr ahneki madamadau en sampah wet me kin pid lapalap?

• Ia madamadau en Sises me pid lapalap?

• Iaduwen sounapwalih kan kak kahlemengih Krais ni ah kin kasalehda lamalam aktikitik?

• Dahme pahn kak sewese kitail en ahneki madamadau en Krais me pid lapalap?

[Kawehwehpen kilel kan nan ehu ehu pali 30]

Ihs me Kin Kasalehda Madamadau en Krais Duwen Irairen Lapalap?

Emen me mwahuki aramas teikan en papah ih de emen me men papah mehteikan?

Emen me kin mwahuki aramas teikan en kapinga ih de emen me kin perenki wia doadoahk kan me aramas teikan sohte kin mwadang kilang?

Emen me kin kapinga pein ih de emen me kin kapinga meteikan?

[Kawehwehpen kilel kan nan ehu ehu pali 27]

Lapalahn dikedik en Parao Amenhotep III

[Kawehwehpen kilel kan nan ehu ehu pali 28]

Ke ese dahme kahrehda Aman pwupwudi?

[Kawehwehpen kilel kan nan ehu ehu pali 29]

Ke kin rapahki ahnsou kan pwehn papah meteikan?